Akust

Mërk mool 2 wichtiche phunkte in tiise psalm: (1) kerechte layt mache propleeme mit un (2) Yeehoowa pefrayt uns fon unser propleeme. Wii tuut Yeehoowa uns pefraye? Tee helft uns, tsum payxpiil, een richtich mënung iwer tas leepe in tiise welt hon. Kot ferxprecht tas mer froo wëre wën mer tëm tiine. Awer Tee karantiirt net tas unser leepe fray fon propleeme wërt. (Isa. 66:14) Kot wil hon tas mer uns aan tëm futuer traan hale — ti tsayt wën mer een froo leepe kriin, tas sort leepe woo Eyer fer uns winxt. (2 Kor. 4:16-18) Pis tat hin, tuut eyer uns helfe tëm yeete taach tiine. (Yaa. 3:22-24) Mit te payxpiile fon Kot sayn troye tiiner fon te piiplixe tsayte un hayt tsu taach, lërne mer tas mer khene unkewaartne propleeme mit mache; awer wën mer uf Yeehoowa traue, tuut eyer uns imer uf phase. (Psal. 55:22) (w23.04 s. 14-15 ap. 3-4)

Meyer khene lërne mim payxpiil fon Yoosef un Maria, woo fërtich waare fer ti autoriteete aan heere soo kaar wën es xweyer waar. (Luk. 2:1-6) Te Sësar Aukusto hot een kesets kemacht tas al unich tëm Romaanix Raych solte tsu sayn muter xtat keen fer sich in xraype. Yoosef un Maria muste pis Petleheem reese, woo unkefeer 150 km wayt waar un tii muste fiile hiwele ruf un runer keen. Tiise rees weyer net laycht, hauptseechlich fer Maria, woo unkefeer 9 moonate xwanger waar. Fiilaycht hon se sich ketanke kemacht weeche Maria un tas nëneche sayn kesuntheet. Un wën tas nëneche uf te welt khome teet soo lang wii se am reese waare? Tas waar net een keweenliche nëneche, awer te ferxprochne Mesias. Meecht se tas wii ausreet kep hon fer ti rechiirung unfoliche? Yoosef un Maria hate uersache fer sich ketanke mache, awer tii hon tas kesets kefolicht. Yeehoowa hot sayn folichkheet keseechent. Maria is in sicherheet pis Petleheem khom, sayn nëneche is kesunt uf te welt khom, un tii hot soo kaar keholef een piiplix profetsii erfiile. (Mik. 5:2) (w23.10 s. 8 ap. 9; s. 9 ap. 11-12)

Un wën komentaare in te fersamlunge kepe tich nerwees lost? Fiilaycht es khan tich helfe tich kuut foer perayte. (Xpr. 21:5) Woo peser tuu te artikel khënst, woo laychter wërts fer tich komentaare kepe. Los aach tayn antwort khorts; soo wërst tuu net soo nerwees. (Xpr. 15:23; 17:27) Wëns tuu een khorts komentaar kepst mit tayn aychne wërter, tuust tuu tsayche tas tuu tich kuut foer perayt host un tas tuu te artikel kuut ferxtan host. Un wëns tuu fersuuchst tiise itee aan wëne, awer noch soo wërst tuu nerwees fer mee wii eene orer tswaay komentaare kepe? Say tich sicher tas Yeehoowa fiil weyert kept fer tayn aanxtrengung fer tayn pestes mache. (Luk. 21:1-4) Unser pestes mache petayt net een iwerxweyer last iwer uns tuun. (Fili. 4:5) Soo, ëntxlis was tuu mache khanst, xtel tas tsiil fer tas trefe un ferlang Yeehoowa sayn hilef in kepeet fer tayn hërts in ruu lose. Fer aan fange, khanst tuu tas tsiil xtele fer een khorts komentaar kepe. (w23.04 s. 21 ap. 6-8)

Te aphostel Phaul ferklaycht uns mit soltaate woo wachsam un aan ketsoo fer te kriich sin. Een soltaat sol fërtich fer se khëmpfe sin imer wëns kriich kept. Kraat soo, plaype mer fërtich fer Yeehoowa sayn taach, mim prust xilt fon klaape un liip un aach te ayse khap fon hofnung aan ketsoo. Een prust xilt hot een soltaat sayn hërts kexitst. Te klaape un ti liip xitse unser simpoolixe hërts. Tii helfe uns wayter Kot tiine un Yeesus noo keen. Te klaape lost uns sicher tas Yeehoowa uns peloone tuut wën mer tëm mit unser kanse hërts suuche. (Hep. 11:6) Es muut uns aach uf leaal tsu unser fiirer Yeesus plaype, soo kaar wën mer layte. Wii khene mer unser klaape ferxtërke fer mit te xwiirichkheete um keen? Meyer khene lërne mit te payxpiile fon layt fon unser taache woo troy keplip sin opwool ti yachtung orer ekonoomixe propleeme. Un meyer khene uns wech hale fon te fal fom materyalismus wën mer noo mache tii woo sayn leepe keweenlicher kelos hon fer tas Raych im eyerste plats tuun. (w23.06 s. 10 ap. 8-9)

