XTUUTYUM ARTIKEL 33
LIIT 4 Yeehoowa is mayn Xeefer
Klaap tas Yeehoowa tich liipt
‘Ich hon tich tsu mich ketsoo mit leaale liip.’ (YEEREMIAS 31:3)
WAS TUUN MER SIIN?
Warom es is wichtich klaape tas Yeehoowa uns liipt un wii meyer khene unser sicherheet too triwer ferxtërke.
1. Warom host tuu tich tsu Yeehoowa tetikiirt? (Kuk aach tas pilt.)
ERINERST tuu tich wiis tuu tich tsu Yeehoowa tetikiirt host? Tuu host tiise ëntxlus kemacht wayls tuu tëm khëne kelërnt host un tan aan kefang host tëm liipe. Tuu host ferxproch tas tëm tiine tas haupste in tayn leepe weyer un tas tuu tëm wayter liipe teest mit tayn kanse hërts, seel, ketanke un kraft. (Mar. 12:30) Fon tat aan, is tayn liip tsu tëm imer xtërker kep. Soo, wii teest tuu antworte wën yemant tich frooe teet: ‘Tuust tuu wërklich Yeehoowa liipe?’ Sicher teest tuu saan: ‘Ich liipe tëm mee wii kwalkee aner tings orer persoon!’
Erinerst tuu tich wii fiil tuu Yeehoowa keliipt host wëns tuu tich tetikiirt un taafe kelos host? (Kuk te apsats 1.)
2-3. (a) Fon was wil Yeehoowa hon tas meyer uns sicher sin? (b) Was tuun mer in tiise artikel siin? (Yeeremias 31:3)
2 Awer, wii teest tuu antworte wën yemant tich frooe teet: ‘Pist tuu tich sicher tas Yeehoowa tich liipt?’ Im xtant, weyer es net laycht fer tich tas antworte, wayls tuu tenkst tas tuu net kuut kenuuch pist fer Yeehoowa sayn liip fertiine. Een xwester woo sich net keliipt kexpiirt hot wii se een khint waar, saat: “Ich liipe Yeehoowa mit mayn kanse hërts. Ich hon khee tswayfel too triwer. Awer ofts, sin ich net mich sicher tas Yeehoowa mich liipt.” Soo, was khan tich helfe se wise op Yeehoowa wërklich tich liipt?
3 Yeehoowa wil hon tas tuu tich sicher pist tas eyer tich liipt. (Lees Yeeremias 31:3.)a Ti woerheet is tas Yeehoowa selepst hot tich tsu tëm ketsoo. Un wëns tuu tich tsu tëm tetikiirt host un tich taafe kelos host, hot eyer tich een weyertlich kexenk kep — sayn leaale liip. Was wil tas saan? Tas eyer een tiif liip tsu tich hot un tas eyer nii tich im xtich lost. Weeche sayn leaale liip, tuut Yeehoowa al sayn troye tiiner, too tepay tuu, wii sayn “weyertlich aychentum” siin. (Mal. 3:17, noote) Yeehoowa wil tas tuu tich soo wii te aphostel Phaul xpiirst. Tee waar sich soo sicher tas Yeehoowa tëm keliipt hot, tas eyer kexrip hot: “Ich sin mich sicher tas khee toot orer leepe, khee engel orer rechiirung, niks woos hayt kept orer woo noch khomt, khee kraft, khee heech orer tiif, orer kwalkee aner kriatsyoon khan uns fon Kot sayn liip aus naner mache.” (Rom. 8:38, 39) In tiise artikel, tuun meyer siin warom meyer mise unser sicherheet ferxtërke tas Yeehoowa uns liipt un was uns helfe khan tas mache.
WAROM MISE MER KLAAPE TAS YEEHOOWA UNS LIIPT?
