Yuuni

Yeehoowa hot ti eyerste kriste keseechent wii se sich aan kephast hon mit te ënerunge in sayn situatsyoon. Tii waare ofts keyacht, als mool wën se tas net kewaart hon. Kuk mool was mit Parnapë un te aphostel Phaul pasiirt is wii se in Listra kepreeticht hon. Am aanfang, hon ti layt se wilkhom un keheert. Awer xpeeter hon ti keechner “ti layt keeche Phaul [un Parnapë] kextelt”; etliche hon soo kaar Phaul mit xteen ferxmist un tëm kelos fer se xtërpe. (Aph. 14:19) Awer tii hon wayter uf anere pletse kepreeticht. Was fer waare ti resultaate? Tii hon “een kroos numer tisipele” kemacht un sayn wërter un payxpiil hon sayn priiter un xwestere ferxtërkt. (Aph. 14:21, 22) Fiile hon nutse kriit wayl Phaul un Parnapë net noo kelos hon se preetiche, opwool se keyacht waare. Meyer wëre aach keseechent wën mer net uf kepe ti aarwayt woo Yeehoowa uns kep hot. (w23.04 s. 16-17 ap. 13-14)

Torich sayn leepe, hat te kheenich Tawi fiile kefeerliche faynte un tee hot ofts Yeehoowa sayn hilef in kepeet ferlangt. Tawi waar sich sicher tas Yeehoowa sayn kepeete keheert un keantwort hot. Tuu khanst tich aach sicher too tefun sin! Ti Piipel lost es taytlich: Kot khan uns kluucheet un kraft fer aus hale kepe. Tee khan unser priiter un xwestere orer soo kaar tii woo tëm net hayt tiine penutse. Meyer wise tas Yeehoowa unser kepeete antworte tuut, opwool tas net imer is wii mer uns foer xtele. Tee tuut uns kepe kraat was mer prayche un in te xtun woo mer es prayche. Tes weeche tuu wayter mit klaape peete. Say tich sicher tas Yeehoowa tich uf phase tuut un, in te nay welt, tuut eyer “te wunx fon ales was lepeentich is [erfiile]”. (Psal. 145:16) (w23.05 s. 8 ap. 4; s. 13 ap. 17-18)

Es is kuut uns traan hale aan te nutse woo mer kriin wën mer unser tsiil trefe. Tsum payxpiil, wën tayn tsiil se tuun hot mit tayn Piipel leesung orer kepeete, tenk wii tas tayn fraayntxaft mit Yeehoowa ferxtërke tuut. (Psal. 145:18, 19) Wën tayn tsiil een kristlich kwaliteet ëntwikele is, tenk wii tas tayn fraayntxaft mit anere ferxtërke tuut. (Kol. 3:14) Fiilaycht khanst tuu een list mache mit al ti uersache warom tuu een tsiil trefe wilst. Tan tuu tiise list ofts noo kuke. Fertrayp aach tsayt mit layt woo tich uf muute tayn tsiil trefe. (Xpr. 13:20) Fer ti woerheet saan, meyer al hon taache woo uns ti muut feelt. Sole mer tan noo lose too traan xafe? Nee. Meyer khene uns aan xtrenge fer unser tsiil trefe soo kaar wën uns te wunx feelt. Sicher es is net laycht, awer ti resultaate loone sich. (w23.05 s. 27-28 ap. 5-8)

Wën mer ti responsapiliteet weeche unser ëntxlise aan nëme, tas khan uns uf muute unser sinte erkhëne, unser feeler korikiire un uf phase fer tas net noch mool mache. Tas tuut uns helfe im xpringe fom leepe plaype. Wëns tuu een xlecht ëntxlus kemacht host, erkhën tas tuu khanst net ënere was xon rom kang is. Ferliir net tayn tsayt orer kraft fer se pewayse tas tuu richtich waarst orer fer ti xult fer ti anere kepe. Xtats tas, erkhën tayn feeler un mach tayn pestes in tayn situatsyoon yets. Wëns tuu tich xultich xpiirst, peet tsu Yeehoowa mit teemuut, erkhën tayn feeler un ferlang tëm sayn fertsayung. (Psal. 25:11; 51:3, 4) Wëns tuu yemant wee kemacht host, tuu tich ëntxultiche un, wëns neetich is, suuch ti hilef fon te elteste. (Tya. 5:14, 15) Lërn fon tayn feeler un xtreng tich aan fer tas net noch mool mache. Soo khanst tuu tich sicher sin tas Yeehoowa parmhërtslich mit tich wërt un tas eyer tich helft. (Psal. 103:8-13) (w23.08 s. 28-29 ap. 8-9)

