Brooklyn Betele—Lagani 100 Ia Abia
LAGANI 1909 be lagani badana New York City totona. Unai lagani ai, Queensboro Bridge bona Manhattan Bridge idia kehoa. Anina be taunimanima be Queens amo Manhattan dekenai idia lao diba, bona Manhattan amo Brooklyn dekenai idia lao diba.
Lagani 1909 be lagani badana danu Iehova ena Witnes taudia totona. Lagani haida gunanai, Charles Taze Russell, (Iehova ena Witnes taudia edia koporeisen ladana Watch Tower Bible and Tract Society ena presiden) ia laloa Dirava ena Basileia ena sivarai namona harorolaia gaukarana idia habadaia be namo. (Mataio 24:14) Ia laloa bema Society ena hedikwota be Pittsburgh, Pennsylvania amo idia kokia bona Brooklyn, New York dekenai idia haginia, unai ese edia haroro gaukara do ia habadaia momokani. Lagani 1908 ai Pittsburgh rakatania totona idia hegaegae, bena lagani 1909 ai Brooklyn dekenai idia hanaia lao.
Dahaka Dainai Brooklyn Dekenai Idia Lao?
Unai nega ai, haroro gaukara idia gunalaia taudia idia laloparara, Baibel ena hereva momokani be taunimanima momo ese idia dibaia totona, niuspepa lalonai haroro herevana idia halasia be dala namona ta. Lagani 1908 ai, Russell ena haroro herevadia be wiki ta ta ai niuspepa 11 ese idia halasia bona unai niuspepa ena kopi 402,000 idia printaia.
To, Russell ia gwau: “Niuspepa gaukara idia manadalaia tadikaka haida . . . be ai idia hamaoroa bema wiki ta ta ena haroro herevadia be [siti badana ta] amo idia halasia, United States taudia momo ese unai hereva idia duahia diba, bona idia gwau reana lagani tamona lalonai niuspepa momo herea ese hanaihanai unai hereva do idia halasia.” Unai dainai, haroro gaukara habadaia totona, gabu namona ta idia tahua matamaia.
Dahaka dainai Brooklyn idia abia hidi? Russell ia gwau: “Ai guriguri murinai, ai ibounai ai laloa Brooklyn, N.Y., taunimanima momo idia noho gabuna . . . be gabu namona iseda gogoa gaukarana ita karaia totona, bona ia be ‘dubu idauidau edia siti.’ ” Gabeai, idia vara gaudia ese idia hamomokania Brooklyn be gabu maorona. Nega kwadogina lalonai, Russell ena haroro herevana be niuspepa 2,000 ese idia halasia.
To, badina namona ma ta dainai New York siti be gabu maorona. Lagani 1909 ai, Watch Tower Society ese Great Britain, Germany, Australia bona gabu ma haida dekenai brens opesi idia haginia danu. Unai dainai, Iehova ena Witnes taudia edia hedikwota be davara badinai bona motuka bona trein daladia momo gabunai idia haginia be maoro.
Dahaka Dainai Idia Gwauraia Betele?
Lagani 1880 lalodiai, Watch Tower Bible and Tract Society ena hedikwota ginigunana be Allegheny (hari idia gwauraia Pittsburgh), Pennsylvania dekenai idia haginia. Unai nega ai ena ladana idia gwauraia Bible House. Lagani 1896 ai, unai ruma dekenai idia noho gaukara taudia be 12.
Lagani 1909 ai Brooklyn dekenai idia lao murinai, unuseniai idia gaukara taudia edia noho ruma matamatana ena ladana idia gwauraia Betele.a Dahaka dainai unai ruma ena ladana idia gwauraia Betele? Watch Tower Society ese 13-17 Hicks Street dekenai ia noho ruma ta ia hoia. Unai ruma ena biaguna be dubu gunalaia tauna badana ta ladana Henry Ward Beecher bona ia ese unai ruma ena ladana ia gwauraia Beecher Bethel. Watch Tower Society ese guna Beecher ia noholaia rumana, 124 Columbia Heights dekenai ia hoia danu. The Watch Tower, March 1, 1909 gauna ia gwau: “Ita moale badina Beecher Bethel ita hoia, to Beecher ese guna ia noholaia rumana ita hoia danu be hoa gauna. . . . Iseda noho ruma matamatana ena ladana do ita gwauraia ‘Betele,’ bona iseda opesi bona hebou gabuna matamatana ena ladana do ita gwauraia ‘The Brooklyn Tabernacle,’ unai ladana ruaosi ese inai ladana ‘Bible House’ ena gabu do idia abia.”
Hari inai negai, Brooklyn, Wallkill bona Patterson dekenai idia haginia rumadia mai edia opesi, printa masini bona noho gabudia edia ladana idia gwauraia, Betele. Tanobada hegegemadai ai, tano 113 lalonai be unai Betele rumadia idia noho. Unuseniai idia gaukara taudia 19,000 mai kahana ese Baibel ena sivarai namona harorolaia gaukarana idia durua.
