Wii wichtich is Yeehoowa sayn naame fer Yeesus?

1-2. (a) Was hot Yeesus kemacht in te nacht foer sayn toot? (b) Was fer frooche tuun mer in tiise artikel antworte?

AM TUNERSTAACH oomts, 14^te Nisan fon 33 N.K., hat Yeesus een ekstra ese mit sayn troye aphostele. Tee wust tas klaych teet Yuutas tëm hinerkeen un tas eyer ferkweelt un tan um keprung fon sayn faynte weyer. Soo, noom ese, hot Yeesus fiile ufmuutiche tinge fer sayn aphostele kesaat. Un eep se faart kang sin, hot eyer een wichtich kepeet kemacht. Te aphostel Yoohan hot tiise kepeet uf kexrip in Yoohan kapitel 17.

² In tiise artikel tuun mer etliche tinge mit Yeesus sayn kepeet lërne. Mit was hot eyer sich ketanke kemacht kraat foer sayn toot? Was waar wichtich fer tëm wii eyer uf te eyert waar? Wole mer ti antworte siin.

“ICH HON TËNE TAYN NAAME PEKHANT KEMACHT”

3. Was hot Yeesus iwer Yeehoowa sayn naame kesaat un was wolt eyer too temit saan? (Yoohan 17:6, 26)

³ In sayn kepeet, hot Yeesus kesaat: “Ich hon tëne tayn naame pekhant kemacht.” In woerheet, hot Yeesus 2 mool kesaat tas eyer Yeehoowa sayn naame fer sayn tisipele pekhant kemacht hat. (Lees Yoohan 17:6,a 26.b) Was wolt eyer too temit saan? Must eyer fer sayn tisipele aus leye tas Kot sayn naame Yeehoowa is? Yeesus sayn tisipele waare yuute kewees. Tes weeche, wuste se xon tas Kot sayn naame Yeehoowa is. Tiise naame is tausente mool in te Hepreeyxe Xrifte foer khom. Soo Yeesus waar net am xpreche iwer Kot sayn perseenliche naame, awer iwer was tiise naame representiirt hot. Tee hot sayn tisipele keholef ti persoon hinich Yeehoowa sayn naame peser khëne lërne, too tepay Sayn tsiile, aktiwiteete un kwaliteete. Ploos Yeesus khënt Yeehoowa soo kuut.

4-5. (a) Mach een ferklaychung woo tsaycht wii een persoon sayn naame wichticher fer uns wëre khan. (b) Wii hon Yeesus sayn tisipele Yeehoowa peser khëne kelërnt?

⁴ Wole mer een ferklaychung mache. Xtel tich mool foer tas Davi, een elteste fon tayn kemaynt, aach een tokter is. Tuu khënst tiise pruuter xon fiile yoore. Awer tan, eene taach, pasiirt een unklik un tuu praychst eene tokter fer tich helfe. Tuu keest tsum krankehaus un tiise pruuter is te tokter woo tayn leepe ret! Yets tuust tuu tëm noch mee liipe. Un wëns tuu sayn naame heerst, tenkst tuu aan ales was eyer fer tich kemacht hot. Davi is net mee ploos te elteste fon tayn kemaynt, awer aach te tokter woo tayn leepe keret hot.

⁵ Kraat soo, Yeesus sayn tisipele wuste xon Yeehoowa sayn naame. Awer tiise naame is noch wichticher fer tëne kep, wayl Yeesus se keholef hot Yeehoowa peser khëne lërne. Warom khene mer tas saan? Wayl Yeesus hot Yeehoowa noo kemacht in ales was eyer kesaat un kemacht hot. Tes weeche, wii ti tisipele kesiin hon ti aat wii Yeesus in kelërnt un ti anere pehantelt hot, khonte se Yeehoowa peser khëne lërne. (Yoo. 14:9; 17:3)

“TAYN NAAME — TE NAAME WOOS TUU MICH KEP HOST”