Yeoyata hot te kheenich Yeoas keholef een kuut persoon sin. Tes weeche, wii Yeoas yung waar, wolt eyer Yeehoowa kefale. Awer noo Yeoyata sayn toot, hot Yeoas ti aphostate prinse aan keheert. (2 Kro. 24:4, 17, 18) Opwool Yeehoowa aarich traurich kep is, hot eyer “wayter profeete kexikt fer tëne tsurik tsu tëm pringe (…), awer tii wolte net heere”. Noch net mool Sakarias, Yeoyata sayn soon, hon se aan keheert. Sakarias waar net ploos Yeehoowa sayn profeet un priister, awer Yeoas sayn primo. Noch soo, hot Yeoas kexikt Sakarias um pringe. (2 Kro. 22:11; 24:19-22) Yeoas hot net wayter tiif respekt tsu Yeehoowa ketsaycht. Yeehoowa hot kesaat: “Tii woo mich oone respekt pehantele, wëre oone respekt pehantelt.” (1 Sam. 2:30) Een tsayt xpeeter, hot een kleen siirix militeer Yeoas sayn “mechtich kroos militeer” ap kewun un Yeoas “xlim wee” kemacht. (2 Kro. 24:24, 25) Un Yeoas is fon sayn aychne tiiner um keprung kep weeche te toot fon Sakarias. (w23.06 s. 18 ap. 16-17)

Phaul hot een tsayt ti kuute notisye kepreeticht un in kelërnt in Ëfeso. (Aph. 19:1, 8-10; 20:20, 21) Tee hot sayn priiter fiil keliipt, un tee wolt se helfe troy tsu Yeehoowa plaype. Friier, waare se sklaawe fon te falxe relichyeese inlërnunge un awerklaape. Ti layt in Ëfeso hon xroo imoraaliteet pratikiirt un hon sich net kexeemt weeche sayn aanxtelung. Tii hon ofts iwer sëks kexproch in te teatros un soo kaar in relichyeese ewënte. (Ëfe. 5:3) Fiile fon te ëfeser ‘hon sich net kekhimert mit was richtich un ferkheert is’. In te orixinaal xprooch, hon tiise wërter petayt tas se “khee mee phayn kexpiirt hon”. (Ëfe. 4:17-19) Foer se lërne was richtich un ferkheert foer Yeehoowa sayn aue is, hot sayn kewise tëne net kexteert. Tes weeche, hot Phaul kexrip: “Sayn ferxtant is in tunkelheet un tii sin wayt wech fon tëm leepe woo tsu Kot keheert.” Awer etliche ëfeser hon ti tunkelheet kelos. (w24.03 s. 20 ap. 2, 4; s. 21 ap. 5-6)

Kiteoon must een kroos fiisix aanxtrengung mache fer wii een richter tiine. Ti mityaniiter waare oomts fom khampf am aus rayse. Kiteoon hot se noo kexprung fom taal fon Yesreël pis te Yortan flus. (Rich. 7:22) Awer Kiteoon hot net tat xtil kehal. Tee un sayn 300 mëner waare xon miit kewees, awer tii sin torich te Yortan flus kang un hon wayter ti mityaniiter noo kexprung. Tsum xlus, hon se tii ketrof un ap kewun. (Rich. 8:4-12) Kiteoon hot ketraut tas Yeehoowa tëm ferxtërke teet un Kot hot kraat tas kemacht. (Rich. 6:14, 34) Kiteoon un sayn mëner waare, tsu fuus, 2 mityaniitixe kheeniche am noo xpringe; awer tiise kheeniche waare tsiimlich sicher uf kamele am aus rayse! (Rich. 8:12, 21) Noch soo, mit Yeehoowa sayn hilef, hon ti israeliiter ti faynte kefang un te kriich ap kewun. Ti elteste khene aach uf Yeehoowa traue, wayl “tee wërt nii miit un sayn kraft wërt nii al”. Tee tuut ti elteste kraft kepe wën se tas prayche. (Isa. 40:28, 29) (w23.06 s. 6 ap. 14, 16)

Meyer khene een fest hërts hon — ekaal ti proope woo mer mit mache! Soo, trau uf Yeehoowa. Kuk mool wii Parak een kriich kewun hot wayl eyer uf Kot sayn oryentiirunge ketraut hot. In tëne tsayt, waar tas folek fon Israël net foerperayt fer se khëmpfe — noch net mool wafe hate se! Awer Yeehoowa hot Parak kexikt keeche te xëf Siisera un sayn kananitixe militeer khëmpfe, woo fiile wafe hate. (Rich. 5:8) Ti profeetin Tëpora hot fer Parak kesaat tas eyer solt fom përich runer keen un keeche Siisera un sayn 900 kriichs ween in te epnung khëmpfe. Awer tat es weyer aarich xlim fer ti israeliiter keeche ti xnel kriichs ween khëmpfe. Noch soo, hot Parak aan keheert. Wii ti soltaate fom përich Tapoor runer kang sin, hot Kot een xtarke reen fom himel kexikt. Weeche ti knatx, khonte Siisera sayn kriichs ween net foran faare un Yeehoowa hot ti kewinung fer Parak kep. (Rich. 4:1-7, 10, 13-16) Kraat soo tuut Yeehoowa uns ti “kewinung” kepe wën mer uf tëm un uf te oryentiirunge fon sayn Orkanisatsyoon traue. (w23.07 s. 19 ap. 17-18)

