Թագավորության քարոզչությունը մեծ առանձնաշնորհում է
1 Ամեն օր երկրի միլիարդավոր բնակիչներ օգտվում են Եհովայի տված առատ բարիքներից, որոնք անհրաժեշտ են կյանքի համար (Մատթ. 5։45)։ Այնուամենայնիվ, միայն քչերն են օգտվում իրենց Արարչի հանդեպ գնահատանք ցույց տալու առանձնահատուկ հնարավորությունից, այն է՝ Աստծու Թագավորության բարի լուրը քարոզելը (Մատթ. 24։14)։ Որքա՞ն բարձր ես գնահատում այս թանկ առանձնաշնորհումը։
2 Թագավորության քարոզչությունը պատիվ է բերում Աստծուն և հույս ու խաղաղություն է տալիս մարդկանց, որոնք ճնշված են այսօրվա անհանգիստ ժամանակների պատճառով (Եբր. 13։15)։ Այս պատգամին արձագանքողներին դա հավիտենական կյանքի հույս է տալիս (Յովհ. 17։3)։ Աշխարհիկ ո՞ր գործը կամ մասնագիտությունը կարող է այսպիսի օգուտներ բերել։ Պողոս առաքյալը ծառայության հանդեպ իր գնահատանքը ցույց էր տալիս նրանով, թե ինչպես էր կատարում այն։ Նա իր ծառայությանը վերաբերվում էր ինչպես գանձի (Գործք 20։20, 21, 24; Բ Կորնթ. 4։1, 7)։
3 Բարձր գնահատենք մեր թանկ առանձնաշնորհումը։ Քարոզելու առանձնաշնորհման հանդեպ մեր գնահատանքը ցույց տալու կերպերից մեկը մեր ծառայության որակին ուշադրություն դարձնելն է։ Ժամանակ տրամադրո՞ւմ ենք այնպիսի մատուցում պատրաստելուն, որը կհասնի մեզ լսողների սրտին։ Կարո՞ղ ենք բարելավել Գրությունները գործածելու և մարդկանց հետ տրամաբանելու մեր կարողությունը։ Հիմնավորապե՞ս ենք մշակում մեզ տրված տարածքը։ Կարո՞ղ ենք Աստվածաշնչի ուսումնասիրություն սկսել և անցկացնել։ Վաղեմի և ներկայիս հավատարիմ քրիստոնյաների պես՝ մենք ճիշտ մղումներով ենք կատարում այս աշխատանքը և բարձր ենք գնահատում մեր ունեցած առանձնաշնորհումը (Մատթ. 25։14–23)։
4 Երբ մենք դիմագրավում ենք տարիքի, առողջության և այլ դժվար հանգամանքների առաջ բերած խնդիրները, կարող ենք մխիթարվել՝ իմանալով, որ ծառայության մեջ գործադրած մեր եռանդուն ջանքերը իսկապես մեծ արժեք ունեն։ Աստծու Խոսքը վստահեցնում է մեզ, որ Եհովան բարձր է գնահատում այդ ջանքերը, որ ներդնում ենք իրեն ծառայելիս, նույնիսկ եթե դրանք այնքան էլ տպավորիչ չեն ուրիշների համար (Ղուկ. 21։1–4)։
5 Թագավորության քարոզչությունը մեծ բավականության աղբյուր է։ 92–ամյա մի քույր ասաց. «Իսկապես մեծ առանձնաշնորհում է Աստծու ծառայության մեջ անցկացնել 80 տարի։ Երբ ետադարձ հայացք եմ նետում այդ տարիներին, բոլորովին չեմ զղջում։ Եթե ես կարողանայի նորից սկսել կյանքս, կընտրեի միևնույն ուղին, որովհետև իրոք որ Աստծու «ողորմութիւնը լաւ է քան թէ կեանքը»» (Սաղ. 63։3)։ Թող որ մենք էլ բարձր գնահատենք Աստծուց ստացած այս արժեքավոր առանձնաշնորհումը՝ Թագավորության քարոզչությունը։