6. Wii soo hot Yeehoowa sayn naame fer Yeesus kep? (Yoohan 17:11, 12)

⁶ Yeesus hot weeche sayn tisipele kepeet, mit te wërter: “Phas tëne uf weeche tayn naame — te naame woos tuu mich kep host.” (Lees Yoohan 17:11, 12.)c Wolt tas saan tas yets weyer Yeesus “Yeehoowa” kenënt? Nee. Mërk mool tas wii Yeesus iwer Yeehoowa sayn naame kexproch hot, hot eyer kesaat “tayn naame”. Tes weeche, “Yeehoowa” is net Yeesus sayn naame kep. Soo, wii hot Yeesus Kot sayn naame kriit? Fer aan fange, waar Yeesus Yeehoowa sayn representant un hot uf tëm sayn plats kexproch. Tee is im naame fon sayn Fater khom un hot fiile wunerliche tinge torich tiise naame kemacht. (Yoo. 5:43; 10:25) Un noch: te naame Yeesus petayt “Yeehoowa is retung”. Yawool, tepay in te petaytung fon Yeesus sayn naame is Yeehoowa sayn naame.

7. Warom khont Yeesus in Yeehoowa sayn naame xpreche? Kep een payxpiil.

⁷ Fer se ferxteen warom Yeesus in Yeehoowa sayn naame xpreche khont, tenk am neekste payxpiil. Een empayxatoer tuut een rechiirente representiire. Tes weeche, khan eyer im naame fon tiise rechiirente xpreche. Soo, wën te empayxatoer xprecht, hot eyer ti selwich autoriteet wii te rechiirente. Kraat soo, hot Yeesus Yeehoowa representiirt un hot tsu te layt kexproch in tëm sayn naame. (Mat. 21:9; Luk. 13:35)

8. Wii waar Yeehoowa sayn naame “aan” Yeesus eep eyer tsu te eyert khom is? (Eeksotus 23:20, 21)

⁸ Ti Piipel nënt Yeesus wii “tas Wort”. Tas is soo wayl Yeehoowa tëm penutst hot fer informatsyoone un oryentiirunge fer anere engele un mënxe kepe. (Yoo. 1:1-3) Tsiimlich sicher waar Yeesus te engel woo Yeehoowa kexikt hot ti israeliiter uf phase wii se im tesërt waare. Wii Yeehoowa fer ti israeliiter kesaat hot tas se solte te engel foliche, hot Eyer aach kesaat warom se tas mache solte: “Wayl mayn naame is aan tëm.”d (Lees Eeksotus 23:20, 21.)e Yeehoowa sayn naame waar “aan” Yeesus wayl eyer Yeehoowa representiirt hot. Tee is aach ti haupst persoon woo Yeehoowa sayn naame xitst un ferhaylicht.

“FATER, FERHËRLICH TAYN NAAME”

9. Wii wichtich waar Yeehoowa sayn naame fer Yeesus un warom khene mer tas saan?

⁹ Wii mer xon kesiin hon, soo kaar eep Yeesus tsu te eyert khom is, waar Yeehoowa sayn naame xon mechtich wichtich fer tëm. Un wii Yeesus uf te eyert waar, hot eyer ketsaycht torich ales was eyer kemacht hot tas Yeehoowa sayn naame important fer tëm is. Neekst am ën fon sayn preetich too uf te eyert, hot Yeesus aus kexproch: “Fater, ferhërlich tayn naame.” Klaych hot Yeehoowa mit een hart xtim fom himel aus keantwort: “Ich hon tëm xon ferhërlicht un tuun tëm noch mool ferhërliche.” (Yoo. 12:28)

10-11. (a) Wii hot Yeesus Yeehoowa sayn naame ferhërlicht? (Kuk aach tas pilt.) (b) Warom mus Yeehoowa sayn naame ferhaylicht un kexitst wëre?