Soo wii ti troye tiiner fon te ferkangne yoore, mise mer ketultich uf Kot waarte pis eyer sayn ferxpreche erfiilt. (Hep. 6:11, 12) Ti Piipel ferklaycht uns mit een pauer. (Tya. 5:7, 8) Een pauer tuut fiil xafe fer sayn plantaaj seeye un kiise, awer tee wees net kenau wanee ti plantse wakse tuun. Soo tuut te pauer mit ketult waarte, mit te hofnung tas eyer ërnte tuut. Kraat soo, tuun mer fiil xafe fer Yeesus noo keen, opwool meyer “[wise] net in was fer taach te Hër khomt”. (Mat. 24:42) Meyer tuun ketultich waarte, mit te sicherheet tas, in te richtich tsayt, tuut Yeehoowa al sayn ferxpreche erfiile. Was khent pasiire wën mer ti ketult ferliire teete? Meyer khente leetich wëre wayl mer soo fiil waarte mise un uns lamsam fon te woerheet ap lenke. Meyer khente aach aan fange uns traan hale aan unser winxe un fersuuche tëne klaych erfiile. Awer wën mer ketultich sin, khene mer pis tas ën aus hale un keret sin. (Mik. 7:7) (w23.08 s. 21 ap. 7)

Wën mer ti profetsii in Tanyël 2:41-43 mit anere profetsiie ferklayche woo in te piicher Tanyël un Apokalipsis xteen, ferxteen mer tas ti fiis representiire ti welt rechiirung fon Kroos Pritaanya un Nort Amërika. Tas is ti xtarkst welt rechiirung fon unser tsayt. Tanyël saat too triwer: “Tas raych [wërt] halpe xtark un halpe xwach.” Warom is tas halpe xwach? Wayl ti keweenliche layt — es wil saan, tas leet — lose net ti rechiirung sich kreftich wii ayse aan xtele. Meyer khene fiile woerheete lërne mit te xtaatue woo Tanyël pexrip hot. Eyerst: ti welt rechiirung fon Kroos Pritaanya un Nort Amërika hot xon ketsaycht wii xtark se is. Tsum payxpiil: ti Fereenichte Xtaate fon Amërika un ti Kroos Pritaanya waare tswixich ti natsyoone woo te 1^te un te 2^te Welt Kriich kewun hon. Awer tiise welt rechiirung wërt yeete taach xweecher, wayl ti layt khëmpfe eene keeche ti anere un keeche ti rechiirung. Tsweet: tas is ti letst welt rechiirung woo foer khomt eep Kot sayn Raych al ti mënxliche rechiirunge fernicht. (w23.08 s. 10-11 ap. 12-13)

Als mool, is Tawi oone muut kep weeche al ti propleeme woo eyer mit kemacht hot. (Psal. 18:4, 5) Awer Yeehoowa sayn liip hot tëm nay kraft kep. Yeehoowa hot sayn fraaynt woo miit waar, tsu “kriines kraas” kefiirt un tsu “pletse mit fiil waser fer se ruue”. Soo, hot Tawi noch mool kraft kriit fer wayter keen. (Psal. 18:28-32; 23:2) Kraat soo hayt, ‘is es weeche Yeehoowa sayn leaale liip tas ti xwiirichkheete uns net fernicht hon’. (Yaa. 3:22; Kol. 1:11) Tawi sayn leepe waar ofts ins kefoer un tee hat xtarke faynte. Awer weeche Yeehoowa sayn liip, hot eyer sich sicher un kexitst kexpiirt. Tawi khont mërke tas Yeehoowa imer mit tëm waar un tas hot tëm ketreest. Tes weeche, khont eyer singe: “[Yeehoowa] hot mich fon mayn kanse pang fray kemacht.” (Psal. 34:4) Tawi sayn pang waar reaal, awer Yeehoowa sayn liip waar xtërker wii sayn pang. (w24.01 s. 30 ap. 15-17)

