Tuu Yeesus “wayter noo keen” noom taaf

1-2. Was fer seechen kriit een persoon noom taaf?

MEYER sin aarich froo kep wii mer uns ketaaft hon un aan kefang hon teel fon Yeehoowa sayn familye sin. Es is een eer een ticht fraayntxaft mit Yeehoowa hon. Meyer xtime mit te wërter fom psalmist Tawi tsu Yeehoowa: “Froo is tee woos tuu raus suuchst un ticht pay tich pringst, fer uf tayn hoof woone.” (Psal. 65:4)

² Yeehoowa lost net tas kwalkee eene teel fon sayn familye macht. Soo wii mer im letste artikel kesiin hon, Yeehoowa suucht raus tichter khome pay tëne woo tsayche tas se wole een ticht fraayntxaft mit tëm hon. (Tya. 4:8) Wëns tuu tich tetikiirst un taafe lost, khomst tuu tichter pay Yeehoowa in een ekstra aat. Tuu khanst tich sicher sin tas, noo tayn taaf, tuut eyer ‘een seechen iwer tich aus xite pis niks mee feelt’. (Mal. 3:10; Yee. 17:7, 8)

3. Was fer ërnst responsapiliteet hot te krist woo tetikiirt un ketaaft is? (Eklesyastes 5:4, 5)

³ Kewis, te taaf is ploos te aanfang fon een leepe in Yeehoowa sayn tiinst. Noo tiise xrit kepe, tuust tuu tayn pestes mache fer tayn ferxpreche fon tetikatsyoon in hale soo kaar foer ti fersuuchunge un tinge woo tayn klaape proope khene. (Lees Eklesyastes 5:4, 5.)a Wii Yeesus sayn tisipel, wilst tuu tëm sayn payxpiil un kepoote noo keen soo ticht wiis meechlich is. (Mat. 28:19, 20; 1 Phe. 2:21) Tiise artikel helft tich tas mache.

TUU YEESUS “WAYTER NOO KEEN” OPWOOL PROOPE UN FERSUUCHUNGE

4. Wii soo tuun Yeesus sayn tisipele een “kweel phoste nëme”? (Lukas 9:23)

⁴ Tayn leepe wërt net fray fon propleeme noom taaf. Yeesus hot, in woerheet, fer sayn tisipele taytlich kelos tas se teete een “kweel phoste nëme” un tii miste tas “taach tsu taach” mache. (Lees Lukas 9:23.)b Wolt Yeesus saan tas sayn tisipele imer am layte weyere? Sicher net. Xtats tas, wolt eyer tsayche tas sayn leepe weyer net ploos seechen, awer tas se teete aach kefoore mit mache. Etliche fon tiise kefoore khente aarich xweyer wëre. (2 Tim. 3:12)

5. Was fer seechen hot Yeesus ferxproch fer tii woo etliche tinge uf kepe fer tas Raych pay xteen?

⁵ Fiilaycht host tuu xon opositsyoon fon tayn familye mit kemacht orer khan sin tas tuu etliche materyaalixe tinge uf kep host fer Kot sayn Raych im eyerste plats xtele. (Mat. 6:33) Yeehoowa siit ales was tuu fer tëm kemacht host. (Hep. 6:10) Tuu host tsiimlich sicher kexpiirt wii Yeesus sayn wërter woer sin: “Nimant hot sayn haus, priiter, xwestere, muter, fater, khiner orer khëmp hiner kelos — weeche mich un weeche ti kuute notisye —, woo net yets kriit, in tiise tsayt, 100 mool mee hayser, priiter, xwestere, muter, khiner un khëmp — unich yachtung — un, im sisteem woo noch khomt, tas eewiches leepe.” (Mar. 10:29, 30) Ti seechen woos tuu yets xon kriit host, sin fiil kreeser wii kwalkee tings woos tuu uf kep host. (Psal. 37:4)

