ՍԱՂՄՈՍ

141 Ո՛վ Տէր, քեզի կը կանչեմ, շուտով հասիր ինծի.

Ակա՛նջ դիր իմ ձայնիս, երբ քեզի կը կանչեմ։

 2 Թո՛ղ իմ աղօթքս խունկի պէս սեպուի քու առջեւդ

Եւ իմ ձեռքերուս վեր վերցուիլը՝ իրիկուան պատարագին պէս։

 3 Ո՛վ Տէր, պահապա՛ն դիր իմ բերնիս

Ու իմ շրթունքներուս դուռը պահպանէ։

 4 Մի՛ թողուր որ սիրտս չար բանի ետեւէ խոտորի,

Որպէս զի անօրէնութիւն գործող մարդոց հետ գէշ գործեր չընեմ

Ու անոնց համադամ կերակուրներէն չուտեմ։

 5 Արդարը թող զիս խրատէ եւ զարնէ ողորմութեամբ,

Բայց անօրէնին իւղը թող չօծէ գլուխս,

Վասն զի անդադար անոնց չարութիւններուն դէմ պիտի աղօթեմ։

 6 Երբ անոնց դատաւորները ապառաժներու մէջ ձգուին,

Այն ատեն իմ խօսքերս պիտի լսեն, վասն զի քաղցր են։

 7 Ինչպէս հերկողը* ու ճեղքողը կը ցրուէ երկրի վրայ,

Այնպէս անոնց ոսկորները գերեզմանին բերանը ցիրուցան եղան.

 8 Սակայն, ո՛վ Տէր Եհովա, իմ աչքերս դէպի քեզ են.

Քեզի՛ յուսացի, իմ հոգիս անպաշտպան մի՛ ձգեր։

 9 Ինծի համար լարուած որոգայթէն

Ու անօրէնութիւն գործողներուն վարմերէն զիս պահէ։

10 Ամբարիշտները իրենց ցանցերուն մէջ պիտի իյնան,

Մինչ միայն ես անվնաս պիտի անցնիմ։