KAROA 17
“Lau be Iehova Ena Hesiai Kekenina!”
1, 2. (a) Maria be tau ta amo dahaka hanamoa hereva ia abia? (b) Maria be dahaka abia hidi do ia karaia?
MARIA ia itaia vadivadi tauna ta be ena ruma lalonai ia vareai neganai, ia hoa bada. Unai tauna be Maria ena tamana eiava sinana totona ia henanadai lasi. To Maria itaia totona ia mai! Maria ia diba ia be amo ia mai lasi. Nasareta be hanua maragina dainai, momo idia diba daidia be vadivadi taudia. Unai tauna ena toana be idau momokani. Maria dekenai hereva idauna ta ia gwauraia, ia gwau: “Maino be oi dekenai, Dirava ese ia lalonamo henia kekenina e, Iehova be oi ida ia noho.”—Luka 1:26-28 duahia.
2 Baibel ese ia hahedinaraia Maria be Heli ena natuna kekeni, ia be Galilea ena taoni Nasareta amo. Baibel ese Maria ia herevalaia negana ginigunana be, mai anina bada abia hidi ta do ia karaia. Maria be kapenta tauna Iosepa ida ia maoheni, ia be taga tauna lasi to abidadama tauna. Unai dainai Maria ia laloa ena mauri do ia namo, ena adavana Iosepa do ia durua bona edia famili do idia naria hebou. To, hari vadivadi tauna ta ese ia hamaoroa Dirava amo asainmen ta ia abia, bona unai ese ena mauri do ia haidaua.
3, 4. Maria ita diba namonamo totona, dahaka gaudia ita dadaraia be namo, bona dahaka gaudia ita laloa be namo?
3 Taunimanima momo idia hoa, badina Baibel ai Maria ena sivarai be momo lasi. Iena mauri dalana, ena kara, bona ena toana ia herevalaia momo lasi. To, Baibel ese Maria totona ia gwauraia gaudia amo gau momo ita dibaia diba.
4 Maria ita diba namonamo totona, tomadiho idauidau ese idia gwauraia lalohadai idauidau ita dadaraia be namo. Hegeregere Maria ena laulau idia penia bona idia koroa gaudia bona edia hahediba herevadia bona idia atoa ladadia hegeregere, “Dirava Ena Sinana” bona “Guba Ena Kwini” ita laloa lasi. To Baibel ese ia herevalaia gaudia ita laloa be namo. Unai amo Maria ena abidadama bona ia ita tohotohoa dalana ita dibaia.
Aneru ta ese Ia Vadivadi Henia
5. (a) Gabriela ena hanamoa hereva dainai Maria ena kara amo dahaka ita dibaia? (b) Dahaka mai anina bada gauna be Maria amo ita dibaia?
5 Maria be taunimanima korikorina ese ia vadivadi henia lasi. To unai be aneru Gabriela. Maria dekenai “Dirava ese ia lalonamo henia kekenina” ia gwauraia neganai, Maria be unai hanamoa hereva dainai “ia laloa momo.” (Luka 1:29) Maria be daika ese ia lalonamo henia? Maria ia laloa lasi ia be taunimanima amo hanamoa hereva do ia abia. To, aneru ese ia hahedinaraia ia be Iehova ese ia lalonamo henia. Maria ese unai ia laloa bada, to ia hekokoroku lasi. Maria ena haheitalai ese ita ia durua ita gaukara goada Dirava ena lalonamo ita abia totona, to namo lasi ita hekokoroku. Dirava ese hekokoroku taudia ia inai henia, to manau taudia ia lalokau henia bona durua.—Iam. 4:6.
