“Suucht hayt raus weem teyer tiine wolt”

1. Was mise mer mache fer wërklich froo sin un warom? (Isayas 48:17, 18)

UNSER himlixe Fater liipt uns aarich fiil un tee wil hon tas mer frooheet yets un im futuer hon. (Ekl. 3:12, 13) Tee hot uns mit wunerliche apiliteete kemacht, awer tee hot uns net ti apiliteet kep fer uns selepst rechiire orer ëntxlise was richtich un ferkheert is. (Ekl. 8:9; Yee. 10:23) Tee wees tas, fer wërklich froo sin, mise mer tëm tiine un foliche. (Lees Isayas 48:17, 18.)a

2. Was wil Satanaas hon tas meyer klaape un was hot Yeehoowa too teweeche kemacht?

² Satanaas wil hon tas mer klaape tas mer khene froo sin oone Yeehoowa un tas ti mënxe sich selepst rechiire khene. (Xee. 3:4, 5) Wii hot Yeehoowa pewayst tas Satanaas een liichner is? Tee hot erlaupt tas ti mënxe torich een tsayt sich selepst rechiire teete. Es is laycht se siin ti resultaate woo too teweeche khom sin. Im keeche teel, ti Piipel xprecht iwer fiile mëner un fraae woo froo waare wayl se Yeehoowa ketiint hon. Yeesus waar te frooeste fon tëne. In tiise artikel, lërne mer warom Yeesus raus kesuucht hot Yeehoowa tiine. Tan tuun mer siin warom fertiint Yeehoowa tas mer tëm aan peete un tsum xlus kuke mer etliche uersache warom meyer raus suuche Yeehoowa tiine.

WAROM HOT YEESUS RAUS KESUUCHT YEEHOOWA TIINE?

3. Was hot Satanaas fer Yeesus aan kepoot un was hot Yeesus raus kesuucht se mache?

³ Wii Yeesus uf te eyert waar, must eyer raus suuche weem eyer tiine teet. Tsum payxpiil: een khorts tsayt noo Yeesus sayn taaf, hot Satanaas tëm ti kanse rechiirunge fon te welt aan kepoot. Yeesus khent tas ales kriin, wën eyer Satanaas ploos een mool aan peete teet. Yeesus hot keantwort: “Kee wech, Satanaas! Wayl es xteet in te Xrifte: ‘Tuu solst Yeehoowa tayn Kot aan peete un ploos tëm tiine.’” (Mat. 4:8-10) Warom hot Yeesus tas ëntxlist? Wole mer etliche uersache kuke.

4-5. Was fer sin etliche uersache warom Yeesus raus kesuucht hot Yeehoowa tiine?

⁴ Ti haupst uersach warom Yeesus raus kesuucht hot Yeehoowa tiine is wayl eyer sayn Fater aarich liipt. (Yoo. 14:31) Yeesus tuut aach Yeehoowa tiine wayl tas is tas richtiches fer se mache. (Yoo. 8:28, 29; Apo. 4:11) Yeesus wees tas Yeehoowa te Kriatoer is, tas mer khene uf Tëm traue un tas Eyer uns fiile kuute tinge kept. (Psal. 33:4; 36:9; Tya. 1:17) Yeehoowa hot imer ti woerheet fer Yeesus kesaat un hot tëm ales kep. (Yoo. 1:14) Awer Satanaas is kans anerste wii Yeehoowa. Weeche tëm, tuun ti mënxe sinte un xtërpe. Tee is een kiirich un ekoiistixe liichner. (Yoo. 8:44) Yeesus hot Yeehoowa un Satanaas kuut kekhënt. Tee wolt nii soo wii Satanaas sin un sich keeche Yeehoowa repeliire. (Fili. 2:5-8)

⁵ Een aner uersach warom Yeesus raus kesuucht hot Yeehoowa tiine is wayl eyer wust ti kuute resultaate woo too teweeche khome teete. (Hep. 12:2) Tee wust tas, wën eyer troy plaype teet, teet eyer Yeehoowa sayn naame ferhayliche un es meechlich lose tas ti sint un te toot wech kexaft weyere.

WAROM FERTIINT YEEHOOWA UNSER AANPEETUNG KRIIN?

