Քրիստոնէական Ընկերակցութիւնը Ո՞րքան Կարեւոր Է

¹ «Ո՛չ ոք կղզի մըն է»։ 17–րդ դարու բանաստեղծի մը այս խօսքը, պարզապէս կ’արձագանգէ այն ինչ որ Աստուածաշունչը կ’ըսէ մարդկային հիմնական կարիքներէն մէկուն՝ ընկերակցութեան՝ մասին։ (Առ. 18։1) Մեր քրիստոնէական ընկերակցութիւնը այս կարիքը կը լեցնէ։ Ի՞նչ օգտակար կերպերով։

² Ծառայութեան Մէջ. Հանրային ծառայութեան մէջ մեր եղբայրները մեզ կը զօրացնեն ու մեզի թիկունք կը կանգնին. ասիկա մեծագոյն օգուտներէն մէկն է։ Յիսուս իր աշակերտները «երկու երկու» ղրկեց որ քարոզեն։ (Մար. 6։7. Ղուկ. 10։1) Երբ այս օրինակին հետեւելով դաշտի ծառայութեան մէջ ուրիշներու հետ կ’աշխատինք, Ժողովողի 4։9, 10–ի խօսքերուն ճշմարիտ ըլլալը փորձառաբար պիտի գիտնանք։ Մինչ միասնաբար մեր ծառայութիւնը կը կատարենք, մեր ընկերակիցներուն հաւատքը, հնազանդութիւնը եւ սէրը, մեզի քաջութիւն պիտի տան եւ մեր եռանդը պիտի նորոգեն։

³ Անհատական Օգնութեան Համար. Մեր եղբայրակցութիւնը, ճնշումներու հետ գլուխ ելլելու եւ փորձութիւններուն դէմ կենալու համար ալ քաջալերութեան եւ առաջնորդութեան աղբիւր մըն է։ Մեր Քրիստոնեայ ընկերակիցները կրնան մեր ուշադրութեան յանձնել սուրբ գրային համարներ, որոնք մեր անձնական պարագաներուն կը վերաբերին։ Անոնք նոյնիսկ կրնան մեզի համար աղօթել, ինչպէս որ մենք իրենց համար կ’աղօթենք։ (Բ. Կորն. 1։11) Իսկ վստահաբար անոնց լաւ օրինակը մեզ կը մղէ բարի գործեր ընելու եւ կը զօրացնէ մեզ։

⁴ Ժողովներուն Մէջ. Քրիստոնէական ընկերակցութեան օրհնութիւնը կը վայելենք, երբ կանոնաւորաբար ժողովներու ներկայ կը գտնուինք։ (Եբր. 10։24, 25) Այս յայտագիրը հարուստ է հոգեւոր հրահանգներով, իսկ ժողովներուն մեր ներկայութիւնը, մեզ մեր հաւատակիցներուն մօտիկ կը պահէ։ Այս հանդիպումները մեր եղբայրներուն ու քոյրերուն մտիկ ընելու պատեհութիւնը կու տան մեզի, մինչ անոնք իրենց հաւատքը կ’արտայայտեն բեմէն, կամ իրենց նստած տեղէն։ (Հռովմ. 1։12) Բարեկամութեան մեր կապը կը զօրանայ, մինչ ժողովներէն առաջ ու վերջ իրարու հետ կը խօսակցինք։ Այսպիսի առիթներ մեզի պատեհութիւն կու տան հաւատք կերտող մեր փորձառութիւնները պատմելու։ Մեր անձնաւորութիւնները դրական կերպով կ’ազդուին, երբ կ’ընկերակցինք անհատներու հետ որոնք կը սիրեն Եհովան, իր Խօսքը եւ իր ժողովուրդը։—Փիլ. 2։1, 2

⁵ Մենք մեր Քրիստոնեայ ընկերակիցներուն կարիքը ունինք։ Առանց անոնց, կեանքի տանող նեղ ճամբուն մէջ քալելը աւելի դժուար պիտի ըլլար։ Սակայն, անոնց սիրով ու քաջալերութեամբ, կրնանք Եհովայի արդար նոր աշխարհը առաջնորդող ճամբուն մէջ շարունակել։—Մատթ. 7։14