Fon pleet meete tsu een misyoneerin

Ich sin uf te welt khom in 1951 in Viena, Austrya. Mayn eltere waare katoolix kewees. Opwool es xweyer fer mich waar mit te anere layt fertseele, hon ich uf Kot keklaapt un ofts tsu tëm kepeet. Wii ich 9 yoore alt waar, hot mayn papa aan kefang ti Piipel mit Yeehoowa sayn Tsayer xtutiire. Een pisye xpeeter, hot mayn mama aach aan kefang.

Klaych, hon mer aan kefang in te Döbling kemaynt in Viena tiine. Unser familye hot fiiles mitsamer kemacht. Meyer hon ti Piipel kelees un xtutiirt, ti fersamlunge kekukt un wii fraywiliche in te konkrëse ketiint. Torich tiise yoore, hot mayn papa mich keholef een tiif liip tsu Yeehoowa ëntwikele. Tee hot imer kepeet tas ich un mayn xwester wii pyoneerine tiine teete. Awer in tiise tsayt, wolt ich tas net mache.

ICH FANGE AAN IN TE FOL TSAYT TIINST

In 1965, wii ich 14 yoore alt waar, hon ich mich taafe kelos. Awer es waar xweyer fer mich se preetiche fer layt woo ich net kekhënt hon. Ich hon aach ofts ketenkt tas ti anere peser wii ich waare un ich wolt wërklich hon tas anere yunge mich kërn hëte.Tes weeche, net fiil tsayt noo mayn taaf, sin ich fraayntin kep fon layt woo Yeehoowa net ketiint hon. Es waar kuut mit tëne sin, awer mayn kewise hot mich kexteert. Ich wust tas ich solt net soo fiil tsayt fertraype mit layt woo Yeehoowa net keliipt hon. Awer, es hot mich ti kraft kefeelt fer ti ënerunge mache. Was hot mich keholef?

Torich tiise tsayt, is Dorothée, een meetche woo 16 yoore alt waar, tsu unser kemaynt khom. Es hot mich ferwunert se siin wii fiil se keliipt hot haus tsu haus preetiche. Ich waar een pisye elter wii tii, awer ich hon kans weenich kepreeticht. Ich hon fer mich selepst ketenkt: “Mayn eltere sin Yeehoowa sayn Tsayer; awer Dorothée is aleen in te woerheet. Tii mus sayn krank mama uf phase, un noch soo, is se imer in te preetich.” Weeche sayn kuute payxpiil, wolt ich aach mee fer Yeehoowa mache. Klaych tëm noo, hon ich un Dorothée aan kefang wii pyoneerine tiine — eyerst wii hilef pyoneerine un tan wii rekulaar pyoneerine. Dorothée sayn muut in te preetich aarwayt hot mich aan kextoch. Tii hot mich keholef mayn eyerst Piipel xtuutyum aan fange. Mit te lëngt, is es laychter fer mich kep tsu te layt preetiche haus tsu haus, uf te xtroose un in anere situatsyoone.

Torich mayn eyerst yoer wii rekulaar pyoneerin, is een spetsyaal pyoneer tsu unser kemaynt khom, woo Heinz keheest hot. Tee hot ti woerheet in Kanata kelërnt, wii eyer sayn elter pruuter — woo Yeehoowa sayn Tsayer waar — pesuucht hot. Fom aanfang aan, hat ich Heinz kërn. Awer tee wolt een misyoneer wëre, un ich net. Soo, am aanfang, hon ich mayn xpiirunge fer mich pehal. Awer xpeeter, hon ich un Heinz aan kefang namoriire. Meyer hon uns kehayrat un aan kefang mitsamer wii pyoneere in Austrya tiine.