6-7. (a) Warom tuun fiile hayt Yeehoowa net tiine? (b) Warom tuut Yeehoowa unser aanpeetung fertiine?

⁶ Fiile hayt tuun Yeehoowa net tiine wayl se khëne net tëm sayn xeene kwaliteete un al ti kuute tinge woo eyer tëne macht. Was eenliches is pasiirt mit te layt in Atenas, tsu weem Phaul kepreeticht hot. (Aph. 17:19, 20, 30, 34)

⁷ Phaul hot fer ti layt in Atenas aus keleet tas te woere Kot “tuut fer yeete eene leepe, luft un ale tinge kepe”. Tee hot noch kesaat: “Weeche tëm tuun mer leepe, uns weekele un eksistiire.” Kot is te Kriatoer un “tee hot fon ploos eene mënx ale mënxliche natsyoone kemacht”. Tes weeche, is eyer te eensiche woo mer aan peete sole. (Aph. 17:25, 26, 28)

8. Was tuut Yeehoowa nii mache un wii tuut eyer tsayche tas eyer uns fiil liipt?

⁸ Yeehoowa is te Kriatoer un te Soweraan fom Uniwërsum. Tes weeche, khent eyer ti layt tswinge tëm tiine. Awer Yeehoowa tuut tas nii mache. Xtats tas, tuut eyer uns pewaysunge kepe tas eyer eksistiirt un tas eyer yeete eene fon uns fiil liipt. Tee wil hon tas soo fiil layt wiis meechlich is tëm sayn fraaynte fer imer wëre. (1 Tim. 2:3, 4) Tes weeche, tuut Kot uns iipe fer ti anere in lërne ti kuute tinge woo eyer fer ti mënxe mache tuut un wii eyer tas macht. (Mat. 10:11-13; 28:19, 20) Un tee kept uns ti kemaynt. Tat khene mer tëm aan peete un hilef fon liipliche elteste kriin. (Aph. 20:28)

9. In was fer aate tuut Yeehoowa sayn liip fer al ti mënxe tsayche?

⁹ Meyer khene Yeehoowa sayn liip taytlich siin in te aat wii eyer pehantelt tii woo net klaape wole tas eyer eksistiirt. Tenk mool noo: torich xon tausente yoore, hon pilyoone layt ëntxlist se leepe tëm noo wii se tenke richtich un ferkheert is. Noch soo, Yeehoowa tuut mit kuutheet tëne kepe ales was se prayche fer wayter leepe un sich too teweeche fraye. (Mat. 5:44, 45; Aph. 14:16, 17) Weeche Yeehoowa, khene se fraaynte un familye hon woo tëne liipe, khiner kriin un sich fraye weeche sayn xweyer aarwayt. (Psal. 127:3; Ekl. 2:24) Es is taytlich tas unser himlixe Fater al ti mënxe liipt. (Eeks. 34:6) Yets wole mer etliche uersache siin warom meyer raus suuche Yeehoowa tiine un wii eyer seechent tii woo tas mache.

WAROM TUUN MER RAUS SUUCHE YEEHOOWA TIINE?

10. (a) Was is ti haupst uersach warom meyer Yeehoowa tiine? (Matheus 22:37) (b) In was fer aate waar Yeehoowa xon ketultich mit tich? (Psalm 103:13, 14)

¹⁰ Soo wii Yeesus, tuun mer Yeehoowa tiine hauptseechlich weeche unser tiif liip tsu Tëm. (Lees Matheus 22:37.)b Meyer wole uns ticht pay Yeehoowa xafe wën mer iwer sayn kwaliteete lërne. Tsum payxpiil, Yeehoowa is ketultich un wilich fer uns fertsaye. Wii ti israeliiter unfolich tsu tëm waare, hot eyer aan kehal: “Pite, khomt fon ayre xlechte weeche tsurik.” (Yee. 18:11) Yeehoowa tenkt sich traan tas mer imperfekt sin. (Lees Psalm 103:13, 14.)c Wëns tuu tenkst iwer ti momënte woo eyer ketultich mit tich waar un tich fertsayt hot, sicher pist tuu uf kemuut tëm fer imer tiine.

