Yeehoowa “heelt tii woo een ferprochne hërts hon”

1. Wii xpiirt sich Yeehoowa iwer sayn tiiner?

WAS siit Yeehoowa in sayn tiiner too uf te eyert? Eyer mërkt wën mer froo un aach wën mer traurich sin. (Psal. 37:18) Tee kefalt sich mit uns wën mer uns aan xtrenge fer tëm wayter tiine, soo kaar wën mer unmuutich sin. Un tee is aach wilich fer uns helfe un treeste.

2. (a) Was macht Yeehoowa fer tii woo een ferprochne hërts hon? (b) Wii khene mer nutse fon sayn hilef kriin?

² Psalm 147:3 saat tas Yeehoowa tuut ti “wee uf phase” fon tëne woo een ferprochne hërts hon. Tiise tekst pexraypt ti aat wii Yeehoowa helft tii woo emotsyonaal phayn layte. Wii khene mer nutse fon tiise hilef kriin? Mërk mool een ferklaychung: een kwap tokter khan fiiles mache fer een krank persoon helfe keheelt wëre. Awer fer nutse fon tiise hilef kriin, mus ti krank persoon acht kepe tsum tokter sayn oryentiirunge un tëne aach noo keen. Kraat soo, mise mer Yeehoowa sayn oryentiirunge foliche fer keheelt wëre in emotsyonaal aat. In tiise artikel, siin mer was Yeehoowa in te Piipel saat fer tii woo emotsyonaal phayn layte un wii mer Sayn liipliche aanreete aan wëne khene.

YEEHOOWA LOST UNS SICHER TAS MER WEYERT FER TËM HON

3. Warom tuun etliche xpiire tas se khee weyert hon?

³ Es is xaat, awer hayt in te welt, tuun fiile layt net ti anere liipe. Tes weeche, tuun se ti anere xlecht pehantele un tëne xpiire mache tas se khee weyert hon. Een xwester, woo Helena heest, saat: “Mayn eltere waare net liiplich kewees; mayn papa waar wyolënt un tee hot mich yeete taach kesaat tas ich khee weyert hat.” Fiilaycht hot yemant tich imer kritikiirt, tich xlecht pehantelt orer tich tenke kemacht tas tuu khee weyert host. Wën es soo is, khan es xweyer sin se klaape tas yemant tich wërklich liipt.

4. Tëm noo Psalm 34:18, was fer sicherheet kept uns Yeehoowa?

⁴ Soo kaar wën anere tich xlecht pehantelt hon, tuu khanst tich sicher sin tas Yeehoowa tich liipt un weyert fer tich kept. “Yeehoowa is ticht pay tëne woo een ferprochne hërts hon.” (Lees Psalm 34:18.)b Wëns tuu xpiirst tas tuu khee weyert host, eriner tich tas Yeehoowa tayn kwaliteete kesiin hot un tich tsu tëm ketsoo hot. (Yoo. 6:44) Tee is imer fërtich fer tich helfe, wayl eyer tich aarich fiil liipt.

5. Was khene mer lërne mit te aat wii Yeesus pehantelt hot tii woo niter kextelt waare?

⁵ Meyer khene iwer Yeehoowa sayn xpiirunge lërne wën mer Yeesus sayn payxpiil noo kuke. Wii Yeesus uf te eyert waar, hot eyer liiplich pehantelt tii woo niter kextelt waare. (Mat. 9:9-12) Een mool hot een kranke fraa aan tëm sayn tsaych aan kekrif wayl se wolt keheelt wëre. Yeesus hot se ketreest un keloopt weeche sayn klaape. (Mar. 5:25-34) Yeesus macht sayn Fater perfekt noo. (Yoo. 14:9) Soo khanst tuu tich sicher sin tas Yeehoowa tich weyert kept un tas tee mërkt tayn kuute kwaliteete, soo wii tayn klaape un tayn liip tsu tëm.