Lërn fon Yeoas sayn xlechte ëntxlise. Noom hooche priister Yeoyata sayn toot, hot Yeoas xlechte fraaynte raus kesuucht. (2 Kro. 24:17, 18) Xtats sich wech hale fon te prinse fon Yutaa, woo Yeehoowa net keliipt hon, hot Yeoas sayn xlechte aanreete aan keheert. Un wën Sakarias — Yeoas sayn primo — fersuucht hot tëm korikiire, hot Yeoas tëm um keprung. (2 Kro. 24:20, 21; Mat. 23:35) Wii xlim un tum! Yeoas hot sayn leepe kuut aan kefang, awer xpeeter is eyer een aphostate kep un hot soo kaar layt um keprung. Tsum xlus, hon sayn aychne tiiner tëm um keprung. (2 Kro. 24:22-25) Sicher, weyer tëm sayn leepe kans anerste wën eyer wayter Kot un tii woo Tëm keliipt hon, aan keheert hët. (w23.09 s. 9 ap. 6)

Wayl Yeesus wust tas Pheeter troy plaype khont, hot eyer mit kuutheet kesaat: “Los noo pang se hon.” Pheeter sayn leepe waar tiif petrof wayl Yeesus uf tëm ketraut hot. Xpeeter, hon Pheeter un sayn pruuter Antrë sayn fixeray kexeft kelos un sin Yeesus noo kang in te aarwayt fer tisipele mache. Soo hot Pheeter wunerliche seechen kriit. (Mar. 1:16-18) Wii Yeesus sayn tisipel, hot Pheeter fiile tinge kesiin woo eyer nii kesiin hët wën eyer net Yeesus noo kang weyer. Tee hot Yeesus kesiin kranke heele, temoone aus traype un soo kaar ti toote uf ruufe. (Mat. 8:14-17; Mar. 5:37, 41, 42) Pheeter hot aach in een wunerlich wisyoon kesiin Yeesus wii kheenich fon Kot sayn Raych, etwas woo eyer nii ferkes hot. (Mar. 9:1-8; 2 Phe. 1:16-18) Pheeter wërt wol aarich froo kep sin tas eyer torich sayn nekatiiwe xpiirunge triwer wech khom is un tas eyer tiise wunerliche seechen kriit hot. (w23.09 s. 21 ap. 4-5)

In sayn eyerste priif, hot te aphostel Pheeter kesaat tas een “tiif liip” tuut uns helfe, net ploos phaar sinte, awer “fiile sinte” fertsaye. (1 Phe. 4:8) Im xtant, hot Pheeter sich traan ketenkt ti lisyoon woo Yeesus tëm in kelërnt hat phaar yoore tsurik. In tiise tsayt, khan sin tas Pheeter ketenkt hot tas eyer een kuut persoon waar wayl eyer kesaat hot tas eyer sayn pruuter “pis 7 mool” fertsaye teet. Awer Yeesus hot Pheeter un uns in kelërnt tas mer sole ti anere “pis 77 mool” fertsaye — es wil saan, net ti rechnung nëme. (Mat. 18:21) Wëns tuu tenkst tas es xweyer is, say net oone muut. Al Yeehoowa sayn imperfekte tiiner hon als mool es xweyer kefun se fertsaye. Tas wichtichste is tas tuu yets ti neetiche xrite kepst fer tayn pruuter fertsaye un te friit mit tëm hale. (w23.09 s. 29 ap. 12)

Im maache fom fix, waar Yoonas sich sicher tas Kot sayn teemuutich kepeet heere teet un tas Yeehoowa tëm helfe teet. Yeehoowa hot Yoonas keret un xpeeter waar eyer fërtich fer sayn flicht aan nëme un erfiile. (Yon. 2:10–3:4) Wëns tuu een propleem host, pist tuu als mool tsu ëngstlich fer se peete? Pist tuu als mool tsu miit fer se xtutiire? Eriner tich tas Yeehoowa tayn situatsyoon perfekt ferxteet. Soo kaar wëns tuu een keweenlich kepeet machst, khanst tuu tich sicher sin tas Kot tich ti neetich kraft kept. (Ëfe. 3:20) Wëns xweyer fer tich is leese un xtutiire wayls tuu krank, miit orer ëngstlich pist, khanst tuu ti autyos fon te Piipel orer fon unser puplikatsyoone horiche. Tuu khanst aach eene fon unser musike heere orer een wiiteo im jw.org kuke. Yeehoowa wil tich xtark mache. Tee kept tich kraft wëns tuu tsu tëm peetst un antworte fer tayn kepeete suuchst in te Piipel un in al ti anere tinge woo eyer fersoricht. (w23.10 s. 13 ap. 6; s. 14 ap. 9)

