Montre yon enterè sensè pou moun : lè nou fleksib
1 Apot Pòl te toujou konn adapte prezantasyon bon nouvèl la selon nivo moun ki t ap koute l yo e selon mantalite yo. Se yon bèl egzanp li kite (1 Kor. 9:19-23). Nou dwe fè efò pou nou fè menm jan an. Souvan, yon ti reflechi alavans ap ede nou adapte prezantasyon yo bay kòm egzanp nan Ministè Wayòm nan ak bezwen moun ki nan tèritwa nou an. Etan nou pral rive nan yon kay, nou kapab note kèk bagay ki endike nou sa ki enterese moun nan kay la, epi nou kapab pale de sa nan prezantasyon n ap fè a. Sepandan, gen yon lòt fason ankò nou kapab montre nou fleksib nan ministè nou.
2 Bati sou sa moun yo di : Byen souvan, lè n ap prezante bon nouvèl la, nou poze yon kesyon e nou envite moun n ap pale avèk yo a reponn. Ki jan w konsidere repons yo bay la ? Èske w gen tandans annik di w konprann epi w jis kontinye ak prezantasyon ou te prepare a ? Oswa èske sa w di annapre a montre ou pran remak moun yo an konsiderasyon ? Si w montre yon enterè sensè pou sa moun yo di, w ap anmezi pou w itilize kèk lòt kesyon avèk tak pou w wè sa k vrèman nan panse yo (Pwo. 20:5). Konsa, ou ka konsantre sou kèk aspè nan mesaj Wayòm nan ki konsène dirèkteman pwoblèm moun k ap koute w la.
3 Sa mande pou nou dispoze pale sou lòt sijè olye de sa nou te deja planifye pou nou diskite yo. Si nou kòmanse pale sou yon pwoblèm k ap fè aktyalite nan nouvèl, epi moun nan mansyone yon bagay ki pase bò lakay li oswa yon kesyon pèsonèl k ap trakase l, ki sa pou nou fè ? Bonjan enterè nou genyen pou nou konble bezwen moun n ap pale avèk li a ap pouse nou pou nou santre diskisyon biblik n ap fè a sou sa ki gen plis enpòtans pou li. — Fil. 2:4.
4 Adapte metòd nou yo : Lè moun n ap pale avè l la soulve yon kesyon, petèt nou ka wè l ap pi bon pou nou kontinye konvèsasyon an yon lòt lè, apre nou fin chèche gen plis enfòmasyon sou sijè a. Epitou, nou ka ofri l piblikasyon ki trete sijè a plis an pwofondè. Tout sa montre enterè sensè nou genyen pou nou ede lòt moun vin konnen Jewova. — 2 Kor. 2:17.