Yuuli

Yeesus hot ti ketanke un xpiirunge fon sayn Fater perfekt noo kemacht in ales was eyer kesaat un kemacht hot — too tepay ti wunere. (Yoo. 14:9) Was lërne mer mit Yeesus sayn wunere? Yeesus un sayn Fater tuun uns fiil liipe. Wii Yeesus uf te eyert waar, hot eyer ketsaycht wii fiil eyer ti mënxe liipt wii eyer sayn macht penutst hot fer se helfe tii woo kelit hon. Tsum payxpiil: een mool hon 2 plinte mëner tëm hilef aan kehal. (Mat. 20:30-34) “Yeesus hot se ketauert” un tan hot se keheelt. Tas kreekix wort, woo too iwersetst is “hot se ketauert”, tsaycht tas Yeesus een tiif phayn kexpiirt hot wii eyer kesiin hot ti mëner am layte. Weeche tiise sort mitlayt, woo een aat waar fer Yeesus liip tsayche, hot eyer aach ese kep fer ti layt woo hunger hate un een leproos keheelt. (Mat. 15:32; Mar. 1:41) Meyer khene uns sicher sin tas Yeehoowa, te Kot fon “hërtslich mitlayt”, un sayn Soon, tuun uns aarich fiil liipe un phayn xpiire wën mer layte. (Luk. 1:78; 1 Phe. 5:7) Tii sin hërtslich am waarte te taach wën se al ti propleeme woo ti mënxe petrefe, tsum ën pringe. (w23.04 s. 3 ap. 4-5)

Meyer mise unser pestes mache fer uns wech hale fon te ferkheerte itee woo ti layt in Satanaas sayn welt kërn hon. Meyer mise ti Piipel leese un xtutiire fer unser khop fol rayne ketanke lose. In te fersamlunge keen un in te preetich aarwayt xafe, tuut unser ketanke aach xitse. Un wën mer tas mache, Yeehoowa ferxprecht net lose tas mer mee fersuucht wëre wii mer aus hale khene. (1 Kor. 10:12, 13) Mee wii noch nii, mus yeete eene fon uns peete fer troy tsu Yeehoowa plaype in tiise xweyere letste taache. Yeehoowa wil hon tas meyer unser hërts foer tëm in kepeet aus xiite. (Psal. 62:8) Loop un tank Yeehoowa weeche ales was eyer macht. Ferlang tëm sayn hilef fer koraajix in te preetich aarwayt sin. Hal Kot sayn hilef aan fer ti xwiirichkheete aus hale un tich fest keeche ti fersuuchung xtele. Los niks un nimant tich um hale imer tsu Yeehoowa peete. (w23.05 s. 7 ap. 17-18)

Warom keen mer tsu te fersamlunge? Hauptseechlich fer Yeehoowa loope, awer aach fer uns naner uf muute in tiise letste taache. (Psal. 26:12; 111:1; 1 The. 5:11) Wën mer unser hant heepe un komentaare kepe, sin mer tiise 2 tinge am mache. Awer es kept phaar kefoore. Khan sin tas mer uns ëngstlich xpiire fer komentaare kepe; orer im xtant wole mer tas mache, awer ti priiter tuun uns net imer ruufe wën mer unser hant heepe. Was khan uns helfe mit tiise kefoore um keen? Te aphostel Phaul hot kesaat tas mer sole uns konsentriire aan “uns naner uf muute”. Soo kaar mit een keweenlich komentaar, woo unser klaape tsaycht, khene mer tas mache. Too traan tenke, helft uns net soo ëngstlich plaype fer ti hant heepe. Un wën mer net imer keruuft sin, khene mer froo plaype wayl anere in te kemaynt ti xans hon fer een komentaar kepe. (1 Phe. 3:8) (w23.04 s. 20 ap. 1-3)

Te kheenich hot was nayes pekhant kemacht: ti yuute, woo unkefeer 70 yoore wii inkexpërtner in Papiloon keleept hon, waare yets fray fer tsurik tsu sayn haymat lant keen: Israël. (Ëst. 1:2-4) Tas waar ploos meechlich weeche Yeehoowa! Ti papilooner waare net keweent sayn inkexpërtner pefraye. (Isa. 14:4, 17) Awer een aner rechiirung hot Papiloon iwerfal un te nay rechiirente hot kesaat tas ti yuute khonte faart keen. Al ti yuute, hauptseechlich ti familye xëfe, miste een ëntxlus mache: teete se fon Papiloon faart keen orer tat plaype? Im xtant waars net laycht tiise ëntxlus mache. Khan sin tas etliche tsu alt waare fer tiise lang rees mache. Un wayl ti meyerste yuute in Papiloon uf te welt khom sin, tas waar ti eensich haymat woo se kekhënt hon. Fer tëne, Israël waar tas lant fon sayn foerkhomer, net tëne sayns. Es siit aach aus tas etliche yuute raych in Papiloon kep sin. Tes weeche waars fiilaycht tëne xweyer sayn xeene hayser orer kexefte lose un uf een plats leepe keen woo se net kekhënt hon. (w23.05 s. 14 ap. 1-2)

