Mete w nan plas lòt moun
Pwoblèm nan
Si nou sèlman ret ap reflechi sou diferans ki genyen ant nou menm ak lòt moun, nou ka panse diferans sa yo se feblès oswa defo. Anfèt, sa gendwa fè n panse nou siperyè lòt moun yo. Depi n fin gen panse negatif konsa sou lòt moun, li vin difisil pou n mete n nan plas yo. Lè n pa rive mete n nan plas lòt moun, sa ka montre n gen yon pi gwo pwoblèm, ki se prejije.
Prensip Bib la bay
“Rejwi ak moun k ap rejwi. Kriye ak moun k ap kriye.” — WOMEN 12:15.
Sa sa vle di? Nou ka di pawòl ki nan prensip sa a nan kèk mo sèlman: mete n nan plas lòt moun. Konsa, nou gen posiblite pou n santi sa yon lòt moun santi.
Poukisa l itil pou n mete n nan plas lòt moun?
Lè n mete n nan plas yon moun, nou vin konprann jan n gen anpil bagay ki sanble ak moun sa a. Nou konprann li ka santi l menm jan n santi nou e li ka reyaji menm jan avè n. Lè n mete n nan plas lòt moun, sa fè n wè, kèlkeswa sa n ye, nou tout se yon sèl fanmi. Plis nou pran tan pou n reflechi sou jan n sanble ak yo, se plis nou ka pa kouri mal jije yo.
Lè n mete n nan plas lòt moun, sa ap pouse n respekte yo tou. Anne-Marie, ki soti Senegal, te konn meprize yon gwoup moun anpil moun te panse ki pi ba nan sosyete a. Fason l te mete l nan plas lòt moun te ede l. Men sa l di sou sa: “Lè m t ap gade pwoblèm gwoup ki pi ba yo t ap rankontre, m te mande tèt mwen ki jan m t ap santi m si m te nan plas yo. Sa te fè m ap reflechi sou swadizan pi gwo pozisyon m te genyen an, se pa yon bagay m te ni chwazi ni achte.” Wi, si n chèche konprann fason lòt moun ap lite ak yon pwoblèm, sandout, n ap pi byen konprann yo, olye n kritike yo.
Men sa w ka fè
Gade pi lwen pase diferans yo epi chèche ki sa k sanble ant ou menm ak gwoup moun ou mal wè a. Pa egzanp, panse sou jan yo santi yo lè:
Lè n mete n nan plas lòt moun, sa fè n wè nou tout se yon sèl fanmi.
y ap manje ak fanmi yo
yo fin fè yon jounen ap travay di
y ap pase tan ak zanmi yo
y ap koute mizik yo renmen
Ansuit, chèche mete w nan plas yo. Poze tèt ou kesyon sa yo:
‘Ki jan m t ap reyaji si yon moun ta fè m santi m pa vo anyen?’
‘Ki jan m t ap santi m si lòt moun ta jije m san yo pa chèche konnen m?’
‘Si m te nan gwoup moun yo meprize a, ki jan m t ap renmen lòt moun konsidere m?’