ATIK ETID 34
KANTIK 107 Modèl lanmou Bondye bay la
Fason ansyen yo demontre lanmou ak mizèrikòd pou moun ki peche yo
“Se bonte Bondye gen lakay li ki fè li vle w repanti.” — WOM. 2:4.
PWEN KLE
Fason ansyen yo eseye ede moun nan kongregasyon an ki te tonbe nan peche grav.
1. Ki sa k ka rive apre yon moun fin fè yon peche grav?
NAN atik ki vin anvan an, nou te wè sa apot Pòl te di kretyen nan kongregasyon Korent lan pou yo fè lè te gen yon mesye ki te fè yon peche grav. Moun ki te peche a pa t repanti e yo te oblije retire l nan kongregasyon an. Men, jan vèsè atik la baze sou li a montre sa, moun ki fè peche grav yo kapab jwenn èd. Yo kapab ede yo repanti (Wom. 2:4). Ki jan ansyen yo kapab ede yo repanti?
2-3. Ki sa nou dwe fè si nou vin aprann gen yon kwayan parèy nou ki te fè yon peche grav, e poukisa nou dwe fè sa?
2 Anvan ansyen yo kapab ede moun ki te fè peche a, yo bezwen konnen ki pwoblèm li te genyen. Nan ka sa a, ki sa nou ta dwe fè si nou ta vin konnen gen yon kwayan parèy nou ki fè yon peche grav, yon peche ki ka lakòz yo retire l nan kongregasyon an? Nou dwe ankouraje moun ki fè peche a pou l al pale ak ansyen yo pou yo ede l. — Eza. 1:18; Tra. 20:28; 1 Pyè 5:2.
3 Men, e si moun ki fè peche a pa vle al pale ak ansyen yo? Nan ka sa a, nou dwe al kot ansyen yo pou n asire n moun nan jwenn èd li bezwen. Lè n aji konsa, nou demontre lanmou, paske nou pa ta renmen pèdi frè n nan oswa sè n nan. Si moun ki peche a pa sispann aji fason l ap aji a, sa ap gen move efè sou relasyon l ak Jewova. Li ka sal repitasyon kongregasyon an tou. Donk, avèk kouraj, nou bezwen aji pou nou montre lanmou nou pou Jewova e pou moun ki fè peche a. — Sòm 27:14.
FASON ANSYEN YO EDE MOUN KI FÈ PECHE GRAV
4. Ki objektif ansyen yo genyen lè yo reyini ak yon moun ki te fè yon peche grav?
4 Lè yon moun nan kongregasyon an fè yon peche grav, gwoup ansyen an chwazi twa ansyen ki kalifye pami yo pou fòme yon komitea. Frè sa yo dwe konn limit yo e yo dwe gen imilite. Menm lè y ap eseye ede moun ki peche a pou l repanti, yo rekonèt yo pa ka fòse moun chanje (Det. 30:19). Ansyen yo rekonèt se pa tout moun ki peche k ap byen reyaji menm jan ak wa David (2 Sam. 12:13). Gen kèk moun ki peche ki chwazi meprize konsèy Jewova bay yo (Jen. 4:6-8). Sepandan, objektif ansyen yo genyen se pou yo ede moun ki peche a pou l repanti si sa posib. Ki prensip yo suiv lè y ap reyini ak yon moun ki fè yon peche?
5. Ki konsèy ansyen yo ap bezwen suiv lè yo reyini ak moun ki fè peche a? (2 Timote 2:24-26). (Gade foto a tou.)
5 Ansyen yo wè moun ki peche a tankou yon ti mouton ki pèdi e ki gen anpil valè (Lik 15:4, 6). Se sa k fè, lè yo reyini ak moun nan, yo pa pale yon fason ki di avè l, ni yo pa aji avèk li yon fason ki pa janti. Mete sou sa, yo pa konsidere reyinyon sa a tankou yon senp woutin kote y ap suiv yon seri règ byen etabli. Olye de sa, y ap montre yo gen menm kalite nou jwenn nan 2 Timote 2:24-26 la. (Li vèsè yo.) Ansyen yo ap toujou aji avèk dousè, jantiyès ak bonte anvè moun ki peche a toutpandan y ap eseye touche kè l.