Ena be Maria be Dirava ena lalonamo ia abia, to ia hekokoroku lasi
6. Aneru ese Maria dekenai dahaka asainmen badana ia henia?
6 Aneru ese Maria dekenai asainmen badana ia henia neganai, Maria be manau karana ia hahedinaraia be namo. Aneru ia gwau Maria ese natuna ta do ia havaraia bona taunimanima ibounai dekenai unai natuna be mai anina bada. Gabriela ia gwau: “Iehova Dirava ese ia dekenai ena tamana Davida ena terona do ia henia, bona Iakobo ena bese do ia lohiaia ela bona hanaihanai, bona ena Basileia be do ia doko lasi.” (Luka 1:32, 33) Maria ia diba lagani tausen mai kahana gunanai Dirava ese Davida dekenai ia gwauhamata, iena bese amo ta be do ia lohia ela bona hanaihanai. (2 Sam. 7:12, 13) Unai dainai Maria ena natuna be Mesia ai do ia lao, lagani handred momo lalonai Dirava ena taunimanima ese idia naria noho tauna unai!
Aneru Gabriela ese Maria dekenai asainmen badana ia henia
7. (a) Maria ena henanadai amo dahaka ita dibaia? (b) Hari inai negai, matamata taudia be Maria amo dahaka idia dibaia diba?
7 Danu aneru ese Maria ia hamaoroa ena natuna mero “do idia gwauraia Ataiai Momokani Diravana ena Natuna.” Edena bamona tanobada hahine ta be Dirava ena Natuna do ia havaraia? Edena bamona Maria be natuna ta do ia havaraia? Ia be Iosepa ida ia maoheni to idia do headava lasi. Maria be mai manau ida ia henanadai, ia gwau: “Unai be edena bamona do ia vara, badina lau be tau ta ida lau mahuta hebou lasi?” (Luka 1:34) Maria be unai hereva ia gwauraia neganai ia hemarai lasi. To, ena kara goeva ia laloa bada. Hari inai negai, matamata taudia momo be karaharaga mahuta hebou karana idia karaia bona kara goeva idia badinaia matamata taudia idia kirikirilaia. Tanobada mauri be ia idau momokani. To, Iehova be ia idau lasi. (Mal. 3:6) Maria ena nega hegeregerena, Iehova be ena taravatu idia badinaia taudia ia laloa bada.—Heberu 13:4 duahia.
8. Edena dala ai goevadae lasi hahine Maria be goevadae natuna do ia havaraia?
8 Ena be Maria be Dirava ena abidadama hesiai hahinena, to ia be goevadae lasi. Edena dala ai ia ese Dirava ena Natuna goevadaena do ia havaraia diba? Gabriela ia gwau: “Lauma helaga be oi latanai do ia diho, bona Ataiai Momokani Diravana ena siahu ese oi do ia koua. Bona unai dainai, ia vara natuna be do idia gwauraia helaga, Dirava ena Natuna.” (Luka 1:35) Vaia taunimanima be goevadae lasi dainai, idia havaraia natudia danu be goevadae lasi. To, Iehova be hoa karana ta ia karaia. Ia ese iena Natuna ena mauri be guba amo ia abia bona Maria ena bogana ai ia atoa. Bena ena gaukara siahuna o lauma helaga amo Maria “ia koua,” unai amo natuna dekenai kara dika ia hanaia lasi. Maria be aneru ena gwauhamata ia abia dae, a? Maria be dahaka ia gwau?
Maria be Gabriela Dekenai Dahaka Ia Gwau?
9. (a) Dahaka dainai Maria ena sivarai idia abia dae lasi taudia edia lalohadai be kerere? (b) Edena dala ai Gabriela ese Maria ena abidadama ia hagoadaia?
9 Baibel ena hereva idia abia dae lasi taudia, bona Kerisendom ena diba bada taudia haida be Maria ena sivarai dekenai idia daradara, badina idia laloa rami-hebou kekeni be natuna do ia havaraia lasi. Ena be idia be sikuli bada taudia, to ia auka hereva momokanina idia lalopararalaia totona. Gabriela ena hereva hegeregerena, “Dirava ese ia gwauraia hereva ibounai be do idia guguru.” (Luka 1:37) Maria ia abia dae Gabriela ena hereva be momokani, badina ia be abidadama goada kekenina. To ena abidadama be mai ena badina. Maria be laloa maoromaoro taudia hegeregerena, ia ura hamomokania ia abidadama henia gaudia be momokani. Unai dainai Gabriela ese hamomokania gaudia ma haida ia hahedinaraia. Ia ese Maria dekenai ena varavara Elisabeta ia herevalaia, ia be buruka bona gabani. To Dirava ena hoa karana dainai Elisabeta be natuna ta do ia abia!