Ti inwënich sayt fom tapernakel un ti thempele, woo xpeeter in Yeruusalem kepaut kep sin, waar eenlich. Es waare 2 tsimere: tas “Haylich Plats” un te “Ale Haylichste”; es waar aach een foerhang tswixich tëne. (Hep. 9:2-5; Eeks. 26:31-33) Im Haylich Plats, waar een kolt khërtse xtant, een altar fer insëns prëne un een tix mit tëm proot fer opfer. Ploos “ti kesalpte priister” khonte in tëm Haylich Plats rin keen fer sayn haylich aarwayt mache. (Nuu. 3:3, 7, 10) Im Ale Haylichste, waar ti Arich fom Pakt, woo aus kolt kemacht waar; tii hot Yeehoowa sayn presens representiirt. (Eeks. 25:21, 22) Ploos te hooche priister waar erlaupt torich te foerhang keen un im Ale Haylichste rin keen. Tee hot tas een mool tas yoer kemacht im Taach fer ti Sinte se Teke. (Lew. 16:2, 17) Tee is tat rin kang mit tëm pluut fon tiere fer sayn aychne sinte un ti sinte fon te kans natsyoon teke. Mit te tsayt, hot Yeehoowa taytlich ketsaycht was tiise tinge im tapernakel wërklich representiirt hon. (Hep. 9:6, 7) (w23.10 s. 27 ap. 12)

In te Piipel, fine mer noo un noo tas kepoot fer “eene te anere liipe”. (Yoo. 15:12; Rom. 13:8; 1 The. 4:9; 1 Phe. 1:22; 1 Yo. 4:11) Awer ti liip is een inerlich xpiirung woo nimant siin khan. Soo, wii khene mer unser liip tsu te priiter un xwestere tsayche? Torich unser wërter un aktsyoone. Kuk mool etliche payxpiile: “Tuut ti woerheet eene mim anere xpreche.” (Sak. 8:16) “Halt te friit eene mit te anere.” (Mar. 9:50) “Tuut te eyerste xrit kepe fer ti anere eere.” (Rom. 12:10) “Tuut eene te aner hërtslich aan nëme.” (Rom. 15:7) “Tuut aych wayter naner (…) fertsaye.” (Kol. 3:13) “Tuut wayter ti laste eene fon te anere nëme.” (Kal. 6:2) “Tuut aych wayter naner treeste.” (1 The. 4:18) “Tuut wayter eene ti anere ferxtërke.” (1 The. 5:11) “Peet eene fer ti anere.” (Tya. 5:16) (w23.11 s. 9 ap. 7-8)

Yeete taach, mache mer ëntxlise woo een xtarke klaape ferlange. Tsum payxpiil: meyer mache ëntxlise iwer keselxaft, ferkniichung, xuul, hayrat, khiner un aarwayt. Es weyer kuut uns selepst frooe: ‘Tuun mayn ëntxlise tsayche tas ich mich sicher sin tas tiise sisteem khorts tauert un wërt klaych mit Kot sayn nay welt ersetst? Orer tuun ich ti selwiche ëntxlise mache wii tii woo net klaape tas se fer imer leepe khene?’ (Mat. 6:19, 20; Luk. 12:16-21) Meyer tuun ti peste ëntxlise mache wën mer unser klaape ferxtërke tas ti nay welt ticht is. Meyer mache aach proope mit woo een xtarke klaape ferlange. Tas khent yachtung, xlime krankheete orer was aneres sin woo uns oone muut lost. Am aanfang, fiilaycht xpiire mer tas mer khene te propleem aus hale. Awer soo sorte propleeme tuun ofts lang tauere. Soo meyer mise een xtarke klaape hon fer aus hale un wayter Yeehoowa mit frooheet tiine. (1 Phe. 1:6, 7) (w23.04 s. 27 ap. 4-5)

Yeehoowa waart tas mer unser teel mache noo se peete. Tsum payxpiil, een pruuter khan hilef tsu Yeehoowa ferlange fer een taach fray fon sayn aarwayt kriin fer tsum rechyonaal konkrës keen. Wii khan Yeehoowa tiise kepeet antworte? Tee khan fiilaycht koraaj fer te pruuter kepe fer mit sayn xëf xpreche. Awer te pruuter mus noch sayn teel mache un een taach fray fer sayn xëf ferlange. Im xtant, mus eyer tas noo un noo mache. Tee khan sich soo kaar aan piite fer in een aner taach xafe orer khan eyer een kleener loon tiise moonat aan nëme. Yeehoowa waart tas mer noo un noo iwer unser soriche peete. Torich Yeesus sayn wërter, khene mer ferxteen tas etliche tinge woo mer ferlange, wëre uns net klaych kep. (Luk. 11:9) Tes weeche, kep net uf! Tuu noo un noo hërtslich peete. (Luk. 18:1-7) Soo tsayche mer tsu Yeehoowa tas was mer ferlange wichtich fer uns is; meyer tsayche aach tas mer klaape tas eyer uns helfe khan. (w23.11 s. 22-23 ap. 10-11)

