Lik 1:37 — “Paske pa gen anyen Bondye pa ka fè”

“Paske, pa gen yon pawòl Bondye di ki enposib pou l reyalize.” — Lik 1:37, Labib — Tradiksyon monn nouvo a

“Paske pa gen anyen Bondye pa ka fè.” — Lik 1:37, Bib la.

Sa Lik 1:37 vle di

Bondye Toupisan e l ka fè yon seri bagay ki parèt enposib pou nou menm lèzòm. Pa gen anyen ki ka anpeche pawòl li reyalize oswa fè l pa ka kenbe pwomès li.

Pou mo “pawòl” la nan lang orijinal la, nou ka mete nan plas li, “deklarasyon” oswa “yon bagay Bondye di”. Anplis de sa, li ka vle di reyalizasyon yon bagay Jewova te deklare. Etandone pawòl Jewovaa Dye toujou reyalize, nou te ka tradui Lik 1:37 konsa tou: “Paske pwomès Bondye yo pa janm pa reyalize” oswa “Paske pa gen anyen ki enposib pou Bondye”. Tout fason sa yo yo tradui tèks grèk orijinal la bay menm ide a: Pa gen yon pawòl oswa yon pwomès Bondye ki pap reyalize, paske pa gen anyen ki enposib pou li. — Ezayi 55:10, 11.

Nou jwenn lòt ekspresyon menm jan an anrapò ak pwomès Bondye yo nan tout Bib la. Pa egzanp, pa mwayen yon zanj, Jewova te predi Sara, madanm Abraram, ki pa t ka fè pitit, t ap vin ansent pandan l fin granmoun. Bondye te di tou: “Èske gen yon bagay ki enposib pou Jewova?” (Jenèz 18:13, 14). Apre patriyach Jòb te fin admire kèk bagay Bondye te kreye, li te fè konnen: “Pa gen anyen ou panse fè ki enposib pou ou.” (Jòb 42:2). E lè disip Jezi yo te fè konnen yo pa sèten si y ap kapab fè sa Bondye mande pou yo sove, Jezi te fè yo sonje “pou Bondye, tout bagay posib”. — Matye 19:25, 26.b

Kontèks Lik 1:37

Se yon zanj ki rele Gabriyèl ki te di yon jèn fi Juif vyèj ki rele Mari pawòl nou jwenn nan Lik 1:37 la. Gabriyèl te fèk fin di l li pral ansent, pitit la se “Pitit Sila a ki nan pi gwo pozisyon an” e se pou l “rele l Jezi”. Jezi t ap vin Wa nan Wayòm Bondye a, yon Wayòm ki pral la pou tout tan gen tan. — Lik 1:26-33; Revelasyon 11:15.

Mari te mande ki jan yon bagay konsa ap fè posib paske li pa marye e l “pa gen relasyon seksyèl ak okenn gason”. (Lik 1:34, 35.) Zanj Gabriyèl fè l konnen Bondye ap sèvi ak lespri sen l, sa vle di fòs pou l aji a. Nan moman an, Jezi, antanke Pitit Bondye, te yon espri nan syèl la. Se sa k fè, Jewova te sèvi ak lespri sen l pou l mete lavi Jezi nan vant Mari (Jan 1:14; Filipyen 2:5-7). Se konsa, pa mwayen yon mirak, Mari vin ansent. Pou zanj lan te ede Mari gen plis lafwa nan pouvwa Bondye genyen, li te di l Elizabèt, fanmi l lan, ansent “pandan l tou granmoun nan”. Elizabèt ansanm ak Zakari, mari l, pa t gen timoun paske Elizabèt pa t ka fè pitit (Lik 1:36). Moun te vin konnen Jan, pitit gason yo te fè a, kòm Jan ki te konn batize moun nan, e Jewova te fè konnen ki travay Jan t ap gen pou l fè depi davans tou. — Lik 1:10-16; 3:1-6.

Lè zanj Gabriyèl te di pawòl nou jwenn nan Lik 1:37 la, petèt li t ap panse ni ak Elizabèt ni ak Mari. Pawòl sa yo bay moun k ap sèvi Jewova jodi a asirans Jewova ap toujou kenbe pwomès li. Sa gen ladan l pwomès pou Wayòm ki jis ki nan syèl la, ki gen Pitit gason l lan, Jezi Kris ki pral dirije antanke Wa, vin ranplase gouvènman lèzòm yo. — Dànyèl 2:44; 7:13, 14.

Gade ti videyo tou kout sa a pou w jwenn yon apèsi sou liv Lik la.