Kot sayn Wort muut uns uf wayter persewerans, mitlayt un liip ëntwikele. Tsum payxpiil, Lukas 21:19 saat: “Weeche ayre persewerans, tuut teyer ayre leepe hale.” Koloser 3:12 saat: “Tsiit aych aan mit liiplich mitlayt.” Un 1 Thesalooniker 4:9, 10 saat: “Kot tuut aych in lërne eene ti anere liipe. (...) Awer priiter, mer muute aych uf fer tas imer mee mache.” Tiise wersikele sin kexrip kep fer tisipele woo xon persewerans, mitlayt un liip ketsaycht hate. Awer tii solte wayter lërne wii tiise kwaliteete tsayche — un meyer aach. Fer tich helfe, sii wii ti eyerste kriste tiise kwaliteete ketsaycht hon. Tan tuust tuu siin wiis tuu se noo mache khanst un, soo, fërtich fer ti kroos tripulatsyoon sin. Soo, wën se aan fangt, tuust tuu xon wise wii persewerans tsayche un wërst pextimt wayter aus hale. (w23.07 s. 3 ap. 4, 8)

Ekaal ep mer fon te kesalpte orer fon te “anere xeef” sin, mise mer wayter im “Weech fon Haylichkheet” keen. Tas helft uns Yeehoowa aan peete yets un im futuer, wën tas Raych wunerliche seechen pringt. (Yoo. 10:16) Fon 1919 N.K. aan, sin milyoone mëner, fraae un khiner fon Papiloon ti Kroos — woo al ti falxe relichyoone representiirt — raus kang. Un tan hon se aan kefang in tiise simpoolix weech reese. Yeehoowa hot sich sicher kelos tas niks te weech fon te yuute, woo fon Papiloon raus kang sin, xteere teet. (Isa. 57:14) Un te “Weech fon Haylichkheet” hayt tsu taach? Hunerte yoore foer 1919, hot Yeehoowa mëner woo tëm respektiirt hon, penutst fer te weech foer perayte tas anere khente fon Papiloon ti Kroos raus keen. (Kuk aach Isayas 40:3.) Tii hon ti neetich aarwayt kemacht tas es xpeeter meechlich weyer tas eerliche layt fon te falxe relichyoone raus keengte un Yeehoowa mit sayn folek aan peete teete. (w23.05 s. 16 ap. 8-9)

Yeehoowa wil hon tas mer tëm froo un mit muut tiine. (2 Kor. 9:7) Tes weeche, khene mer uns frooe: ‘Sole mer uns wayter aan xtrenge fer een kaystlich tsiil trefe, aach wën mer net te wunx hon fer tas mache?’ Kuk mool te aphostel Phaul sayn wërter: “Ich tuun mayn khërper xtreng tisipliniire un mache tëm mayn sklaaw.” (1 Kor. 9:25-27) Phaul hot sich ketswung fer se mache was richtich is, soo kaar wën eyer net te wunx hat fer tas mache. Waar Yeehoowa froo mit Phaul sayn aarwayt? Ia, sicher. Un Yeehoowa hot tëm peloont. (2 Tim. 4:7, 8) Kraat soo, wërt Yeehoowa froo wën eyer siit unser aanxtrengung fer unser tsiile trefe, aach wën uns ti muut feelt. Tee kefalt sich wayl eyer wees tas, soo kaar wën mer net imer liipe was mer am mache sin, mache mer tas wayl mer tëm liipe. Soo wii Yeehoowa Phaul keseechent hot, tuut Eyer uns weeche unser aanxtrengung seechne. (Psal. 126:5) Un wën mer Yeehoowa sayn seechen xpiire, khene mer aan fange mee muut hon. (w23.05 s. 29 ap. 9-10)

Te aphostel Phaul ferklaycht tii woo Yeehoowa sayn taach net iwerleepe mit layt woo am xloofe sin. Tii mërke net was um tëne rom pasiirt un wii ti tsayt rom keet. Soo, mërke se net wën was wichtiches pasiirt un tii khene niks too triwer mache. Ti meyerste hayt sin am xloofe in kaystlich aat. (Rom. 11:8) Tii klaape net aan te pewaysunge tas mer in te “letste taache” am leepe sin un tas ti kroos tripulatsyoon klaych khomt. (2 Phe. 3:3, 4) Awer meyer ferxteen tas wachsam plaype wërt yeete taach wichticher. (1 The. 5:6) Tes weeche mise mer unser ketanke fest un in ruu hale fer uns net rin mexe in te politixe un sotsyaalixe sache fon te welt. Soo lang wii Yeehoowa sayn taach tichter khomt, tuun ti layt uns noch mee tswinge een sayt in tiise sache raus suuche. Noch soo, prayche mer uns net ketanke mache iwer wii mer reakiire tuun. Kot sayn kayst khan uns helfe unser ketanke fest un in ruu hale un, soo, kluuche ëntxlise mache. (Luk. 12:11, 12) (w23.06 s. 10 ap. 6-7)