6. Warom must tuu wayter keeche “te wunx fom flayx” khëmpfe noom taaf?

⁶ Noom taaf, must tuu wayter khëmpfe keeche “te wunx fom flayx”. (1 Yo. 2:16) Tas is soo wayls tuu noch imperfekt pist. Fiilaycht khanst tuu tich als mool xpiire soo wii te aphostel Phaul, woo kexrip hot: “Te mënx woo ich inwënich sin, tuut sich wërklich aan Kot sayn kesets fraye, awer ich siin in mayn khërper een aner kesets woo khëmpft keeche tas kesets fon mayn ferxtant, un tas tuut mich wii kefangne fom kesets fon te sint nëme, woo in mayn khërper xteet.” (Rom. 7:22, 23) Keeche ferkheerte winxe khëmpfe, khan tich oone muut lose. Awer, traan tenke aan tëm ferxpreche woos tuu fer Yeehoowa kemacht host in tayn tetikatsyoon, tuut tich ferxtërke fer keeche ti fersuuchung khëmpfe. Wii soo?

7. Wii tuut ti tetikatsyoon tsu Yeehoowa tich helfe wayter troy tsu tëm plaype?

⁷ Wëns tuu een tetikatsyoon tsu Yeehoowa machst, tuust tuu tich selepst ap saan. Tas petayt tas tuu raus suuchst “nee” saan fer tayn perseenliche winxe un tsiile woo khente Yeehoowa traurich lose. (Mat. 16:24) Soo, wëns tuu foer een fersuuchung orer een xlim situatsyoon pist, praychst tuu tich net frooe was tuu mache tuust. Es is soo, wayls tuu xon foer heyer ëntxlist hast “nee” saan fer al ti optsyoone, heechstens eens: troy tsu Yeehoowa plaype. Tuu wërst xon pextimt Yeehoowa kefale, kraat soo wii Yoop. Soo kaar foer te xlimste proope, hot eyer aus kexproch: “Ich [tuun] mayn intekriteet nii uf kepe!” (Yoop 27:5)

8. Wii triwer noo tenke aan tayn tetikatsyoon tuut tich helfe keeche ti fersuuchung khëmpfe?

⁸ Wëns tuu triwer noo tenkst aan tayn ferxpreche fon tetikatsyoon, kriist tuu kraft fer tich keeche kwalkee proop xtele. Tsum payxpiil, teest tuu aan fange romantix interes tsayche aan yemant sayn fraa orer man? Sicher net! Tuu host xon “nee” fer tas kesaat. Wëns tuu net lost ti ferkheerte winxe sich ëntwikele, tuust tuu tich xoone fon te aarwayt fer tas noo heyer aus rope. Soo tuust tuu tich wech hale fom “weech fon te xlechte mënxe”. (Xpr. 4:14, 15)

9. Wii triwer noo tenke aan tayn tetikatsyoon khan tich helfe Yeehoowa sayn aanpeetung im eyerste plats hale?

⁹ Un wën yemant tich een aarwayt aan piit woo tich um hale khent imer tsu te fersamlunge keen? Tuu weest xon was se mache. Eep tiise aarwayt tich aan kepoot waar, hast tuu xon ëntxlist tas tuu teest nii een aarwayt aan nëme woo tich um hale teet Yeehoowa aan peete. Soo wërst net neetich een aat fine fer ti ferkheert ëntxlus richtich ap laafe mache. Aan Yeesus sayn payxpiil triwer noo tenke, khan uns helfe. Tee waar pextimt sayn Fater kefale. Soo wii Yeesus, say pextimt klaych ap xtose kwalkee tings woo khent traurich lose te Kot tsu weem tuu tetikiirst pist. (Mat. 4:10; Yoo. 8:29)

10. Noom taaf, wii tuut Yeehoowa tich helfe Yeesus “wayter noo keen”?

¹⁰ Ti proope un fersuuchunge kepe tich ti xans fer se tsayche tas tuu pextimt pist Yeesus “wayter noo keen”; un tuu khanst tich sicher sin tas Yeehoowa tich helfe tuut tas mache. Ti Piipel saat: “Kot is troy, un tee tuut net lose tas teyer mee fersuucht wërt wii teyer aus hale khent. Awer, wën ti fersuuchung khomt, tuut eyer aach een ausweech tsayche tas teyer es aus hale khent.” (1 Kor. 10:13)

WII KHANST TUU YEESUS WAYTER NOO KEEN?

