Septemper

Kot hot Yeesus ti macht kep fer al ti mënxliche propleeme in te ray xtele. Torich sayn wunere, hot Yeesus pewayst tas eyer khan ti propleeme resolwiire woo mer nii selwer resolwiire khente. Tsum payxpiil, tee hot ti macht fer uns pefraye fon was hinich al unser propleeme is: ti sint woo mer keërpt hon un ales was too tefun khomt, wii ti krankheete un te toot. (Mat. 9:1-6; Rom. 5:12, 18, 19) Sayn wunere hon pewayst tas eyer khan “yeete sort krankheet” heele un soo kaar ti toote uf ruufe. (Mat. 4:23; Yoo. 11:43, 44) Tee hot aach ti kraft fer xlime wint xtorme peruyche un ti layt fon xlechte kayste pefraye. (Mar. 4:37-39; Luk. 8:2) Es lost uns in ruu se wise tas Yeehoowa soo een kroos macht fer sayn Soon kep hot. Meyer khene uns sicher sin tas ti ferxpreche fon kuute tinge unich Kot sayn Raych, sich erfiile tuun. Ti wunere woo Yeesus kemacht hot wii eyer een mënx waar, tsayche was eyer uf te kans eyert mache tuut wii Kheenich fon Kot sayn Raych im himel. (w23.04 s. 3 ap. 5-7)

Wën tayn kemaynt fiile puplikatoore hot un tuu tenkst tas tuu ofts net keruuft wërst, im xtant xpiirst tuu tas es peser weyer uf kepe. Awer los net noo tich aan meele fer een komentaar kepe! Tuu phaar komentaare fer yeete fersamlung foer perayte, net ploos een. Soo, wëns tuu net am aanfang keruuft wërst, kriist tuu anere oportuniteete soo lang wii ti fersamlung wayter keet. Wiis tuu tich foer peraytst fer Te Wachthorm xtuutyum, tenk aan wii yeete apsats mim theema fom artikel ferpunt is. Soo tuust tuu sicher phaar kuute komentaare hon fer torich tas xtuutyum kepe. Tuu khanst tich aach in richte fer komentaare kepe in apsetse woo iwer tiifer woerheete xpreche. Wayl se een pisye xweyer sin fer aus leye, im xtant weenicher tuun sich aan meele fer antworte kepe. Awer un wëns tuu torich phaar fersamlunge net keruuft wërst? Tuu khanst fer te fiirer foer te fersamlung saan was fer frooch tuu antworte wilst. (w23.04 s. 21-22 ap. 9-10)

Wayl Yoosef fërtich waar fer Yeehoowa sayn oryentiirunge noo keen, waar eyer een peser man fer Maria. In ferweenichst 3 situatsyoone, hot Kot tëm oryentiirunge iwer sayn familye kep. Yoosef hot yeete mool klaych aan keheert, aach wën es xweyer waar. (Mat. 1:20; 2:13-15, 19-21) Wayl eyer Kot sayn oryentiirunge noo kang is, hot Yoosef Maria kexitst un uf kephast. Meyer khene uns sicher sin tas Yoosef sayn aktsyoone hon Maria sayn liip un respekt tsu tëm noch xtërker kelos. Ferhayrate mëner, wii khent teyer Yoosef noo mache? Suucht aanreete woo sich aan te Piipel xtaype iwer wii ayre familye uf phase. Wën teyer tiise aanreete aan wënt, soo kaar wën tas petayt ënerunge mache, tuut teyer liip fer ayre fraae tsayche un ayre hayrat ferxtërke. Een xwester in Vanuatu, woo xon mee wii 20 yoore ferhayrat is, saat: “Wën mayn man Yeehoowa sayn oryentiirunge suucht un aan wënt, wërt mayn respekt tsu tëm kreeser. Ich xpiire mich sicher un ich traue uf tëm sayn ëntxlise.” (w23.05 s. 21 ap. 5)

Ti yuute woo fon Papiloon tsurik khemte, solte een “haylich folek” fer sayn Kot sin. (Teut. 7:6) Awer tii praychte ënerunge mache fer Yeehoowa kefale. Wayl ti meyerste yuute in Papiloon uf te welt khom sin, siits aus se sich traan keweent hon mit te aat wii ti papilooner ketenkt un sich aan kextelt hon. Fiile yoore noo ti eyerste israeliiter tsu Yeruusalem khom sin, hot te kowernatoer Neemias sich ferxrok wii eyer tsum wise kriit hot tas khiner woo in Israël uf te welt khom sin, ti xprooch fon te yuute net kelërnt hon. (Teut. 6:6, 7; Nee. 13:23, 24) Kot sayn Wort waar hauptseechlich in hepreeyx kexrip. Soo, wën ti khiner net tiise xprooch wuste, wii khente se lërne Kot liipe un aan peete? (Ëst. 10:3, 44) Yawool, ti yuute miste kroose ënerunge mache. Awer es weyer laychter tas mache wayl se in Israël keleept hon — tas plats woo ti phuer aanpeetung lamsam wiiter kextelt waar. (Nee. 8:8, 9) (w23.05 s. 15 ap. 6-7)