Aan was tenkst tuu wëns tuu te naame Samsan heerst? Fiilaycht erinerst tuu tich tas tee mechtich xtark waar. Un tas is woer. Awer Samsan hot een xlecht ëntxlus kemacht woo fiile xwiirichkheete keprung hot. Noch soo, hot Yeehoowa sich traan kehal aan ales was Samsan xon kemacht hat fer tëm tiine. Un Kot hot aach sayn troy payxpiil in te Piipel kelos tas mer nutse too temit kreechte. Kot hot Samsan penutst fer wunerliche tinge mache fer Sayn folek, ti israeliiter, helfe. Hunerte yoore noo Samsan sayn toot, hot Yeehoowa te aphostel Phaul inspiriirt een list mache fon layt woo xtarke klaape ketsaycht hon un Samsan waar too tepay. (Hep. 11:32-34) Samsan sayn payxpiil khan uns uf muute un in lërne. Tee hot uf Yeehoowa ketraut, soo kaar torich xweyere situatsyoone. (w23.09 s. 2 ap. 1-2)

Meyer khene unser persewerans ferxtërke wën mer eftas tsu Yeehoowa peete un iwer unser kanse soriche xpreche. (1 The. 5:17) Fiilaycht yets, host tuu net xweyere propleeme. Awer tuust tuu Yeehoowa sayn hilef in kepeet ferlange wëns tuu traurich, konfus orer tich oone ausweech xpiirst? Wëns tuu xon yets Yeehoowa sayn hilef ferlangst fer mit te kleene propleeme um keen, tuust tuu tas selwiche mache wën kreeser propleeme im futuer foer khome. Tas tuut tich ti sicherheet kepe tas Yeehoowa wees wanee un wii tich helfe. (Psal. 27:1, 3) Meyer hon een kreeser xans fer ti kroos tripulatsyoon aus hale, wën mer ti proope xon hayt phake. (Rom. 5:3) Warom khene mer tas saan? Fiile priiter hon raus kefun tas, wën se een propleem aus hale, es helft tëne te neekste propleem phake. Wën se een propleem mit Kot sayn hilef aus hale, is sayn klaape ferxtërkt tas Yeehoowa fërtich un wilich is fer tëne helfe. Un wayl se uf Yeehoowa klaape, khene se ti neekste proop aus hale. (Tya. 1:2-4) (w23.07 s. 3 ap. 7-8)

Was tuut Yeehoowa uf muute sich aan phase? Sayn teemuut un mitlayt. Tsum payxpiil, Kot hot teemuut ketsaycht eep eyer ti xtat fon Sotooma fernicht hot. Torich sayn engele, hot Yeehoowa te kerechte Lot oryentiirt tsu te përiche aus rayse. Awer Lot hat pang tat hin keen. Soo hot eyer tsu Yeehoowa aan kehal tas eyer un sayn familye khente tsu Soar aus rayse, een xtat woo Kot ëntxlist hat fernichte. Yeehoowa khent Lot ketswung hon sayn oryentiirung kenau aan wëne; awer xtats tas, hot eyer erlaupt Lot tsu Soar keen un Kot hot tiise xtat net fernicht. (Xee. 19:18-22) Hunerte yoore xpeeter, hot Yeehoowa mitlayt fer Niiniwe sayn pewooner ketsaycht. Tee hot te profeet Yoonas kexikt etwas pekhant mache: Niiniwe un sayn xlechte pewooner weyere fernicht. Awer wii ti niniwiiter sich peroyt hon, hot Yeehoowa tëne mitlayt ketsaycht un ti xtat net fernicht. (Yon. 3:1, 10; 4:10, 11) (w23.07 s. 21 ap. 5)

Was khene mer mit Yeoas sayn xlechte payxpiil lërne? Tee waar wii een paam mit flache wortsle, woo praycht een phoste fer sich xtaype. Wii tiise phoste net mee tat waar — es wil saan, wii Yeoyata kextorep is — un te wint fon aphostasii keploos hot, is te paam kefal; in anere wërter, is Yeoas untroy tsu Yeehoowa kep. Tiise ferklaychung tsaycht tas mer sole net Yeehoowa aan heere ploos wayl unser familye orer anere in te kemaynt een kuute payxpiil fer uns kelos hon. Fer ticht pay Yeehoowa plaype, mise mer unser aychne liip un respekt tsu tëm ferxtërke. Fer tas hin kriin, mise mer reeklich xtutiire, triwer noo tenke un peete. (Yee. 17:7, 8; Kol. 2:6, 7) Yeehoowa tuut net fiil fon uns ferlange, soo wii Eklesyastes 12:13 tsaycht: “Tuu tiife respekt tsu te woere Kot hon un tëm sayn kepoote aan heere, wayl tas is ales was te mënx mache sol.” Wën mer Kot tiif respektiire, khene mer troy tsu Tëm plaype ekaal was im futuer pasiirt. Niks tuut unser fraayntxaft mit Yeehoowa fersaue! (w23.06 s. 18-19 ap. 17-19)