Yeehoowa hot fer sayn fraaynt Apraham ferxproch tas eyer teet een soon kriin un tas al ti natsyoone fon te eyert teete een seechen torich tiise soon kriin. (Xee. 15:5; 22:18) Awer wii Apraham 100 yoore alt waar un sayn fraa, 90, hate se noch khee khint. (Xee. 21:1-7) Noch soo, ti Piipel saat: “[Apraham hot] sich uf te hofnung kextitst un hat klaape tas eyer fater fon fiile natsyoone kepe teet, tëm noo was kesaat kep is.” (Rom. 4:18) Wayl Apraham een xtarke klaape aan Kot hat, waar eyer sich sicher tas Tëm sayn ferxpreche sich erfiile teet. Un was Apraham kehoft hot, hot sich erfiilt: tee is fater fon Isak kep, te soon woo eyer soo lang tsayt kewaart hot. Warom waar Apraham sich sicher tas Yeehoowa sayn ferxpreche erfiile teet? Wayl Apraham een ticht fraayntxaft mit Yeehoowa hat, waar eyer “sich sicher tas was Kot ferxproch hat”, sich erfiile teet. (Rom. 4:21) Yeehoowa hot sich mit Apraham kefal un hot tëm kerecht aus kexproch weeche sayn klaape. (Tya. 2:23) (w23.12 s. 8 ap. 1-2)

Wën eene yunge pruuter al sayn flichte kuut uf phast, khene ti layt uf tëm traue. Tenk aan Yeesus sayn perfekte payxpiil. Tee hot ales mit muut kemacht un tee waar yemant woo ti anere traue khonte. Tee hot kemacht ales was Yeehoowa tëm ferlangt hat, soo kaar wën tas xweyer waar. Tee hot ti layt keliipt — hauptseechlich sayn tisipele — un waar wilich sayn leepe tëne kepe. (Yoo. 13:1) Mach Yeesus noo un xaf xtram in kwalkee inxtelung woos tuu kriist. Wëns tuu net wise tuust wii tas mache, say teemuutich un ferlang hilef fer rayfe priiter. Say net tsufriite mit ploos tas neetiches mache. (Rom. 12:11) Xtats tas, mach tayn aarwayt wii wëns tuu “fer Yeehoowa un net fer ti mëner” xafe teest. (Kol. 3:23) Sicher, pist tuu net perfekt; soo say teemuutich un erkhën yeete feeler woos tuu machst. (Xpr. 11:2) (w23.12 s. 26 ap. 8)

Meyer sin aarich froo kep wii mer uns ketaaft hon un aan kefang hon teel fon Yeehoowa sayn familye sin. Es is een eer een ticht fraayntxaft mit Yeehoowa hon. Meyer xtime mit te wërter fom psalmist Tawi tsu Yeehoowa: “Froo is tee woos tuu raus suuchst un ticht pay tich pringst, fer uf tayn hoof woone.” (Psal. 65:4) Yeehoowa lost net tas kwalkee eene teel fon sayn familye macht. Tee suucht raus tii woo tsayche tas se wole een ticht fraayntxaft mit tëm hon. (Tya. 4:8) Wëns tuu tich tetikiirst un taafe lost, khanst tuu tich sicher sin tas, noo tayn taaf, tuut eyer ‘een seechen iwer tich aus xite pis niks mee feelt’. (Mal. 3:10; Yee. 17:8) Te taaf is ploos te aanfang. Tuu solst tayn pestes mache fer tayn ferxpreche fon tetikatsyoon in hale soo kaar foer ti fersuuchunge un tinge woo tayn klaape proope khene. (Ekl. 5:4, 5) Wii Yeesus sayn tisipel, wilst tuu tëm sayn payxpiil un kepoote noo keen soo ticht wiis meechlich is. (Mat. 28:19, 20; 1 Phe. 2:21) (w24.03 s. 8 ap. 1-3)