Menm jan ak bèje nan tan lontan yo, ansyen yo fè tout sa yo kapab pou yo ede yon mouton ki pèdi. (Gade paragraf 5.)
6. Ki jan ansyen yo prepare kè yo anvan yo reyini ak yon moun ki fè yon peche? (Women 2:4).
6 Ansyen yo prepare kè yo. Yo eseye imite Jewova nan fason y ap aji ak moun ki peche a, yo sonje Pòl ki te di: “Se bonte Bondye gen lakay li ki fè li vle w repanti.” (Li Women 2:4.) Toudabò, ansyen yo dwe sonje yo se bèje ki anba direksyon Kris (Eza. 11:3, 4; Mat. 18:18-20). Anvan komite a reyini ak moun ki peche a, yo priye ansanm e yo egzamine objektif yo genyen ki se ede moun ki peche a repanti. Yo fè rechèch nan Bib la ak nan piblikasyon nou yo e yo priye Bondye pou l ka ba yo bon konprann. Yo egzamine sa yo bezwen konnen sou moun nan ki te ka lakòz li panse fason l te panse a oswa li aji fason l te aji a. — Pwo. 20:5.
7-8. Ki jan ansyen yo kapab imite pasyans Jewova gen lakay li lè yo reyini ak yon moun ki fè yon peche?
7 Ansyen yo imite pasyans Jewova. Yo reflechi sou fason Jewova te konn aji ak moun ki peche nan tan lontan yo. Pa egzanp, Jewova te gen pasyans avèk Kayen, li te fè l konnen ki sa k t ap rive l si l pa t chanje e l te fè l konnen li t ap beni l si l te obeyi (Jen. 4:6, 7). Jewova te sèvi ak pwofèt Natan pou l te ka konseye David e pwofèt Natan te sèvi ak yon egzanp ki te touche kè wa a (2 Sam. 12:1-7). Epitou, Jewova te “kontinye voye” pwofèt li yo “san rete” pou y al pale ak nasyon Izrayèl la ki te vire do ba li (Jer. 7:24, 25). Li pa t tann pèp li a repanti anvan l ede yo. Olye de sa, li te pran devan lè l te ankouraje yo repanti.
8 Ansyen yo suiv egzanp Jewova lè y ap eseye ede moun ki te tonbe nan peche grav. Yo aji ak yo “avèk anpil pasyans”, jan 2 Timote 4:2 di sa. Se sa k fè, yon ansyen dwe toujou rete kalm e li dwe gen anpil pasyans pou l ka ede moun ki peche a pou l anvi fè sa ki dwat. Si yon ansyen ta vin pèdi pasyans e li ta vin fache, moun nan ka pa koute konsèy li ba li oswa li ka refize repanti.
9-10. Ki jan ansyen yo kapab ede yon moun rezone sou sa ki te lakòz li tonbe nan peche?
9 Ansyen yo chèche wè ki sa ki te lakòz moun nan tonbe nan peche. Pa egzanp, èske kretyen sa a te vin fèb tikras pa tikras akoz li te neglije fè etid pèsonèl oswa li te neglije travay predikasyon an? Èske l te sispann priye Jewova oswa li te priye pa woutin? Èske se kite l kite move dezi mennen l nan peche? Èske se move chwa li te fè nan kesyon zanmi oswa nan kesyon detant? Ki efè desizyon l te pran yo genyen sou fason l panse ak sou anvi li genyen yo? Èske l rekonèt desizyon l te pran yo ak fason l te aji yo gen efè sou Jewova, Papa l?
10 Lè ansyen yo poze kesyon ki fè sans, san yo pa antre nan detay ki pa nesesè, ansyen yo ap ede moun nan reflechi sou bagay ki te fè l vin fèb nan relasyon l gen ak Jewova a e ki te lakòz li tonbe nan peche (Pwo. 20:5). Mete sou sa, yo ka sèvi ak egzanp pou yo ede moun nan rezone e pou yo ede l wè nan ki pwen l te mal aji, jan Natan te fè sa avèk David. Petèt pandan premye reyinyon an, moun nan ka santi l tris anpil paske l te aji fason l te aji a. Li ka menm repanti.
