Repons kesyon w yo

◼ Ki sa nou dwe fè si yo ta mande nou pou nou sispann preche yon kote?

Gen kèk ka kote lapolis konn vin kote pwoklamatè yo pandan y ap patisipe nan yon aktivite kèlkonk nan ministè a, pou fè yo konnen yo vyole lalwa, e yo mande pwoklamatè yo pou yo sispann. Si yo pase nou lòd pou nou kite tèritwa a, nou dwe fè sa vit e nou dwe fè sa avèk jantiyès (Mat. 5:41; Fil. 4:5). Nou pa dwe eseye rezoud pwoblèm nan poukont nou, sa vle di, nou pa dwe chèche fè diskisyon ak polisye a sou dwa nou genyen pou nou preche. Si sa posib, avèk tak, chèche konnen nimewo badj polisye a epi chèche konnen ki kote li kantone. Apre sa, enfòme ansyen yo tousuit, e yo menm y ap rantre an kontak ak biwo filyal la pou yo ba l enfòmasyon sou pwoblèm ki pase a. Se menm bagay la tou, si yon moun ki responsab yon bilding, responsab yon apatman, oubyen nenpòt lòt responsab mande nou pou nou kite yon lokal, nou dwe deplase imedyatman epi n ap fè ansyen yo konn sa. Lè nou gen dousè ak imilite nan fason nou boule ak moun ki gen otorite yo, sa ka anpeche nou tonbe nan pwoblèm san nesesite. — Pwo. 15:1; Wom. 12:18.