XTUUTYUM ARTIKEL 23
LIIT 2 Tayn naame is Yeehoowa
Wii wichtich is Yeehoowa sayn naame fer tich?
“‘Teyer sayt mayn tsayer’, saat Yeehoowa.” (ISAYAS 43:10)
WAS TUUN MER SIIN?
Was mer mache khene fer Yeehoowa sayn naame ferhayliche un xitse.
1-2. Wii wise mer tas Yeehoowa sayn naame wichtich fer Yeesus is?
NIKS is wichticher fer Yeesus wii Yeehoowa sayn naame. Yeesus is ti haupst persoon woo Yeehoowa sayn naame xitst. Wii mer im letste artikel kesiin hon, waar Yeesus wilich fer se xtërpe weeche Yeehoowa sayn naame un weeche ales was tiise naame representiirt. (Mar. 14:36; Hep. 10:7-9) Un noo sayn Tausent Yoore Rechiirung, wërt Yeesus wilich sin fer sayn kans autoriteet uf kepe fer Yeehoowa sayn naame ferhayliche. (1 Kor. 15:26-28) Ales was Yeesus xon fer Yeehoowa kemacht hot, tsaycht tas eyer Yeehoowa aarich fiil liipt.
2 Yeesus is tsu te eyert khom im naame fon sayn Fater. (Yoo. 5:43; 12:13) Tee hot Yeehoowa sayn naame fer sayn tisipele pekhant kemacht. (Yoo. 17:6, 26) Wii eyer ti layt in kelërnt hot un wunere kemacht hot, hot eyer es taytlich kelos tas es waar Yeehoowa woo tëm kluucheet un kraft kep hot fer tiise tinge mache. (Yoo. 10:25) Un Yeesus hot fer Yeehoowa ferlangt fer sayn tisipele uf phase ‘weeche Sayn aychne naame’. (Yoo. 17:11) Es is taytlich tas Yeehoowa sayn naame wichticher fer Yeesus waar wii kwalkee aner tings. Soo, wii khan yemant saan tas eyer Yeesus noo keet, awer in te selwich tsayt net Yeehoowa sayn naame khëne un penutse?
3. Was tuun mer in tiise artikel siin?
3 Wayl meyer woere kriste sin, tuun mer Yeesus noo mache un liip un respekt fer Yeehoowa sayn naame tsayche. (1 Phe. 2:21) In tiise artikel, tuun mer siin warom Yeehoowa sayn naame kep hot fer tii woo ti “kuute notisye fom Raych” preetiche. (Mat. 24:14) Meyer tuun aach siin wii wichtich Yeehoowa sayn naame fer yeete eene fon uns sol sin.
“EEN FOLEK FER SAYN NAAME”
4. (a) Was hot Yeesus fer sayn tisipele kesaat eep eyer tsurik tsum himel kang is? (b) Was fer frooch tuun mer noo kuke?
4 Klaych foer tsurik tsum himel keen, hot Yeesus fer sayn tisipele kesaat: “Wën te hayliche kayst iwer aych khomt, kriit teyer macht un wërt mayn tsayer in Yeruusalem, soo wii in kans Yuteea un Samaria, un pis tsum letste ek fon te eyert.” (Aph. 1:8) Soo teete ti tisipele iweraal preetiche, net ploos in Israël. Mit te tsayt, teete layt fon te kans welt ti xans kriin fer Yeesus noo keen. (Mat. 28:19, 20) Awer Yeesus hot kesaat: “[Teyer] wërt mayn tsayer.” Soo, miste tiise naye tisipele Yeehoowa sayn naame wise, orer teete se ploos tsayer fon Yeesus sin? Ti ewënte in Aphostele sayn Kexicht 15 helfe uns ti antwort fine.
5. Wii hon ti aphostele un ti elteste in Yeruusalem ketsaycht tas al miste Yeehoowa sayn naame wise? (Kuk aach tas pilt.)