4. Aan was fer lii wil Satanaas tas meyer klaape un wii khene mer uns too tekeeche xtele?
4 Wën meyer klaape tas Yeehoowa uns liipt, khene mer fest plaype keeche “te Taywel sayn hinerlistiche pleen”. (Ëfe. 6:11) Satanaas wil hon tas meyer noo lose Yeehoowa tiine un eyer macht ales was eyer khan fer tas hin kriin. Een aat wii eyer fersuucht tas mache is ti lii aus prayte tas Yeehoowa uns net liipt. Ti Piipel ferklaycht Satanaas mit een leep. Ti leepe tuun anere tiere atakiire wën se xwach sin un khene sich net xitse. Kraat soo, tuut Satanaas uns ofts atakiire wën mer uns xwach orer miit xpiire, wën mer traurich sin wayl meyer xlechte tinge friier mit kemacht hon, propleeme hayt hon, orer wën meyer uns ketanke mache mit was im futuer pasiire khan. (Xpr. 24:10) Satanaas wil uns soo xwach lose tas meyer uf kepe Yeehoowa tiine. Awer meyer khene uns keeche te Taywel un sayn hinerlistiche pleen xtele wën meyer wayter unser sicherheet ferxtërke tas Yeehoowa uns liipt. (1 Phe. 5:8, 9; Tya. 4:7)
5. Warom mise mer xpiire tas Yeehoowa uns liipt un weyert fer uns kept?
5 Wën meyer klaape tas Yeehoowa uns liipt, tuun meyer tichter pay tëm khome. Warom khene mer tas saan? Yeehoowa hot uns kemacht mit te neetichkheet fer liip tsayche un fer uns keliipt xpiire. Wën yemant uns liip tsaycht, tas muut uns uf tëm aach liipe. Woo mee meyer xpiire tas Yeehoowa uns liipt un weyert fer uns kept, woo kreeser wërt unser liip tsu tëm sin. (1 Yo. 4:19) Un woo xtërker unser liip tsu tëm is, woo xtërker wërt tëm sayn liip tsu uns sin. Ti Piipel tuut uns taytlich saan: “Khomt ticht tsu Kot, un Eyer khomt ticht tsu aych.” (Tya. 4:8) Awer wii khene mer unser sicherheet ferxtërke tas Yeehoowa uns liipt?
WAS KHAN UNS HELFE SE KLAAPE TAS YEEHOOWA UNS LIIPT?
6. Was khanst tuu mache wëns tuu tich net sicher pist tas Yeehoowa tich liipt?
6 Tuu wayter tsu Yeehoowa peete tas eyer tich helft ferxteen warom eyer tich liipt. (Luk. 18:1; Rom. 12:12) Im xtant, wërts neetich phaar mool yeete taach peete tas tuu khanst tich selepst siin soo wii eyer tich siit. Wën tayn hërts wil imer tich klaape mache tas Yeehoowa tich net liipt, eriner tich tas Yeehoowa kreeser wii tayn hërts is. (1 Yo. 3:19, 20) Tee siit tayn kuute kwaliteete soo kaar wëns tuu tëne net siin khanst. (1 Sam. 16:7; 2 Kro. 6:30) Soo, ‘xiit tayn hërts tsu Yeehoowa aus’ un ferlang tëm sayn hilef fer sayn liip aan nëme. (Psal. 62:8) Noo tas tuu peete tuust, is es wichtich etliche tinge mache. Wole mer too triwer xpreche.
7-8. Wii tuun ti Psalme uns sicher lose tas Yeehoowa uns liipt?
7 Klaap aan was Yeehoowa saat. Tee hot ti Piipel xrayper inspiriirt tëm pexraype wii eyer wërklich is. Tsum payxpiil, mërk mool ti xeene wërter woo Tawi penutst hot fer Yeehoowa pexraype: ‘Yeehoowa is ticht pay tëne woo een ferprochne hërts hon, eyer ret tii woo oone muut sin.’ (Psal. 34:18, noote) Wëns tuu oone muut pist, im xtant, tenkst tuu tas tuu kans aleen pist. Awer Yeehoowa ferxprecht tas, in tiise momënte, wërt eyer ticht pay tich wayl eyer wees wii fiil tuu tëm sayn hilef praychst. In een aner Psalm hot Tawi kexrip: “Samel mayne treene in tayn leter sak.” (Psal. 56:8) Yeehoowa siit wëns tuu traurich un am layte pist. Tee khimert sich fiil mit tich un xpiirt tayn phayn in sayn hërts. Soo wii yeete trop waser in een leter sak fiil weyert hot fer yemant woo im tesërt am reese is, hon tayn treene fiil weyert fer Yeehoowa. Un eyer tenkt sich traan fon yeetes mool woos tuu traurich waarst un keprilt host. Im Psalm 139:3 hot Tawi aach fer Yeehoowa kesaat: “Tuu khënst kenau ale mayne weeche.” Yeehoowa siit ales was tuu machst, awer eyer halt sich traan aan tas kuutes woos tuu machst. (Hep. 6:10) Warom? Wayl eyer kept fiil weyert fer ales was tuu machst fer tëm kefale.b
8 Torich tiise ufmuutiche wersikele, is es wii wën Yeehoowa tich saan teet: ‘Ich wil tas tuu weest wii fiil ich tich liipe un tas ich mit tich khimere.’ Awer wii mer eente kesiin hon, wil Satanaas hon tas tuu klaapst tas Yeehoowa tich net liipt. Soo, wëns tuu als mool tswayfele host tas Yeehoowa tich liipt, froo tich: ‘Aan weem tuun ich klaape — “te fater fon te lii” orer te “Kot fon te woerheet”?’ (Yoo. 8:44; Psal. 31:5)
9. Was ferxprecht Yeehoowa fer tii woo tëm liipe? (Eeksotus 20:5, 6)
9 Tenk triwer noo aan wii Yeehoowa sich xpiirt iwer tëne woo tëm liipe. Mërk mool was Yeehoowa fer Mooses un fer ti israeliiter kesaat hot. (Lees Eeksotus 20:5, 6.)c Yeehoowa ferxprecht tas eyer tuut wayter leaale liip tsayche fer tii woo tëm liipe. Wayl Yeehoowa leaal is, khene mer uns sicher sin tas eyer teet nii liip fon sayn tiiner kriin un tëne net tsurik liipe. (Nee. 1:5) Soo, wën es als mool xweyer fer tich is klaape tas Yeehoowa tich liipt, froo tich: ‘Tuun ich Yeehoowa liipe?’ Tan tenk mool: wëns tuu tëm liipst un tich aan xtrengst fer tëm kefale, khanst tuu tich sicher sin tas eyer liipt tich aarich fiil. (Tan. 9:4; 1 Kor. 8:3) In anere wërter, wëns tuu tich sicher pist tas tuu Yeehoowa liipst, khanst tuu tich aach kans sicher sin tas eyer tich liipt un tich nii im xtich lose tuut.
10-11. Wii wil Yeehoowa hon tas tuu tas fray khaaf opfer siist? (Kalater 2:20)
10 Tenk triwer noo aan tëm fray khaaf opfer. Tas kreeste kexenk woo Yeehoowa fer ti mënxe kep hot, waar sayn Soon, Yeesus Kristus, tsu te eyert xike fer fer uns xtërpe. (Yoo. 3:16) Awer is tas een kexenk aach fer tich? Sicher! Tenk mool iwer te aphostel Phaul sayn payxpiil. Tee hot phaar xlime sinte kemacht, un soo kaar noo eyer een krist kep is, must eyer wayter keeche sayn xwacheete khëmpfe. (Rom. 7:24, 25; 1 Tim. 1:12-14) Noch soo, waar eyer sich sicher tas Yeehoowa tas fray khaaf opfer fer tëm wii een kexenk kep hot. (Lees Kalater 2:20.)d Eriner tich tas Yeehoowa te aphostel Phaul inspiriirt hot too triwer xraype. Soo, wil Yeehoowa hon tas meyer mit Phaul sayn wërter lërne. (Rom. 15:4) Yeehoowa wil tas tuu klaapst tas Yeesus sayn fray khaaf opfer een kexenk fer tich is. Wëns tuu tas fray khaaf opfer soo siist, wërst tuu tich noch sicher tas Yeehoowa tich liipt.
11 Meyer sin petanklich tsu Yeehoowa tas eyer Yeesus tsu te eyert kexikt hot fer sayn leepe fer uns kepe. Awer es kept noch een aner uersach warom Yeesus tsu te eyert khom is — ti woerheet iwer Kot fer ti anere xpreche, too tepay wii fiil eyer sayn khiner liipt. (Yoo. 18:37)
WII HELFT UNS YEESUS YEEHOOWA SAYN LIIP AAN NËME?