Selepst kontrol is ti apiliteet fer eene sayn aychne xpiirunge un aktsyoone kontroliire. Meyer mise selepst kontrol hon fer uns tswinge unser tsiile trefe, hauptseechlich wën es xweyer is een tsiil trefe orer wën mer khee muut hon. Te selepst kontrol is een teel fon te frucht fon Kot sayn kayst. Soo ferlang tas in kepeet fer tiise wichtich kwaliteet ëntwikele. (Luk. 11:13; Kal. 5:22, 23) Waart net ti perfekt situatsyoon. In tiise welt, tuun mer tsiimlich sicher nii een perfekt situatsyoon hon. Wën mer soo was waarte, im xtant tuun mer unser tsiil nii trefe. Fiilaycht es feelt uns ti muut wayl es aus siit tas unser tsiil tsu xweyer is fer se trefe. Wën es soo is, khenst tuu tayn tsiil in kleene tsiile teele? Tsum payxpiil, wën tayn tsiil een kristlich kwaliteet ëntwikele is, was mënst tuu eyerst tich aan xtrenge fer tiise kwaliteet in kleene tinge tsayche? Wën tayn tsiil is ti kans Piipel leese, khenst tuu eyerst tich orkanisiire fer een kleen pisye tsayt hoole fer tas mache? (w23.05 s. 29 ap. 11-13)

In tiise letste taache, tuut Yeehoowa sayn Orkanisatsyoon penutse fer uns imer kaystlich esmitel kepe fer wayter ufm “Weech fon Haylichkheet” keen. (Isa. 35:8; 48:17; 60:17) Wën yemant een Piipel xtuutyum aan nëmt, hot eyer ti oportuniteet fer aan fange ufm “Weech fon Haylichkheet” keen. Etliche tuun ploos een khorts xtik uf tiise weech laafe, un tan keen se raus. Anere sin pextimt uf tiise weech plaype pis se sayn tsiil trefe. Was fer tsiil? Fer tii woo ti himlix hofnung hon, te “Weech fon Haylichkheet” nëmt tsu “Kot sayn paratiis” im himel. (Apo. 2:7) Fer tii woo ti hofnung hon fer uf te eyert leepe, tiise weech nëmt tsu te perfektsyoon, am ën fon te 1.000 yoore. Wëns tuu uf tiise weech reest, kuk net tsurik! Un pis tuu tayn rees tsu te nay welt fërtich kriist, kee fon tiise weech net raus. (w23.05 s. 17 ap. 15; s. 19 ap. 16-18)

Wëns tuu tenkst aan ales was Yeehoowa fer tich kemacht hot, wërst tuu petanklich un es tuut tich uf muute tayn leepe tsu tëm tetikiire. (Psal. 116:12-14) Ti Piipel saat tas “yeete kuute un perfekte kexenk khomt fon [Kot]”. (Tya. 1:17) Tas haupste fon tiise kexenke is tas opfer fon sayn Soon Yeesus. Tenk aan wii wunerlich tiise opfer is. Weeche tas fray khaaf opfer, khanst tuu een ticht fraayntxaft mit Yeehoowa hon un ti xans fer eewiche leepe kriin. (1 Yo. 4:9, 10) Tas fray khaaf opfer is ti kreest pewaysung fon liip un Yeehoowa hot aach fiil anere seechen tich kep. Sich tetikiire, is een aat fer petanklichkheet too teweeche tsayche. (Teut. 16:17; 2 Kor. 5:15) (w24.03 s. 5 ap. 8)

Wën mer ti aanxtelung fon te layt hayt tsu taach siin, xpiire mer uns kraat soo wii Lot. Tee is “aarich ëngstlich kep (...) weeche ti ausferxeemt aanxtelung fon te xlechte”, wayl eyer wust tas Yeehoowa soo een sort aanxtelung hast. (2 Phe. 2:7, 8) Lot hot ti imoraalix aanxtelung um tëm rom kehast wayl eyer Yeehoowa keliipt un tiif respektiirt hot. Kraat soo, hayt tsu taach, hon ti layt um uns rom weenich orer kaar khee respekt tsu Yeehoowa sayn kesetse. Awer meyer khene rayn sin wën mer unser liip tsu Yeehoowa hale un lërne tëm tiif respektiire. Wii helft uns Yeehoowa tas mache? Torich ufmuutiche wërter woo mer im Xpriiche puuch fine. Al ti kriste — mëner, fraae, yunge un alte — khene nutse kriin fon te kluuche aanreete woo tat xteen. Wën mer Yeehoowa tiif respektiire, tuun mer uf phase fer net fraaynte sin fon tëne woo xlechte tinge mache. (w23.06 s. 20 ap. 1-2; s. 21 ap. 5)