5 In 49 N.K., hon ti aphostele un ti elteste in Yeruusalem sich fersamelt fer noo kuke op tii woo net yuute waare, miste pexnit sin fer kriste wëre. Am ën fon te fersamlung, hot Tyako — Yeesus sayn xtif pruuter — kesaat: “[Pheeter] hot es taytlich pekhant kemacht wii Kot, tas eyerste mool, acht tsu te natsyoone kep hot, fer een folek fer Sayn naame raus hoole.” Iwer was fer naame waar Tyako am xpreche? Mit te wërter fom profeet Amoos, hot eyer noch kesaat: ‘Te rest fon te mënxe sol Yeehoowa flaysich suuche, tsusamer mit layt fon ale natsyoone, layt woo mit mayn naame kenënt sin, saat Yeehoowa.’ (Aph. 15:14-18) Tiise naye tisipele teete net ploos iwer Yeehoowa lërne; tii weyere aach ‘mit Yeehoowa sayn naame kenënt’. Tas wil saan tas se teete Yeehoowa sayn naame fer ti anere pekhant mache un tas ti layt teete se aach itentifitsiire wii een folek woo Kot sayn naame representiirt.
Im eyerst yoerhunert, torich een fersamlung fon te rechiirente khërperxaft, hon tiise troye mëner ferxtan tas ti kriste miste een folek fer Kot sayn naame sin (Kuk te apsats 5.)
6-7. (a) Warom is Yeesus tsu te eyert khom? (b) Was fer waar een wichticher uersach warom Yeesus tsu te eyert khom is?
6 Yeesus sayn naame petayt “Yeehoowa is Retung”, un Yeehoowa hot Yeesus penutst fer se rete al tii woo aan tëne klaape. Yeesus is tsu te eyert khom fer sayn leepe fer ti mënxe kepe. (Mat. 20:28) Wii Yeesus tas fray khaaf opfer petsaalt hot, hot eyer es meechlich kemacht tas ti mënxe keret weyere un eewiche leepe kreechte. (Yoo. 3:16)
7 Awer warom miste ti mënxe keret wëre? Weeche was im Eetem kaate pasiirt is. Wii mer im letste artikel kesiin hon, hon ti eyerste mënxe, Aatam un Ewa, sich keeche Yeehoowa repeliirt un soo ti xans ferloer fer fer imer leepe. (Xee. 3:6, 24) Awer es waar een sache woo wichticher waar wii ti retung fon te sintiche mënxe: Yeehoowa sayn naame ferhayliche. Satanaas hot liie iwer Yeehoowa kesaat. (Xee. 3:4, 5) Soo ti mënxe miste wise tas Yeehoowa niks ferkheertes kemacht hot. Yeesus waar ti pest persoon fer tas pewayse, wayl eyer Yeehoowa representiirt hot un hot Yeehoowa sayn wile perfekt kemacht.
Wii khan yemant saan tas eyer Yeesus noo keet, awer in te selwich tsayt net Yeehoowa sayn naame khëne un penutse?
8. Was mise al ti kriste ferxteen?
8 Al ti kriste mise ferxteen tas sayn retung khomt fon Yeesus sayn Fater, es wil saan, Yeehoowa Kot. (Yoo. 17:3) Soo wii Yeesus, wëre se mit Yeehoowa sayn naame itentifitsiirt. Tii mise aach ferxteen wii wichtich es is tiise naame ferhayliche. Tëne sayn retung hëngt too tefun ap. (Aph. 2:21, 22) Tes weeche al Yeesus sayn troye nookeener mise iwer tëm un Yeehoowa lërne. Es is tsum ferxteen warom Yeesus sayn kepeet in Yoohan kapitel 17 mit too ti wërter tsum ën keprung hot: “Ich hon tëne tayn naame pekhant kemacht un ich tuun tëm wayter pekhant mache soo tas ti liip woos tuu fer mich host in tëne wërt un aach tas ich eenich mit tëne wëre khan.” (Yoo. 17:26)
“TEYER SAYT MAYN TSAYER”
9. Wii khene mer tsayche tas Yeehoowa sayn naame wichtich fer uns is?
9 Mit was mer kelërnt hon, is es taytlich kep tas fer Yeesus noo keen, mise mer Yeehoowa sayn naame ferhayliche. (Mat. 6:9, 10) Khee aner naame sol wichticher fer uns sin. Un meyer mise tas tsayche torich unser aanxtelung. Soo, wii khene mer Yeehoowa sayn naame ferhayliche un pewayse tas was Satanaas kesaat hot een lii is?