Kot sayn karantii fangt soo aan: “Tee, woo uf tëm troon kesitst waar, hot kesaat.” (Apo. 21:5 1^te teel) Tiise wërter sin wërklich ekstra, wayl tii tsayche tas Yeehoowa am xpreche is; im puuch Apokalipsis macht eyer tas ploos 3 mool. Soo, weer tiise karantii kept, is net een engel, noch net mool Yeesus, awer Yeehoowa selepst! Tas lost uns sicher tas mer klaape khene aan was Kot noo heyer saat. Warom is tas soo? Wayl Yeehoowa “net liie khan”. (Tit. 1:2) Soo ti wërter in Apokalipsis 21:5, 6 tuun sich sicher erfiile. Yeehoowa saat tan: “Kuk!” Tas kreekix wort woo iwersetst is “kuk”, is noo un noo im puuch Apokalipsis penutst. Kot hot klaych tëm noo kesaat: “Ich sin ale tinge nay am mache.” Yeehoowa macht tiise ënerunge im futuer, awer tee is sich soo sicher tas eyer sayn ferxpreche erfiile tuut, tas eyer xprecht wii wën eyer tas xon am mache weyer. (Isa. 46:10) (w23.11 s. 3-4 ap. 7-8)

Te aphostel Pheeter must keeche etliche xwacheete khëmpfe. Mërk mool etliche payxpiile. Wii Yeesus aus keleet hot tas eyer layte un xtërpe must soo wii ti Xrifte foer raus kesaat hate, hot Pheeter tëm kesaat tas soo was net pasiire praycht. (Mar. 8:31-33) Pheeter un ti anere aphostele hon noo un noo ketsënkt iwer weer te kreeste waar. (Mar. 9:33, 34) In te letst nacht foer Yeesus sayn toot, hot Pheeter tas oer fon eene man ap kexnit. (Yoo. 18:10) In te selwich nacht, hot Pheeter soo fiil pang kriit tas eyer 3 mool kesaat hot tas eyer sayn fraaynt Yeesus net kekhënt hot; tes weeche hot Pheeter piterlich keprilt. (Mar. 14:66-72) Pheeter is kans oone muut kep, awer Yeesus hot net fon sayn aphostel uf kep. Noo tas Yeesus uf keruuft kep is, hot eyer Pheeter ti xans kep fer tëm sayn liip tsu Yeesus pewayse. Yeesus hot Pheeter in kelaat sayn xeef teemuutich uf phase un Pheeter hot es aan kenom. (Yoo. 21:15-17) Soo tee waar in Yeruusalem im Phingste Taach fon 33 N.K. un waar tswixich ti eyerste woo mit hayliche kayst kesalpt waare. (w23.09 s. 22 ap. 6-7)

Te aphostel Pheeter hot fer ti elteste kesaat: “Phast Kot sayn trop xeef uf.” (1 Phe. 5:1-4) Wëns tuu een elteste pist, meyer wise tas tuu tayn priiter un xwestere liipst un wilst tëne uf phase. Awer als mool, khan sin tas tuu soo fiil se tuun host orer soo miit pist tas tuu tenkst tuu khanst net tiise flicht erfiile. Was khan tich helfe? Mach tayn hërts fer Yeehoowa uf un xprech iwer tayn soriche. Pheeter hot kexrip: “Wën yemant ti anere tiint, mach tas mit te kraft woo Kot xenkt.” (1 Phe. 4:11) Khan sin tas tayn priiter un xwestere propleeme mit mache woo khene net in tiise welt resolwiirt wëre. Awer eriner tich tas unser “haupste xeefer”, Yeesus, khan tëne peser helfe wiis tuu. Tee khan tas yets un in te nay welt mache. Was Yeehoowa fon te elteste waart, is tas se sayn priiter un xwestere liipe un uf phase, un tas se “payxpiile fer ti trop” wëre. (w23.09 s. 29-30 ap. 13-14)