Fiilaycht host tuu opositsyoon fon tayn familye mit kemacht orer khan sin tas tuu etliche materyaalixe tinge uf kep host fer Kot sayn Raych im eyerste plats xtele. (Mat. 6:33) Yeehoowa siit ales was tuu fer tëm kemacht host. (Hep. 6:10) Tuu host tsiimlich sicher kexpiirt wii Yeesus sayn wërter woer sin: “Nimant hot sayn haus, priiter, xwestere, muter, fater, khiner orer khëmp hiner kelos — weeche mich un weeche ti kuute notisye —, woo net yets kriit, in tiise tsayt, 100 mool mee hayser, priiter, xwestere, muter, khiner un khëmp — unich yachtung — un, im sisteem woo noch khomt, tas eewiches leepe.” (Mar. 10:29, 30) Ti seechen woos tuu yets xon kriit host, sin fiil kreeser wii kwalkee tings woos tuu uf kep host. (Psal. 37:4) (w24.03 s. 9 ap. 5)

Wii ti kriste in Yuteea een kroos hungernoot mit keleept hon, hon ti priiter in te kemaynt in Antyokya “ëntxlist, yeete eene, tëm noo sayn situatsyoon, hilef xike fer ti priiter woo in Yuteea keleept hon”. (Aph. 11:27-30) Yuteea waar net ticht, awer ti priiter in Antyokya waare pextimt tëne helfe. (1 Yo. 3:17, 18) Meyer khene aach mitlayt tsayche wën unser priiter am layte sin weeche unklike. Meyer tuun uns klaych aan piite fer se helfe; meyer khene, tsum payxpiil, fer ti elteste saan tas mer wole in een umaniteer hilef proyëkt xafe. Meyer khene aach kontripuytsyoone fer ti weltwayt aarwayt mache orer peete fer tii woo ti unklik kelit hon. Fiilaycht, prayche unser priiter un xwestere aach hilef kriin fer tas neetiches hon. Wën unser Kheenich Yeesus ti mënxe richte khomt, wole mer hon tas tee uns fint soo lang wii mer mitlayt am tsayche sin un tas eyer uns tan in laat ‘tas Raych ërpe’. (Mat. 25:34-40) (w23.07 s. 4 ap. 9-10; s. 6 ap. 12)

Soo wii Yeehoowa, waar Yeesus net xtreng. Yeesus is ploos tsu te “ferloerne xeef fon Israël sayn haus kexikt kep” un tee solt fer tëne preetiche. Awer een mool, hot een fraa — woo net israeliitix waar — tëm aan kehal sayn meetche heele, wayl tii hat “een temoon in sich trin”. Weeche mitlayt, hot Yeesus kemacht was ti fraa ferlangt hot un hot sayn meetche keheelt. (Mat. 15:21-28) Kuk mool een aner payxpiil. Eente in sayn preetich aarwayt, hat Yeesus kesaat: “Weer mich foer ti mënxe ap saat, wëre ich tee aach (…) ap saan.” (Mat. 10:33) Awer tee hot net Pheeter ap kesaat wii eyer 3 mool kesaat hot tas eyer Yeesus net kekhënt hot. Yeesus wust tas Pheeter sich wërklich peroyt hot un tas eyer een troye man waar. Noo Yeesus sayn ufxtaye, is eyer mit Pheeter xpreche kang, tsiimlich sicher fer Pheeter ti sicherheet kepe tas eyer tëm fertsayt hot un tëm wayter keliipt hot. (Luk. 24:33, 34) Yeehoowa un Yeesus sin net xtreng. Awer un meyer? Kot wil hon tas mer uns aach aan phase. (w23.07 s. 21-22 ap. 6-7)

Was khene mer fer ti anere layt saan fer tëne sicher lose tas Kot sayn ferxpreche fom Paratiis sich wërklich erfiile tuut? Eyerst: Yeehoowa selepst hot tiise ferxpreche kemacht. Apokalipsis saat: “Tee, woo uf tëm troon kesitst waar, hot kesaat: ‘Kuk! Ich sin ale tinge nay am mache.’” Kot hot ti kluucheet, ti kraft un te wunx fer sayn ferxpreche erfiile. Tsweet: Yeehoowa wees tas was eyer kesaat hot, sicher pasiirt. Tes weeche hot eyer aus kexproch: “Tiise wërter sin troy un woer. (…) Tii hon sich erfiilt!” Trit: wën Yeehoowa aan fangt etwas mache, niks khan tëm um hale tas fërtich pringe. Tes weeche hot eyer kesaat: “Ich sin te Alfa un te Oomeka.” (Apo. 21:6) Yeehoowa tuut pewayse tas Satanaas een liichner is woo Tëm net um hale khan Sayn tsiil erfiile. Soo, wën yemant tich saat: “Tas heert sich tsu kuut aan fer woer sin”, tuu khanst tëm Apokalipsis 21:5, 6 leese un aus leye. Tsaych tëm tas Yeehoowa selepst tuut sayn ferxpreche “unertsayche”. (Isa. 65:16) (w23.11 s. 7 ap. 18-19)

