2te Kheeniche

13 Eyer hot kesaat: “Keet un fint raus woo eyer is. Tan, tuun ich mëner xike fer tëm fange.” Xpeeter, hon se tëm kesaat: “Tee is in Totan.” 14 Klaych, hot te kheenich kayl, kriichs ween un een kroos militeer tat hin kexikt. Tii sin oomts khom un hon sich um ti xtat rom kextelt. 15 Wii te helfer fom man fom woere Kot frii uf kextii is un raus kang is, hot eyer een militeer mit kayl un kriichs ween um ti xtat rom kesiin. Klaych, hot te helfer fer Eliseu kesaat: “Oo mayn hër! Was tuun mer mache?” 16 Awer tee hot keantwort: “Tuu khee pang hon! Wayl tii woo mit uns sin, sin mee wii tii woo mit tëne sin.” 17 Tan, hot Eliseu aan kefang se peete, am saan: “Oo Yeehoowa, pite, mach tëm sayn aue uf tas tee siin khan.” Yeehoowa hot klaych te helfer sayn aue uf kemacht, un tee hot kesiin tas ti përich rechyoon waar fol kayl un kriichs ween aus fayer, um Eliseu rom. 18 Wii ti siiryer runer tsu Eliseu kang sin, hot eyer tsu Yeehoowa kepeet: “Pite, los tiise natsyoon plint.” Soo, hot Eyer tii plint kemacht soo wii Eliseu ferlangt hot. 19 Eliseu hot tan fer tëne kesaat: “Teyer sayt uf tëm ferkheert weech, un tas is net ti richtich xtat. Keet mich noo, un ich tuun aych tsu tëm man fiire woo teyer suuche tuut.” Awer tee hot se tsu Samaria kefiirt.