Es is xaat, awer ekaal wii fiil muut un selepst kontrol mer hon, khene tinge pasiire woo es xweyer lose unser tsiil trefe. Tsum payxpiil: “tinge woo mer net waarte” khene ti tsayt xteele woo mer penutse teete fer unser tsiil trefe. (Ekl. 9:11) Orer khan sin tas mer een propleem layte woo uns unmuutich un mit weenich kraft lost. (Xpr. 24:10) Weeche unser imperfektsyoon, khene mer uns in een aat aan xtele woo es noch xweyer lost unser tsiil trefe. (Rom. 7:23) Orer khan sin tas mer ploos miit sin. (Mat. 26:43) Was khan uns helfe too triwer wech khome? Los net noo tich aan xtrenge. Ti Piipel lost es taytlich tas, aach wën mer propleeme noo un noo mit mache, khene mer uns noch mool uf xtele. Yawool, wën mer uns wayter aan xtrenge fer unser tsiile trefe, aach wën tas xweyer is, tsayche mer tsu Yeehoowa wii fiil mer tëm kefale wole. Yeehoowa wërt aarich froo wën eyer siit tayn aanxtrengung fer tayn tsiil trefe! (w23.05 s. 30 ap. 14-15)

Wii pyoneer xafe, helft een yunge man lërne wii mit unerxiitliche sorte layt um keen. Es helft tëm aach kuut penutse tas kelt woo eyer fertiint un net mee aus kepe wii eyer kriit. (Fili. 4:11-13) Een kuut aat fer in te fol tsayt tiinst aan fange, is een hilef pyoneer sin, woo khan yemant fërtich lose fer wii rekulaar pyoneer tiine. Een pyoneer sin, khan te weech uf mache fer anere insetsunge in te fol tsayt tiinst — wii in te paueray proyëkte fon te Orkanisatsyoon orer in Petël xafe. Al ti priiter sole sich aan xtrenge fer sich kwalifitsiire fer sayn priiter un xwestere wii elteste tiine. Ti Piipel saat tas ti mëner woo sich too traan aan xtrenge, tuun “een kuut aarwayt winxe”. (1 Tim. 3:1) Awer eyerst mus eyer sich wii ministeryaale tiiner kwalifitsiire. Ti ministeryaale tiiner tuun ti elteste helfe ti priiter un xwestere in te kemaynt uf phase. Ti ministeryaale tiiner un ti elteste tuun sayn priiter un xwestere mit teemuut tiine un tii sin flaysich in te preetich aarwayt. (w23.12 s. 27-28 ap. 14-16)

Te kheenich Yosias waar 16 yoore alt wii eyer aan kefang hot Yeehoowa suuche. Tee wolt iwer Yeehoowa lërne un sayn wile mache. Awer tas leepe waar net laycht fer tiise yunge kheenich. In tëm sayn tsayt, hon ti meyerste layt falxe keeter aan kepeet. Soo Yosias must koraaj tsayche fer keeche ti falx aanpeetung khëmpfe, awer tee hot tas kemacht! Eep Yosias 20 yoore alt waar, hot eyer aan kefang ti falx aanpeetung in Israël wech nëme. (2 Kro. 34:1, 2) Aach wëns tuu yung pist, khanst tuu raus suuche Yosias noo mache. Too tefoer, lërn mee iwer Yeehoowa un sayn wunerliche kwaliteete. Tas tuut tich uf muute tich tsu Tëm tetikiire. Wii tuut tas tayn leepe petrefe? Mërk mool Luke sayn payxpiil, woo sich taafe kelos hot wii eyer 14 yoore alt waar. Wii eyer sich tsu Yeehoowa tetikiirt hot, wust eyer tas fon tiise xtun aan, teet Yeehoowa eyerst in sayn leepe khome un tas eyer sich aan xtrenge teet fer Kot kefale. (Mar. 12:30) Wëns tuu te selwiche wunx ëntwikelst, sicher tuust tuu fiile seechen kriin! (w23.09 s. 11 ap. 12-13)