10. Dahaka dainai ita gwau lasi, Maria be unai hahenamo ia abia dainai do ia gari lasi eiava nega aukadia ia davaria lasi?
10 Maria be dahaka do ia karaia? Ia be asainmen ta ia abia bona ia diba Gabriela ese ia gwauraia gaudia ibounai be Dirava ese do ia hagugurua. To namo lasi ita gwau, Maria be unai hahenamo ia abia dainai do ia gari lasi eiava nega aukadia ia davaria lasi. Ia be Iosepa ida ia maoheni dainai, inai do ia laloa; Bema Iosepa ia diba Maria be ia rogorogo, do idia headava, a? Bona gau ma ta danu be ia be asainmen badana ia abia. Maria be Dirava ena lalokau Natuna do ia havaraia, Dirava ese ia havaraia gaudia ibounai amo unai Natuna ia laloa bada! Iesu be beibi dainai Maria ese ia naria namonamo be namo, bona tanobada dikana amo ia do ia gimaia. Unai be gaukara badana!
11, 12. (a) Nega haida abidadama goada taudia be Dirava amo asainmen badana idia abia neganai, edena bamona idia kara? (b) Maria ese Gabriela dekenai ia henia haere amo dahaka ita dibaia?
11 Baibel ia hahedinaraia nega haida, abidadama goada taudia be Dirava ese ia henia asainmen badana idia ura lasi abia dae. Mose ia gwau ia be hereva namonamo lasi tauna dainai ia auka Dirava ena hereva gwauraia tauna ai ia lao totona. (Eso. 4:10) Ieremia ese Dirava amo ia mai asainmen ia abia dae lasi badina ia laloa ia be “mero matamata sibona.” (Ier. 1:6) Bona Iona be ena asainmen amo ia heau! (Iona 1:3) Maria be edena bamona?
12 Taunimanima momo idia diba Maria ena hereva ese manau bona kamonai karana ia hahedinaraia. Gabriela dekenai ia gwau: “Lau be Iehova ena hesiai kekenina! Mani emu hereva hegeregerena lau dekenai do ia vara.” (Luka 1:38) Hesiai kekeni be iena biaguna kamonai henia bona ia henia gaukara sibona ia karaia. Maria be unai bamona ia laloa, Iehova be iena Biaguna. Maria ia diba Iehova ese ia ia gimaia, badina ia idia badinaia taudia ia rakatania lasi, bona Dirava ese do ia hanamoa bema ia hekwarahi ena asainmen badana ia huaia totona.—Sal. 18:25.
Maria ia diba Iehova Dirava ese ia ia gimaia, badina ia idia badinaia taudia ia rakatania lasi
13. Bema Dirava amo ita abia asainmen be ia auka, edena dala ai Maria ena haheitalai ese ita ia durua diba?
13 Nega haida ita laloa Dirava amo ita abia asainmen be ia auka ita karaia totona. To, Dirava ese Baibel amo ia ita trast henia momokani ena badina idauidau ia hadibaia, Maria ia karaia bamona. (Aon. 3:5, 6) Ita be Iehova do ita trast henia, a? Bema unai ita karaia, ia ese ita do ia hanamoa, unai amo do ita diba iseda abidadama ita hagoadaia be mai ena badina.
Maria be Elisabeta Ia Vadivadi Henia
14, 15. (a) Maria be Elisabeta bona Sekaraia ia vadivadi henia neganai, Iehova ese edena dala ai ia hanamoa? (b) Luka 1:46-55 ai, Maria ena hereva ese dahaka ia hahedinaraia?