Kot hot tas ferxproch wii Apraham 75 yoore alt waar un khee khiner hat. Hot Apraham ti erfiilung fon tiise ferxpreche kesiin? Ploos een teel. Noo tas eyer torich te Eufrates flus kang is un 25 yoore kewaart hot, hot eyer een wuner kesiin wii sayn soon Isak uf te welt khom is. Un noo 60 yoore, sin sayn enkelskhiner, Esau un Yaakop, uf te welt khom. (Hep. 6:15) Awer Apraham hot nii kesiin sayn nookhomer een kroos natsyoon wëre un tas Ferxprochne Lant ërpe. Noch soo, hat tiise troye man een ticht fraayntxaft mit sayn Kriatoer. (Tya. 2:23) Un wën Apraham fom toot uf keruuft wërt, kriit eyer tsum wise tas weeche sayn klaape un ketult, waare al ti natsyoone fon te eyert keseechent! Sicher, tas tuut tëm aarich froo lose. (Xee. 22:18) Was lërne mer too temit? Fiilaycht, tuun mer net siin al Yeehoowa sayn ferxpreche sich yets erfiile. Awer wën mer ketult soo wii Apraham tsayche, khene mer uns sicher sin tas Yeehoowa uns yets peloone tuut un hauptseechlich in Tëm sayn nay welt. (Mar. 10:29, 30) (w23.08 s. 24 ap. 14)

Wii Usiias yung waar, waar eyer teemuutich. Tee “hat tiife respekt foer te woere Kot”. Torich neekst sayn kanse leepe, woo 68 yoore lang waar, hot Kot tëm keseechent. (2 Kro. 26:1-4) Usiias hot fiile faynte ap kewun un hot Yeruusalem ferxtërkt. Tee waar sicher froo mit ales was Yeehoowa tëm keholef hot se mache. (2 Kro. 26:6-15; Ekl. 3:12, 13) Te kheenich Usiias waar keweent iwer ti anere xike. Meecht eyer too teweeche aan kefang hon se tenke tas eyer mache khont ales was eyer wolt? Eene taach is Usiias in Yeehoowa sayn thempel rin kang. Mit hoochmuut, hot tee fersuucht insëns ufm altar prëne, etwas woo ti kheeniche net erlaupt waare se mache. (2 Kro. 26:16-18) Te hooche priister Asariias hot fersuucht tëm korikiire, awer Usiias is pees kep. Es is xaat, awer Usiias is net troy keplip un Yeehoowa hot tëm mit lëpra kextrooft. (2 Kro. 26:19-21) Sayn leepe weyer kans anerste wën eyer sich teemuutich kehal hët! (w23.09 s. 10 ap. 9-10)

Soo kaar noo tas te aphostel Pheeter een kesalpte krist kep is, must eyer wayter keeche sayn xwacheete khëmpfe. In 36 N.K., hot Yeehoowa Pheeter kexikt mit Kornëlyus xpreche, woo net een yuute waar. Tan hot Kot Kornëlyus mit hayliche kayst kesalpt. Tas waar een taytlich pewaysung tas “Kot khee sayt hoolt” un tas tii woo net yuute waare, khonte teel fon te kristlich kemaynt sin. (Aph. 10:34, 44, 45) Xpeeter hot Pheeter aan kefang se ese mit tiise naye priiter, etwas woo eyer nii foer heyer kemacht hat. Awer etliche yiitixe kriste hon ketenkt tas ti yuute un tii woo net yuute waare, thërfte net mitsamer ese. Wii etliche woo soo ketenkt hon pis Antyokya khom sin, hot Pheeter noo kelos se ese mit tëne woo net yuute waare. Tsiimlich sicher, hat eyer pang tas eyer ti yiitixe kriste pelaytiche teet. Te aphostel Phaul hot kesiin was Pheeter kemacht hat un hot tëm ërnst korikiirt foer te anere. (Kal. 2:13, 14) Opwool sayn feeler, hot Pheeter aus kehal. (w23.09 s. 22 ap. 8)