Wii te aphostel Phaul sayn priif kexrip hot, waar ti kemaynt in Thesaloonika weenich wii 1 yoer alt. Tsiimlich sicher, hate sayn inkexteltne mëner weenich speryens; un khan sin tas se feeler kemacht hon. Noch soo, hon se respekt fertiint. Soo lang wii ti kroos tripulatsyoon tichter khomt, mise mer noch mee uf te elteste fon unser kemaynt traue fer oryentiirunge kriin. Es is wichtich yets lërne tëne liipe un respektiire, wayl im xtant wërts net meechlich oryentiirunge kriin fon te priiter in te haupst sets un fon te filyaal. Meyer sole uns net konsentriire aan tëne sayn imperfektsyoone, awer mer sole uns erinere tas Yeehoowa, torich Yeesus, tiise mëner lenkt. Yaa, ekaal was pasiirt, wole mer uns ferninftich hale! Soo wii een ayse khap een soltaat sayn khop kexitst hot, tuut unser hofnung fon retung unser ketanke xitse. Was tiise welt uns aan piit, hot khee weyert. (Fili. 3:8) Unser hofnung helft uns in ruu un fest plaype. (w23.06 s. 11-12 ap. 11-12)

Tii woo ti “tume fraa” heere, mise een ëntxlus mache: tuun se sayn inlaatung aan nëme orer ap xtose? Es kept kuute uersache fer uns wech fon te imoraalix aanxtelung hale. Ti “tume fraa” saat: “Tas waser woo ma xteelt, is siis.” (Xpr. 9:17) Was is “tas waser woo ma xteelt”? Ti Piipel ferklaycht te sëks tswixich een man un een fraa woo ferhayrat sin mit frixe waser. (Xpr. 5:15-18) Een man un een fraa woo tëm noo tas kesets ferhayrat sin, khene sëks eene mit te aner mache. Awer tas is kans anerste wii “tas waser woo ma xteelt”. Tas khan petayte sëks woo ferpoot orer imoraalix is. Ofts tii woo imoraaliteet pratikiire, fersuuche tas fon te anere ferxtekele, wii een xpitspuup woo fersuucht etwas xteele. “Tas waser woo ma xteelt” khan hauptseechlich siis aus siin wën ti layt woo ti imoraaliteet pratikiire tenke tas nimant tas tsum wise kriit. Awer tii sin sich selepst am hinerkeen, wayl Yeehoowa siit ales. Niks khent xlimer sin wii Yeehoowa sayn tsuxtimung ferliire; tas is sicher net “siis”. (1 Kor. 6:9, 10) (w23.06 s. 22 ap. 7-9)

Un wëns tuu xpiirst tas tayn kepeete automatix kep sin orer tas tuu ploos preetiche keest weeche tayn rutiin? Tenk net tas tuu Yeehoowa sayn kayst ferloer host. Wayl mer imperfekt sin, khene unser xpiirunge hooche un niitriche phunkte hon. Wën tayn muut sich ferxweecht, tenk am aphostel Phaul. Opwool eyer fersuucht hot Yeesus noo mache, wust eyer tas eyer als mool net een xtarke muut hët fer sayn flicht erfiile. Phaul waar pextimt sayn tiinst erfiile ekaal wii eyer sich xpiire teet. Kraat soo, mach net ëntxlise woo sich ploos aan tayn xpiirunge xtaype. Say pextimt se mache was richtich is ekaal wiis tuu tich xpiirst. Soo, khene tayn xpiirunge sich mit te tsayt ënere. (1 Kor. 9:16) (w24.03 s. 11-12 ap. 12-13)

Een aat wii mer khene liip fer unser priiter un xwestere tsayche, is tëne sayn fraaynte sin un tsayt mit tëne fertraype. (2 Kor. 6:11-13) Fiile fon uns sin in een kemaynt woo ti priiter unerxiitliche kultuure, personaliteete un kewoonheete hon. Meyer khene unser liip tsu tëne al ferxtërke wën mer uns traan hale aan tëne sayn kuute kwaliteete. Wën mer lërne ti layt siin wii Yeehoowa se siit, tsayche mer unser liip tsu tëne. Ti liip wërt aarich wichtich sin torich ti kroos tripulatsyoon. Wën se aan fangt, wii meecht Yeehoowa uns xitse? Kuk mool was eyer sayn folek aan kereet hot se mache wii ti friirix Papiloon atakiirt kep is: “Keet, mayn folek, keet in ayre tsimere rin un macht ti teere hinich aych tsu. Ferxtekelt aych fer een tsayt pis ti wuut torich keet.” (Isa. 26:20) Khan sin tas mer mise tiise selwich oryentiirung aan heere torich ti kroos tripulatsyoon. (w23.07 s. 6-7 ap. 14-16)