11. Was is eene fon te peste aate fer Yeesus wayter noo keen? (Kuk aach tas pilt.)

¹¹ Yeesus hot Yeehoowa mit sayn kans hërts ketiint un tee hot sich ticht pay tëm kehal torich tas kepeet. (Luk. 6:12) Eene fon te peste aate fer Yeesus wayter noo keen noom taaf is tinge mache woo tich tichter pay Yeehoowa xafe. Ti Piipel saat: “Ekaal wii wayt mer xon foran kang sin, wole mer wayter in tiise selwich weech keen.” (Fili. 3:16) Tan un wan, tuust tuu speryense heere iwer priiter woo ëntxlist hon mee in Yeehoowa sayn tiinst mache. Fiilaycht hon se ti Xuul fer Preeticher fom Raych kemacht orer sich kewanert tsu een plats woo ti neetichkheet kreeser is. Wën tayn situatsyoon tich erlaupt, tas is aach een kuut tsiil fer tich. Yeehoowa sayn tiiner tuun imer aate suuche fer tëm peser tiine. (Aph. 16:9) Un wën es net meechlich is tas yets mache? Tenk net tas tuu weenicher pist wii tii woo tas mache khene. Tas wichtichste is wayter aus hale. (Mat. 10:22) Ferkes tich net tas Yeehoowa froo wërt wëns tuu tas pestes in tayn situatsyoon machst. Tas is een wichtich aat wiis tuu khanst Yeesus wayter noo keen noom taaf. (Psal. 26:1)

12-13. Was khanst tuu mache wën tayn muut sich ferxweecht? (1 Korinter 9:16, 17) (Kuk aach te khaste “Los net noo se xpringe!”)

¹² Un wëns tuu xpiirst tas tayn kepeete automatix kep sin orer tas tuu ploos preetiche keest weeche tayn rutiin? Un wën tayn Piipel leesung tich net mee soo froo lost wii friier? Wëns tuu tich soo xpiirst noom taaf, tenk net tas tuu Yeehoowa sayn kayst ferloer host. Wayl mer imperfekt sin, khene unser xpiirunge hooche un niitriche phunkte hon. Wën tayn muut sich ferxweecht, tenk am aphostel Phaul. Opwool eyer fersuucht hot Yeesus noo mache, wust eyer tas eyer als mool net een xtarke muut hët fer sayn flicht erfiile. (Lees 1 Korinter 9:16, 17.)c Tee hot kesaat: “Soo kaar wën ich tas keeche mayn wile mache, tas is noch ti flicht woo mich iwer kep is.” In anere wërter: Phaul waar pextimt sayn tiinst erfiile ekaal wii eyer sich xpiire teet.

¹³ Kraat soo, mach net ëntxlise woo sich ploos aan tayn xpiirunge xtaype. Say pextimt se mache was richtich is ekaal wiis tuu tich xpiirst. Wëns tuu wayter tas richtiches machst, khene tayn xpiirunge sich mit te tsayt ënere. Foerlaywich, een kuut rutiin hale fon perseenlich xtuutyum, kepeet, preetich aarwayt un fersamlunge, tuut tich helfe wayter Yeesus noo keen noom taaf. Wën tayn priiter un xwestere siin tayn persewerans fer Yeehoowa tiine, wëre se uf kemuut. (1 The. 5:11)

‘TUUT WAYTER FER AYCH SELEPST KUKE UN IN PROOP XTELE’

14. Was solst tuu ofts noo kuke un warom? (2 Korinter 13:5)

¹⁴ Noom taaf, is es aach wichtich tas tuu tich ofts noo kukst. (Lees 2 Korinter 13:5.)d Tan un wan, is es kuut uns noo kuke un uns frooe: ‘Tuun ich yeete taach peete? Tuun ich ti Piipel leese un xtutiire? Keen ich imer tsu te fersamlunge un ti preetich aarwayt?’ Suuch aate fer mee frooheet un nutse fon tiise aktiwiteete kriin. Tsum payxpiil, tuu khanst tich frooe: ‘Kriin ich es hin ti haupste inlërnunge fon te Piipel fer anere aus leye? Khan ich etwas mache tas ich mee frooheet in mayn preetich aarwayt xpiire? Sin mayn kepeete spetsiifix un tuun se tsayche tas ich kans uf Yeehoowa traue? Sin ich imer in te fersamlunge? Wii khan ich mee acht hale un eftas komentiire?’