6. Was khanst tuu mache wëns tuu tenkst tas tuu khee weyert host?

⁶ Was khanst tuu mache wëns tuu wayter tenkst tas tuu khee weyert host? Lees piiplixe wersikele woo tich sicher lose tas Yeehoowa tich weyert kept un tenk too triwer noo.c (Psal. 94:19) Ferklaych tich net mit te anere un hal tich net traan aan was tuu net kemacht kriist. Yeehoowa waart net tas tuu mee machst wiis tuu khanst. (Psal. 103:13, 14) Wën yemant tich emotsyonaal, fiisix orer seksuaal xaate keprung hot, es waar net tayn xult kewees. Ferkes tich net: Yeehoowa tuut aprechnunge mache mit tëne woo xaate pringe, net mit tëne woo xaate layte. (1 Phe. 3:12) Sandra, woo krop pehantelt waar wii se een khint waar, saat: “Ich tuun ofts hilef tsu Yeehoowa ferlange tas ich mich siin khan soo wii eyer mich siit.”

7. Wii khene mer unser friirixe speryense kuut penutse in Yeehoowa sayn tiinst?

⁷ Tuu nii tswayfele tas Yeehoowa tich penutse khan fer ti anere helfe. Tee kept tich ti eer fer mit tëm in te preetich aarwayt xafe. (1 Kor. 3:9) Tuu khanst een kroos hilef kepe fer tii woo layte. Warom khan ma tas saan? Wayl weeche ti xlime tinge woos tuu kelit host, khanst tuu se laychter ferxteen. Helen, iwer weem mer foner traan kexproch hon, hot hilef kriit un yets khan se ti anere peser helfe. Tii saat: “Ich hon mich unutslich kexpiirt. Awer weeche Yeehoowa, tuun ich mich keliipt xpiire un tee tuut mich penutse fer ti anere helfe.” Helen tuut hayt wii een rekulaar pyoneerin froo tiine.

YEEHOOWA WIL HON TAS MER SAYN FERTSAYUNG AAN NËME

8. Was saat uns Yeehoowa in Isayas 1:18?

⁸ Etliche fon Yeehoowa sayn tiiner tuun sich noch unruych xpiire weeche ti sinte woo se friier kemacht hon — foer orer noo sayn taaf. Awer meyer sole uns erinere tas Yeehoowa uns tas fray khaaf opfer kep hot weeche sayn tiif liip tsu uns. Un kewis wil eyer hon tas mer sayn kexenk aan nëme. Yeehoowa lost uns sicher tas wën mer ‘ti sache mit tëm in te ray tuun’,d tuut eyer uns kans fertsaye. (Lees Isayas 1:18.)e Meyer sin aarich petanklich tas unser liipliche Fater ferkest sich fon te sinte woo mer friier kemacht hon! In te selwich tsayt, tuut eyer sich imer traan tenke fom kuutes woo mer kemacht hon. (Psal. 103:9, 12; Hep. 6:10)

9. Warom sole mer net wayter tenke iwer ti sinte woo mer friier kemacht hon?

⁹ Wëns tuu tich unruych xpiirst weeche was tuu friier kemacht host, xtreng tich aan fer tich konsentriire aan was tuu yets un im futuer mache khanst. Mërk mool tas payxpiil fom aphostel Phaul. Tee hat ti kriste krop keyacht un tee hot sich traurich too teweeche kexpiirt; awer tee wust tas Yeehoowa tëm fertsayt hat. (1 Tim. 1:12-15) Meecht eyer wayter iwer sayn friirixe sinte ketenkt hon? Kewis net, soo wii eyer aach net wayter ketenkt hot aan was eyer kemacht hat wii eyer een importante fariseer waar. (Fili. 3:4-8, 13-15) Xtats tas, hot Phaul wayter sayn pestes in te preetich aarwayt kemacht un hot wayter tsum futuer kekukt. Soo wii Phaul, khanst tuu net ënere was xon pasiirt is, awer tuu khanst Yeehoowa hayt loope un kefale. Un tuu khanst iwer te wunerlich futuer woo eyer tich ferxproch hot, tenke.

10. Was khanst tuu mache wën tayn friirixe aktsyoone anere wee kemacht hon?

¹⁰ Im xtant, xpiirst tuu tich traurich weeche etliche tinge woos tuu friier kemacht host un woo xaate fer anere keprung hon. Was khan tich helfe? Mach was tuu khanst fer ti tinge noch mool in te ray lose, too tepay tich eerlich ëntxultiche. (2 Kor. 7:11) Peet tas Yeehoowa ti neetich hilef kept fer tii woo weeche tayn aktsyoone petrof kep sin. Tee khan tich un tii woos tuu wee kemacht host, helfe wayter aus hale un noch mool friit xpiire.