Es mus taytlich fer ti anere sin, torich tayn aanxtelung, tas tuu net xtreng pist. Froo tich: ‘Meechte ti layt tenke tas ich tolerant un wilich fer mich aan phase sin? Orer siin se mich wii yemant woo xtreng, krop un tikhopich is? Tuun ich ti anere heere un mich aan phase wëns meechlich is?’ Woo peser mer Yeehoowa un Yeesus noo mache, woo peser tuun mer uns aan phase. Meyer mise tas mache wën unser situatsyoon sich ënert. Soo sorte ënerunge khene uns unkewaartne propleeme pringe. Tsum payxpiil: uf een mool, khene mer een xlim krankheet kriin. Orer khan sin tas unkewaartne ënerunge in te ekonomii orer in te rechiirung unser leepe aarich xweyer lose. (Ekl. 9:11) Es khan soo kaar xweyer fer uns sin wën ti Orkanisatsyoon ënert een insetsung woo mer hon. Tuu khanst es hin kriin tich aan phase mit tayn nay situatsyoon wëns tuu tiise 4 xrite kepst: (1) ferxtee tas tayn situatsyoon yets anerste is, (2) konsentriir tich aan was tuu yets mache tuust, net aan was tuu friier kemacht host, (3) hal tich traan aan te kuute tinge fon tayn leepe un (4) helf ti anere. (w23.07 s. 22 ap. 7-8)

Te profeet Tanyël waar noch yung wii eyer inkexpërt tsu Papiloon kenom kep is, wayt wech fon Yeruusalem. Noch soo, hon ti papilooner sich ferwunert mit was se kesiin hon: Tanyël ‘hat khee feele un hot kuut aus kesiin’ un tee waar fon een wichtich familye. (1 Sam. 16:7) Tes weeche hon se tëm keiipt fer im palas tiine. (Tan. 1:3, 4, 6) Yeehoowa hot Tanyël keliipt wayl tiise man raus kesuucht hot leaal tsu Kot plaype. In woerheet, wii Yeehoowa kesaat hot tas Tanyël soo wii Noee un Yoop waar, tsiimlich sicher waar Tanyël ploos unkefeer 20 yoore alt. Yawool, foer Yeehoowa, waar te yunge Tanyël soo kerecht wii Noee un Yoop, woo hate Kot troy ketiint torich fiile yoore. (Xee. 5:32; 6:9, 10; Yoop 42:16, 17; Ese. 14:14) Un Yeehoowa hot wayter Tanyël keliipt torich sayn lang un interesant leepe. (Tan. 10:11, 19) (w23.08 s. 2 ap. 1-2)

Wëns tuu ëntxlise teest een haus khaafe orer net, sicher teest tuu yeete kleenichkheet unersuuche. Meyer khene tas selwiche mache wën mer ti Piipel leese un xtutiire. Wëns tuu ploos xnel triwer leest, im xtant lërnst tuu ploos ti haupste inlërnunge — “ti haupste funtamente fon Kot sayn hayliche wërter”. (Hep. 5:12) Soo wiis tuu must im haus rin keen fer mee kleenichkheete iwer tëm lërne, must tuu aach ti Piipel xtutiire fer peser ferxteen was se saat. Een kuut itee is xtutiire wii ti tinge in te Piipel naner ferpunt sin. Fersuuch ferxteen net ploos was tuu klaapst, awer aach warom tuu too traan klaapst. Fer ti kanse teele fon Kot sayn Wort ferxteen, sin etliche tinge woos tuu must tiifer xtutiire. Te aphostel Phaul hot ti kriste uf kemuut ti Piipel flaysich xtutiire fer kenau ferxteen “wii prayt, lang, hooch un tiif ti woerheet is”. Soo khente se ufm klaape noch peser “kewortselt un fest kextelt” wëre. (Ëfe. 3:14-19) Meyer mise tas selwiche mache. (w23.10 s. 18 ap. 1-3)

