Frooche fon te leeser

Wanee tuut ti preetich fon te kuute notisye tsum ën khome?

Yeesus hot kesaat: “Tiise kuute notisye fom Raych wëre uf te kans pewoont eyert kepreeticht, tsum tsaye fer ale natsyoone; un tan khomt tas ën.” (Mat. 24:14) Tas kreekix wort woo iwersetst is “ën” in tiise wersikel un in te wersikele 6 un 13 hot se tuun mit tas ën fon Satanaas sayn welt im Armaxeton. (Apo. 16:14, 16) Tes weeche, tuun mer wayter ti kuute notisye preetiche pis een pisye foer te Armaxeton. Tas ënert ti aat wii mer tiise sache friier ferxtan hon.

Friier hon mer ferxtan tas mer noo lose teete ti kuute notisye preetiche wën ti kroos tripulatsyoon aan fange teet, mit te fernichtung fon Papiloon ti Kroos. (Apo. 17:3, 5, 15, 16) Meyer hon ketenkt tas wën ti kroos tripulatsyoon aan fange teet, “tas yoer fon Yeehoowa sayn kuute wile” tsum ën khome teet, es wil saan, teet Yeehoowa net mee fer ti layt ti xans kepe fer ti kuute notisye aan nëme. (Isa. 61:2) Meyer hon aach ketenkt tas tii woo ti kroos tripulatsyoon iwerleepe teete, teete sayn troyheet tsu Yeehoowa xon pewayst hon foer te aanfang fon tiise ewënt. Meyer hon tëne ferklaycht mit te yuute woo ti fernichtung fon Yeruusalem in 607 F.K. iwerleept hon. Tiise yuute waare xon markiirt fer iwerleepe wayl se Yeehoowa aan kepeet hon un ti xlechtichkheet kehast hon. (Ese. 5:11; 9:4) Awer tiise ferklaychung xtimt net mit Yeesus sayn wërter in Matheus 24:14, woo tsayche tas ti layt khene im xtant ti xans hon fer ti kuute notisye aan nëme pis een pisye foer tas ën im Armaxeton.

Tas nay ferxtëntnis iwer Matheus 24:14 ënert aach was mer ferxtan hon iwer tas pexeet woo ferklaycht is mit kroose xlose woo in Apokalipsis 16:21 xteet. Een tiifer xtuutyum hot ketsaycht tas een tekst macht tas ferxtëntnis fon te aner komplët. Was uns helft tas wise, is ti aat wii ti Piipel pexraypt ti layt sayn aanxtelung foer tas pexeet fom Raych. Te aphostel Phaul hot kexrip tas fer “tëne woo in te xtroos fon te retung sin”, tas pexeet sin kuute notisye, een “keroch fon leepe”. Awer fer Kot sayn faynte, tiise pexeet sin xlechte notisye, een “keroch fon toot”. (2 Kor. 2:15, 16) Tii hase tas pexeet fom Raych wayl es tsaycht tas ti welt woo se liipe is xlecht, fon Satanaas rechiirt un wërt klaycht fernicht. (Yoo. 7:7; 1 Yo. 2:17; 5:19)

Mërk aach tas te phest fon xlose fon Apokalipsis 16:21 wërt “aarich kroos” sin. Im xtant, tas wil saan tas torich ti kroos tripulatsyoon, wërt tas pexeet noch xtërker un tuut mee layt wii kwalkee aner tsayt trefe. Tes weeche, tuun mee layt Yeehoowa sayn naame khëne lërne. (Ese. 39:7) In tiise tsayt, noo ti fernichtung fon Papiloon ti Kroos, meecht tas pexeet fom Raych fer etliche layt wii een kuut keroch wëre? Es is meechlich tas tas pasiire tuut. Fiilaycht tuun se sich erinere orer tsum wise kriin tas torich phaar yoore, hon Yeehoowa sayn Tsayer kesaat tas ti falxe relichyoone fernicht weyere.

Was eenliches is im friirix Ejipt pasiirt noo ti 10 pheste. Noo Yeehoowa “een kericht [kemacht hot] keeche ti kanse keeter fom Ejipt”, is “een kroos numer layt” woo net israeliiter waare, mit Kot sayn folek raus fom Ejipt kang. (Eeks. 12:12, 37, 38) Im xtant hon tiise layt raus kesuucht mit Kot sayn folek keen wii se kesiin hon tas ales was Mooses iwer ti 10 pheste kesaat hot, sich erfiilt hot.

Kwalkee persoon woo ëntxlist Yeehoowa pay xteen noo ti fernichtung fon Papiloon ti Kroos, tuut ti xans hon fer Kristus sayn priiter woo noch uf te eyert wëre, unerxtitse. (Mat. 25:34-36, 40) Kewis, ti oportuniteet fer wii een xoof kericht wëre, tuut tsum ën khome een pisye foer te Armaxeton, wën ti kesalpte woo noch uf te eyert sin sayn himlix peloonung kriin tuun.

Tiise ënerung in unser ferxtëntnis is een taytlich pewaysung fon Yeehoowa sayn kroos liip un parmhërtslichkheet. Yawool, Yeehoowa ‘winxt net tas yemant fernicht wërt, awer winxt tas al sich peroye’. (2 Phe. 3:9)