12. Warom khene mer klaape aan was Yeesus iwer Yeehoowa kesaat hot?
12 Wii Yeesus uf te eyert waar, hot eyer kërn kexproch iwer was fer sort persoon Yeehoowa is. (Luk. 10:22) Un meyer khene klaape aan was Yeesus iwer Yeehoowa kesaat hot. Warom? Wayl Yeesus hot im himel mit sayn Fater torich pilyoone yoore keleept eep eyer tsu te eyert khom is. (Kol. 1:15) Yeesus wust wii fiil sayn Fater tëm liipt un eyer hot aach kesiin Yeehoowa sayn liip tsayche fer sayn troye engele un al sayn troye soone un tochtere uf te eyert. Awer, wii helft uns Yeesus uns sicher sin tas Yeehoowa uns liipt?
13. Wii wil Yeesus hon tas meyer Yeehoowa siin?
13 Yeesus wil tas meyer Yeehoowa siin soo wii eyer tëm siit — wii eene fater woo sayn khiner fiil liipt. In te Ewankeelye, hot Yeesus Yeehoowa wii “Fater” kenënt mee wii 160 mool. Un wii eyer mit say tisipele kexproch hot, hot eyer wërter penutst soo wii “ayer Fater” un “ayre Fater, woo im himel is”. (Mat. 5:16; 6:26) Eep Yeesus tsu te eyert khom is, hon Yeehoowa sayn troye tiiner thitele fer Tëm penutst soo wii Ale Mechtiche, Ale Heechste, Kroos Kriatoer un soo wayter. Awer Yeesus hot Yeehoowa ofts wii unser “Fater” kenënt. Tiise wort tsaycht tas Yeehoowa wil hon tas sayn tiiner sich ticht pay tëm xpiire soo wii een khint sich ticht pay sayn liipliche fater xpiirt. Yets wole mer lërne iwer 2 mool woo Yeesus tas wort “Fater” penutst hot fer Yeehoowa pexraype.
14. Wii hot Yeesus ketsaycht tas yeete eene fon uns weyert fer unser Fater Yeehoowa hot? (Matheus 10:29-31) (Kuk aach tas pilt.)
14 Eyerst, wole mer siin was Yeesus in Matheus 10:29-31e kesaat hot. (Lees.) Ti xpërlinge sin kleene feechel woo nii Yeehoowa liipe orer aan peete tuun. Noch soo, hot Yeesus kesaat tas Yeehoowa wees kenau woo yeete eene fon tëne is. Wën Yeehoowa soo fiil weyert fer een foochel kept, khene mer uns sicher sin tas eyer fiil mee weyert kept fer yeete eene fon sayn troye tiiner woo tëm liipe un aan peete. Yeesus hot aach kesaat tas unser Fater wees wii fiil hoer hon mer uf unser khop. Wayl Yeehoowa soo kaar tiise kleenichkheet iwer uns khënt, khene mer uns kans sicher sin tas eyer sich fiil mit uns khimert. Es is taytlich tas Yeesus wil hon tas meyer uns sicher sin tas yeete eene fon uns fiil weyert fer unser himlixe Fater hot.
Yeehoowa wees woo yeete xparling is. Wën eyer soo fiil weyert fer een foochel kept, iwerlee tich wii fiil weyert kept Yeehoowa fer tich, een troye tiiner woo tëm liipt! (Kuk te apsats 14.)
15. Was tuun Yeesus sayn wërter in Yoohan 6:44 tich in lërne iwer tayn himlixe Fater?
15 Een aner mool woo Yeesus tas wort “Fater” penutst hot, waar in Yoohan 6:44.f (Lees.) Yeehoowa hot tich tsu te woerheet ketsoo wayl eyer tayn kuute kwaliteete kesiin hot. (Aph. 13:48) Wii Yeesus ti wërter in Yoohan 6:44 kesaat hot, waar eyer im xtant am xpreche iwer Yeehoowa sayn wërter woo in Yeeremias 31:3 xteen. Tat hot Yeehoowa fer sayn folek kesaat: “Ich hon tich tsu mich ketsoo mit leaale liip.” (Kuk aach Oseyas 11:4.) Tenk iwer was tas petayt: unser liipliche Fater im himel tuut imer tayn kuute kwaliteete siin, soo kaar wëns tuu selepst tas net mache khanst.
16. (a) Was hot Yeesus uns in kelërnt un warom sole mer aan tëm klaape? (b) Wii khanst tuu tayn sicherheet ferxtërke tas Yeehoowa te peste Fater fer tich is? (Kuk aach te khaste “Te Fater woo meyer al prayche”.)