10. Iwer was tuut Isayas 42 pis 44 xpreche? (Isayas 43:9; 44:7-9) (Kuk aach tas pilt.)
10 In Isayas 42 pis 44 lërne mer iwer was mer mache khene fer Yeehoowa sayn naame ferhayliche. In tiise kapitele, saat Yeehoowa fer ti layt woo Tëm net aan peete tas se pewayse sole tas sayn keeter wërklich eksistiire. Soo wii in een kericht, Yeehoowa froot op es tsayer kept woo tas pewayse khene, awer kepts khee eene. (Lees Isayas 43:9;a 44:7-9.b)
In fiile aate, es is wii wën mer in een kericht weyere (Kuk ti apsetse 10-11.)
11. Was saat Yeehoowa fer sayn folek in Isayas 43:10-12?
11 Lees Isayas 43:10-12.c Yeehoowa saat fer sayn folek: “Teyer sayt mayn tsayer (…) un ich sin Kot.” Yeehoowa is tëne am ferlange tiise frooch antworte: “Kept es een aner Kot woo net ich sin?” (Isa. 44:8) Meyer hon een kroos eer: tiise frooch antworte. Torich unser wërter un aktsyoone, khene mer pewayse tas Yeehoowa te eensiche woere Kot is. Tëm sayn naame is heecher wii al ti anere naame. Un torich ti aat wii mer leepe, tsayche mer tas mer Yeehoowa wërklich liipe un tas mer leaal tsu tëm sin — ekaal ti proope woo Satanaas keeche uns xtelt. Soo hon mer ti xans fer se helfe Yeehoowa sayn naame ferhayliche.
12. Wii hot ti profetsii in Isayas 40:3, 5 sich erfiilt?
12 Wën mer Yeehoowa sayn naame xitse, mache mer Yeesus noo. Isayas hot aach foer raus kesaat tas yemant teet “te weech fer Yeehoowa foer [perayte]”. (Isa. 40:3) Wii hot tas sich erfiilt? Yoohan te Taafer hot te weech fer Yeesus foer perayt. Awer in woerheet, tas waar te weech fer Yeehoowa, wayl Yeesus in Yeehoowa sayn naame khom is un in Tëm sayn naame kexproch hot. (Mat. 3:3; Mar. 1:2-4; Luk. 3:3-6) Ti selwich profetsii hot kesaat: “Yeehoowa sayn hërlichkheet wërt ketsaycht.” (Isa. 40:5) Wii is tas pasiirt? Wii Yeesus tsu te eyert khom is, hot eyer Yeehoowa soo perfekt representiirt tas es waar wii wën Yeehoowa selepst tsu te eyert khom weyer. (Yoo. 12:45)
13. Wii khene mer Yeesus noo mache?
13 Soo wii Yeesus, sin mer Yeehoowa sayn tsayer. Meyer nëme Yeehoowa sayn naame un meyer xpreche mit ale kaar iwer sayn wunerliche aktsyoone. Awer fer een kuute tsayer fon Yeehoowa sin, mise mer aach fer ti layt saan was Yeesus kemacht hot fer Yeehoowa sayn naame ferhayliche. (Aph. 1:8) Yeesus is ti haupst Yeehoowa sayn Tsayer un meyer mache tëm sayn payxpiil noo. (Apo. 1:5) Awer was sol Yeehoowa sayn naame fer yeete eene fon uns petayte?
