Klaap tas Yeehoowa tich fertsayt hot

1-2. Wii xpiire mer uns wën mer mërke tas Yeehoowa uns fertsayt hot? (Kuk tas aanfangs pilt.)

TORICH sayn leepe hot te kheenich Tawi phaar xlime feeler kemacht. Tee wust wii es is sich xultich xpiire. (Psal. 40:12; 51:3, iwerxrift) Awer tee hot sich hërtslich peroyt un Yeehoowa hot tëm fertsayt. (2 Sam. 12:13) Tes weeche khont Tawi ti frooheet xpiire woo khomt weeche Yeehoowa sayn fertsayung. (Psal. 32:1)

² Soo wii Tawi, khene mer aach froo sin wën Yeehoowa parmhërtslich mit uns is un unser sinte fertsayt. Es treest uns se wise tas Yeehoowa wilich is fer unser sinte fertsaye — soo kaar wën se xlim sin — wën meyer uns hërtslich peroye, tëne erkhëne un uns aan xtrenge fer ti selwich sinte net mee mache. (Xpr. 28:13; Aph. 26:20; 1 Yo. 1:9) Un es lost uns froo se wise tas wën Yeehoowa uns fertsayt, is es wii wën mer nii kesint hëte. (Ese. 33:16)

3-4. (a) Wii hot een xwester sich kexpiirt noo sayn taaf? (b) Was tuun mer in tiise artikel siin?

³ Awer als mool, khan es xweyer fer uns sin klaape tas Yeehoowa uns wërklich fertsayt hot. Tas is mit Jennifer pasiirt. Sayn eltere hon tëne iwer Yeehoowa in kelërnt. Awer wii se elter kep is, hot se aan kefang xlechte tinge mache un tas fon sayn eltere ferxtekele. Yoore xpeeter, hot se ënerunge kemacht, sich tsu Yeehoowa tetikiirt un taafe kelos. Tii saat: “Friier hon ich ofts seksuaal imoraaliteet pratikiirt un sin pesof kep. Ich waar een wuutich persoon un tas kelt waar tas haupste fer mich. Ich wust tas ti Piipel saat tas weeche Kristus sayn opfer, khan Yeehoowa unser sinte fertsaye. Awer opwool ich mich peroyt hon un Yeehoowa sayn fertsayung ferlangt hon, hon ich net wërklich keklaapt tas eyer mich fertsayt hot.”

⁴ Un tuu? Is es als mool xweyer fer tich se klaape tas Yeehoowa fertsayt hot ti feeler woos tuu friier kemacht host? Wën es soo is, eriner tich tas Tawi sich sicher waar tas Yeehoowa tëm fertsayt hot wayl Eyer parmhërtslich is. Un Yeehoowa wil tas tuu tich soo wii Tawi xpiirst. In tiise artikel, tuun meyer siin warom meyer klaape mise tas Yeehoowa uns fertsayt hot un was uns helfe khan tas mache.

WAROM MISE MER KLAAPE TAS YEEHOOWA UNS FERTSAYT HOT?

5. Was wil Satanaas hon tas meyer klaape? Kep een payxpiil.

⁵ Wën meyer Yeehoowa sayn fertsayung aan nëme, tuun meyer net klaape aan Satanaas sayn liie. Eriner tich tas Satanaas tuut ales mache fer uns um hale Yeehoowa tiine. Fer tas hin kriin, khan Satanaas fersuuche uns klaape mache tas unser sinte soo xlim sin tas Yeehoowa uns nii fertsaye tuut. Tenk aan tëm man in Korinto woo seksuaal imoraaliteet pratikiirt hot un woo fon te kemaynt raus ketuun kep is. (1 Kor. 5:1, 5, 13) Xpeeter hot tiise man sich peroyt. Awer Satanaas wolt hon tas ti priiter tëm net fertsaye teete un tëm net noch mool in te kemaynt aan nëme teete. In te selwich tsayt, wolt Satanaas hon tas te man tenke teet tas Yeehoowa khent tëm nii fertsaye. Im xtant, teet eyer sich soo traurich too teweeche xpiire tas eyer noo lose teet Yeehoowa tiine. Satanaas hot sayn opjetiiw net keënert. Awer meyer wise wii keeche tëm khëmpfe wayl meyer “khëne sayn pleen”. (2 Kor. 2:5-11)

