Chèche vin pi maton nan travay predikasyon an: Prepare premye pawòl nou pral di yo

Rezon ki fè sa enpòtan: Si entwodiksyon nou fè a pa enteresan, sa ka fè moun n al preche a kanpe konvèsasyon an anvan menm nou ba l yon temwayaj. Kidonk, pou anpil pwoklamatè, premye pawòl yo di nan entwodiksyon yo fè se pawòl ki pi enpòtan nan prezantasyon y ap fè a. Se vre yo ban nou kèk modèl prezantasyon nan Ministè Wayòm nan ak nan liv Comment raisonner a, men, yo pa toujou gen yon entwodiksyon ki tou fèt pou chak sitiyasyon nou ka rankontre nan tèritwa a. Menmsi yo ban nou yon modèl prezantasyon ki tou fèt, pwoklamatè yo ka chwazi fè kèk ti chanjman ladan l oswa yo ka prepare pwòp prezantasyon pa yo. Donk, lè n al preche yon moun lakay li, n ap rive fè yon pi bon travay si nou pran san nou pou nou prepare premye pawòl n ap di yo olye nou di nenpòt sa k ta vin nan lespri nou. — Pwo. 15:28.

Fason pou nou fè l:

Chwazi sijè w vle pale a. Li dwe baze sou piblikasyon w ap ofri a e li dwe yon sijè ki enterese moun nan tèritwa w la.
Pran san w pou w byen prepare premye fraz oswa de premye fraz ou pral di yo apre w fin salye moun nan. Ou ka kòmanse konvèsasyon an konsa: “Mwen pase wè w paske...” oswa “Gen anpil moun k ap reflechi anpil sou...” oswa “Mwen ta renmen tande sa w panse...” oswa ou ka di yon lòt bagay. Nòmalman, fraz ki kout e ki senp konn pi bon. Gen kèk pwoklamatè ki chwazi kenbe entwodiksyon yo pral fè a nan tèt yo.
Poze moun nan yon kesyon k ap pouse l di sa k nan panse l (Mat. 17:25). Pa bliye moun w al preche a te ka deja gen lòt bagay nan lespri l anvan w rive lakay li. Donk, kesyon ou poze l la pa dwe twò difisil pou l reponn oswa li pa dwe fè l santi l malalèz.

Eseye sa a pandan mwa a:

Pandan n ap fè adorasyon an fanmi, pran yon ti tan pou nou prepare premye pawòl nou pral di lè n ap patisipe nan travay predikasyon an. Apre sa, fè repetisyon.
Lè nou nan predikasyon, pale ak lòt pwoklamatè yo sou sa w prepare pou w di (Pwo. 27:17). Nou dwe chanje entwodiksyon n ap fè a si nou wè l pa t byen mache.