ICH KRIIN TE WUNX FER MISYONEERIN SIN

Heinz hot ofts mit mich kexproch iwer sayn wunx fer misyoneer wëre. Tee hot mich nii ketswung, awer hot mich keholef too triwer tenke, mit soo sorte frooche: “Wayl mer khee khint hon, meechte mer khene mee in Yeehoowa sayn tiinst mache?” Wayl ich pleet waar, misyoneerin wëre hot mich pang kep. Es is woer tas ich een pyoneerin waar, awer een misyoneerin wëre, hot tsu xweyer fer mich aus kesiin. Noch soo, hot Heinz mit ketult, net kelos tas tiise tsiil ferxwiine teet. Tee hot mich aach uf kemuut mee tenke iwer wii ich ti anere helfe khont, xtats aan mich selepst. Tiise aanreet hot mich fiil keholef.

Mit te tsayt, hon ich te wunx kriit fer een misyoneerin wëre un meyer hon ti petitsyoon fer ti Xileat Xuul aus kefiilt. Awer te pruuter woo ti filyaal uf kephast hot, hot kesaat tas es kuut weyer tas ich lërne teet peser ënglix xpreche. Ich hon 3 yoore too traan kexaft. Awer too, hon ich un Heinz een unkewaartne insetsung kriit: in een sërpix-kroatix kemaynt in Salzburg, Austrya, tiine. Ti sërpix-kroatix xprooch waar net laycht, awer meyer hate fiile Piipel xtuutye. Torich ti 7 neekste yoore, hon mer kepreeticht fer ti layt woo sërpix-kroatix xprooch kexproch hon. Un Heinz hot 1 yoer wii sirkuyt superintentent ketiint.

In 1979, hon ti priiter woo ti filyaal uf kephast hon, uns ferlangt een khorts tsayt in Pulkaarya plaype. Wayl ti preetich aarwayt tat ferpoot waar, hon se uns ferlangt tas mer uns ferxtele solte wii wën mer am reese weyere. Unser opjetiiw waar net preetiche awer heelich, kans kleene puplikatsyoone nëme tsu te 5 xwestere woo in Sofia keleept hon, ti haupst xtat fon Pulkaarya. Ich hat fiil pang, awer Yeehoowa hot mich keholef. Tiise 5 xwestere waare aarich koraajix un froo, opwool se khente in kexpërt wëre. Tëne sayn payxpiil hot mich koraaj kep fer kwalkee insetsung in Yeehoowa sayn Orkanisatsyoon aan nëme.

In tiise tsayt, hon mer noch mool een petitsyoon tsu te Xileat Xuul kexikt un yets, sin mer keruuft kep. Meyer hon kerechent tas mer ti xuul in te Fereenichte Xtaate fon Amërika in ënglix mache teete. Awer in nofemper fon 1981, hot te Orkanisatsyoon aan kefang ti Xileat Xuul in Taytxlant aach mache. Soo, khonte mer ti xuul in taytx mache, woo ich laychter ferxteen khont. Awer was fer weyer unser insetsung?

MISYONEERE IN EEN LANT FOL KRIICHE

Meyer sin tsu Keenya in kesetst kep. Awer ti filyaal fon Keenya hot uns kefroot op mer khente im lant neewer traan tiine, Ukanta. Mee wii 10 yoore eente, hat te Xeneral Idi Amin tas militeer kefiirt fer ti rechiirung um mache un ersetse. Torich sayn rechiirung, hot tee kexikt tausente layt um pringe un milyoone hon een xweyer leepe kelit. Tan in 1979, hon ti xeneral sayn faynte tëm sayn rechiirung um kemacht. Ich tenke ich mus kaar net saan awer, ich hat pang fer mich wanere tsu een lant woo soo fiil wyolënts kelit hot. Awer Xileat hat uns foer perayt fer uf Yeehoowa traue. Tes weeche, hon mer ti insetsung aan kenom.