6. Wii khene mer noo lose uns xultich xpiire?

⁶ Wën meyer Yeehoowa sayn fertsayung aan nëme, khene mer noo lose uns xultich xpiire. Wën meyer sinte, is es natiirlich uns xultich xpiire. (Psal. 51:17) Tas is was kuutes. Unser kewise khan uns uf muute uns ënere un tas richtiches mache. (2 Kor. 7:10, 11) Awer wën meyer uns wayter xultich xpiire noo tas meyer uns peroyt hon, khene mer soo oone muut wëre tas meyer noo lose Yeehoowa tiine. Wën meyer Yeehoowa sayn fertsayung aan nëme, khene mer ti xult in tëm richtich plats xtele — hinich uns. Tan khene mer Yeehoowa tiine wii eyer es wil — mit een sauwer kewise un frooheet. (Kol. 1:10, 11; 2 Tim. 1:3) Awer was khene mer mache fer wërklich klaape tas Yeehoowa uns fertsayt hot?

WAS KHAN UNS HELFE SE KLAAPE TAS YEEHOOWA UNS FERTSAYT HOT?

7-8. Wii hot Yeehoowa sich selepst fer Mooses pexrip un was fer sicherheet tuun mer too teweeche kriin? (Eeksotus 34:6, 7)

⁷ Tenk aan wii Yeehoowa sich selepst pexrip hot. Tsum payxpiil, wii Mooses mee iwer Yeehoowa wise wolt, mërk mool was Yeehoowa tëm kesaat hot.a (Lees Eeksotus 34:6, 7.)b Opwool Yeehoowa fiile xeene kwaliteete hot, hot eyer raus kesuucht aan fange sich pexraype wii “een Kot woo parmhërtslich un mitlaytich is”. Meecht soo een sort Kot sich tsurik hale fertsaye yemant woo tëm liipt un sich wërklich fon sayn sint peroyt hot? Sicher net! Tas weyer krop un Yeehoowa teet sich nii soo aan xtele.

⁸ Meyer khene uns sicher sin tas wën Yeehoowa saat tas eyer parmhërtslich is, saat eyer ti woerheet. Tee tuut nii liie. (Psal. 31:5) Tes weeche khene mer klaape aan was eyer saat. Wën es xweyer fer tich is noo lose tich xultich xpiire, froo tich: ‘Klaape ich tas Yeehoowa parmhërtslich un mitlaytich is un tas eyer fertsayt yeete eene woo sich wërklich peroyt? Soo, sol ich net aan nëme tas eyer mich fertsayt hot?’

9. Was tuut te Psalm 32:5 uns in lërne iwer ti aat wii Yeehoowa unser sinte fertsayt?

⁹ Tenk aan was Yeehoowa ti Piipel xrayper inspiriirt hot iwer tëm sayn fertsayung saan. Tsum payxpiil, mërk mool wii te Piipel xrayper Tawi Yeehoowa sayn fertsayung pexrip hot. (Lees Psalm 32:5.)c Tee hot kesaat: “Tuu host mayn feeler un mayn sinte fertsayt.” Tas hepreeyx wort woo iwersetst is “fertsaye” petayt “uf heepe” orer “nëme”. Soo, wii Yeehoowa Tawi fertsayt hot, es waar wii wën Yeehoowa Tawi sayn sinte uf heepe un wech nëme teet. Tan khont Tawi sich froo xpiire wayl eyer wust tas Yeehoowa tëm komplët fertsayt hat. (Psal. 32:2-4) Meyer khene tiise selwich frooheet xpiire. Wën meyer uns fon unser sinte wërklich peroye, tuut Yeehoowa tëne uf heepe un wech fon uns nëme. Meyer prayche net ti last fon xult wayter traan.