Say eerlich mit tich selepst un mërk woos tuu tich ferpesere khanst. Awer ferliir net tayn muut. Te Hër Yeesus is liiplich un tuut tich helfe tich ferpesere. (1 Phe. 2:3) Te aphostel Pheeter lost uns sicher: “[Kot] tuut ayre iipung fërtich pringe. Tee tuut aych fest mache.” Am aanfang, hot Pheeter ketenkt tas eyer net fertiint hot mit Yeesus sin. (Luk. 5:8) Awer mit te liiplich hilef fon Yeehoowa un Yeesus, is Pheeter Yeesus wayter troy noo kang. Tes weeche, hot Yeehoowa Pheeter erlaupt ‘in tëm eewiche Raych fon unser Hër un Reter Yeesus Kristus rin khome’. (2 Phe. 1:11) Tas waar wërklich een wunerlich peloonung! Wëns tuu, soo wii Pheeter, aus halst un tich fon Yeehoowa iipe lost, tuust tuu aach tas eewiche leepe kriin. Tuu tuust ‘tas tsiil fon tayn klaape hin kriin: ti retung’. (1 Phe. 1:9) (w23.09 s. 31 ap. 16-17)

Te friirix tapernakel hat een hoof: eene kroose plats mit een tsaun um sich rom. Tat, hon ti priister sayn flichte erfiilt. In tiise hoof, waar te kroose altar aus khuper woo ti opfere ferprënt waare un aach een waser xisel aus khuper woo ti priister penutst hon fer sich wexe, eep se sayn haylich tiinst mache khente. (Eeks. 30:17-20; 40:6-8) Hayt, tuun ti kesalpte woo noch uf te eyert sin, im inwënich hoof fom kaystlich thempel troy tiine. Te kroose waser xisel erinert tëne un al ti kriste tas tii mise sayn leepe un aanpeetung sauwer hale. Awer woo tuut tas “kroose folek” Yeehoowa tiine? Te aphostel Yoohan hot se “foer Kot sayn troon” kesiin; tii hon “hayliche tiinst taach un nacht in sayn thempel” kemacht. Tas kroose folek macht tas too uf te eyert, im auswënich hoof fom kaystlich thempel. (Apo. 7:9, 13-15) Meyer sin aarich petanklich tas Yeehoowa uns ti xeen oportuniteet kept fer tëm aan peete in sayn kroos kaystlich thempel! (w23.10 s. 28 ap. 15-16)

Een aat wii Yeehoowa uns ferxtërkt is torich ti elteste. (Isa. 32:1, 2) Soo, wëns tuu ëngstlich pist, xprech mit een elteste too triwer. Wën se tich hilef aan piite, nëm tas aan. Yeehoowa khan tëne penutse fer tich xtark mache. Meyer khene aach fiil kraft kriin torich unser piiplixe hofnung — ekaal ep mer hofe uf te eyert orer im himel leepe. (Rom. 4:3, 18, 19) Tas ferxtërkt uns fer ti proope aus hale, ti kuute notisye preetiche un unerxiitliche flichte in te kemaynt erfiile. (1 The. 1:3) Tiise selwich hofnung hot te aphostel Phaul ferxtërkt. Tee waar ‘unertrikt, wust net was se mache, waar keyacht un runer kexmis’. Als mool waar soo kaar sayn leepe ins kefoer. (2 Kor. 4:8-10) Awer tee hot sich aan sayn hofnung — eewiche leepe im himel kriin — traan kehal un too triwer noo ketenkt. (2 Kor. 4:16-18) Soo, hot eyer kraft kriit fer aus hale un kexpiirt tas eyer “yeete taach nay” kep is. (w23.10 s. 15-16 ap. 14-17)

Wën mer peete, khene mer uns frooe: ‘Meecht es ti richtich tsayt sin fer Kot mayn kepeete antworte?’ Meyer khene tenke tas mer prayche klaych een antwort fer unser kepeete kriin, awer Yeehoowa wees ti pest tsayt fer uns helfe. (Hep. 4:16) Wën mer net klaych kriin was mer ferlangt hon, khene mer tenke tas Yeehoowa sayn antwort “Nee” is. Awer im xtant is tëm sayn antwort “Noch net”. Tsum payxpiil, een yunge pruuter hot kepeet fer keheelt wëre fon sayn krankheet. Awer tas is net pasiirt. Wën Yeehoowa een wuner mache teet fer te pruuter heele, khent Satanaas saan tas te pruuter wayter Yeehoowa ketiint hot ploos wayl eyer keheelt waar. (Yoop 1:9-11; 2:4) Yeehoowa hot aach een tsayt pextimt fer al ti krankheete heele. (Isa. 33:24; Apo. 21:3, 4) Pis tiise tsayt khomt, khene mer net waarte tas Yeehoowa een wuner macht fer unser krankheete heele. Soo, tiise pruuter khent tsu Yeehoowa ferlange tas Eyer tëm ti neetich kraft un inerlich friit kepe sol fer ti krankheet wayter aus hale un troy plaype. (w23.11 s. 24 ap. 13)