11. Was khene mer mim payxpiil fom profeet Yoonas lërne? (Kuk aach tas pilt.)

¹¹ Lërn mit tayn feeler un los Yeehoowa tich penutse uf kwalkee aat wii eyer raus suucht. Mërk mool tas payxpiil fom profeet Yoonas. Kot hat tëm kexikt tsu Niiniwe keen, im lëst, awer tee is tsu Tarsis aus keris, im oëst. Yeehoowa hot Yoonas tisipliniirt un tee hot mit sayn feeler kelërnt. (Yon. 1:1-4, 15-17; 2:7-10) Yeehoowa hot net noo kelos Yoonas wii een profeet penutse. Kot hot tëm een aner oportuniteet kep fer wii profeet in Niiniwe tiine un, yets, waar Yoonas fërtich fer aan heere. Opwool Yoonas traurich weeche sayn feeler waar, hot eyer kemacht was Kot tëm ferlangt hot. (Yon. 3:1-3)

YEEHOOWA TREEST UNS TORICH SAYN HAYLICHE KAYST

12. Wii kept uns Yeehoowa friit wën mer was xlimes mit mache? (Filiper 4:6, 7)

¹² Torich sayn hayliche kayst, tuut Yeehoowa uns treeste wën mer xlime propleeme layte. Mërk mool ti speryens fon Ron un Carol. Es is xaat, awer sayn soon hot sich selepst um keprung. “Meyer hate xon xlime proope mit kemacht — saan se —, awer tas waar sicher ti xlimste. Fiile nachte, hon mer net kexloof; soo hon mer tsu Yeehoowa kepeet un wërklich te friit kexpiirt woo in Filiper 4:6, 7f pexrip is.” (Lees.) Wën tayn hërts ferproch is weeche een xlim situatsyoon, xiit tëm foer Yeehoowa aus. Tuu khanst mit Kot xpreche soo ofts un soo lang wiis tuu wilst. (Psal. 86:3; 88:1) Ferlang Yeehoowa sayn kayst noo un noo; tee tuut tich imer helfe. (Luk. 11:9-13)

13. Wii khan te hayliche kayst uns helfe wayter Yeehoowa troy tiine? (Ëfeser 3:16)

¹³ Tuust tuu een xweyer propleem mit mache woo tich oone kraft lost? Te hayliche kayst khan tich ferxtërke fer wayter Yeehoowa troy tiine. (Lees Ëfeser 3:16.)g Mërk mool ti speryens fon een xwester woo Flora heest. Tii un sayn man waare mitsamer wii misyoneere am tiine. Awer tan is sayn man untroy kep un tii hon sich tiworsiirt. Tii saat: “Ich waar mechtich traurich weeche was eyer kemacht hat un ich khont aan niks aneres tenke. Ich hon hayliche kayst tsu Yeehoowa in kepeet ferlangt tas ich aus hale khent un tee hot mich ketreest. Un, opwool es am aanfang unmeechlich aus kesiin hot, sin ich xtërker kep un ich hon es aus kehal.” Flora xpiirt tas Kot se keholef hot noch mee uf tëm traue. Tii is sich aach sicher tas eyer se helft in ale ti proope woo se mit macht. Flora saat tas ti wërter fom Psalm 119:32 tuun kenau pexraype ti aat wii Yeehoowa se keholef hot. Te tekst saat: “Ich tuun mich aan xtrenge fer te weech fon tayn kepoote noo keen, wayls tuu machst een plats too tefoer in mayn hërts uf.”