In te Piipel, fine mer fiile payxpiile fon layt woo ketultich waare. Was mënst tuu een perseenlich xtuutyum too triwer mache? Tsum payxpiil: opwool Tawi aarich yung waar wii eyer kesalpt kep is fer kheenich iwer Israël sin, must eyer phaar yoore waarte fer ti rechiirung kriin. Simeoon un Ana hon Yeehoowa troy ketiint soo lang wii se te ferxprochne Mesias kewaart hon. (Luk. 2:25, 36-38) Soo lang wiis tuu xtutiirst, suuch ti antwort fer tiise frooche: ‘Was meecht tiise persoon keholef hon ketult tsayche? Was fer nutse hot se too temit kriit? Wii khan ich tiise persoon noo mache?’ Tuu khanst aach nutse kriin wëns tuu lërnst iwer tii woo net ketult ketsaycht hon. (1 Sam. 13:8-14) Tuu khanst tich frooe: ‘Warom hon se ti ketult ferloer? Was fer xlechte tinge sin mit tëne too teweeche pasiirt?’ (w23.08 s. 25 ap. 15)

Te aphostel Pheeter waar leaal kewees. Tee hot niks kelos tëm um hale Yeesus noo keen. Tsum payxpiil: een mool hot Yeesus was kesaat woo sayn tisipele net ferxtan hon. (Yoo. 6:68) Xtats een ausleyung waarte, hon fiile noo kelos Yeesus noo keen; awer Pheeter, net. Tee hot kesaat tas ploos Yeesus “ausxprechunge fon eewiche leepe” hat. Yeesus wust tas Pheeter un ti anere aphostele tëm im xtich lose teete. Noch soo, hot eyer kesaat tas eyer sich sicher waar tas Pheeter tsurik khemt un troy weyer. (Luk. 22:31, 32) Yeesus hot ferxtan tas “te kayst is wilich, awer tas flayx is xwach”. (Mar. 14:38) Soo kaar wën Pheeter kesaat hot tas eyer Yeesus net kekhënt hot, hot Yeesus tëm net uf kep. Noo sayn ufxtaye, is eyer fer Pheeter tsum foer xayn khom, sicher wën tee aleen waar. (Mar. 16:7; Luk. 24:34; 1 Kor. 15:5) Tenk wii tas meecht Pheeter ferxtërkt hon, woo aarich traurich weeche sayn feeler waar! (w23.09 s. 22 ap. 9-10)

Yeehoowa fertsayt, orer tekt, ti sinte fon tëne woo aan tëm klaape. Tee tuut se kans fertsaye un tuut sich net mee fon sayn sinte erinere. (Psal. 32:1, 2) Foer tëm, sin tiise layt kerecht un unxultich weeche sayn klaape. Opwool Apraham, Tawi un anere troye tiiner fon Yeehoowa kerecht aus kexproch kep sin, waare se noch imperfekte un sintiche layt. Awer weeche sayn klaape, waare se unxultich foer Kot sayn aue, hauptseechlich wën ma se ferklaycht mit te layt woo Kot net aan kepeet hon. (Ëfe. 2:12) In sayn priif fer ti romaaner, hot te aphostel Phaul aus keleet tas mer mise klaape hon fer een ticht fraayntxaft mit Kot paue. Tas waar soo mit Apraham un Tawi un tas is aach soo mit uns. (w23.12 s. 3 ap. 6-7)

Hayt, hon al ti kriste ti eer fer opfere fer Yeehoowa mache wën se sayn tsayt, kraft un tinge penutse fer tëm tiine. Wën mer unser pestes kepe, tsayche mer tas mer petanklich sin fer ti eer woo mer hon fer Kot aan peete. Te aphostel Phaul hot kexrip iwer etliche tinge woo mer net uf sayt lose sole, soo lang wii mer Kot aan peete. (Hep. 10:22-25) Too tepay is tsu Yeehoowa peete, tsu te anere preetiche, uns in te kemaynt fersamele un eene ti anere uf muute ‘noch mee wën mer siin Yeehoowa sayn taach tichter khome’. Neekst am ën fom puuch Apokalipsis, hot Yeehoowa sayn engel kesaat: “Tuu Kot aan peete!” Tee hot tas 2 mool kesaat fer se tsayche wii wichtich tas is. (Apo. 19:10; 22:9) Wole mer uns nii ferkese fon te tiife tinge woo mer iwer Yeehoowa sayn kroose kaystlich thempel kelërnt hon un iwer ti xeen priwilëj woo mer hon fer unser kroos Kot aan peete! (w23.10 s. 29 ap. 17-18)

