Ճշմարտութիւնը փնտռել

Հազարաւոր տարիներ, մէ՛կը չէր գիտեր այդ հարցումին ճիշդ պատասխանը։ Մինչ այդ, համաճարակները միլիոնաւորներու կեանքը խլեցին։ Ի վերջոյ, գիտնականները ճշմարտութիւնը գիտցան։ Անոնք յայտնաբերեցին, թէ մանրէները՝ ինչպէս պակտէրիաները եւ ժահրերը (virus), յաճախ կը պատճառեն հիւանդութիւնները։ Այդ մէկ ճշմարտութիւնը գիտնալը մարդոց օգնած է, որ շատ մը հիւանդութիւններ կանխարգիլեն եւ դարմանեն, ինչ որ իր կարգին թոյլ տուած է որ միլիառաւոր մարդիկ աւելի երկար կեանք ունենան եւ աւելի առողջ ըլլան։

Գալով ուրիշ կարեւոր հարցումներու, քու կարծիքովդ՝ հետեւեալ հարցումներուն պատասխանները գիտնալը ինչպէ՞ս կրնայ քեզի ազդել։

• Ո՞վ է Աստուած։

• Ո՞վ է Յիսուս Քրիստոս։

• Ի՞նչ է Աստուծոյ Թագաւորութիւնը։

• Ապագային մեզի ի՞նչ կը սպասէ։

Միլիոնաւորներ այս հարցումներուն պատասխանները գտած են եւ իրենց կեանքը բարելաւած են։ Պատասխաններէն դուն ալ կրնաս օգտուիլ։

ԿՐՆԱ՞Ս ՃՇՄԱՐՏՈՒԹԻՒՆԸ ԳՏՆԵԼ

Թերեւս հարց տաս. ‘Ինչպէ՞ս կարելի է բանի մը մասին ճշմարտութիւնը գտնել’։ Ի վերջոյ, այնպէս կ’երեւի որ շատ մը բաներու մասին ճշմարտութիւնը գտնելը երթալէն աւելի կը դժուարանայ։ Ինչո՞ւ։

Շատեր չեն վստահիր կառավարութիւններուն, ընկերութիւններուն կամ լրատուամիջոցներուն, որ իրենց ըսեն ճշմարտութիւնը։ Անոնց համար դժուար է գիտնալ, թէ ուրիշներ իրողութիւննե՞րը կ’ըսեն, թէ ոչ պարզապէս իրենց կարծիքը կու տան, որոշ տեղեկութիւններ կը պահեն կամ նոյնիսկ սուտ կը խօսին։ Այսպիսի անվստահութեան մթնոլորտի մէջ, մարդիկ իրարմէ տարբեր կարծիքներ կ’ունենան, թէ իրողութիւնը ի՛նչ է եւ ի՛նչ նշանակութիւն ունի։

Հակառակ այս բոլոր դժուարութիւններուն, կարելի՛ է կեանքի ամէնէն կարեւոր հարցումներուն պատասխանները գտնել։ Ինչպէ՞ս։ Ընելով ինչ որ առօրեայ կեանքիդ մէջ կ’ընես նուազ կարեւոր հարցումներուն պատասխանները գտնելու։

ՃՇՄԱՐՏՈՒԹԻՒՆԸ ՓՆՏՌԵԼԴ

Դուն որոշ չափով ամէն օր ճշմարտութիւնը կը փնտռես։ Նկատի առ Ճեսիքայի պարագան։ Ան կ’ըսէ. «Աղջիկս գետնապիստակի հանդէպ ահռելի գերզգայնութիւն ունի, այն աստիճան որ գետնապիստակի փրոթէինի նոյնիսկ չնչին քանակը կրնայ զինք սպաննել»։ Ուստի հարկ է որ ան գիտնայ, թէ իր գնած ուտելիքը իր աղջկան համար ապահով պիտի ըլլայ։ «Նա՛խ ուտելիքներու պիտակները կը կարդամ, գիտնալու համար թէ ինչ նիւթեր կը պարունակեն։ Ետքը, յաւելեալ փնտռտուք կ’ընեմ եւ նոյնիսկ արտադրող ընկերութեան հետ կապի մէջ կը մտնեմ, վստահ ըլլալու համար որ գործարանին մէջ սխալմամբ ուտելիքին գետնապիստակ չէ խառնուած։ Նաեւ աչքէ կ’անցընեմ ուրիշ վստահելի աղբիւրներ, վստահ ըլլալու համար որ արտադրող ընկերութիւնը ապահովութեամբ ուտելիք պատրաստելու նկատմամբ լաւ համբաւ ունի»։

Թերեւս այն հարցումները, որոնց պատասխանները օրուան ընթացքին կը փնտռես, մահու կենաց հարց չեն՝ ինչպէս Ճեսիքայի պարագան։ Բայց անոր պէս, կրնաս հետեւեալ մօտեցումով հարցումներուդ պատասխանները գտնել.

• Իրողութիւնները գիտցիր։

• Յաւելեալ փնտռտուք ըրէ։

• Վստահ եղիր որ վստահելի աղբիւրներու կը դիմես։

Այս նոյն կերպով կրնաս կեանքի կարեւոր հարցումներուն պատասխանները գտնել։ Ինչպէ՞ս։

ՃՇՄԱՐՏՈՒԹԻՒՆԸ ԲՈՎԱՆԴԱԿՈՂ ՅԱՏՈՒԿ ԳԻՐՔ ՄԸ

Ճեսիքան կեանքի կարեւոր հարցումներուն պատասխանները փնտռելու համար գործածեց այն նոյն կերպը, որ կը գործածէ ուտելիքներու նկատմամբ իրողութիւններ գիտնալու։ Ան կ’ըսէ. «Աստուածաշունչը ուշի–ուշով կարդալը եւ խոր փնտռտուք ընելը ինծի օգնեցին, որ ճշգրիտ պատասխանները գտնեմ»։ Ճեսիքային պէս, միլիոնաւորներ գիտցած են Աստուածաշունչին պատասխանը հետեւեալ հարցումներուն.

• Ի՞նչ է կեանքին նպատակը։

• Մեռելներուն վիճակը ի՞նչ է։

• Ինչո՞ւ կը չարչարուինք։

• Աստուած ներկայիս ի՞նչ կ’ընէ ամէն տառապանք մէջտեղէն վերցնելու համար։

• Ինչպէ՞ս կրնանք ընտանեկան երջանիկ կեանք մը վայելել։

Այս եւ ուրիշ հարցումներու վստահելի պատասխանները կրնաս գտնել Աստուածաշունչը կարդալով եւ www.pr2711.com կայքին միջոցաւ յաւելեալ փնտռտուք ընելով։