14. Was khene mer mache fer mee fon Kot sayn kayst kriin?

¹⁴ Noo tas tuu hayliche kayst tsu Yeehoowa ferlangst, was solst tuu mache? Mach tinge woo tich helfe mee fon Kot sayn kayst kriin. Too tepay is tsu te fersamlunge keen un tsu te anere preetiche. Lees Kot sayn Wort yeete taach. Tas tuut tich helfe aan Kot sayn ketanke triwer noo tenke. (Fili. 4:8, 9) Soo lang wiis tuu leest, kep acht tsu te layt in te Piipel woo proope mit kemacht hon un mërk wii Yeehoowa se keholef hot aus hale. Sandra, iwer weem mer foner traan kexproch hon, hot phaar xlime propleeme mit kemacht. Tii saat: “Yoosef sayn kexicht tuut mich fiil uf muute. Tee hot net kelos ti unkerechtichkheete un ti proope tëm sayn fraayntxaft mit Yeehoowa ferxweeche.” (Xee. 39:21-23)

YEEHOOWA TREEST UNS TORICH TI PRIITER

15. Weer khan uns treeste un wii khene se uns helfe? (Kuk aach tas pilt.)

¹⁵ Wën mer am layte sin, khene mer fiil troost torich unser priiter un xwestere kriin. (Kol. 4:11) Een aat wii Yeehoowa uns sayn liip tsaycht, is torich tëne. Fer uns treeste, khene se uns horiche wën mer iwer unser propleeme xpreche orer aynfach mit uns plaype. Tii khene uns uf muute wën se een piiplix tekst uns leese orer wën se een kepeet mit uns mache.h (Rom. 15:4) Als mool, khan een pruuter uns erinere was Yeehoowa iwer een sache tenkt un soo uns helfe wayter aus hale. Unser priiter khene uns aach praktix hilef kepe; tii khene, tsum payxpiil, uns een ese in richte tas mer uns peser xpiire.

16. Was mise mer im xtant mache fer hilef fon te anere kriin?

¹⁶ Als mool mise mer ti neetich hilef ferlange. Unser priiter un xwestere liipe uns un tii wole uns helfe. (Xpr. 17:17) Awer im xtant wise se net wii mer uns xpiire orer was mer prayche. (Xpr. 14:10) Wëns tuu emotsyonaal phayn layte tuust, xprech iwer tayn xpiirunge mit rayfe fraaynte. Saa tëne was se mache khene fer tich helfe. Tuu khanst im xtant fertseele mit eene orer tswaay elteste mit weem tuu tich kuut xpiirst. Etliche xwestere hon es aach kuut kefun mit een aner rayf xwester fertseele.

17. (a) Was khent uns um hale ti priiter sayn hilef kriin? (b) Wii khene mer unser teel mache fer tiise hilef kriin?

¹⁷ Playp net tsu fiil tsayt aleen. Khan sin tas, weeche tayn phayn, wilst tuu net tsayt mit te anere aus kepe. Als mool, khene tayn priiter un xwestere net kans ferxteen wiis tuu tich xpiirst orer khene se was ferkheertes saan. (Tya. 3:2) Awer playp net wech fon tayn priiter un xwestere — Yeehoowa khan se penutse fer tich uf muute. Gavin, een elteste woo tiifsinichkheet layte tuut, saat: “Ofts, wil ich net fertseele orer tsayt mit mayn fraaynte aus kepe.” Awer Gavin xtrengt sich aan fer mit sayn priiter un xwestere plaype. Un ofts xpiirt eyer sich peser too teweeche. Een xwester, woo Amy heest, saat: “Weeche was ich xon friier mit kemacht hon, is es xweyer fer mich uf te anere traue. Awer ich sin am lërne mayn priiter un xwestere liipe un uf tëne traue, soo wii Yeehoowa es macht. Ich wees tas Yeehoowa too temit froo wërt un tas lost mich aach froo.”

YEEHOOWA SAYN FERXPRECHE KHENE UNS TREESTE

18. Was tuut im futuer pasiire un was khene mer yets mache?

¹⁸ Klaych tuut Yeehoowa unser kanse fiisixe un emotsyonaale wee heele. (Apo. 21:3, 4) In tiise tsayt, al ti xlime tinge woo mer kelit hon, “tuun net mee ins hërts khome”. (Isa. 65:17) Awer xon hayt tuut Yeehoowa unser wee uf phase. Tee kept uns fiile tinge fer uns helfe un treeste. Soo, nëm sayn hilef aan! Tuu nii tswayfele — noch net mool torich een sekunt — tas Yeehoowa tich uf phast. (1 Phe. 5:7)