Քրիստոսի Սիրոյն կ’Ընդառաջէ՞ք
1 Իր Տիրոջ կեանքի ընթացքին մասին խորհրդածելով, Յովհաննէս առաքեալ գրեց. «Յիսուս . . . սիրելով իրենները, որոնք աշխարհի մէջ էին, մինչեւ վերջն ալ սիրեց զանոնք»։ (Յովհ. 13։1) Յիշատակատօնի այս ժամանակաշրջանին, մեր մտածումները կ’ուղղուին դէպի Քրիստոսի սիրոյն մեծագոյն արտայայտութեան։ Կրնանք այդ սիրոյն ընդառաջել, փրկանքին վրայ հաւատք ընծայելով, նախանձախնդրաբար քարոզչութեան մասնակցելով, եւ Յիսուսի նման «մինչեւ վերջը» համբերելով։—Մատթ. 24։13. 28։19, 20. Յովհ. 3։16
2 Քրիստոսի Սիրոյն Ընդառաջենք. Յիսուս իր երկրային կեանքին վերջին շաբաթը շատ գործունեայ էր։ (Մատթ. 21։23. 23։1. 24։3) Որպէս Քրիստոսը ընդօրինակողներ, սէրը մե՛զ ալ կը մղէ որ ‘ջանք ընենք’ Եհովայի ծառայութեան մէջ։ (Ղուկ. 13։24) Կրնա՞ք Ապրիլի ընթացքին վկայելու յաւելեալ գործունէութեան կարգադրութիւնները օգտագործել, աւելցնելով ծառայութեան համար ձեր յատկացուցած ժամանակը։
3 Այս տարի Տիրոջ Ընթրիքը տեղի պիտի ունենայ Չորեքշաբթի, 19 Ապրիլի երեկոյեան։ Այս առիթին համար քանի՞ հոգիներ ներկայ պիտի գտնուին։ Մեծաւ մասամբ, ասիկա մեզմէ կախեալ է։ Ձեր հրաւիրելիք անհատներուն ցանկը պատրաստա՞ծ էք, օրինակ՝ ձեր Աստուածաշունչի աշակերտները եւ ուրիշ հետաքրքրուած անհատներ, ազգականներ, գործի բարեկամներ կամ դասընկերներ։ Անոնց հետ կապ պահա՞ծ էք, եւ սրտանց հրաւիրա՞ծ էք զանոնք։ Անոնց պիտի յիշեցնէ՞ք Յիշատակատօնէն քանի մը օր առաջ։ Ներկայ գտնուելու համար անոնք ձեր օգնութեան կարիքը ունի՞ն։ Երէցները պիտի հրաւիրեն նաեւ ծառայութեան մէջ անգործունեայ դարձած անհատները։ Յիշատակատօնը՝ փոխանակ շաբաթավերջին, շաբթուան մէջ տեղի ունենալը, պատճառ մը չէ որ ոմանք ներկայ գտնուիլը նուազ կարեւոր նկատեն։
4 Պատրաստուա՛ծ Եկէք. Կենսական է որ պատրաստ ըլլանք եւ մտքի պատշաճ վիճակ մը ունենանք երբ Յիշատակատօնին ներկայ կը գտնուինք։ Պօղոս իր հաւատակիցները յորդորեց որ այս առիթին լրջութիւնը ի մտի ունենան։ (Ա. Կորն. 11։20-26) Կրնաք ձեր ընտանեկան ուսումնասիրութեան ընթացքին կարդալ Յովհաննու Աւետարանին 13-17–րդ գլուխները, ապա ընտանիքի իւրաքանչիւր անդամ պատմէ թէ Յիսուսի զոհագործութիւնը ի՛նչ կը նշանակէ իրեն համար։ Նաեւ մի՛ մոռնաք Յիշատակատօնի շաբթուան համար նշանակուած առօրեայ ընթերցանութիւնը ընելու։
5 Քրիստոսի հանդէպ մեր սէրը խորունկ է եւ անիկա 19 Ապրիլէն շա՜տ աւելի անդին կ’երթայ։ Վճռած ենք իրեն հանդէպ մեր սէրը յաւիտեա՛ն ցուցաբերել։ Այս տարուան Յիշատակատօնի տօնակատարութիւնը պիտի օգնէ մեզի որ այս վճռակամութեան կառչած մնանք։