11. Was fer sin anere uersache warom meyer raus suuche Yeehoowa tiine?

¹¹ Meyer wole aach Yeehoowa tiine wayl tas is tas richtiches fer se mache. (Mat. 4:10) Meyer wise aach tas wën mer leaal tsu Yeehoowa plaype, fiile kuute tinge tuun too teweeche pasiire. Meyer ferhayliche Yeehoowa sayn naame, pewayse tas Satanaas een liichner is un lose Yeehoowa sayn hërts froo. Un wën mer raus suuche Yeehoowa yets tiine, kriin mer een xeen hofnung: tëm fer imer tiine! (Yoo. 17:3)

12-13. Was host tuu kelërnt mit te speryens fon Jane un Pamela?

¹² Wën mer noch yung sin, khene mer een tiif liip tsu Yeehoowa ëntwikele un tiise liip wërt xtërker soo lang wii mer kroos wakse. Mërk mool tas payxpiil fon 2 xwestere: Jane un Pamela.d Jane waar 11 yoore alt un Pamela, 10 yoore alt, wii se aan kefang hon ti Piipel xtutiire. Sayn eltere wolte net xtutiire, awer tii hon erlaupt tas Jane un Pamela mit Yeehoowa sayn Tsayer xtutiire teete soo lang wii se aach mit te familye tsu te khërich keengte. Jane saat: “Was Yeehoowa sayn Tsayer mich in kelërnt hon, hot mich keholef fest plaype wii mayn koleke mich tswinge wolte troke in nëme un seksuaal imoraaliteet mache.”

¹³ Noo phaar yoore, sin Jane un Pamela puplikatoorine kep. Xpeeter, hon se aan kefang wii pyoneerine tiine, soo lang wii se sayn eltere, woo xon alt waare, uf kephast hon. Jane leet aus wii se sich xpiirt iwer ales was Yeehoowa tëne kemacht hot: “Ich hon kelërnt tas Yeehoowa sayn fraaynte uf phast un aach tas, soo wii 2 Timoteus 2:19 saat, ‘Yeehoowa khënt tii woo tëm keheere’.” Es is taytlich tas Yeehoowa imer uf phast tii woo raus suuche tëm liipe un tiine.

14. Wii khene mer Yeehoowa xitse? (Kuk aach ti pilter.)

¹⁴ Meyer wole hon tas ti layt ti woerheet iwer Yeehoowa wise. Tsum payxpiil, tenk iwer een ticht fraaynt woo kuut un krooshërtslich is un woo ti anere laycht fertsayt. Awer tan, tuust tuu heere yemant saan tas tayn fraaynt uneerlich un krop is. Was teest tuu mache? Tëm xitse. Kraat soo, wën mer liie iwer Yeehoowa heere, tuun mer tëm xitse un ti woerheet iwer tëm saan. (Psal. 34:1; Isa. 43:10) Torich unser wërter un aktsyoone tuun mer tsayche tas mer raus suuche Yeehoowa liipe un tiine.

15. Was fer kuute tinge sin mit Phaul pasiirt wayl eyer kroose ënerunge in sayn leepe kemacht hot? (Filiper 3:7, 8)

¹⁵ Meyer sin wilich fer ënerunge in unser leepe mache tas mer khene Yeehoowa kefale orer mee in tëm sayn aarwayt mache. Tsum payxpiil, te aphostel Phaul hat een wichtich xtel in te yiitix relichyoon. Awer eyer hot raus kesuucht tiise relichyoon lose fer Yeesus sayn tisipel wëre un Yeehoowa tiine. (Kal. 1:14) Tes weeche, hat eyer een xeen leepe in Yeehoowa sayn tiinst un tee hot aach ti xans kriit fer mit Yeesus im himel rechiire. Tee hot sich nii unmuutich kexpiirt weeche sayn ëntxlus fer Yeehoowa tiine. Un es wërt aach soo mit uns. (Lees Filiper 3:7, 8.)e