Meyer mise uf phase mit te mënxliche itee. Wën net, khente mer aan fange uns aan xtele soo wii ti layt woo Yeehoowa sayn kesetse unfoliche. (1 Kor. 3:19) “Ti kluucheet fon tiise welt” tuut ti layt ofts influentsiire Kot unfoliche. Etliche kriste in Përkamo un Tiatira sin influentsiirt kep fon te layt um tëne rom woo imoraalix waare un itole aan kepeet hon. Yeesus hot een xtark pexeet fer ti 2 kemaynte kexikt wayl se ti seksuaal imoraaliteet aan kenom hon. (Apo. 2:14, 20) Hayt, ti layt um uns rom khene uns influentsiire ferkheerte itee aan nëme. Unser familye orer layt woo mer khëne, khente fersuuche uns rom papele tas Yeehoowa sayn kesetse tsu xtreng sin un tas es peser weyer tëne unfoliche. Tsum payxpiil, tii khene saan tas es net wichtich is een rayn leepe nëme orer tas was ti Piipel saat richtich un ferkheert is, net mee hayt phast. Als mool khene mer tenke tas Yeehoowa sayn oryentiirunge net taytlich kenuuch sin. Tas khent een fersuuchung sin fer “iwer ti tinge woo kexrip sin [keen]”. (1 Kor. 4:6) (w23.07 s. 16 ap. 10-11)

Maria, Yeesus sayn mama, must ferxtërkt sin. Tii waar noch net ferhayrat, awer teet een khint kriin. Tii hat noch khee khiner ketsoo, awer teet uf phase te puup woo te Mesias wëre teet. Opwool se noch net sëks kemacht hat, must se fer Yoosef saan tas se xwanger waar. Sicher tas weyer aarich xweyer. (Luk. 1:26-33) Wii is Maria ferxtërkt kep? Tii hot hilef fon te anere kesuucht. Tii hot, tsum payxpiil, mee informatsyoone fer Kapryël ferlangt. (Luk. 1:34) “Klaych tëm noo, is Maria xnel tsu te përich rechyoon kang, tsu een xtat in Yutaa.” Tii wolt Elisapët, sayn parentin, pesuuche. Elisapët hot Maria keloopt un Yeehoowa hot se inspiriirt een ufmuutich profetsii aus xpreche iwer Maria sayn khint woo uf te welt khome teet. (Luk. 1:39-45) Maria hot kesaat: “[Yeehoowa] hot mechtiche tinge mit sayn aarm kemacht.” (Luk. 1:46-51) Yeehoowa hot Maria ferxtërkt torich Kapryël un Elisapët. (w23.10 s. 14-15 ap. 10-12)

Een spetsiifix numer fon Yeesus sayn tisipele is mit hayliche kayst kesalpt kep. Tiise 144.000 tuun wii priister mit Yeesus im himel tiine. (Apo. 14:1) Wii se uf te eyert sin, tuut Kot se mit hayliche kayst salpe un wii sayn khiner aan nëme. Tas Haylich Plats fom tapernakel representiirt tiise ekstra ferpiinung woo se mit Kot hon. (Rom. 8:15-17) Te Ale Haylichste fom tapernakel representiirt te himel, Yeehoowa sayn woonung plats. “Te foerhang” tswixich tas Haylich Plats un te Ale Haylichste representiirt Yeesus sayn khërper. Soo lang wii eyer een mënxliche khërper hat, khont eyer net im himel rin keen wii te kroos Hooche Priister fom kaystlich thempel. Wii eyer sayn mënxliche khërper fer ti mënxheet keopfert hot, hot Yeesus te weech uf kemacht tas al ti kesalpte kriste im himel leepe khente. Fer tiise peloonung kriin, mise se aach sayn mënxlich khërper lose. (Hep. 10:19, 20; 1 Kor. 15:50) (w23.10 s. 28 ap. 13)

Kiteoon is in ruu keplip wii ti mëner fon Efraiim tëm kritikiirt hon. Tee hot keheert wii se sich pexweert hon un tee hot net krop keantwort, awer mit kexik; soo hot eyer teemuut ketsaycht un tas hot ti mëner fon Efraiim peruycht. (Rich. 8:1-3) Soo wii Kiteoon, tuun kluuche elteste mit acht heere un net pees kepe wën se kritikiirt sin. (Tya. 3:13) Soo tuun se te friit in te kemaynt uf muute. Wën anere Kiteoon keloopt hon wayl eyer ti mityaniiter ap kewun hat, hot eyer ti eer tsu Yeehoowa kep. (Rich. 8:22, 23) Fer Kiteoon noo mache, sole ti elteste ti eer tsu Yeehoowa kepe weeche was se kemacht kriin. (1 Kor. 4:6, 7) Wole mer saan, tsum payxpiil, tas een elteste keloopt is weeche sayn apiliteet wii leerer. Tee khan antworte tas ti kans inlërnung fon te Piipel khomt orer tas meyer al fon Kot sayn Orkanisatsyoon keiipt sin. Als mool khene ti elteste sich frooe ep ti aat wii se in lërne ti eer tsu Yeehoowa kept orer ploos acht fer sich selepst ruuft. (w23.06 s. 4 ap. 7-8)