16 Wii Yeesus Yeehoowa wii unser Fater pexrip hot, es waar wii wën eyer saan teet: “Yeehoowa is net ploos mayn Fater; tee is aach tayn Fater. Say tich sicher tas Yeehoowa tich liipt un sich fiil mit tich khimert.” Soo wëns tuu als mool tich net sicher pist tas Yeehoowa tich liipt, froo tich: ‘Yeesus tuut imer ti woerheet saan un khënt unser Fater peser wii kwalkee aner persoon; soo meecht ich wërklich een uersach hon fer net aan tëm klaape?’ (1 Phe. 2:22)
TUU WAYTER TAYN SICHERHEET FERXTËRKE TAS YEEHOOWA TICH LIIPT
17. Warom sole mer wayter unser sicherheet ferxtërke tas Yeehoowa uns liipt?
17 Meyer mise wayter unser sicherheet ferxtërke tas Yeehoowa uns liipt. Wii mer xon kelërnt hon, is Satanaas een hinerlistich faynt woo wil uns um hale Yeehoowa tiine un uns xwach lose. Fer tas hin kriin, tuut eyer wayter fersuuche uns klaape mache tas Yeehoowa uns net liipt. Wole mer nii aan Satanaas sayn liie klaape! (Yoop 27:5)
18. Wii khanst tuu tayn sicherheet ferxtërke tas Yeehoowa tich liipt?
18 Fer tayn sicherheet ferxtërke tas Yeehoowa tich liipt, tuu wayter tsu tëm peete fer se ferxteen warom eyer tich liipt. Tenk triwer noo aan wii ti piiplixe xrayper Yeehoowa sayn liip pexrip hon. Eriner tich tas Yeehoowa imer liipt tii woo tëm liipe. Ferkes tich net tas Yeehoowa tas fray khaaf opfer fersoricht hot wii een perseenlich kexenk fer tich. Un trau tas Yeehoowa tayn Fater is, soo wii Yeesus es kesaat hot. Soo, wën yemant tich froot: ‘Pist tuu tich sicher tas Yeehoowa tich liipt?’, tuust tuu klaych saan: ‘Yaa, ich sin mich sicher, un ich mache mayn pestes yeete taach fer mayn liip tsu tëm tsayche!’
LIIT 154 Eewiche liip
a (Yeeremias 31:3) Fon wayt wech is Yeehoowa tsum foer xayn khom un hot mich kesaat: “Ich liipe tich mit een eewiche liip. Tes weeche hon ich tich tsu mich ketsoo mit leaale liip.
b Fer anere ufmuutiche tekste fine woo lose uns sicher tas Yeehoowa uns liipt, kuk tas theema Dúvidas; sentimentos negativos im puplikatsyoon Princípios Bíblicos para a Vida Cristã.
c (Eeksotus 20:5, 6) Tuu solst tich net foer tëne niter pike un tii aach net tiine, wayl ich, Yeehoowa, tayn Kot, sin een Kot woo ferlangt tas se ploos mich wii Kot aan peete sole un weeche ti eltere sayn sinte, pringe ich xtroof iwer ti khiner, iwer ti trit xeneratsyoon un iwer ti fiert xeneratsyoon fon tëne woo mich hase tuun. 6 Awer ich tsayche leaale liip, soo kaar fer ti tausentste xeneratsyoon fon tëne woo mich liipe un mayn kepoote hale.
d (Kalater 2:20) Ich sin yets mit Kristus aan tëm phoste kenaachelt. Weer hayt leept sin net mee ich, awer es is Kristus woo in eenichkheet mit mich leept. Yawool, tas leepe woo ich hayt aan tiise khërper leepe, leepe ich weeche te klaape aan Kot sayn Soon, woo hot mich keliipt un sich fer mich ap kep.
e (Matheus 10:29-31) Tswaay xpërlinge wëre mit een nikel woo kleen weyert hot ferkhaaft, kël? Awer, soo kaar wën eene fon tëne ufm pootem falt, wees ayre Fater es xon. 30 Toch, yeete hoer uf ayre khop is aach xon ketseelt. 31 Tes weeche, tuut khee pang hon; teyer hot mee weyert wii fiile xpërlinge.
f (Yoohan 6:44) Nimant khan tsu mich khome heechstens wën te Fater, woo mich kexikt hot, tëm tsiit, un ich tuun tëm fom toot uf ruufe im letste taach.