16. Was host tuu mit Julia sayn speryens kelërnt? (Kuk aach ti pilter.)

¹⁶ Wën Yeehoowa sayn tiinst tas haupste in unser leepe is, tuut eyer uns yets un im futuer peloone. Mërk mool ti speryens fon een xwester woo Julia heest. Wii Julia een yung meetche waar, hot se in te khërich kesung. Tii hot soo kuut kesung tas tii aan kefang hot iipung kriin fer een opera singer sin. Klaych, is Julia pekhant kep un hot in wichtiche pletse kesung. Soo lang wii se een xiiler in een pekhante musik xuul waar, hot een koleke aan kefang mit tëne iwer Kot xpreche. Tee hot tëne aus keleet tas Kot een naame hot — Yeehoowa. Een khorts tsayt tëm noo, hot Julia aan kefang 2 mool te woch ti Piipel xtutiire. Mit te tsayt, hot se ëntxlist sayn tsayt un kraft in Yeehoowa sayn tiinst penutse xtats een opera singer wëre. Tiise ëntxlus waar net laycht fer se mache. Tii saat: “Fiile layt hon mich kesaat tas es tum waar noo lose se singe fer Yeehoowa tiine. Awer ich wolt mayn leepe soo penutse.” Wii xpiirt sich Julia hayt iwer te ëntxlus woo se kemacht hot mee wii 30 yoore tsurik? “Ich sin froo tas ich raus kesuucht hon Yeehoowa tiine un ich wees tas eyer im futuer al ti winxe in mayn hërts, erfiile tuut.” (Psal. 145:16)

TUU WAYTER YEEHOOWA TIINE!

17. Meyer leepe ticht am ën fon tiise welt. Wii tuut tas petrefe (a) tii woo xon ëntxlist hon Yeehoowa tiine? (b) tii woo noch net raus kesuucht hon Yeehoowa tiine?

¹⁷ Meyer leepe ticht am ën fon tiise welt. Te aphostel Phaul hot kexrip: “‘Noch een kleen pisye tsayt’ un ‘tee woo khome tuut, khomt, un tee tuut sich net ferxpeete’.” (Hep. 10:37) Was petayt tas? Een tings is tas ti tsayt fer ti layt raus suuche Yeehoowa tiine, is khorts; tii mise klaych in krayfe! (1 Kor. 7:29) Een aner tings is tas wën mer xon ëntxlist hon Yeehoowa tiine, wise mer tas, opwool meyer proope mit mache, es wërt torich ploos “een kleen pisye tsayt”.

18. Was wole Yeesus un Yeehoowa hon tas mer mache?

¹⁸ Yeesus hot ti layt uf kemuut net ploos sayn tisipele wëre awer aach tëm wayter noo keen. (Mat. 16:24) Soo, wën mer Yeehoowa torich xon fiile yoore tiine, sole mer pextimt sin net uf kepe. Yeehoowa wil hon tas mer uns aan xtrenge fer tëm wayter tiine. Fiilaycht, is es net laycht tas mache, awer meyer khene xon yets froo sin un fiile seechen kriin! (Psal. 35:27)

19. Was host tuu mit Gene sayn speryens kelërnt?

¹⁹ Etliche tenke tas se mise tsu fiil uf kepe fer Yeehoowa tiine. Wëns tuu yung pist, tenkst tuu tas Yeehoowa tiine tsu xweyer fer tich is? Een yunge pruuter woo Gene heest saat: “Ich hon ketenkt tas tas leepe wii Yeehoowa sayn Tsayer tsu xtreng waar. Es hot aus kesiin tas fiile yunge um mich rom hon interesante tinge kemacht, soo wii tsu feste keen, namoriire orer wyolënte videogames xpiile. Awer ich must mayn tsayt fertraype in te fersamlunge un in te preetich aarwayt.” Wii hot tiise mënung Gene petrof? “Ich hon aan kefang een topelte leepe nëme — saat eyer — un torich een tsayt, tas waar interesant. Awer es hot mich net woere frooheet keprung. Ich hon aan kefang se tenke aan te nutse woo mer kriin wën mer foliche was ti Piipel saat un ich hon ëntxlist Yeehoowa mim kanse hërts tiine. Fon tat aan, siits aus tas Yeehoowa yeete eene fon mayn kepeete keantwort hot.”

20. Was sole mer pextimt sin se mache?

²⁰ Een psalmist hot fer Yeehoowa kesung: “Froo is tee woos tuu raus suuchst un ticht pay tich pringst, fer uf tayn hoof woone.” (Psal. 65:4) Soo wole mer pextimt sin wayter Yeehoowa tiine. Meyer wole soo wii Yosuee saan: “Ich un mayn familye tuun Yeehoowa tiine.” (Yos. 24:15)