Meyer al wole wayter “eene te anere liipe”. Awer mer sole uns net ferkese was Yeesus kesaat hot: “Ti liip fon te meyerste [wërt] khalt.” (Mat. 24:12) Yeesus waar net am saan tas ti meyerste fon sayn tisipele teete noo lose sich naner liipe. Awer mer sole uns uf phase tas ti aanxtelung fon te welt uns net influentsiirt. Soo es kept een wichtich frooch: Was tuut uns helfe se wise ep unser liip tsu te priiter xtark is? Een aat fer tas mache, is unser aanxtelung in etliche situatsyoone noo kuke. (2 Kor. 8:8) Pheeter hot iwer eene fon tëne kexproch: “Iwer ales, tuut tiif liip eene tsu te anere hon, wayl ti liip tuut fiile sinte teke.” (1 Phe. 4:8) Yaa, ti xwacheete un imperfektsyoone fon te anere khene unser liip proope. (w23.11 s. 10-11 ap. 12-13)

Meyer sin net Yeesus sayn kepoot iwer liip am aan heere wën mer liip ploos fer etliche in te kemaynt tsayche un fer anere, net. Kewis, soo wii mit Yeesus pasiirt is, fiilaycht xpiire mer uns tichter pay etliche priiter fon te kemaynt. (Yoo. 13:23; 20:2) Awer te aphostel Pheeter muut uns uf uns aan xtrenge fer al unser priiter un xwestere liipe, wayl se teel fon unser familye sin. (1 Phe. 2:17) Pheeter hot uns aan kereet “een tiife liip, fom hërts, eene tsum anere hon”. (1 Phe. 1:22) Too, “tiife liip” petayt yemant liipe soo kaar wën tas xweyer is. Tsum payxpiil, wole mer saan tas eene pruuter uns pelayticht orer wee kemacht hot. Fiilaycht wole mer tsurik petsaale, xtats liip tsayche. Awer Pheeter hot mit Yeesus kelërnt tas soo een sort aanxtelung Yeehoowa net kefalt. (Yoo. 18:10, 11) Tee hot kexrip: “Tuut net xlechtes mit xlechtes un aach net pelaytichung mit pelaytichung tsurik petsaale. Xtats tas, tuut mit een seechen tsurik petsaale.” (1 Phe. 3:9) Wëns tuu een tiif liip host, wërst tuu kuut un ketultich. (w23.09 s. 29 ap. 9-11)

Kans fiks, wëre ti khiner folyeeriche mënxe. Tas tuut uns soo kaar ferwunere, kël? Es khan aus siin tas khee aanxtrengung too hiner traan is. Awer fer een rayfe krist wëre, mise mer mii mache. (1 Kor. 13:11; Hep. 6:1) Fer tiise tsiil trefe, mise mer een xtark fraayntxaft mit Yeehoowa hon. Meyer mise aach sayn hayliche kayst hon, woo uns helft kwaliteete ëntwikele woo Tëm kefale, nutsliche apiliteete lërne un uns foer perayte fer ti flichte woo mer im futuer kriin khene. (Xpr. 1:5) Yeehoowa hot ti mënxe kemacht tas se mëner orer fraae wëre. (Xee. 1:27) Ti mëner un ti fraae sayn khërper sin anerste. Awer tas is net ti eensich unerxiit tswixich tëne. Tsum payxpiil, Yeehoowa hot ti mëner un ti fraae kemacht fer spetsiifixe flichte uf phase. Soo, mise se ti neetiche kwaliteete un apiliteete ëntwikele woo se helfe tuun sayn responsapiliteete uf phase. (Xee. 2:18) (w23.12 s. 18 ap. 1-2)

Wolt Yeesus hon tas ti anere Kot sayn naame penutse teete? Sicher. Etliche relichyeese fiirer hon fiilaycht ketenkt tas Kot sayn naame tsu haylich waar fer aus xpreche. Awer Yeesus hot nii noo kelos Yeehoowa sayn naame loope weeche soo sorte tratitsyoone woo sich net aan te Piipel kextaypt hon. Tenk aan te tsayt woo Yeesus in te rechyoon fon te keraseener waar un een man keheelt hot woo een temoon in sich hat. Ti layt hon pang kriit un hon aan kehal tas Yeesus faart keengt. Tes weeche is eyer net tat keplip. (Mar. 5:16, 17) Noch soo, wolt Yeesus hon tas ti layt fon te rechyoon iwer Yeehoowa sayn naame wise teete. Soo hot eyer fer te man woo keheelt waar, kesaat tas eyer solt fer ti layt fertseele iwer was Yeehoowa kemacht hat, net iwer was Yeesus kemacht hat. (Mar. 5:19) Tee wil tas selwiche hayt hon — tas mer Yeehoowa sayn naame uf te kans welt pekhant mache. (Mat. 24:14; 28:20) Wën mer unser teel mache, kefale mer unser kheenich Yeesus. (w24.02 s. 10 ap. 10)