Un wën teyer net kërn mitsamer wii pheyerche playpt? Was khent teyer mache? Tenkt aan een fayer. Wën tas aan fangt se prëne, is tas fayer net kroos. Meyer mise lamsam kreeser xtike hols truf leye. Kraat soo, was mënt teyer ploos een pisye tsayt yeete taach mitsamer plaype? Macht etwas woo teyer tswaay kërn hot. (Tya. 3:18) Xrit noo xrit, khan ayre liip noch mool “aan keen”. Te respekt is aarich wichtich in te hayrat. Es is wii te oksixeenyo woo lost een fayer xtark. Oone oksixeenyo, keet tas fayer xnel aus. Kraat soo, oone respekt, ti liip tswixich een man un fraa khan xnel khalt wëre. Im keeche teel, een pheyerche woo sich aan xtrengt fer respekt tsayche, lost sayn liip xtark. Awer eriner tich: te phunkt is net ops tuu tenkst tas tuu respekt tsaychst, awer op tayn man orer fraa sich respektiirt xpiirt. (w23.05 s. 22 ap. 9; s. 24 ap. 14-15)

In te Piipel, hon etliche troye tiiner fon Yeehoowa kexproch iwer momënte woo se sich traurich un mit pang kexpiirt hon weeche ti faynte orer anere propleeme. (Psal. 18:4; 55:1, 5) Kraat soo, khan sin tas mer opositsyoon in te xuul, in te aarwayt, in te familye orer fon te rechiirung mit mache. Meyer khene soo kaar pang fom toot kriin weeche een krankheet. In soo sorte momënte, khene mer uns wii een khint xpiire woo sich net aleen xitse khan. Wii tuut Yeehoowa uns helfe in tiise situatsyoone? Tee tuut uns treeste. Soo tuu imer tsayt mit Yeehoowa fertraype — peet tsu Tëm un lees Sayn Wort. (Psal. 77:1, 12-14) Wëns tuu tiise kewoonheet host, tsiimlich sicher tas eyerste tings woos tuu mache tuust wëns tuu stresiirt pist, is hilef fer tayn himlixe Fater ferlange. Xprech mit Yeehoowa iwer tayn pang un soriche. Tan los eyer mit tich xpreche un tich treeste torich ti Piipel. (Psal. 119:28) (w24.01 s. 24-25 ap. 14-16)

Een xtarke wunx hon fer kaystliche tsiile trefe, is aarich wichtich. Soo een sort wunx tuut een persoon uf muute sich aan xtrenge fer sayn tsiile trefe. Un woo xtërker unser wunx is, woo kreeser is unser xans fer unser tsiil trefe. Soo, wii khanst tuu tayn wunx ferxtërke fer een kaystlich tsiil trefe? Peet too triwer. Torich sayn hayliche kayst, khan Yeehoowa tich uf muute tayn tsiil trefe. Als mool, xtele mer een tsiil wayl mer tenke: ‘Ich sol tas mache.’ Un tas is was kuutes. Awer khan sin tas mer net wërklich te wunx hon fer tas trefe. Tenk triwer noo aan was Yeehoowa xon fer tich kemacht hot. (Psal. 143:5) Te aphostel Phaul hot triwer noo ketenkt aan te unfertiint kuutheet woo Yeehoowa tëm ketsaycht hat; un tas hot tëm uf kemuut xtram fer Yeehoowa xafe. (1 Kor. 15:9, 10; 1 Tim. 1:12-14) Kraat soo, woo mee tuu triwer noo tenkst aan was Yeehoowa xon fer tich kemacht hot, woo kreeser wërt tayn wunx fer tayn tsiil trefe. (Psal. 116:12) (w23.05 s. 27 ap. 3-5)

Meyer lose unser himlixe Fater froo wën mer sayn naame loope. (Psal. 119:108) Awer wil tas saan tas te Ale Mechtiche Kot is soo wii ti imperfekte mënxe woo mise loop kriin weeche sayn emotsyonaal neetichkheete? Nee. Satanaas hot een lii keeche yeete eene fon uns kesaat. Wën mer unser himlixe Fater loope, helfe mer pewayse tas es net woer is. Satanaas saat tas khee mënx tuut Kot sayn naame troy xitse. Tee saat tas nimant troy tsu Kot playpt unich proope. Tee saat tas meyer al teete noo lose Kot tiine, wën mer rechne teete tas es peser fer uns weyer. (Yoop 1:9-11; 2:4) Awer Yoop is troy tsu Kot keplip un hot pewayst tas Satanaas een liichner is. Un tuu? Tuust tuu aach troy plaype? Yeete eene fon uns khan raus suuche Kot sayn naame xitse un tëm froo lose torich unser troy tiinst. (Xpr. 27:11) Es is wërklich een eer tas mache. (w24.02 s. 8-9 ap. 3-5)