WAS YEEHOOWA SAYN NAAME FER UNS PETAYT
14. Tëm noo te Psalm 105:3, wii xpiire mer uns iwer Yeehoowa sayn naame?
14 Meyer sin xtols uf Yeehoowa sayn naame. (Lees Psalm 105:3.)d Yeehoowa frayt sich wën mer xtols iwer sayn naame xpreche. (Yee. 9:23, 24; 1 Kor. 1:31; 2 Kor. 10:17) Fer uns, es is een eer Yeehoowa sayn naame loope un xitse. Meyer sole uns nii xeeme se saan tas mer Yeehoowa sayn Tsayer sin fer unser aarwayts orer xuul koleke, nochpere un anere. Satanaas wil hon tas mer noo lose se xpreche iwer Yeehoowa sayn naame fer ti anere. (Yee. 11:21; Apo. 12:17) In woerheet, Satanaas un tii woo tëm sayn liie aus prayte, wole mache tas ti layt sich ferkese fon Yeehoowa sayn naame. (Yee. 23:26, 27) Awer wayl mer Yeehoowa sayn naame liipe, wole mer tëm loope “te kanse taach”. (Psal. 5:11; 89:16)
15. Was petayt Yeehoowa sayn naame aan ruufe?
15 Meyer tuun wayter Yeehoowa sayn naame aan ruufe. (Yoël 2:32; Rom. 10:13, 14) Yeehoowa sayn naame aan ruufe, petayt mee wii ploos sayn naame wise un penutse. Es petayt khëne lërne ti sort persoon Kot is un aach uf tëm traue un sayn hilef un oryentiirunge suuche. (Psal. 20:7; 99:6; 116:4; 145:18) Meyer xpreche fer ti anere iwer sayn naame un kwaliteete. Meyer tuun aach ti layt helfe sayn leepe ënere tas se khene Yeehoowa kefale un keret wëre. (Isa. 12:4; Aph. 2:21, 38)
16. Wii khene mer pewayse tas Satanaas een liichner is?
16 Meyer sin wilich fer se layte weeche Yeehoowa sayn naame. (Tya. 5:10, 11) Wën mer troy tsu Yeehoowa plaype soo kaar wën mer layte, pewayse mer tas Satanaas een liichner is. In Yoop sayn taache, hot Satanaas iwer Yeehoowa sayn tiiner kesaat: “Een mënx tuut ales kepe fer sayn leepe se rete.” (Yoop 2:4) Satanaas hot kesaat tas ti layt teete Yeehoowa tiine ploos wën es laycht fer tëne weyer. Wën se xwiirichkheete mit mache teete, teete se Yeehoowa im xtich lose. Yoop hot pewayst tas tiise akusatsyoon falx waar. Hayt meyer hon aach ti eer fer se pewayse tas, ekaal ti proop woo Satanaas foer uns xtelt, tuun mer nii noo lose Yeehoowa tiine. Meyer khene uns kans sicher sin tas Yeehoowa uns wayter uf phase tuut weeche sayn naame. (Yoo. 17:11)
17. Tëm noo 1 Pheeter 2:12, in was fer aner aat khene mer eer fer Yeehoowa sayn naame pringe?
17 Meyer tsayche respekt fer Yeehoowa sayn naame. (Xpr. 30:9; Yee. 7:8-11) Wayl ti layt wise tas mer Yeehoowa sayn Tsayer sin, khene unser aktsyoone Yeehoowa sayn naame eere orer trekich mache. (Lees 1 Pheeter 2:12.)e Soo meyer wole uns aan xtrenge fer Yeehoowa loope torich unser wërter un aanxtelung. Tes weeche, opwool mer imperfekt sin, khene mer noch eer fer Yeehoowa sayn naame pringe.
18. Was is een aner aat fer se pewayse tas Yeehoowa sayn naame wichtich fer uns is? (Kuk aach ti noote.)
18 Yeehoowa sayn naame is wichticher fer uns wii was ti layt iwer uns tenke. (Psal. 138:2) Warom is tas soo wichtich? Wayl unser liip tsu Yeehoowa sayn naame khan mache tas ti layt xlecht iwer uns xpreche.f Wii Yeesus kextorep is, hon ti layt tëm wii een kriminoos kesiin un tëm niter kextelt. Awer Yeesus waar wilich fer soo een sort toot layte fer Yeehoowa sayn naame eere. Tee “hot ti xaam uf sayt kelos”; es wil saan, tee hot sich net tsu fiil ketanke kemacht mit was ti layt iwer tëm ketenkt hon. (Hep. 12:2-4) Tee hot sich traan kehal aan Yeehoowa sayn wile mache. (Mat. 26:39)