Es is een seechen teel fon Yeehoowa sayn Orkanisatsyoon sin torich tiise xweyere letste taache. Tas leepe in tiise welt wërt yeete taach xlimer, awer Kot kept uns ti priiter un xwestere fer uns helfe. (Psal. 133:1) Un tee helft uns een froo familye hon. (Ëfe. 5:33–6:1) Tee kept uns aach ti kluucheet woo mer prayche fer inerlich friit hon. Awer meyer mise uns aan xtrenge fer wayter Yeehoowa troy tiine, wayl als mool ti imperfektsyoone fon te anere khene uns pelaytiche. Khan aach sin tas unser aychne xwacheete uns traurich lose, hauptseechlich wën mer ti selwiche feeler noo un noo mache. Meyer mise aus hale in Yeehoowa sayn tiinst (1) wën een pruuter orer xwester uns pelayticht, (2) wën unser man orer fraa uns traurich lost un (3) wën mer uns selepst traurich lose weeche unser feeler. (w24.03 s. 14 ap. 1-2)

Tan un wan, tuust tuu speryense heere iwer priiter woo ëntxlist hon mee in Yeehoowa sayn tiinst mache. Fiilaycht hon se ti Xuul fer Preeticher fom Raych kemacht orer sich kewanert tsu een plats woo ti neetichkheet kreeser is. Wën tayn situatsyoon tich erlaupt, tas is aach een kuut tsiil fer tich. Yeehoowa sayn tiiner tuun imer aate suuche fer tëm peser tiine. (Aph. 16:9) Un wën es net meechlich is tas yets mache? Tenk net tas tuu weenicher pist wii tii woo tas mache khene. Tas wichtichste is wayter aus hale. (Mat. 10:22) Ferkes tich net tas Yeehoowa froo wërt wëns tuu tas pestes in tayn situatsyoon machst. Tas is een wichtich aat wiis tuu khanst Yeesus wayter noo keen noom taaf. (Psal. 26:1) (w24.03 s. 10 ap. 11)

Unser himlixe Fater ferxprecht uns fertsaye wën mer uns peroye. (Psal. 86:5) Soo, wën mer uns wërklich peroyt hon, khene mer traue aan was Yeehoowa saat — tee hot uns fertsayt. Eriner tich tas Yeehoowa net xtreng is. Tee tuut nii mee fon uns ferlange wii mer kepe khene. Soo lang wii mer uns aan xtrenge, wërt eyer froo too temit. Tenk aach aan piiplixe payxpiile fon layt woo Yeehoowa mit sayn kans hërts ketiint hon. Tsum payxpiil, te aphostel Phaul hot torich fiile yoore xtram kexaft. Tee is tausente kilometer kereest un hot fiile kemaynte kekrintet. Awer tan, hot sayn leepe sich keënert un tee khont net mee soo fiil preetiche. Meecht Yeehoowa noo kelos hon sich mit tëm kefale? Nee. Phaul hot wayter kemacht was eyer khont un Yeehoowa hot tëm keseechent. (Aph. 28:30, 31) Kraat soo, was mer tsu Yeehoowa mache khene, khan sich als mool ënere. Awer was wichtich fer tëm is, is warom mer tas mache. (w24.03 s. 27 ap. 7, 9)

Yeesus sayn kepeete hon een payxpiil fer sayn tisipele kelos. Tee hot ofts kepeet; awer tee must tsayt hoole fer tas mache, wayl tee hat fiil se tuun un es waare imer fiile layt pay tëm. (Mar. 6:31, 45, 46) Tas eyer khent aleen sin fer se peete, is eyer frii uf kextii. Un ferweenichst een mool, hot eyer ti kans nacht kepeet foer een wichtich ëntxlus mache. (Luk. 6:12, 13) Un Yeesus hot noo un noo kepeet in te nacht eep eyer kextorep is — kraat foer tas xweyerste teel fon sayn flicht too uf te eyert erfiile. (Mat. 26:39, 42, 44) Was lërne mer mit Yeesus sayn payxpiil? Aach wën mer fiil se tuun hon, mise mer tsayt hoole fer se peete. Fer tas hin kriin, im xtant mise mer een pisye friier uf xtaye orer een pisye xpeeter xloofe keen. Soo tsayche mer tsu Yeehoowa tas mer weyert kepe fer tiise ekstra kexenk. (w23.05 s. 3 ap. 4-5)