Ukanta waar een torich naner. Ti rechiirung khont net waser, licht un anere neetiche tinge fer ti layt fersoriche. Ti telefoone hon net funtsyoniirt. Ti layt hon sich naner kexoos un kextool, hauptseechlich torich ti nacht. Soo, wën es tunkel waar, sin ti layt tehëm keplip. Tii hon kehoft un kepeet tas nimant khome teet sayn tinge xteele orer tëne um pringe. Opwool tas leepe xweyer waar, hon ti priiter in Ukanta wayter Yeehoowa froo ketiint.

In 1982, sin ich un Heinz in Kampala hin khom, Ukanta sayn haupst xtat. Torich ti eyerste 5 moonate, sin mer im haus fon Sam un Christina Waiswa keplip. Tii hon aach mit 5 khiner un 4 parente keleept. Te pruuter un ti xwester Waiswa un sayn familye hon ofts ploos een mool te taach kes; awer tii waare imer wilich fer mit uns teele was se hate. Torich unser tsayt mit te Waiswa, hon mer fiile lisyoone kelërnt woo uns keholef hon in unser aarwayt wii misyoneere. Meyer hon, tsum payxpiil, kelërnt wii uns paate mit weeniche liter waser un tan tiise selwiche waser ufm waso xiite, noo tas mer tëm penutst hon. In 1983, hon ich un Heinz uns kewanert tsu een haus in een plats fon Kampala woo net tsu kefeerlich waar.

Meyer hon ti preetich aarwayt in Kampala keliipt. Ich tenke mich traan tas eene moonat, hon mer mee wii 4.000 piichelcher ap kep. Awer tas pestes waar se siin wii ti layt sich aan kextelt hon wii se ti woerheet keheert hon. Tii hon Kot respektiirt un wolte iwer ti Piipel xpreche. Neekst imer, hat yeete eene fon uns 10 pis 15 Piipel xtuutye. Un meyer hon fiil mit unser xtutënte kelërnt. Tsum payxpiil, opwool se muste tsu te fersamlunge yeete woch laafe, hon se sich nii pexweert un tii waare imer froo.

In 1985 un 1986, sin noch 2 kriiche in Ukanta pasiirt. Ofts, hon mer khiner kesiin mit kroose wafe. Tii hon wii soltaate ketiint un hon kontroliirt weer torich ti xtroose kang is. Torich tiise tsayt, hon mer kluucheet tsu Yeehoowa in kepeet ferlangt un aach tas eyer unser hërts peruyche teet soo lang wii mer kepreeticht hon. Un Yeehoowa hot unser kepeete keantwort. Unser pang in ferxwun wii mer ti layt kefun hon woo mee iwer Yeehoowa lërne wolte.

Meyer hon aach kërn kepreeticht fer ti layt woo sich tsu Ukanta kewanert hate. Tsum payxpiil, meyer hon ti Piipel xtutiirt mit een tokter, woo Murat Ibatullin keheest hot, un aach mit sayn fraa Dilbar. Tiise pheyerche fon Tatarstan in Ruslant, hot sich taafe kelos un pis hayt tuun se Yeehoowa troy tiine. Xpeeter, hon ich Tatjana Vileyska ketrof, een fraa fon Ukraanya. In tiise tsayt, waar Tatjana soo tiifsinich tas se wolt sich um pringe. Noo sayn taaf, is Tatjana tsurik tsu Ukraanya kang un xpeeter hot se ketiint wii iwersetser fon unser puplikatsyoone.a

NAYE KEFOORE

In 1991, wii mer in Austrya waare torich unser fërye, hot ti filyaal fom lant uns kexrip. Tii hon uns een nay insetsung kep: in Pulkaarya tiine. Torich phaar yoore waar ti preetich ferpoot in etliche lënter fon Europa. Awer tas hot sich keënert un Yeehoowa sayn Tsayer hon erlaupnis kriit fer in tiise lënter preetiche, too tepay Pulkaarya. Wii ich xon eente kesaat hon, hate ich un Heinz puplikatsyoone tsu tiise lant heelich keprung, wii ti aarwayt noch ferpoot waar. Awer yets sin mer tat kexikt kep fer se preetiche.