11. Ki jan Jezi te aji ak moun ki peche yo?
11 Ansyen yo fè efò pou yo imite Jezi. Pou Jezi ki resisite te kapab ede Sòl ki moun Tas, avèk sajès, li te poze l kesyon ki vin annapre a: “Sòl, Sòl, poukisa w ap pèsekite m?” Lè sa a, Jezi te ede l wè move fason l t ap aji a (Tra. 9:3-6). Epitou, men sa Jezi te di konsènan “madanm yo rele Jezabèl la”: “Mwen ba l tan pou l repanti.” — Rev. 2:20, 21.
12-13. Ki jan ansyen yo ka bay yon moun ki peche tan pou l repanti? (Gade foto a tou.)
12 Menm jan ak Jezi, ansyen yo pa kouri panse yon moun ki fè peche pap repanti. Se vre gen kèk moun ki repanti depi nan premye reyinyon komite a fè ak yo a, men gen lòt moun ki gendwa bezwen plis tan. Se sa k fè, ansyen yo kapab pran dispozisyon pou yo reyini plizyè fwa ak moun ki fè peche a. Petèt apre premye reyinyon an, kretyen ki te fè peche a kapab kòmanse reflechi toutbon sou sa ansyen yo te di l la. Avèk imilite, li ka priye Jewova (Sòm 32:5; 38:18). Konsa, nan yon lòt reyinyon, moun ki peche a gendwa gen yon etadespri ki diferan parapò ak etadespri li te genyen nan premye reyinyon an.
13 Pou ansyen yo ede moun ki peche a repanti, yo mete yo nan plas li e yo aji avè l avèk bonte. Yo priye Jewova pou l beni efò yo fè e yo espere kretyen ki te vire do bay Jewova a ka retounen nan bonsans li e l ka repanti. — 2 Tim. 2:25, 26.
Ansyen yo kapab reyini plizyè fwa ak yon moun ki fè yon peche yon fason pou yo ba l tan pou l repanti. (Gade paragraf 12.)
14. Lè yon moun peche e li repanti, kiyès ki ede moun sa a tounen, e ki rezon ki fè nou di sa?
14 Se pa ti kontan nou kontan lè moun ki peche a repanti (Lik 15:7, 10)! Byenke ansyen yo te fè tout sa yo kapab pou yo korije moun nan, kiyès ki vrèman ede yon moun ki peche pou l chanje? Sonje pawòl apot Pòl te ekri konsènan moun ki peche yo lè l te di: “Petèt, Bondye ka byen pèmèt yo repanti.” (2 Tim. 2:25). Kidonk, se Jewova, se pa okenn lòt moun, ki ede yon kretyen chanje fason l panse ak fason l aji. Pòl esplike bon bagay ki rive apre yon moun fin repanti. Moun sa a kapab vin gen yon konesans ki pi egzak sou laverite, li kapab retounen nan bonsans li e li kapab retire kò l anba pyèj Satan yo. — 2 Tim. 2:26.
15. Ki jan ansyen yo ka kontinye ede yon moun ki te peche ki repanti?
15 Lè yon moun ki peche repanti, ansyen yo ap pran dispozisyon pou yo vizite moun sa a pou l ka kontinye jwenn èd li bezwen pou l goumen kont pyèj Satan yo e pou l fè chemen dwat pou pye l (Ebre 12:12, 13). Natirèlman, ansyen yo pap bay pèsonn okenn detay sou sa moun ki te peche a te fè a. Sepandan, ki sa kongregasyon an ka bezwen konnen?
“REPRIMANDE MOUN K AP PRATIKE PECHE YO DEVAN JE TOUT MOUN”
16. Selon 1 Timote 5:20, lè Pòl te di “tout moun” nan, de kiyès li t ap pale?
16 Li 1 Timote 5:20. Pòl te mande Timote, yon lòt ansyen, pou l “reprimande moun k ap pratike peche yo devan je tout moun”. Ki sa l te vle di? Se pa di l te vle di peche a te fèt “devan je tout moun” nan kongregasyon an. Okontrè, li t ap pale de kèk moun ki gendwa te deja okouran de peche a. Yo gendwa te wè sa k te fèt la ak je yo oswa moun ki fè peche a gendwa te pale ak yo sou sa. Se moun sa yo sèlman ansyen yo ap fè konnen yo te trete sitiyasyon an e yo te korije moun ki te peche a.