Samsan hot een xlim feeler kemacht, awer tee hot net uf kep. Tee hot wayter een xans kesuucht fer se mache was Kot fon tëm wolt: keeche ti filisteer khëmpfe. (Rich. 16:28-30) Samsan hot tsu Yeehoowa aan kehal: “Los mich winkans iwer ti filisteer pringe.” Yeehoowa hot Samsan sayn kepeet keantwort un, noch een mool, hot eyer tëm ekstra kraft kep. Soo, tiise mool, hot Samsan mee filisteer um keprung wii eyer um keprung hat torich sayn kanse leepe. Opwool ti xlime konsekwënse fon sayn feeler, hot Samsan net noo kelos Yeehoowa tiine. Soo kaar wën mer mise korikiirt sin orer een priwilëj ferliire weeche unser feeler, sole mer net noo lose Yeehoowa troy tiine. Eriner tich tas Yeehoowa fërtich fer uns fertsaye is. (Psal. 103:8, 9) Soo wii Samsan, khene mer noch nutslich fer Kot sin, opwool unser feeler. (w23.09 s. 6 ap. 15-16)

Wëns tuu aus halst, kefalst tuu Yeehoowa. Tee frayt sich wayls tuu troy aus halst, net wayls tuu xwiirichkheete mit machst. Tas wise, is aarich ufmuutich. (Psal. 5:12) Eriner tich tas Apraham hot xwiirichkheete mit kemacht, un wayl eyer troy aus kehal hot, waar Yeehoowa froo mit tëm. Kot hot tëm wii fraaynt kesiin un tëm kerecht aus kexproch. (Xee. 15:6; Rom. 4:13, 22) Tas selwiche khan mit uns pasiire. Yeehoowa kefalt sich mit uns wayl mer troy plaype opwool ti proope — net weeche unser priwilëje orer wii fiil aarwayt meyer tëm mache. Ekaal unser elter, apiliteete orer situatsyoon im leepe, meyer al khene aus hale. Pist tuu yets een proop troy am aus hale? Wën yaa, eriner tich tas tuu Kot froo lost. Wën mer tas ferxteen, wërt unser hofnung aan tëm sayn ferxpreche noch xtërker. (w23.12 s. 11 ap. 13-14)

Een kristliche man mus lërne wii mit acht heere un fraayntlich xpreche. Es wil saan, eyer mus heere un ferxteen ti anere sayn ketanke un xpiirunge. (Xpr. 20:5) Tee khan aach lërne wii ti ketanke un xpiirunge fon te anere “leese” torich te thoon fon sayn xtim, sayn kesicht un wii se sich weekele. Too tefoer must tuu tsayt mit te anere fertraype. Wëns tuu imer mit te anere torich eletroonixe aparate xprechst — wii, tsum payxpiil, torich e-mail un mensagens —, wërts xweyer fer tich mit te layt perseenlich fertseele. Soo, fersuuch aate fine fer mit te anere perseenlich xpreche. (2 Yo. 12) Een rayfe pruuter mus aach sich selepst un sayn familye fersoriche. (1 Tim. 5:8) Es is kuut een apiliteet lërne woo tich helfe khan een aarwayt fine. (Aph. 18:2, 3; 20:34; Ëfe. 4:28) Xaf xtram un pring fërtich was tuu aan kefang host; ti anere tuun tas mërke un tuu wërst pekhant wii yemant woo een kuut aarwayt macht. Soo wërts laychter een aarwayt fine un hale. (w23.12 s. 27 ap. 12-13)

“Yeehoowa sayn taach” — was petayt tas in te Piipel? Es hot se tuun mit te tsayt wën Yeehoowa sayn faynte fernicht un sayn folek ret. In te ferkangne yoore, hot Yeehoowa etliche natsyoone kextrooft. (Isa. 13:1, 6; Ese. 13:5; Sof. 1:8) In unser tsayt, “Yeehoowa sayn taach” fangt aan mit te atak keeche Papiloon ti Kroos un khomt tsum ën im Armaxeton kriich. Fer iwerleepe, mise mer uns yets foer perayte. Yeesus hot in kelërnt tas mer mise, net ploos fërtich fer ti kroos tripulatsyoon wëre, awer aach uns “imer fërtich hale”. (Mat. 24:21; Luk. 12:40) Im eyerste priif fer ti thesalooniker, hot te aphostel Phaul etliche ferklaychunge penutst fer ti kriste helfe sich fërtich fer Yeehoowa sayn kroose taach fon kericht hale. Phaul wust tas Yeehoowa sayn taach net in sayn tsayt khemt. (2 The. 2:1-3) Awer Phaul hot ti priiter uf kemuut sich foer perayte fer tiise taach wii wën eyer moye khemt. Un tiise aanreet phast fer uns aach. (w23.06 s. 8 ap. 1-2)