19. Wii xpiirst tuu tich iwer Yeehoowa sayn naame un warom?
19 Meyer sin xtols uf Yeehoowa sayn naame un tenke tas es een eer is Yeehoowa sayn Tsayer kenënt wëre. Yeehoowa sayn naame is aarich wichtich fer uns. Tes weeche, tuun mer tëm wayter loope soo kaar wën ti anere uns niter xtele. Yeehoowa sayn naame is wichticher fer uns wii unser aychne naame. Wole mer pextimt sin wayter Yeehoowa sayn naame loope, ekaal ti proope woo Satanaas foer uns xtelt. Soo tuun mer tsayche tas Yeehoowa sayn naame tas haupste fer uns is, soo wii es fer Yeesus waar.
LIIT 10 Meyer loope unser Kot Yeehoowa!
a (Isayas 43:9) Al ti natsyoone sole sich uf ploos eene plats samele, un al ti folke sole kesamelt wëre. Weer tswixich tëne khan tas pekhant mache? Khene se uns ti eyerste tinge fertseele? Tee sol sayn tsayer foer xtele, fer se tsayche tas eyer recht hot. Tii sole heere un saan: ‘Tas is ti woerheet!’”
b (Isayas 44:7-9) Kepts yemant soo wii ich? Wën yaa, eyer sol xpreche, aus ruufe un tas mich pewayse! Eyer sol ti tinge saan woo noch khome un was noch pasiirt, soo wii ich xon mache fon te tsayt aan woo ich tas alte folek kekrintet hon. 8 Tuut khee pang hon un lost net ti pang aych um hale. Hon ich tas net fer yeete eene fon aych foer heyer kesaat un pekhant kemacht? Teyer sayt mayne tsayer. Kept es een aner Kot woo net ich sin? Nee, es kept khee aner Fels; ich khëne khee aner.’” 9 Al woo auskepikne xtaatue mache sin kaar niks, un sayn keliipte tinge hon khee tswek. Wii tëne sayn tsayer, tuun se niks siin un niks wise. Tes weeche, tii woo se kemacht hon, wëre ferxeemt.
c (Isayas 43:10-12) “Teyer sayt mayn tsayer”, saat Yeehoowa, “yaa, mayne tiiner woo ich raus kesuucht hon, tas teyer mich khënt un aan mich klaapt, un ferxteet tas ich te selwiche sin. Foer mich waar es khee aner Kot kemacht kep un noo mich tuuts wayter khee aner kepe. 11 Ich sin Yeehoowa: es kept khee aner reter.” 12 “Ich hon es kesaat, keret un pekhant kemacht, wën es khee frëmte kot tswixich aych waar. Tes weeche sayt teyer mayn tsayer”, saat Yeehoowa, “un ich sin Kot.
d (Psalm 105:3) Tuut iwer tëm sayn hayliche naame, xtols xpreche. Ti hërtse fon tëne woo Yeehoowa suuche, sole sich fraye.
e (1 Pheeter 2:12) Halt een kuut aanxtelung tswixich ti natsyoone. Soo, wën se aych akusiire tas xlechtes mache, khene se ayre kuute aktsyoone taytlich siin un, weeche tas, Kot loope aan tëm taach fon Sayn inspektsyoon.
f Soo kaar te troye man Yoop hot aan kefang sich tsu fiil ketanke mache iwer was ti layt iwer tëm ketenkt hon. Tas is pasiirt wii ti tray mëner xlecht iwer tëm kexproch hon. Am aanfang, wii eyer sayn khiner un al sayn tinge ferloer hot, hot Yoop “net kesint orer kesaat tas Kot was ferkheertes kemacht hat”. (Yoop 1:22; 2:10) Awer wii Yoop akusiirt waar was ferkheertes mache, hot eyer sich selepst kexitst un hot kexproch oone se tenke. Tas haupste fer tëm waar sayn aychne naame xitse xtats eer tsu Yeehoowa kepe. (Yoop 6:3; 13:4, 5; 32:2; 34:5)