Noo te taache fon Mooses un Yosuee, hot Yeehoowa richter in kesetst fer sayn folek lenke. Nochter, torich ti tsayt fon te kheeniche, hot Yeehoowa profeete in kesetst fer sayn folek fiire. Ti troye kheeniche hon ti profeete aan keheert. Tsum payxpiil: te profeet Natan hot te kheenich Tawi korikiirt, woo tas teemuutich aan kenom hot. (2 Sam. 12:7, 13; 1 Kro. 17:3, 4) Te kheenich Yeosafat hot ti lenkung fom profeet Yaasyël aan kenom; un tee hot tas folek fon Yutaa uf kemuut “aan [Kot] Sayn profeete” klaape. (2 Kro. 20:14, 15) Wii te kheenich Esekias propleeme mit kemacht hot, hot eyer hilef fer te profeet Isayas ferlangt. (Isa. 37:1-6) Yeetes mool woo ti kheeniche Kot sayn oryentiirung aan keheert hon, hot Yeehoowa tii un tas folek keseechent un kexitst. (2 Kro. 20:29, 30; 32:22) Es waar taytlich tas Yeehoowa sayn folek torich ti profeete am lenke waar. (w24.02 s. 21 ap. 8)

Satanaas wil hon tas mer keselxaft mit layt hon woo es xweyer fer uns lose Yeehoowa sayn kesetse aan heere. Hayt, mise meyer uf phase, wayl meyer khene tsayt mit te layt plaype net ploos perseenlich, awer aach torich ti sotsyaale weepe. Meyer mise khëmpfe keeche ti welt sayn itee tas ti imoraalix aanxtelung richtich is. Meyer wise kans kenau tas es net soo is. (Ëfe. 4:19, 20) Meyer mise uns selepst frooe: ‘Tuun ich uf phase fer net uneetich keselxaft hon mit aarwayts orer xuul koleke orer anere layt woo Yeehoowa sayn kesetse net respektiire? Tuun ich mit koraaj pay xteen was Yeehoowa saat richtich un ferkheert is, opwool etliche saan khene tas ich net tolerant sin?’ Tëm noo 2 Timoteus 2:20-22, mise mer aach uf phase wën mer tichte fraaynte in te kemaynt raus suuche. Meyer mise uns erinere tas etliche uns net helfe tuun troy in unser tiinst tsu Yeehoowa plaype. (w24.03 s. 22-23 ap. 11-12)

Host tuu xon fersuucht tich foer xtele wii Yeehoowa is? Opwool meyer tëm net siin khene, tuut ti Piipel Yeehoowa in unerxiitliche aate pexraype. Tee is kenënt wii “sun un xuts xilt” un aach wii “een fayer woo fernicht”. (Psal. 84:11; Hep. 12:29) Een Piipel xrayper hot Yeehoowa in een wisyoon pexrip wii een safira xteen, een xaynlich metaal un wii een xaynlich reen pooche. (Ese. 1:26-28) Wayl meyer Yeehoowa net siin khene, es khan fiilaycht xweyer sin se klaape tas eyer uns liipt. Etliche tenke tas Yeehoowa khent se nii liipe weeche ti xlechte tinge woo mit tëne pasiirt sin. Yeehoowa ferxteet soo sorte xpiirunge un ferxteet wii se uns petrefe. Fer uns helfe, tuut eyer uns in lërne torich ti Piipel was fer sort persoon eyer is. Liip — tas is tas peste wort fer Yeehoowa pexraype. (1 Yo. 4:8) Ti Piipel saat tas Kot is liip. Ales was Yeehoowa macht is weeche liip. Yeehoowa sayn liip is soo krooshërtslich un xtark, tas eyer liip tsaycht soo kaar fer tii woo Tëm net liipe. (Mat. 5:44, 45) (w24.01 s. 26 ap. 1-3)

Yeehoowa hot Mooses in kesetst fer ti israeliiter ausm Ejipt lenke un Tee hot taytliche pewaysunge kep tas eyer tas folek am lenke waar: mit een wolk phoste torich te taach un een fayer phoste torich ti nacht. (Eeks. 13:21) Mooses is te phoste noo kang, woo tee un ti israeliiter tsum Roote Meer kelenkt hot. Awer ti ejipter hon ti israeliiter noo keyacht. Soo hon ti israeliiter fiil pang kriit — foer tëne waar tas meer un hinich tëne waare ti ejipter. Awer Mooses hat khee feeler kemacht. Yeehoowa hat Mooses penutst fer Sayn folek pis tat hin lenke un Kot hot se een wunerlich pefrayung kep. (Eeks. 14:2, 26-28) Torich ti neekste 40 yoore, is Mooses wayter te wolk phoste noo kang woo Yeehoowa penutst hot fer Sayn folek im tesërt fiire. (Eeks. 33:7, 9, 10) Yeehoowa hot mit Mooses ausm phoste kexproch un tan hot Mooses ti oryentiirunge fer tas folek kep. Ti israeliiter hate taytliche pewaysunge tas Yeehoowa Mooses am penutse waar fer tëne fiire. (w24.02 s. 21 ap. 4-5)