¹⁰ Yeesus hot aach te naame fon sayn Fater ferhërlicht. Wii soo? Tee hot fer ti anere kexproch iwer Yeehoowa sayn wunerliche kwaliteete un aktsyoone. Awer fer Yeehoowa sayn naame ferhërliche, waar es neetich tëm ferhayliche un xitse.f Yeesus hot fer sayn tisipele ketsaycht wii wichtich tiise sache is wii eyer se in kelërnt hot se peete: “Unser Fater im himel, tayn naame sol kehaylicht wëre.” (Mat. 6:9)

¹¹ Warom mus Yeehoowa sayn naame ferhaylicht un kexitst wëre? Wayl im Eetem kaate hot Satanaas liie iwer Yeehoowa fertseelt. Satanaas hot kesaat tas Yeehoowa een liichner waar un tas Eyer etwas kuutes fon Aatam un Ewa tsurik kehal hot. (Xee. 3:1-5) Tee hot aach tsum ferxteen kep tas ti aat wii Yeehoowa ti tinge kemacht hot, net richtich waar. Weeche Satanaas sayn liie, khene ti layt tenke tas Yeehoowa een xlecht Kot is. Nochter, in Yoop sayn taache, hot Satanaas kesaat tas tii woo Yeehoowa tiine, mache tas ploos weeche was se fon tëm kriin khene. Tiise liichner hot aach kesaat tas ti layt noo lose tuun Yeehoowa tiine wën se proope mit mache, wayl se Tëm net wërklich liipe. (Yoop 1:9-11; 2:4) Es weyer neetich tsayt fer taytlich lose weer te liichner waar: Yeehoowa orer Satanaas.

“ICH TUUN MAYN LEEPE UF KEPE”

12. Weeche sayn liip tsu Yeehoowa sayn naame, was waar Yeesus wilich se mache?

¹² Weeche sayn liip tsu Yeehoowa, wolt Yeesus mache ales was eyer khont fer Yeehoowa sayn naame ferhayliche un xitse. Tee hot kesaat: “Ich [tuun] mayn leepe uf kepe.” (Yoo. 10:17, 18) Yawool, Yeesus waar soo kaar wilich fer se xtërpe weeche Kot sayn naame.g Ti 2 eyerste perfekte mënxe, Aatam un Ewa, hon Kot unfolicht un sin Satanaas noo kang. Awer Yeesus waar wilich fer tsu te eyert khome un sayn liip tsu Yeehoowa pewayse. Too tefoer hot eyer Yeehoowa aan keheert in ales was eyer kesaat un kemacht hot. (Hep. 4:15; 5:7-10) Tee is troy keplip pis eyer aan een kweel phoste um keprung kep is. (Hep. 12:2) Soo, hot eyer sayn liip tsu Yeehoowa un Sayn naame pewayst.

13. Warom waar Yeesus ti pest persoon fer se pewayse tas Satanaas een liichner is? (Kuk aach tas pilt.)

¹³ Ales was Yeesus kemacht hot, hot pewayst tas Satanaas een liichner is, net Yeehoowa! (Yoo. 8:44) Yeesus hot Yeehoowa peser kekhënt wii kwalkee aner persoon woo xon keleept hot. Wën kwalkee eene fon Satanaas sayn akusatsyoone keeche Yeehoowa woer weyer, teet Yeesus tas wise. Awer Yeesus waar pextimt Yeehoowa sayn naame xitse. Soo kaar wëns aus kesiin hot tas Yeehoowa tëm im xtich kelos hot, waar Yeesus wilich fer se xtërpe, xtats sayn liipliche Fater unfoliche. (Mat. 27:46)h

“[ICH] HON FËRTICH KEMACHT TI AARWAYT WOOS TUU MICH KEP HOST”

14. Wii hot Yeehoowa Yeesus sayn troyheet peloont?

¹⁴ Im kepeet woo Yeesus kemacht hot in te nacht foer sayn toot, hot eyer kesaat: “[Ich] hon fërtich kemacht ti aarwayt woos tuu mich kep host.” Yeesus waar sich sicher tas Yeehoowa tëm peloone teet weeche sayn troyheet. (Yoo. 17:4, 5) Un tas waar net umsonst kewees. Yeehoowa hot net erlaupt tas Yeesus im kraap plaype teet. (Aph. 2:23, 24) Yeehoowa hot Yeesus fom toot uf keruuft un hot tëm een hooche xtel im himel kep. (Fili. 2:8, 9) Mit te tsayt, hot Yeesus aan kefang wii kheenich fon Kot sayn Raych rechiire. Was teet tiise Raych mache? Yeesus hot ti antwort kep wii eyer sayn tisipele in kelërnt hot se peete: “Tayn Raych sol khome. Tayn wile [es wil saan, Kot sayns] sol kemacht wëre, wii im himel, soo aach uf te eyert.” (Mat. 6:10)