Wën mer net kriin was mer in kepeet ferlangt hon, khene mer uns frooe: ‘Sin ich tas richtich tings am ferlange?’ Ofts tenke mer tas mer wise was peser fer uns is. Awer ti tinge woo mer ferlange, khene in woerheet net kuut fer uns sin. Wën mer iwer een propleem peete, khan sin tas es een peser solutsyoon kept wii tii woo mer ferlange. Un im xtant, etliche tinge woo mer ferlange, xtime net mit Yeehoowa sayn wile. (1 Yo. 5:14) Tsum payxpiil, tenk aan eltere woo tsu Yeehoowa ferlange tas sayn khint wayter in te woerheet plaype sol. Es is net ferkheert soo was ferlange. Awer Kot tswingt nimant tëm tiine. Eyer wil hon tas meyer al, soo kaar unser khiner, raus suuche tëm aan peete. (Teut. 10:12, 13; 30:19, 20) Tes weeche, khente ti eltere tsu Kot ferlange tas eyer se helft tas hërts fom khint aan krayfe. Soo, wërt tas khint uf kemuut Yeehoowa liipe un sayn fraaynt sin. (Xpr. 22:6; Ëfe. 6:4) (w23.11 s. 21 ap. 5; s. 23 ap. 12)

Warom is ti anere treeste een wichtich aat fer tëne liip tsayche? Tëm noo een piiplix puuch, tas wort woo Phaul penutst hot un woo iwersetst is “treeste”, petayt “pay yemant plaype fer tëm uf muute wën eyer am layte is weeche een xlim propleem”. Soo, wën mer een pruuter woo am layte is treeste, helfe mer tëm wayter Yeehoowa tiine. Yeetes mool woo mer unser pruuter treeste, tsayche mer tëm liip. (2 Kor. 7:6, 7, 13) Mitlayt xpiire un troost kepe, sin ticht ferpunt. Wii soo? Wën yemant am layte is, wil een mitlaytich persoon tëm treeste un etwas mache fer tëm helfe. Soo, eyerst xpiire mer mitlayt; tan kepe mer troost. Kuk mool wii Phaul ferpiint Yeehoowa sayn mitlayt mit tëm troost woo eyer kept. Phaul pexraypt Yeehoowa wii “te Fater fon te parmhërtslichkheet un te Kot fom kanse troost”. (2 Kor. 1:3) (w23.11 s. 9-10 ap. 8-10)

Al Yeesus sayn nookeener khene xwiirichkheete waarte. Es waar soo mim aphostel Phaul. Tee hot fer ti priiter in Thesaloonika kexrip: “Wën mer mit aych waare, hon mer xon foer heyer kesaat tas meyer xwiirichkheete mit mache teete, un tas is was am pasiire is.” (1 The. 3:4) Un tee hot fer ti korinter kexrip: “Meyer wole hon, priiter, tas teyer tsu wise kriit iwer ti xwiirichkheet woo mer in te prowins fon Asya mit kemacht hon. (…) Meyer waare aarich ëngstlich iwer unser leepe.” (2 Kor. 1:8; 11:23-27) Ti kriste hayt khene aach unerxiitliche sorte xwiirichkheete waarte. (2 Tim. 3:12) Fiilaycht hon tayn fraaynte orer parente tich ferxpot wayls tuu aan Yeesus klaapst un tëm noo keest; im xtant waare se soo kaar krop mit tich. Host tuu xon propleeme in te aarwayt mit kemacht wayls tuu pextimt waarst imer eerlich sin? (Hep. 13:18) Host tuu xon opositsyoon fon te rechiirung mit kemacht wayls tuu iwer tayn hofnung fer ti anere kepreeticht host? Een tuun ti xwiirichkheet, Phaul saat tas mer uns fraye khene. (w23.12 s. 10-11 ap. 9-10)

Yaakop hot fiile propleeme mit kemacht. Tswaay fon Yaakop sayn soone — Simeoon un Lewii — hon uneer fer ti familye un Yeehoowa sayn naame keprung. Yaakop sayn liipe fraa, Rakël, is kextorep wii se sayn tsweete soon kriit hot. Un weeche een kroos hungernoot, must Yaakop, woo xon alt waar, sich tsum Ejipt wanere. (Xee. 35:16-19; 37:28; 45:9-11, 28) Opwool tiise propleeme al, hot Yaakop nii sayn klaape aan Yeehoowa un sayn ferxpreche ferloer. Un Yeehoowa hot Yaakop ketsaycht tas eyer Tëm kefalt hot. Tsum payxpiil: Yeehoowa hot Yaakop materyaalix keseechent. Un kewis is Yaakop aarich petanklich tsu Yeehoowa kep wii eyer Yoosef noch mool kesiin hot — te soon woo eyer ketenkt hot fiile yoore tsurik kextorep is. Weeche sayn ticht fraayntxaft mit Yeehoowa, khont Yaakop sayn propleeme aus hale. (Xee. 30:43; 32:9, 10; 46:28-30) Wën mer aach een ticht fraayntxaft mit Yeehoowa hale, khene mer ti unkewaartne propleeme aus hale. (w23.04 s. 15 ap. 6-7)

