“Nou pase lakay ou paske...”

Lè kèk moun ouvri pòt yo epi yo wè nou kanpe devan lakay yo, yo ka mande tèt yo ki sa n ap fè devan pòt yo e poukisa nou vin lakay yo. Ki premye bagay nou ka di pou nou kalme lespri yo? Apre kèk pwoklamatè fin salye moun nan, yo konn itilize mo “paske” a pou yo esplike moun nan rezon ki fè yo pase lakay li. Pa egzanp, yo konn di moun nan: “Nou pase lakay ou paske gen anpil moun nan vwazinaj la ki enkyè akoz krim k ap fèt nan zòn nan. Èske w panse...” oubyen “Nou vin lakay ou paske n ap ofri tout moun nou rankontre yon etid biblik lakay yo san yo pa peye pou sa.” Depi okòmansman si nou di moun nan poukisa nou pase lakay li, li ka pi dispoze koute sa nou vin di l la.