15-16. Was host tuu kelërnt iwer fest keeche ti fersuuchung plaype mit Robert sayn speryens?

¹⁵ Es is aach important tayn xwacheete kuut khëne. Een pruuter woo Robert heest, hot etwas mit kemacht woo helft uns tiise phunkt ferxteen. “Wii ich unkefeer 20 yoore alt waar — saat eyer —, hon ich halpe taach kexaft. Eene taach, noo te aarwayt, hot een kolekin mich in kelaat tsu sayn haus keen. Tii hot kesaat tas es weyere ploos meyer tswaay un tas mer teete een pisye xpas hon. Am aanfang, hon ich phaar ausreete kep, awer tii waare kans xwach. Tsum xlus, hon ich ‘nee’ kesaat un hon aus keleet warom.” Robert hot sich fest keeche ti fersuuchung kextelt un tee fertiint keloopt wëre. Awer xpeeter, hot eyer too triwer noo ketenkt un hot kemërkt tas eyer khent mit te situatsyoon peser um kang sin. Tee hot kesaat: “Ich hon net soo xnel un fest ‘nee’ kesaat wii Yoosef mit Potifaar sayn fraa kemacht hot. (Xee. 39:7-9) In woerheet, es hot mich ferxrok wii xweyer es waar fer mich tas ap saan. Tas hot mich ketsaycht tas ich must mayn fraayntxaft mit Yeehoowa ferxtërke.”

¹⁶ Tuu khanst nutse kriin wëns tuu tich selepst noo kukst soo wii Robert es kemacht hot. Aach wëns tuu fest keeche een fersuuchung playpst, froo tich selepst: ‘Wii lang hon ich ketauert fer “nee” saan?’ Wëns tuu mërkst tas tuu tich ferpesere khanst, playp net oone muut. Say froo tas tuu yets tiise xwacheet khënst. Peet iwer tayn xwacheet un mach tinge woo tayn wunx fer Kot foliche ferxtërke. (Psal. 139:23, 24)

17. Wii Robert troy tsu Yeehoowa keplip is, wii hot tas Yeehoowa sayn naame petrof?

¹⁷ Es kept noch etwas woos tuu mit Robert sayn speryens lërne khanst. Tee saat noch: “Noo tas ich ti inlaatung ap kextos hon, hot se mich kesaat: ‘Ich wolt tich proope… un tuu host tas richtiches kemacht.’ Ich hon se kefroot was se saan wolt. Tii hot aus keleet tas se een fraaynt hat woo friier Yeehoowa sayn Tsayer waar. Tee hat kesaat tas al ti yunge woo Yeehoowa sayn Tsayer sin, mache heelich was ferkheert is wën se ti xans kriin. Tii hat fer sayn fraaynt kesaat tas se wolt tas mit sayn aychne aue siin. Ich sin mechtich froo kep tas ich eer tsu Yeehoowa sayn naame kep hon.”

18. Was pist tuu pextimt se mache noo tayn taaf? (Kuk aach te khaste “Tswaay ufmuutiche artikele”.)

¹⁸ Wëns tuu tich tsu Yeehoowa tetikiirst un taafe lost, tsaychst tuu tas tuu wilst tëm sayn naame ferhayliche ekaal was pasiire tuut. Say tich sicher tas Yeehoowa khënt ti proope woos tuu mit machst un ti fersuuchunge woos tuu ap saast. Tee tuut tayn aanxtrengung fer wayter troy plaype, seechne. Trau tas torich sayn hayliche kayst, khan Kot tich ferxtërke fer tas hin kriin. (Luk. 11:11-13) Mit Yeehoowa sayn hilef, khanst tuu Yeesus wayter noo keen noom taaf.