Vadivadi Taudia Ai Welkam Henia
Betele be January 31, 1909 ai idia hahelagaia. Monday, September 6, 1909 be Betele vadivadi henia dinana. Unai nega lalonai, Bible Student taudia (unai neganai Iehova ena Witnes taudia be unai bamona idia gwauraidia) momo herea be Betele idia vadivadi henia. Idia momo be Saratoga Springs (ena daudau New York City amo be 320 kilomita bamona) dekenai idia karaia Keristani hebouhebou badana ta amo idia mai. Charles Taze Russell ese unai taudia ia welkam henia bona idia ida ia herevahereva.b
Hari danu, taunimanima be Betele idia vadivadi henia diba. Lagani ta ta lalonai, taunimanima 40,000 mai kahana be Brooklyn Betele idia vadivadi henia. Hari inai nega ai, Brooklyn Betele taudia be idia gaukara goadagoada Iehova ena Basileia ena sivarai namona harorolaia gaukarana idia habadaia totona, bona unai ese taunimanima milioni momo dekenai namo bada ia havaraia noho.
[Footnotes]
a Heberu gado herevana idia hahanaia “Betele” anina be “Dirava Ena Ruma.” Baibel lalonai, Betele be Israela taudia edia hanua badana ta. To, Baibel ese Ierusalema hanua sibona ia gwauraia momo.
b Sivarai ma haida oi diba totona, Jehovah’s Witnesses—Proclaimers of God’s Kingdom, rau 718-723 oi itaia, ia be Iehova ena Witnes taudia ese idia karaia.
[Box/Pictures on page 25]
Watch Tower Bible and Tract Society Oi Diba, A?
Hari inai negai idia gwauraia Watch Tower Bible and Tract Society of Pennsylvania ena koporeisen be lagani 1884 ai idia haginia. Unai nega ai ena ladana idia gwauraia Zion’s Watch Tower Tract Society. Unai koporeisen ena gaukara badana be Baibel ena hereva momokani idia gwauraia pepapepadia do ia printaia. Hari, tanobada hegegemadai Iehova ena Witnes taudia be gavamani ena taravatu hegeregerena, Watch Tower Bible and Tract Society ena siahu henunai idia gaukara noho.c—Filipi 1:7.
Watch Tower Bible and Tract Society ese Baibel bona Baibel idia herevalaia bukadia be gado 473 ai ia halasia. Watch Tower Society ese Baibel ladana New World Translation of the Holy Scriptures—ibounai o ena kahana—be gado 72 ai ia hahanaia bona kopi 150 milioni mai kahana ia halasia. Watch Tower Society ese New World Translation Baibel sibona ia printaia lasi, to Baibel ma haida ia printaia danu bona printa kampani ma haida dekenai moni ia henia Baibel ma haida idia printaia totona. Unai Baibel haida be: American Standard Version, The Bible in Living English, The Emphatic Diaglott, Holman’s Linear Parallel Edition, King James Version (Bible Students Edition gauna danu), bona The New Testament Newly Translated and Critically Emphasized, Second Edition gauna.
Iehova ena Witnes taudia be Baibel sibona idia printaia lasi, to idia hanaia lagani 10 lalonai, idia ese gau idauidau 20 billion mai kahana, hegeregere buka, magasin, pepapepa, CD, DVD, bona Baibel idia herevalaia gaudia ma haida idia karaia danu.d Argentina, Australia, Brazil, Britain, Canada, Colombia, Finland, Germany, India, Italy, Japan, Korea, Mexico, Myanmar, Nigeria, Philippines, South Africa, Spain, bona United States edia Betele rumadia dekenai unai gaudia idia karaia o printaia bona bouti amo tano idauidau dekenai idia siaia lao.
[Footnotes]
c Lagani 2008 ai, Iehova ena Witnes taudia tano 236 dekenai edia namba be 7,124,443 bona edia kongrigeisen ibounai be 103,267.
d Inai gaudia be idia hoihoilaia lasi. Iehova ena Witnes taudia ese idia karaia Baibel hadibaia gaukarana be taunimanima ta ta edia ura hegeregerena ai idia henia kontribusen monina amo idia durua.
[Chart]
1998-2008 IDIA HALASIA GAUDIA
Buka 458,230,708
Magasin 11,292,413,199
Pepapepa 7,996,906,376
Buklet 862,050,233
CD/MP3 34,621,130
DVD 13,500,125
Ma Haida 129,083,031
Ibounai 20,786,804,802
[Picture on page 22]
Betele Rumana 122-124 Columbia Heights
[Picture on page 22]
13-17 Hicks Street (1909-1918)
[Picture on page 22]
Russell ena niuspepa haroro herevadia
[Pictures on page 22, 23]
35 Myrtle Avenue (1920-1922)
[Picture on page 23]
18 Concord Street (1922-1927)
[Picture on page 23]
117 Adams Street (1927 ema bona hari)
[Picture on page 24]
25-30 Columbia Heights
[Pictures on page 24]
Wallkill printa rumana
[Picture on page 24]
Patterson Educational Center