17. Si anpil moun nan kongregasyon an okouran yon peche grav ki te fèt, oswa gen anpil posiblite pou yo vin konn sa, ki anons yo ta dwe fè, e poukisa?
17 Nan kèk ka, anpil moun nan kongregasyon an gendwa deja okouran peche ki te fèt la oswa gen anpil posiblite pou yo vin konnen sa ki te fèt la. Nan yon ka konsa, ekspresyon “tout moun” nan gen rapò ak tout kongregasyon an. Se sa k fè, yon ansyen ap fè yon anons nan kongregasyon an pou fè konnen frè entèl oswa sè entèl te resevwa yon reprimann. Pou ki rezon? Men repons Pòl bay: “Pou sa ka yon avètisman pou rès moun yo” pa tonbe nan peche.
18. Ki sa ansyen yo ap fè si yon timoun ki batize ki poko gen 18 an fè yon peche grav? (Gade foto a tou.)
18 Ki sa ansyen yo ka fè lè yon timoun ki batize ki poko gen 18 an fè yon peche grav? Gwoup ansyen an ap pran dispozisyon pou de ansyen reyini ak timoun nan ansanm ak paran l ki Temwen Jewova.b Ansyen yo ap chèche wè ki sa paran yo deja fè pou ede pitit yo a repanti. Si timoun nan gen yon bon etadespri e paran l yo ap ede l, de ansyen yo gendwa deside li pa nesesè pou y ale pi lwen. Ansyen yo konnen Bondye bay paran yo responsablite pou yo korije pitit yo avèk lanmou (Det. 6:6, 7; Pwo. 6:20; 22:6; Efe. 6:2-4). Annapre, ansyen yo ap rankontre detanzantan ak paran yo pou asire yo timoun nan jwenn èd li bezwen. Sepandan, ki sa ansyen yo bezwen fè si yon timoun ki batize ki poko gen 18 an pa repanti e li kontinye fè sa ki mal? Nan ka sa a, yon komite ansyen ap reyini avè l ansanm ak paran l ki Temwen Jewova.
Lè yon timoun ki poko gen 18 an fè yon peche ki grav, de ansyen ap reyini avè l ansanm ak paran l ki Temwen Jewova. (Gade paragraf 18.)
“JEWOVA GEN ANPIL KONPASYON AK ANPIL MIZÈRIKÒD”
19. Ki jan ansyen yo fè efò pou yo imite Jewova lè y ap ede moun ki fè peche yo?
19 Ansyen k ap sèvi nan komite yo gen responsablite devan Jewova pou yo kenbe kongregasyon an pwòp (1 Kor. 5:7). Epitou, yo vle ede moun ki peche yo pou yo repanti depi yo vle sa. Pou ansyen yo rive fè sa, lè y ap ede yon moun, yo espere moun sa a ap chanje. Poukisa? Se paske yo vle imite Jewova, Sila a ki “gen anpil konpasyon ak anpil mizèrikòd” la (Jak 5:11). Remake fason apot Jan ki te granmoun anpil te montre li te renmen frè ak sè yo. Men sa l te ekri: “Timoun mwen yo, m ap ekri nou bagay sa yo pou nou ka pa fè peche. Men, si yon moun ta fè yon peche, nou gen yon èd bò kot Papa a, se Jezi Kris, yon moun ki jis.” — 1 Jan 2:1.
20. Sou ki sa nou pral pale nan dènye atik ki nan seri sa a?
20 Malerezman, gen moman kote yon kretyen refize repanti. Nan ka sa a, yo dwe retire l nan kongregasyon an. Ki sa ansyen yo fè lè gen yon sitiyasyon grav konsa? Nou pral pale sou sijè sa a nan dènye atik ki nan seri sa a.
KANTIK 103 Bèje yo se kado Bondye bay
a Anvan sa, nou te rele gwoup sa yo komite disiplin relijye. Men, etandone jije se sèlman yon aspè nan travay yo a, nou pa sèvi ak ekspresyon sa a ankò. Olye de sa, n ap senpleman rele gwoup sa yo komite ansyen.
b Sa yo di konsènan paran yo valab tou pou moun ki responsab yon timoun devan lalwa, oswa pou moun ki gen responsablite pou pran swen yon timoun.