Èske Temwen Jewova yo ede moun lè gen katastwòf natirèl?

Wi. Temwen Jewova yo abitye ede moun lè gen katastwòf natirèl. Nan moman sa yo, nou ede ni Temwen parèy nou ni moun ki pa Temwen, sa ki ann amoni ak enstriksyon nou jwenn nan Bib la nan Galat 6:10 ki di: “ Fè byen ak tout moun, men sitou ak moun ki fanmi nou nan lafwa.” Pou n soutni moun ki viktim yo, nou ba yo sa yo konn plis bezwen nan moman sa yo, sa vle di nou ede yo nan domèn espirityèl e nou ba yo konsolasyon. — 2 Korentyen 1:3, 4.

Fason nou òganize

Tousuit apre yon katastwòf natirèl, moun ki alatèt asanble Temwen Jewova ki nan zòn ki gen dega yo eseye kontakte tout moun ki nan ansanble pa yo a, pou yo ka konnen si yo toujou vivan oswa pou yo konnen ki èd yo ka bezwen. Apre sa, yo voye yon rapò bay biwo filyal Temwen Jewova yo pou fè konnen ki moun ki vivan e ki efò yo deja fè pou ede yo.

Si sa moun yo bezwen yo ta depase sa frè nan asanble lokal yo ka bay, Kolèj santral Temwen Jewova yo pran dispozisyon pou bay moun yo sa yo bezwen. Se menm bagay la kretyen nan premye syèk yo te fè, yo te ede youn lòt lè te gen yon gwo grangou ki te frape nan yon zòn (1 Korentyen 16:1-4). Biwo filyal ki nan peyi a mete sou pye yon komite sekou pou òganize èd yo epi bay direksyon. Temwen ki sot lòt kote yo bay tan yo ak sa yo genyen pou yo ede moun. — Pwovèb 17:17.

Ofrann

Youn nan fason yo itilize ofrann volontè yo voye nan biwo filyal Temwen Jewova yo se lè yo itilize ofrann sa yo pou ede moun ki viktim anba katastwòf natirèl (Travay 11:27-30; 2 Korentyen 8:13-15). Etandone se volontè k ap travay, kòb yo bay yo se pou ede moun ki viktim, se pa pou peye moun k ap travay yo. Nou fè tout sa nou kapab pou nou byen sèvi ak ofrann sa yo. — 2 Korentyen 8:20.