15. Was noch tuut Yeesus mache?

¹⁵ Palt tuut Yeesus keeche Kot sayn faynte khëmpfe un ti xlechte im Armaxeton fernichte. (Apo. 16:14, 16; 19:11-16) Klaych tëm noo, tuut eyer Satanaas in “tëm tiife loch” rin xmayse; tat kriit Satanaas niks kemacht. (Apo. 20:1-3) Torich sayn Tausent Yoore Rechiirung, tuut Yeesus te friit tsurik tsu te eyert pringe un ti mënxe helfe perfekt wëre. Tee tuut ti layt fom toot uf ruufe un fon te kans eyert een paratiis mache. Tsum xlus wërt Yeehoowa sayn tsiil erfiilt! (Apo. 21:1-4)

16. Wii wërt tas leepe sin noo te Tausent Yoore Rechiirung?

¹⁶ Wii wërt tas leepe sin noo te Tausent Yoore Rechiirung? Es kept khee mee sint orer imperfektsyoon. Es wërt net mee neetich tas ti mënxe fertsayung fon sayn sinte ferlange torich tas fray khaaf opfer. Es wërt aach net mee neetich fer ti mënxe een mitler orer priister hon tas se khene Yeehoowa sayn fraaynte sin. “Un te letste faynt, te toot [woo fon Aatam khom is], wërt tsu niks kemacht.” Ti kreeper wëre leyer, wayl tii woo kextorep sin, sin tsurik tsum leepe keprung. Un al uf te eyert wëre perfekt. (1 Kor. 15:25, 26)

17-18. (a) Was tuut pasiire am ën fon te Tausent Yoore Rechiirung? (b) Was tuut Yeesus mache wën sayn rechiirung tsum ën khomt? (1 Korinter 15:24, 28) (Kuk aach tas pilt.)

¹⁷ Noch was ekstras tuut pasiire am ën fon te Tausent Yoore Rechiirung. Nimant tuut noch mool tswayfele tas Yeehoowa een haylich un kerechte Kot is. Wii soo? Im Eetem kaate, hot Satanaas kesaat tas Yeehoowa een liichner is un tas Eyer net ti mënxe mit liip rechiirt. Fon tiise tsayt aan, tii woo Yeehoowa eere un respektiire, hon tëm sayn naame noo un noo ferhaylicht. Soo, am ën fon te Tausent Yoore Rechiirung, wërt Yeehoowa sayn naame komplët kexitst. Yeehoowa tuut pewayse tas eyer unser liipliche Fater im himel is. Es wërt kaar khee tswayfel too triwer.

¹⁸ Am ën fon te Tausent Yoore Rechiirung, tuun al wise tas ales was Satanaas keeche Yeehoowa kesaat hot, een lii waar. Was tuut Yeesus mache wën sayn rechiirung tsum ën khomt? Meecht eyer sich keeche Yeehoowa repeliire soo wii Satanaas? Nee! (Lees 1 Korinter 15:24,i 28.j) Yeesus tuut tas Raych tsurik tsu sayn Fater kepe un sich unich Tëm sayn autoriteet xtele. Yawool, anerste wii Satanaas, is Yeesus wilich fer ales uf kepe weeche sayn liip tsu Yeehoowa.

19. Wii wichtich is Yeehoowa sayn naame tsu Yeesus?

¹⁹ Yeehoowa hat wërklich kuute uersache fer sayn naame tsu Yeesus kepe. Yeesus hot pewayst tas eyer sayn Fater perfekt representiirt. Soo, was tuut Yeehoowa sayn naame fer Yeesus petayte? Es is wichticher fer Yeesus wii kwalkee aner tings. Tee waar wilich fer weeche tiise naame xtërpe un tee wërt wilich fer ales tsurik tsu Yeehoowa kepe am ën fon te Tausent Yoore Rechiirung. Wii khene mer Yeesus sayn payxpiil noo mache? Im neekste artikel, fine mer ti antwort.