Im yoerkang 1978, is een mechtich hooch kepay in Tokyo (Yaapan) kepaut kep. Ti layt hon sich kefroot: ‘Wii khan tiise kepay xteen plaype wën soo fiil eyertxutere too rom pasiire?’ Was hon ti inxenyeere kemacht? Tii hon tiise hooch kepay kepleent tas es khont sich een pisye piie awer sich net ferpreche wën een eyertxuter pasiire teet. Ti kriste sin soo wii tiise kepay. Wii soo? Tii mise fest sin, awer tii mise aach uf phase fer net xtreng sin. Tii mise fest un pextimt sin fer Yeehoowa sayn kesetse aan heere. Tii mise “fërtich fer aan heere” sin un net fon sayn klaape uf kepe. Im keeche teel, tii mise aach “net xtreng” sin wën ti situatsyoon es erlaupt orer soo kaar ferlangt. (Tya. 3:17) Een krist woo kelërnt hot ekiliipryum hon, wërt net tsu xtreng orer tsu tolerant. (w23.07 s. 14 ap. 1-2)

Yeesus must sich keeche te Taywel xtele, woo tëm fersuucht hot se sinte un tëm richt raus kesaat hot noo lose troy tsu Kot sin. (Mat. 4:1-11) Satanaas waar pextimt Yeesus sinte mache, wayl soo khont Yeesus net tas fray khaaf opfer petsaale. Torich sayn preetich aarwayt, hot Yeesus anere proope mit kemacht. Sayn faynte hon tëm keyacht un fersuucht tëm um pringe. (Luk. 4:28, 29; 13:31) Tee must ti xwacheete fon sayn tisipele aus hale. (Mar. 9:33, 34) Tee waar aach kekweelt un ferxpot im kericht woo ëntxlist hot ep eyer leepe orer xtërpe teet. Tan waar eyer um keprung wii een kriminoos un hot fiil phayn mit kemacht. (Hep. 12:1-3) Wii eyer im kweel phoste aan kenaachelt waar, must eyer ti kroos phayn aleen aus hale, oone Yeehoowa sayn xitsung. (Mat. 27:46) Sicher hot Yeesus fiil kelit fer tas fray khaaf opfer uns fersoriche. Wën mer too triwer tenke, xpiire mer een tiif liip tsu tëm. (w24.01 s. 10-11 ap. 7-9)

Meyer mise ketultich sin fer kuut mit te anere rom khome un fer se mit acht horiche. (Tya. 1:19) Ti ketult helft uns aach te friit mit te anere hale; wën mer stresiirt sin, tuun meyer net tsu fiks reakiire un was kropes saan. Un wën mer ketultich sin, wëre mer net klaych pees wën yemant unser xpiirunge wee macht. Xtats tsurik petsaale, tuun mer “wayter [uns] naner aus hale un krooshërtslich fertsaye”. (Kol. 3:12, 13) Meyer mise ketultich sin fer kuute ëntxlise mache. Xtats uns ayle fer een ëntxlus mache, hoole mer kenuuch tsayt fer unersuuche un tan raus suuche was te pest ëntxlus is woo mer mache khene. Tsum payxpiil: wole mer saan tas mer een aarwayt am suuche sin. Fiilaycht wole mer ti eyerst aarwayt woo mer fine, aan nëme. Awer wën mer ketultich sin, tuun mer tsayt hoole fer tiise frooch antworte: ‘Wii tuut tiise aarwayt mayn familye un mayn fraayntxaft mit Yeehoowa petrefe?’ Wën mer ketultich sin, hale mer uns wech fon te xlechte ëntxlise. (w23.08 s. 22 ap. 8-9)

Wëns tuu tich oone muut xpiirst wayls tuu keeche ferkheerte winxe khëmpfst, tenk tich traan fom ferxpreche woos tuu fer Yeehoowa kemacht host in tayn tetikatsyoon. Es tuut tich ferxtërke fer keeche ti fersuuchung khëmpfe. Wii soo? Wëns tuu tich tsu Yeehoowa tetikiirst, tuust tuu tich selepst ap saan. Tuu tuust raus suuche “nee” saan fer tayn perseenliche winxe un tsiile woo khente Yeehoowa traurich lose. (Mat. 16:24) Soo, wëns tuu foer een fersuuchung pist, praychst tuu tich net frooe was tuu mache tuust. Es is soo wayls tuu xon foer heyer ëntxlist hast “nee” saan fer al ti optsyoone, heechstens eens: troy tsu Yeehoowa plaype. Tuu wërst xon pextimt Yeehoowa kefale, kraat soo wii Yoop. Soo kaar foer te xlimste proope, hot eyer aus kexproch: “Ich [tuun] mayn intekriteet nii uf kepe!” (Yoop 27:5) (w24.03 s. 9 ap. 6-7)