10-11. Was tuun ti wërter “fërtich fer se fertsaye” uns iwer Yeehoowa in lërne? (Psalm 86:5)

¹⁰ Lees Psalm 86:5.d Too saat Tawi tas Yeehoowa ‘fërtich is fer se fertsaye’. Tas wil saan tas Yeehoowa wërt net klaych pees wën mer feeler mache un tas eyer wil imer fertsaye tii woo sich peroye. Warom tuut Yeehoowa sich soo aan xtele? Te selwich psalm leet aus: “Tayn leaale liip fer al woo tich aan ruufe is mechtich kroos.” Soo wii mer im letste artikel kelërnt hon, Yeehoowa ferxprecht leaale liip tsayche fer tii woo tëm liipe un tëne nii im xtich lose. Weeche sayn leaale liip, tuut Yeehoowa “krooshërtslich fertsaye” al tii woo fon sayn sinte sich peroye. (Isa. 55:7) Wën es xweyer fer tich is Yeehoowa sayn fertsayung aan nëme, froo tich: ‘Klaape ich tas Yeehoowa fërtich is fer se fertsaye al tii woo sich wërklich peroye un tëm sayn parmhërtslichkheet ferlange? Tes weeche, sol ich net klaape tas Yeehoowa mich fertsayt hot wën ich tëm parmhërtslichkheet ferlangt hon?’

¹¹ Ti Piipel saat uns aach tas Yeehoowa kenau ferxteet wii mer kemacht kep sin un tas mer imperfekt sin. Tas khan uns fiil treeste. (Psal. 139:1, 2) Wole mer yets siin was Tawi in een aner psalm kesaat hot un wii tas uns aach helfe khan Yeehoowa sayn fertsayung aan nëme.

WAS ERINERT SICH YEEHOOWA IWER UNS?

12-13. Tëm noo Psalm 103:14, was erinert sich Yeehoowa iwer uns un wii tuut eyer uns pehantele?

¹² Lees Psalm 103:14.e Tawi saat tas Yeehoowa “erinert sich tas meyer xtaap sin”. Mit too ti wërter tuut Tawi aus leye een uersach warom Yeehoowa fërtich is fer se fertsaye tii woo fon sayn sinte sich peroye. Tee wees tas mer imperfekt sin. Fer tas peser ferxteen, wole mer Tawi sayn wërter noo kuke.

¹³ Tawi saat tas Yeehoowa wees kenau wii meyer kemacht kep sin. Yeehoowa hot Aatam fom xtaap fom krunt kemacht. Soo wees Eyer was ti mënxe prayche. Tsum payxpiil, soo kaar perfekte mënxe prayche ese, xloofe un luft in tsiie. (Xee. 2:7) Awer wayl Aatam un Ewa kesint hon, sin ti mënxe xtaap in noch een aner aat. Meyer sin imperfekt uf te welt khom un mise khëmpfe keeche te wunx fer ferkheerte tinge mache. Yeehoowa wees tas kans kenau. Awer Tawi saat aach tas Yeehoowa “erinert sich” too tefun. Tas hepreeyx wort woo too penutst waar khan petayte was positiiwes too triwer mache. In khortse wërter: Yeehoowa wees tas als mool tuun mer feeler mache. Awer tee wërt parmhërtslich un uns fertsaye wën meyer uns hërtslich peroye. (Psal. 78:38, 39)

14. (a) Was noch saat Tawi iwer ti aat wii Yeehoowa fertsayt? (Psalm 103:12) (b) Was khene mer lërne mit te aat wii Yeehoowa Tawi fertsayt hot? (Kuk te khaste “Yeehoowa fertsayt un ferkest”.)

¹⁴ Was noch khene mer lërne fom Psalm 103 iwer ti aat wii Yeehoowa uns fertsayt? (Lees Psalm 103:12.)f Tawi saat tas wën Yeehoowa uns fertsayt, tuut Eyer unser sinte wayt wech fon uns xtele, soo wii ‘ti sun sayn ufkang wayt fon te sun sayn unerkang is’. Ti ufkang un ti unerkang fon te sun tuun sich nii trefe. Was tuut tas uns in lërne iwer ti sinte woo Yeehoowa fertsayt? Een puuch woo iwer tiise wersikel xprecht, macht soo een ferklaychung: “Een sint woo Yeehoowa wayt wech fon uns nëmt is wii een keroch woo kans ferxwun is. Soo khene mer uns sicher sin tas eyer nii too traan tenke tuut orer uns too tefun erinere mache.” Tenk mool noo — een keroch khan een erinerung tsum ketanke pringe. Awer wën Yeehoowa fertsayt, is es wii wën kaar kheen keroch plaype teet tas Yeehoowa sich fon te sint erinere teet orer uns too teweeche xtroofe teet. (Ese. 18:21, 22; Aph. 3:19)