Im Psalm 23, hot Tawi ketsaycht tas eyer sich sicher waar tas Yeehoowa tëm keliipt un uf kephast hot. Tee hot ti xtark fraayntxaft pexrip tswixich tëm un sayn Xeefer, Yeehoowa. Tawi hot kelos Yeehoowa tëm lenke un tee hot kans uf Tëm ketraut. Tes weeche, hat eyer khee pang. Tawi wust tas Yeehoowa teet Sayn liip tsu tëm yeete taach fom leepe tsayche. Warom waar eyer sich soo sicher? Yeehoowa hot imer tas neetiches fer Tawi fersoricht. Un tes weeche, hot Tawi kexpiirt tas eyer kuut uf kephast waar. Tawi hat aach een fraayntxaft mit Yeehoowa un hot Tëm kefalt. Soo, waar Tawi sich sicher tas Yeehoowa tëm keliipt hot un wayter uf phase teet ekaal was noch pasiire khent. Tas hot tëm keholef froo un tsufriite sin, un net ëngstlich wëre. (Psal. 16:11) (w24.01 s. 29 ap. 12-13)

Fom 2^te Welt Kriich aan, hot Kot sayn folek fray kepreeticht in fiile lënter. Ti aarwayt is wërklich foran kang! Hayt, ti mitkliiter fon te Rechiirente Khërperxaft tuun wayter Yeesus sayn lenkung suuche. Tii wole oryentiirunge fer ti priiter kepe woo xtime mit was Yeehoowa un Yeesus too triwer tenke. Tii penutse aach sirkuyt superintentente un elteste fer ti kemaynte oryentiire. Ti kesalpte elteste — un, in woerheet, al ti elteste — sin in Yeesus sayn “rechts hant”. (Apo. 2:1) Kewis al ti elteste sin imperfekt un mache feeler. Als mool, hon Mooses, Yosuee un ti aphostele feeler kemacht. (Nuu. 20:12; Yos. 9:14, 15; Rom. 3:23) Awer meyer khene taytlich siin tas Yeesus tuut te troye sklaaw un ti elteste lenke un tee tuut net noo lose tas mache. Soo hon mer kuute uersache fer se traue aan te lenkung woo eyer uns kept torich tiise mëner. (w24.02 s. 23 ap. 13-14)

Fer Yeehoowa hayt kefale, mise mer iwer tëm xpreche mit liip un petanklichkheet. Wën mer in te preetich aarwayt sin, unser haupste opjetiiw is ti layt helfe tichter pay Yeehoowa khome un tëm siin soo wii meyer tëm siin. (Tya. 4:8) Es frayt uns fer ti layt tsayche wii ti Piipel Yeehoowa pexraypt un aach tëm sayn liip, kerechtichkheet, kluucheet, kraft un anere xeene kwaliteete. Meyer loope aach Yeehoowa un lose tëm froo wën mer uns aan xtrenge fer tëm noo mache. Soo, khene anere mërke tas mer anerste sin wii ti layt fon tiise xlechte welt. Un tii khene sich frooe warom tas soo is. (Mat. 5:14-16) Wën mer mit tëne um keen, khene mer se aus leye warom mer uns soo aan xtele. Tas khan eerliche layt uf muute tichter pay Kot khome. Wën mer Yeehoowa soo loope, lose mer Sayn hërts froo. (1 Tim. 2:3, 4) (w24.02 s. 10 ap. 7)

Fer een rayfe pruuter wëre, must tuu nutsliche apiliteete lërne. Tas tuut tich helfe flichte in te kemaynt aan nëme, een aarwayt fine un hale woo tich un tayn familye fersoricht un aach kuute fraayntxafte mit te anere hon. Lërn, tsum payxpiil, wii kuut leese un xraype. Ti Piipel saat tas eene frooe man hoolt tsayt yeete taach fer ti Piipel leese un too triwer noo tenke. (Psal. 1:1-3) Wën eyer ti Piipel yeete taach leest, tuut eyer lërne se tenke wii Yeehoowa tenkt un aach wii Sayn aanreete kuut aan wëne. (Xpr. 1:3, 4) Unser priiter un xwestere mise hilef fon mëner kriin woo wise wii in lërne un aanreete fon te Piipel kepe. Wëns tuu kuut leese un xraype weest, khanst tuu kuute reete un komentaare foer perayte woo ti anere helfe un sayn klaape ferxtërke. Tuu khanst aach importante phunkte uf xraype woo tich helfe tayn aychne klaape ferxtërke un anere uf muute. (w23.12 s. 26-27 ap. 9-11)