Yeehoowa, “te Kot fon liip”, is pay uns! (2 Kor. 13:11) Tee khimert sich mit yeete eene fon uns. Meyer sin uns sicher tas ‘sayn leaale liip um uns rom is’. (Psal. 32:10) Woo mee mer too triwer noo tenke, woo eftas tuun mer sayn hant in unser leepe siin un woo tichter pay tëm meyer khome. Meyer khene fray tsu tëm peete un tëm saan wii sayn liip neetich fer uns is. Meyer khene iwer unser soriche mit tëm xpreche, wayl meyer uns sicher sin tas eyer uns ferxteet un uns helfe wil. (Psal. 145:19) Soo wii mer wole ticht pay een fayer plaype in een khalte taach, wole mer ticht pay Yeehoowa sayn liip plaype. Tas fayer is mechtich, awer wërmt aach. Kraat soo, is Yeehoowa sayn liip mechtich, awer “wërmt” aach unser hërts. Tes weeche, nëm Yeehoowa sayn liip aan. Soo, khanst tuu aach saan: “Ich liipe Yeehoowa”! (Psal. 116:1) (w24.01 s. 31 ap. 19-20)

Yeesus hot net ploos fer ti layt kesaat tas Kot sayn naame Yeehoowa is. Ti yuute woo Yeesus in kelërnt hot, wuste xon Kot sayn naame. Awer Yeesus “hot Tee pekhant kemacht”. (Yoo. 1:17, 18) Tsum payxpiil: ti Hepreeyxe Xrifte tsayche tas Yeehoowa parmhërtslich un mitlaytich is. (Eeks. 34:5-7) Yeesus hot tiise woerheet taytlicher kelos wii eyer tas kexicht fom ferloerne soon un sayn fater fertseelt hot. Wii te soon “noch wayt wech waar”, hot te fater tëm kesiin, tsu tëm kexprung, um kekrif un hërtslich fertsayt. Tas helft uns taytlich siin wii Yeehoowa parmhërtslich un mitlaytich is. (Luk. 15:11-32) Yeesus hot ti anere keholef se ferxteen was fer sort persoon Yeehoowa wërklich is. (w24.02 s. 10 ap. 8-9)

Yeehoowa ferxtërkt un treest tii woo layte. Wii khene mer Yeehoowa noo mache un mitlayt tsu te anere xpiire un tëne treeste? Een tings is kwaliteete ëntwikele woo uns helfe tas mache. Was fer sin etliche fon tiise kwaliteete woo uns helfe wayter eene te anere liipe un treeste? (1 The. 4:18) Meyer mise empatii, priiterlich liip, un fraayntlichkheet ëntwikele. (Kol. 3:12; 1 Phe. 3:8) Wii tuun tiise kwaliteete uns helfe? Wën mer mitlayt tsu unser priiter xpiire un uns wërklich mit tëne khimere, kriin mer een xtarke wunx fer tëne treeste wën se propleeme mit mache. Es is soo wii Yeesus kesaat hot: “Te munt xprecht fon was tas hërts fol is. Te kuute man hoolt kuute tinge raus fon sayn kuute xats.” (Mat. 12:34, 35) Ti neetich troost fer unser priiter un xwestere kepe, is een wichtich aat wii mer tëne liip tsayche khene. (w23.11 s. 10 ap. 10-11)

Meyer mise hilef kriin fer ti piiplixe profetsiie ferxteen. Tenk mool aan tiise ferklaychung: iwerlee tich tas tuu pesuuchst een plats woos tuu net khënst. Awer een fraaynt woo mit tich reest, tuut tas plats kuut khëne. Tee wees kans kenau woo teyer sayt un woo yeete weech hin nëmt. Sicher pist tuu froo tas tiise fraaynt mit tich kang is. Yeehoowa is wii tiise fraaynt. Tee ferxteet kans kenau ti tsayt woo mer am leepe sin un was im futuer pasiirt. Soo, wën mer wole ti piiplixe profetsiie ferxteen, mise mer Yeehoowa sayn hilef teemuutich ferlange. (Tan. 2:28; 2 Phe. 1:19, 20) Soo wii kuute eltere, wil Yeehoowa hon tas sayn khiner een froo futuer kriin. (Yee. 29:11) Awer anerste wii ti mënxliche eltere, khan Yeehoowa uns kenau saan was im futuer pasiirt. Tee hot ti profetsiie in sayn Wort kexrip kelos tas mer khonte iwer importante ewënte wise eep se pasiire teete. (Isa. 46:10) (w23.08 s. 8 ap. 3-4)