14 Gabriela ese Maria dekenai Elisabeta ena sivarai ia gwauraia bona unai ese Maria ia hagoadaia. Maria ia diba, Elisabeta be ena hemami do ia lalopararalaia, badina idia ruaosi dekenai ia vara gauna be hegeregere. Maria be Iudea provinsi ena ororo momo gabuna ai ia noho siti ta dekenai ia lao haraga, reana unai be dina toi o foa ena daudau hegeregerena. Maria be Elisabeta bona hahelaga tauna Sekaraia edia ruma dekenai ia vareai neganai, Iehova ese ena abidadama hagoadaia totona hamomokania gauna ta ia hahedinaraia. Elisabeta ese Maria ena hanamoa hereva ia kamonai neganai, ena bogana lalonai ia noho beibi be mai moale bada ida ia marere. Elisabeta be lauma helaga amo ia honu bona Maria dekenai ia gwau: “Egu Lohiabada ena sinana.” Dirava ese Elisabeta dekenai ia hahedinaraia Maria ena natuna be ena Lohiabada ai do ia lao, Mesia unai. Danu Maria ena abidadama karana dainai ia hanamoa, ia gwau: “Oi abidadama dainai oi danu oi moale.” (Luka 1:39-45) Oibe, Iehova ese Maria dekenai ia gwauhamata gaudia ibounai do idia guguru!
Maria bona Elisabeta edia hetura karana be hahenamo ta
15 Bena Maria ia hereva. Iena hereva be Baibel dekenai ia noho. (Luka 1:46-55 duahia.) Unai be Maria ese ia gwauraia hereva latana, bona unai ese ena kara ia hahedinaraia. Unai hereva amo iena tanikiu karana ia hahedinaraia, badina Iehova ese ia dekenai hahenamo ia henia Mesia ena sinana ai ia lao totona, unai dainai Iehova ia hanamoa. Bona Iehova ese hekokoroku bona siahu taudia ia kokia bona ia idia hesiai henia ladana maragi bona ogogami taudia ia durua karana ia herevalaia neganai, ena abidadama goadana ia hahedinaraia. Danu ena diba ena bada ia hahedinaraia. Unai siri lalonai, ia ese nega 20 bamona ena hereva be Heberu Toretore amo ia gwauraia!a
16, 17. (a) Maria bona gabeai ia havaraia natuna ese dahaka kara namona idia hahedinaraia ita tohotohoa totona? (b) Maria be Elisabeta ia vadivadi henia karana amo dahaka ita dibaia?
16 Momokani, Maria be Dirava ena Hereva ia laloa dobu. Badina ena hereva lalonai manau karana ia hahedinaraia, Toretore Helagadia ia gaukaralaia, bona ia sibona ena lalohadai ia gwauraia lasi. Iena bogana ai ia noho natuna be gabeai unai bamona manau karana ia hahedinaraia danu, ia gwau: “Lau hadibaia gaudia be lau amo lasi, to lau ia siaia tauna amo.” (Ioa. 7:16) Namona be sibona dekenai ita henanadai: ‘Lau ese Dirava ena Hereva lau matauraia bona laloa bada, a? O sibona egu lalohadai bona diba lau gwauraia, a?’ Maria be lalohadai maorona ia abia.
17 Maria be Elisabeta ida hua toi bamona ia noho, bona idia hagoadaia heheni. (Luka 1:56) Unai Baibel ena sivarai ese ita ia hadibaia hetura karana be hahenamo ta. Bema Iehova Dirava idia lalokau henia taudia ita tura henia, ita diba iseda abidadama bona hetura karana Iehova ida do ia goada. (Aon. 13:20) Bena, Maria be ena hanua dekenai do ia giroa lou negana ia ginidae. Iosepa be dahaka do ia gwau, bema ia diba Maria be ia rogorogo?