15. Was khene mer mache wën mer wayter uns xultich xpiire weeche feeler woo mer friier kemacht hon?

¹⁵ Wii khene Tawi sayn wërter im Psalm 103 uns helfe Yeehoowa sayn fertsayung aan nëme? Wën meyer uns wayter xultich xpiire weeche ti sinte woo meyer friier kemacht hon, khene mer uns frooe: ‘Tuun ich mich ferkese was Yeehoowa sich erinert, es wil saan, tas ich imperfekt sin un tas eyer fertsayt al tii woo sich peroyt hon? Tuun ich mich aach erinere was Yeehoowa raus kesuucht hot ferkese, es wil saan, ti sinte woo eyer xon fertsayt hot un tas eyer tuut nii mich too teweeche xtroofe?’ Yeehoowa halt sich net traan aan ti sinte woo mer friier kemacht hon. Un meyer sole aach tas net mache. (Psal. 130:3) Wën meyer Yeehoowa sayn fertsayung aan nëme, khene mer uns selepst fertsaye un wayter Yeehoowa mit frooheet tiine.

16. Mach een ferklaychung woo tsaycht wii es kefeerlich is wayter tenke aan te sinte woo Yeehoowa xon fertsayt hot. (Kuk aach tas pilt.)

¹⁶ Tenk aan tiise ferklaychung: wën yemant een khare am faare is, tuut eyer in te khare xpiichel kuke fer se siin was hinich tëm am khome is. Tee tuut tas als mool mache. Awer weyer es kefeerlich wën eyer im xpiichel ti kans tsayt kuke teet. Fer mit sicherheet faare, mus eyer sayn aue uf te xtroos foer tëm hale. Kraat soo, is es kuut als mool tenke aan te feeler woo mer friier kemacht hon. Tas khan uns helfe ti selwiche feeler net noch mool mache. Awer wën meyer wayter tenke aan te sinte woo Yeehoowa xon fertsayt hot, khan ti xult uns um hale unser pestes fer Yeehoowa kepe. Soo, wole mer uns traan hale aan te weech woo foer uns is — te weech woo tsum leepe in Kot sayn nay welt nëmt. Tat wëre ti xlechte erinerunge ferkes. (Xpr. 4:25; Isa. 65:17)

TUU WAYTER TAYN HËRTS SICHER LOSE

17. Warom mise mer wayter unser hërts sicher lose tas Yeehoowa uns liipt un fertsayt?

¹⁷ Meyer mise unser hërts sicher lose tas Yeehoowa uns liipt un fërtich is fer uns fertsaye. (1 Yo. 3:19, noote) Warom? Wayl Satanaas tuut wayter fersuuche uns klaape mache tas Yeehoowa uns net liipt orer uns fertsayt. Tëm sayn tsiil is uns um hale Yeehoowa tiine. Un soo lang wii tas ën tichter is, tuut Satanaas sich noch mee aan xtrenge fer tas hin kriin, wayl tee wees tas sayn tsayt khorts is. (Apo. 12:12) Awer meyer mise wayter keeche Satanaas khëmpfe un Yeehoowa troy tiine.

18. Was khanst tuu mache fer tayn hërts sicher lose tas Yeehoowa tich liipt un fertsayt?

¹⁸ Fer tayn sicherheet iwer Yeehoowa sayn liip ferxtërke, tuu ti phunkte fom letste artikel aan wëne. Fer tayn hërts sicher lose tas Yeehoowa tich fertsayt hot, tenk iwer wii eyer sich selepst pexrip hot. Tenk triwer noo aan was eyer ti Piipel xrayper inspiriirt hot se saan iwer Sayn fertsayung. Ferkes tich net tas Yeehoowa wees tas tuu imperfekt pist un tuut tich mit parmhërtslichkheet pehantele. Un eriner tich tas wën eyer fertsayt, tuut eyer tas in een komplët aat mache. Tan, soo wii Tawi woo uf Yeehoowa sayn parmhërtslichkheet ketraut hot, khanst tuu saan: “Tanke xeen Yeehoowa, wayls tuu ‘mayn feeler un mayn sinte fertsayst’!” (Psal. 32:5)