Երախտապարտ՝ Աստուծոյ Ողորմութեան Համար

¹ Քրիստոնեայ չեղած, Պօղոս առաքեալ վայրագօրէն կը հակառակէր Քրիստոնէութեան տարածման։ Սակայն, քանի որ տգիտութեամբ կ’ընէր ասիկա, իրեն ողորմութիւն ցուցաբերուեցաւ։ Եհովա անարժան ողորմութիւն ցոյց տուաւ, եւ Պօղոսի շնորհուեցաւ քարոզելու նշանակում մը։ Ան այս նշանակումը արժեւորեց։ (Գործք 26։9-18. Ա. Տիմ. 1։12-14) Եհովայի ողորմութեան համար երախտապարտութիւնը Պօղոսը մղեց որ իր ծառայութիւնը անձնազոհութեամբ կատարէ։—Բ. Կորն. 12։15

² Աստուծոյ ողորմութեամբ, մեզի ալ ծառայութիւն մը տրուած է։ (Բ. Կորն. 4։1) Պօղոսի նման, կրնանք մեզի հանդէպ ցուցաբերուած ողորմութեան համար մեր երախտապարտութիւնը ցոյց տալ, անձնազոհութեամբ ուրիշներու օգնելով որ հոգեւորապէս յառաջդիմեն։ Ասիկա ընելու կերպերէն մէկն է՝ Աստուածաշունչի ուսումնասիրութիւններ սկսիլ ու վարել։

³ Աստուածաշունչի Ուսումնասիրութիւններ Սկսիլ. Անհատի մը կանոնաւորաբար պարբերաթերթ տանիլը կրնայ ճամբան հարթել Աստուածաշունչի ուսումնասիրութիւն սկսելու համար։ Երբ այսպիսի անհատներու կանոնաւորաբար կ’այցելենք, անոնց մտահոգութիւններէն աւելի տեղեակ կ’ըլլանք։ Ժամանակ մը ետք, պարբերաթերթերէն մէկուն մէջ հրատարակուած յօդուած մը կրնայ մեկնակէտը ըլլալ, Ի՛նչ կը Պահանջէ գրքոյկով Աստուածաշունչի ուսումնասիրութիւն մը առաջարկելու համար։ Յաջորդ այցելութիւններուն, երբ տանտիրոջ պարբերաթերթեր կը բերէք, թերեւս կրնաք շարունակել Ի՛նչ կը Պահանջէ գրքոյկը նկատի առնել։

⁴ Աղօթքն ու Ջանքը Անհրաժեշտ Են. Աղօթքը եւ ժրաջան աշխատանքը մեր քարոզչութեան գործունէութիւնը պիտի բարելաւեն։ Աստուածաշունչի ուսումնասիրութիւն մը ունեցող ռահվիրայ քոյր մը, Եհովայի աղօթեց որ զինք օրհնէ՝ յաւելեալ ուսումնասիրութիւններ ունենալով։ Ան նաեւ իր աղօթքներուն համաձայն գործեց։ Ան իր ծառայութիւնը վերլուծեց, եւ նկատեց թէ վերայցելութիւններու ընթացքին Աստուածաշունչի ուսումնասիրութիւններ չէր առաջարկեր։ Ան սկսաւ ասիկա ընել եւ շուտով երկու նոր ուսումնասիրութիւններ ունեցաւ։

⁵ Որքա՜ն առանձնաշնորհեալ ենք որ «Աստուծոյ շնորհքներու աւետարանը» ճանչցնելու մէջ բաժին կը բերենք։ (Գործք 20։24) Աստուծոյ ողորմութեան համար երախտապարտութիւնը թող մեզ մղէ որ ժրաջանօրէն ուրիշներու օգնենք Եհովայի անարժան ողորմութենէն օգտուելու։