Wëns tuu pang host, tenk triwer noo aan was Yeehoowa im futuer macht, wën Satanaas un ti xlechte layt fernicht wëre. Een foerxtelung im Rechyonaal Konkrës fon 2014 hot ketsaycht wii een papa mit sayn familye kexproch hot iwer wii 2 Timoteus 3:1-5 weyer wën tiise wersikele iwer tas Paratiis xpreche teete: “In te nay welt, khome ti peste tsayte woo xon khom sin. Wayl ti mënxe tuun ti anere liipe, tuun kaystliche tinge liipe, tuun sayn krënse erkhëne, wëre teemuutich, tuun Kot loope, tuun ti eltere aan heere, wëre petanklich, troy. Tii tuun sayn familye fiil liipe, wëre wilich fer mit te anere xtime, tuun imer kuut iwer ti anere xpreche, tuun selepst kontrol, tsaamheet un liip fer ti kuutheet hon. Tii wëre layt woo ma traue khan; tii tuun noo kepe un sich selepst kleen siin. Tii tuun Kot eerlich liipe, net ti luste. Hal tich ticht tsu tiise layt.” Tuust tuu mit tayn familye un priiter fertseele iwer wii tas leepe in te nay welt wërt? (w24.01 s. 6 ap. 13-14)

Es is aarich ufmuutich se wise tas Yeehoowa sich mit sayn folek kefalt. Ti Piipel saat: “Yeehoowa frayt sich mit sayn folek.” (Psal. 149:4) Awer als mool, khene mer soo oone muut plaype tas mer uns frooe: ‘Tuut Yeehoowa sich mit mich kefale?’ Fiile fon Yeehoowa sayn troye tiiner in te piiplixe tsayte hon es aach xweyer kefun se klaape tas Kot sich mit tëne kefalt hot. (1 Sam. 1:6-10; Yoop 29:2, 4; Psal. 51:11) Ti Piipel lost es taytlich tas imperfekte mënxe khene Kot kefale. Too tefoer, mise mer aan Yeesus Kristus klaape un uns taafe lose. (Yoo. 3:16) Soo, tsayche mer fer ti anere tas mer uns fon unser sinte peroyt hon un tas mer tsu Yeehoowa ferxproch hon tëm sayn wile mache. (Aph. 2:38; 3:19) Yeehoowa frayt sich aarich fiil mit uns wën mer tiise xrite kepe fer tëm sayn fraaynte wëre. Wën mer unser pestes mache fer unser tetikatsyoon in hale, kefalt sich Yeehoowa mit uns un siit uns wii sayn tichte fraaynte. (Psal. 25:14) (w24.03 s. 26 ap. 1-2)

Meyer khene ti tisipele noo mache wën mer wayter preetiche soo kaar wën ti autoriteete uns xike noo lose tas mache. Meyer khene uns sicher sin tas Yeehoowa uns helfe tuut unser preetich aarwayt mache. Soo ferlang koraaj, kluucheet un hilef fer aus hale in kepeet. Fiile fon uns mise aus hale fiisixe orer emotsyonaale propleeme, te toot fon een keliipte, een xweyer situatsyoon in te familye, yachtung orer was aneres. Un tinge soo wii pantemiie un kriiche lose es noch xweyer tiise propleeme aus hale. Soo, mach tayn hërts tsu Yeehoowa uf. Xprech mit tëm wii wëns tuu mit een ticht fraaynt xpreche teest. Say tich sicher tas Yeehoowa tich helfe tuut. (Psal. 37:3, 5) Wayter peete, tuut uns helfe ‘ti xwiirichkheete aus hale’. (Rom. 12:12) Yeehoowa wees was sayn aanpeeter mit mache; “tee heert wën se tëm ruufe fer hilef kriin”. (Psal. 145:18, 19) (w23.05 s. 5-6 ap. 12-15)

Wën mer wichtiche ëntxlise mache mise, sole mer ferxteen “was Yeehoowa sayn wile is” un tan, uns tëm noo tiise wile aan xtele. (Ëfe. 5:17) Wën mer piiplixe funtamente fine woo in unser situatsyoon phase, sin mer uns am aan xtrenge fer se wise was Yeehoowa too triwer tenkt. Tiise funtamente aan wëne, khan uns helfe kuute ëntxlise mache. Unser faynt Satanaas, te “Xlechter”, wil hon tas mer soo fiil se tuun hon mit te sache fon te welt, tas mer khee tsayt fine fer unser tiinst tsu Yeehoowa. (1 Yo. 5:19) Een krist khent aan fange sich traan hale am kelt, xuul orer aarwayt, xtats aan te fiile aate wii eyer Yeehoowa peser tiine khent. Wën eyer tas mache teet, khent eyer tsayche tas eyer soo wii ti layt fon te welt am tenke is. Sicher, tiise tinge sin net ferkheert, awer tii sole nii im eyerste plats in unser leepe khome. (w24.03 s. 24 ap. 16-17)