Meyer sin oryentiirt kep terek tsu Pulkaarya keen. Soo meyer sin nii tsurik tsu Ukanta kang fer unser tinge hoole orer “auf wiiter siin” saan fer unser priiter un xwestere tat. Xtats tas, sin mer tsu te filyaal fon Taytxlant kang, hon mer een khare fon tëne kriit un tan sin mer pis Pulkaarya kefaar. Meyer sin tsu een krup mit unkefeer 20 puplikatoore in Sofia in kesetst kep.

In Pulkaarya, hon mer phaar naye kefoore mit kemacht. Eyerst, wuste mer net ti xprooch xpreche. Tsweet, es waare ploos 2 puplikatsyoone un pulkaarix: A Verdade Que Conduz à Vida Eterna un Meu Livro de Histórias Bíblicas. Trit, es waar aarich xweyer Piipel xtuutye aan fange. Opwool tiise kefoore, hot unser kleen krup flaysich kepreeticht. Ti Ortotoksix Khërich fon Pulkaarya hot tas kemërkt un hot aan kefang uns yachte.

In 1994 hot ti rechiirung net mee Yeehoowa sayn Tsayer wii een relichyoon erkhënt un fiile layt hon ketenkt tas mer een kefeerlich relichyeesix krup waare. Etliche priiter sin in kexpërt kep. In te tsaytung un in te TV, hon ti layt fiile xrekliche liie iwer uns fertseelt. Tii hon kesaat tas mer kelos hon unser khiner xtërpe wayl mer khee pluut transfusyoon aan kenom hon un tas mer anere uf kemuut hon sich um pringe. Soo es waar aarich xweyer se preetiche. Ofts hon mer krope layt kefun woo uns ferxënt hon, ti polise keruuft hon un soo kaar tinge aan uns kexmis hon. Es waar net meechlich puplikatsyoone tsu Pulkaarya pringe un es is xweyer kep fersamlung pletse mite. Ti polise hon soo kaar eene fon unser konkrëse xtil kehal. Ich un Heinz waare net keweent mit soo fiil has siin. Tas waar kans anerste wii Ukanta, woo mer fiile layt ketrof hon woo ti Piipel xtutiire wolte. Was hot uns keholef net oone muut kepe?

Tsayt mit unser priiter un xwestere fertraype hot uns froo kelos. Tii hon ti woerheet keliipt un waare petanklich weeche ti hilef woo mer tëne kep hon. Meyer al hon uns naner uf kephast un kextitst. Ich un Heinz hon kelërnt tas mer khene froo in kwalkee insetsung sin wën mer ti layt wayter liipe.

Awer mit te lëngt, hon ti tinge sich ferpesert. In 1998, hot ti rechiirung Yeehoowa sayn Tsayer noch mool wii een relichyoon erkhënt un fiile fon unser puplikatsyoone sin tsu pulkaarix iwersetst kep. Tan in 2004, is een nay filyaal kepay tetikiirt kep. Hayt kepts 57 kemaynte in Pulkaarya, mit 2.953 puplikatoore. In 2024 sin 6.475 layt tsum Aantenke khom. Friier es waare ploos 5 xwestere in Sofia, awer yets kepts 9 kemaynte. Meyer hon wërklich kesiin ti erfiilung fon te profetsii: “Te kleen wërt tausent.” (Isa. 60:22)

PERSEENLICHE KEFOORE

Torich mayn leepe, hon ich phaar kesuntheet propleeme kehat. Phaar mool hon toktere kewekse in mich kefun, too tepay eene in mayn khop. Ich hon ratyoterapii kemacht fer tiise keweks ferkleene. Ich sin aach tsu Intya kang fer een sirurxii mache, woo 12 xtune ketauert hot, un woo neekst tas kanse keweks wech kenom hot. Noo te sirurxii, sin mer een tsayt im Petël fon Intya keplip tas ich khent peser wëre. Tan sin mer tsurik tsu unser insetsung in Pulkaarya kang.

