Եհովայի Համբերութիւնը կը Գնահատէ՞ք
1 Եթէ Եհովա անցեալ 10, 20, եւ աւելի տարիներու ընթացքին համբերատար եղած չըլլար եւ թոյլ չտար որ մեծածաւալ վկայութիւն մը տրուէր, ճշմարտութիւնը սորված պիտի ըլլայի՞ք։ Որքա՜ն երախտապարտ ենք որ ան շատ աւելի անհատներու թոյլ տուած է որ «ապաշխարեն»։ Այսուհանդերձ, Եհովայի մեծ օրը «գողի պէս պիտի գայ»։ (Բ. Պետ. 3։9, 10) Ուստի, Աստուծոյ համբերութիւնը պէտք չէ սխալ կերպով մեկնել՝ որպէս իրերու այս դրութեան վախճանը բերելու մէջ ուշացում։—Ամբ. 2։3
2 Մարդոց Վրայ Խղճանք. Եհովայի երկայնամտութիւնը մեր խելքէն մտքէն վեր է։ Անոր նպատակը միշտ մեր մտքին մէջ պէտք է պահենք։ (Յովն. 4։1-4, 11) Եհովա մարդկութեան թշուառ վիճակը կը տեսնէ եւ անոնց կը կարեկցի։ Յիսուս ալ նոյնը կը զգայ։ Իր քարոզած բազմութիւններուն վրայ խղճալով, ան ուզեց որ քարոզչութեան գործը ընդլայնի, որպէսզի աւելի շատ անհատներ պատեհութիւնը ունենան յաւիտենական կեանք ձեռք ձգելու։—Մատթ. 9։35-38
3 Երբ ողբերգութիւններ ու աղէտներ հարուածեն, ճշմարտութիւնը չգիտցող անհատներուն չե՞նք կարեկցիր։ Ներկայիս մարդիկ «հովիւ չունեցող ոչխարներու պէս» են, մինչ կը ջանան աշխարհի մէջ տիրող քաոսային վիճակին հետ գլուխ ելլել եւ զայն հասկնալ։ (Մար. 6։34) Բարի լուրը նախանձախնդրաբար քարոզելով, բարեացակամ սիրտ ունեցող անհատները կը մխիթարենք եւ Եհովայի համբերութեան հանդէպ մեր գնահատութիւնը ցոյց կու տանք։—Գործք 13։48
4 Մեր Գործը Ստիպողական Է. Անցեալ տարի 323,439 հոգի մկրտուեցաւ եւ աւելի քան 14,000,000 անհատներ Յիշատակատօնին ներկայ գտնուեցան։ Մեծ հաւանականութիւն կայ որ շատ աւելի անհատներ այս ամբարիշտ դրութեան կործանումէն վերապրին։ «Մեծ բազմութիւն»ը ո՛րքան մեծ պիտի ըլլայ՝ չենք գիտեր։ (Յայտ. 7։9) Քարոզելու մեր յանձնարարութիւնը ո՛րքան պիտի տեւէ՝ չենք գիտեր։ Բայց Եհովան գիտէ։ Բարի լուրը պիտի քարոզուի ի՛ր ուզած տարողութեամբ, «անկէ յետոյ Վերջը պիտի գայ»։—Մատթ. 24։14
5 Մնացած ժամանակը կարճցած է եւ Աստուծոյ օրը մօտ է։ (Ա. Կորն. 7։29. Եբր. 10։37) Անկասկած, «հիմա մօտ է մեզի փրկութիւնը՝ քան թէ այն ատեն որ հաւատացինք»։ (Հռովմ. 13։11) Աստուածային համբերութեան նպատակը մեր ուշադրութենէն թող չվրիպի։ Ընդհակառակը, ստիպողական հոգիով քարոզենք, որպէսզի արդարութեան կարօտը քաշող տակաւին շատ ուրիշներ Եհովայի մեծ ողորմութեան փորձառութիւնը ունենան։