Maria Bona Iosepa
18. Maria be Iosepa dekenai dahaka ia hadibaia, bona Iosepa be dahaka ia karaia?
18 Maria ia ura lasi ia naria ela bona taunimanima idia itaia ia be mai ena bogana, bena Iosepa do ia hadibaia. Unai dainai Iosepa ia hereva henia guna. Reana ia laloa bema Dirava gari henia tauna Iosepa dekenai unai ia herevalaia, ia be dahaka do ia karaia? To, Iosepa dekenai ia lao bona idia vara gaudia ibounai ia herevalaia. Mani oi laloa, reana Iosepa be ia lalohekwarahi bada. Iosepa ia ura ia lalokau henia kekeni ena hereva ia abia dae, to toana be Iosepa ia laloa ia ia koia. Baibel be Iosepa ese ia abia lalohadai o hemami ia gwauraia lasi. To Baibel ia gwau, ia ura Maria do ia divos badina unai nega ai, maoheni taudia be headava taudia bamona idia laloa. To, Iosepa ia ura lasi taunimanima vairanai Maria do ia hahemaraia, unai dainai ia ura hunia dalanai Maria ida do ia divos. (Mat. 1:18, 19) Maria ia itaia Iosepa be ia lalohekwarahi bada neganai, ia danu ia lalohisihisi. To, Maria be Iosepa ia bleim lasi.
19. Edena dala ai Iehova ese Iosepa ia durua abia hidi maorona ia karaia totona?
19 Iehova ese Iosepa ia durua abia hidi maorona ia karaia totona. Nihi ta lalonai, Dirava ena aneru ese Iosepa ia hamaoroa Maria ena rogorogo be Dirava ena hoa karana ta. Unai ese Iosepa ena lalona ia hanamoa! Hari Iosepa danu be Iehova ena ura do ia badinaia Maria hegeregerena. Ia be Maria ia adavaia, bona Iehova ena Natuna ia naria ena maduna badana totona ia hegaegae.—Mat. 1:20-24.
20, 21. Headava taudia bona headava idia laloa noho taudia be Maria bona Iosepa amo dahaka idia dibaia?
20 Headava taudia bona headava idia laloa noho taudia be lagani 2,000 gunanai idia noho headava tau bona hahine amo diba idia abia be namo. Iosepa ia itaia iena adavana be ena maduna bona natuna naria ena maduna ia hagugurua neganai, ia moale badina Iehova ena aneru ena hereva ia badinaia. Iosepa ia laloparara abia hidi badana ia karaia totona Iehova dekenai ia tabekau be mai anina bada. (Sal. 37:5; Aon. 18:13) Iosepa be ruma bese kwarana dainai, ia laloa namonamo bona mai kara namo ida ruma bese totona abia hidi ia karaia.
21 Danu, Maria be mai ura ida Iosepa ia adavaia karana amo dahaka ita dibaia? Ena be matamanai Iosepa ese Maria ena sivarai ia kamonai neganai ia auka unai ia lalopararalaia totona, to Maria be Iosepa ena disisen totona ia naria badina Iosepa be ruma bese ena kwarana ai do ia lao. Unai be Maria dekenai leseni namona, hari Keristani hahinedia totona danu. Bona Iosepa bona Maria be idia dekenai idia vara gaudia amo idia diba kara momokani bona herevahereva namonamo karana be mai anina bada.—Aonega Herevadia 15:22 duahia.
22. Dahaka ese Iosepa bona Maria edia headava ia durua bona dahaka maduna badana idia abia?
22 Unai headava matamata taudia, Iosepa bona Maria be Iehova idia lalokau henia bona idia ura tama sina namodia ai idia lao, unai amo Iehova do idia hamoalea. Momokani, hahenamo idauidau do idia abia, bona hekwakwanai idauidau danu do idia davaria. Edia maduna be Iesu do idia naria, ia be tanobada ai tau hereadaena ai do ia lao.
a Unai Heberu Toretore amo Maria ese abidadama hahine Hana ena hereva ia gwauraia. Iehova ese Hana ia hanamoa bona ia dekenai natuna ta ia henia danu.—Karoa 6 ena maua ladana “Guriguri Idau Herea Rua” itaia.