Foerlaywich hot Heinz aan kefang een unkeweenlich krankheet layte. Tes weeche es waar xweyer fer tëm laafe, xpreche un sayn muskele kontroliire. Soo lang wii sayn krankheet xlimer kep is, must ich tëm noch mee helfe. Ich hon mich als mool iwerlaat kexpiirt un ich hon mich ketanke kemacht tas ich tëm net mee uf kephast kreecht. Awer eene yunge pruuter, woo Bobi keheest hot, hot Heinz ofts in kelaat fer mit tëm preetiche keen. Heinz khont net kuut xpreche orer sayn aarme un peen kontroliire. Awer noch soo, hot Bobi sich net ferxeemt mit tëm in te preetich keen. Tee waar imer tat fer Heinz helfe wën ich tas net mache khont. Ich un Heinz hate ëntxlist net khiner in tiise sisteem kriin fer mee fer Yeehoowa mache. Awer meyer hon kexpiirt tas Yeehoowa uns Bobi wii een soon kep hot! (Mar. 10:29, 30)

Heinz hot aach kreeps kelit. Es is traurich, awer in 2015 is mayn liipe man kextorep. Ich hon soo fiil ferlangre fon mayn man… Tee hot mich imer keholef net tsu ëngstlich wëre. Es is aarich xweyer se klaape tas eyer net mee too is. Awer in mayn ketanke is eyer noch am leepe. (Luk. 20:38) Sayn liipliche wërter un kuute aanreete tuun ofts in mayn ketanke khome torich te taach. Ich sin aarich petanklich tas mer khonte Yeehoowa mitsamer tiine torich fiile yoore.

PETANKLICH WEECHE YEEHOOWA SAYN HILEF

In al mayn xwiirichkheete, hot Yeehoowa mich keholef. Tee hot mich aach keholef een misyoneerin wëre woo ti layt liipt, opwool ich pleet sin. (2 Tim. 1:7) Kot sayn tank, sin ich un mayn xwester in te fol tsayt tiinst. Hayt tii un sayn man tiine in een sërpix sirkuyt in Europa. Yeehoowa hot wërklich keantwort ti kepeete woo mayn papa kemacht hot wii ich een khint waar!

Ti Piipel xtutiire, kept mich inerlich friit. In xweyere tsayte, hon ich kelërnt “noch tiifer [kepeete]” mache, soo wii Yeesus. (Luk. 22:44) Een aat wii mayn kepeete keantwort sin, is torich ti liip un fraayntlichkheet fon te priiter un xwestere in mayn kemaynt in Nadezhda, Sofia. Tii tuun mich imer in laate fer etwas mit tëne mache un mich ofts saan tas se mich liipe. Tas ales lost mich aarich froo.

Ich tuun ofts triwer noo tenke iwer tas ufxtaye un ich siin mayn kanse familye im Paratiis. Mayn eltere sin foer unser haus un sin soo xeen un yung wii se waare im taach fon sayn hoochtsayt. Ich siin mayn xwester een ese in richte. Un ich siin aach Heinz neewich sayn khaul. Soo sorte tinge foer xtele, helft mich ti nekatiiwe ketanke aus mayn khop xtele un filt mayn hërts mit petanklichkheet tsu Yeehoowa.

Wën ich triwer noo tenke iwer ti kanse kuute tinge woo Yeehoowa mich kep hot in mayn leepe un ti tinge woo eyer mich noch kepe tuut, xpiire ich mich soo wii Tawi, woo kesaat hot im Psalm 27:13, 14: “Woo weyer ich wën ich khee klaape hët, tas ich Yeehoowa sayn kuutheet siin teet in tëm lant fon te lepeentiche? Hof uf Yeehoowa; say koraajix un xtark im hërts. Yaa, hof uf Yeehoowa.”