Mërk mool im tekst fon hayt tas Yeehoowa ferklaycht sayn liip mit waser. Tas is in te kesalpte sayn hërts “aus kexut”. Een puuch woo ti Piipel komentiirt, pexraypt tas wii “een flus”. Tas tuut taytlich tsayche wii fiil Yeehoowa ti kesalpte liipt un ti kesalpte wise tas. (Yuu. 1) Te aphostel Yoohan hot tiise xpiirunge aus keleet wii eyer kexrip hot: “Kuk mool wii kroos is te Fater sayn liip tsu uns — soo kroos tas mer Kot sayn khiner kenënt sin!” (1 Yo. 3:1) Awer meecht Yeehoowa ploos ti kesalpte liipe? Nee, tee hot sayn liip tsu uns al pewayst. Was is ti kreest pewaysung fon Yeehoowa sayn liip? Tas fray khaaf opfer — noch nii hot yemant soo fiil liip ketsaycht! (Yoo. 3:16; Rom. 5:8) (w24.01 s. 28 ap. 9-10)

Tiise tekst tsaycht was Tawi keholef hot torich sayn pang triwer wech khome. Opwool sayn leepe ins kefoer waar, hot eyer triwer noo ketenkt aan was Yeehoowa fer tëm im futuer mache teet. Tawi wust tas Yeehoowa teet tëm in te richtich tsayt rete; tas is soo wayl Kot kesaat hat tas Tawi te neekste kheenich fon Israël weyer. (1 Sam. 16:1, 13) Fer Tawi, Yeehoowa teet sicher erfiile sayn ferxpreche. Was hot Yeehoowa fer tich ferxproch? Meyer waarte net tas eyer uns fon al unser propleeme xitst. Awer ekaal te propleem woos tuu hayt mit machst, Yeehoowa tuut tas in te nay welt wech xafe. (Isa. 25:7-9) Sicher is unser Kriatoer xtark kenuuch fer ti toote uf ruufe, fer unser krankheete un emotsyonaale wee heele un fer ti keechner fernichte. (1 Yo. 4:4) (w24.01 s. 6 ap. 12-13)

Tenk triwer noo iwer tayn tetikatsyoon un taaf. Tuu host tiise xrite kep wayl tuu wolst Yeehoowa sayn sayt pay xteen. Tenk tich traan was tich keholef hot ti sicherheet kriin tas tuu ti woerheet kefun hast. Tuu host Yeehoowa khëne kelërnt un aan kefang Tee wii tayn himlixe Fater liipe un respektiire. Tuu host klaape ëntwikelt un pist uf kemuut kep tich peroye. Tuu host noo kelos tinge mache woo Yeehoowa hast un host aan kefang Tëm sayn wile mache. Wiis tuu kemërkt host tas Kot tich fertsayt hot, host tuu tich peser kexpiirt. (Psal. 32:2) Tuu host aan kefang tsu te fersamlunge keen un aach fer ti anere preetiche iwer ti wunerliche tinge woos tuu kelërnt host. Yets, noo tayn tetikatsyoon un taaf, pist tuu am laafe im weech woo tsum leepe nëmt un tuu pist pextimt net raus keen. (Mat. 7:13, 14) Yawool, wole mer uns fest xtele un imer Yeehoowa liipe un aan heere. (w23.07 s. 17 ap. 14; s. 19 ap. 19)

Wëns tuu triwer noo tenkst aan tayn ferxpreche fon tetikatsyoon, kriist tuu kraft fer tich keeche kwalkee proop xtele. Tsum payxpiil, teest tuu aan fange romantix interes tsayche aan yemant sayn fraa orer man? Sicher net! Tuu host xon “nee” fer tas kesaat. Wëns tuu net lost ti ferkheerte winxe sich ëntwikele, tuust tuu tich xoone fon te aarwayt fer tas noo heyer aus rope. Soo tuust tuu tich wech hale fom “weech fon te xlechte mënxe”. (Xpr. 4:14, 15) Aan Yeesus sayn payxpiil triwer noo tenke, khan uns helfe. Tee waar pextimt sayn Fater kefale. Soo wii Yeesus, say pextimt klaych ap xtose kwalkee tings woo khent traurich lose te Kot tsu weem tuu tetikiirst pist. (Mat. 4:10; Yoo. 8:29) Ti proope un fersuuchunge kepe tich ti xans fer se tsayche tas tuu pextimt pist Yeesus “wayter noo keen”; un tuu khanst tich sicher sin tas Yeehoowa tich helfe tuut tas mache. (w24.03 s. 9-10 ap. 8-10)