Աստուածաշունչը—Մարդկութեան Ամենահին Եւ Այժմու Գիրքը
1 Աստուածաշունչը պատմութեան մէջ ամենէն մեծ շրջաբերութիւնը ունեցող գիրքն է։ Ուրիշ ոչ մէկ գիրք այսքան շատ լեզուներու թարգմանուած է։ Ասկէ զատ, ոչ մէկ խումբ Եհովայի Վկաներու նման նախանձախնդիր եղած է Աստուածաշունչը բաշխելու եւ զայն հրապարակաւ ներկայացնելու որպէս Աստուծոյ Խօսքը։
2 Քանի որ ան Աստուծոյ Խօսքն է, կրնանք վստահ ըլլալ որ այժմու խնդիրներուն համար գործնական լուծումներ կու տայ։ Եւ այսպիսի լուծումներ գտնելու համար Եհովայի կազմակերպութիւնը գործնական օգնութիւն կը հայթայթէ գրականութիւններու եւ պատկերիզներու միջոցաւ։ Հետեւաբար ուրախ ենք ծանուցանելով թէ Անգլերէնով Աստուածաշունչը—Մարդկութեան Ամենահին եւ Այժմու Գիրքը, երկրորդը այն երեք պատկերիզներէն որոնք ցոյց կու տան Աստուածաշունչին ներշնչուած ըլլալը, այժմ հրատարակուած է։ Անոր տեւողութիւնը 40 վայրկեան է։
3 Այս շարքին առաջին պատկերիզին նման, այս երկրորդ պատկերիզն ալ վստահութիւն կը կերտէ Աստուածաշունչին հանդէպ որպէս աստուածային ուղեցոյց մը։ Ան տեսարաններ կը գործածէ որոնք առնուած են Աստուածաշունչին մէջ յիշուած շրջաններէն եւ թանգարաններէն համայն աշխարհի մէջ, մեզի օգնելու որ գիտակցինք ինչպէ՛ս Եհովա Աստուած Աստուածաշունչը պահպանած է դարերու ընթացքին մինչեւ օրս։ Պիտի նկատէք ինչպէ՛ս Աստուածաշունչի ճշգրտութիւնը պահպանուած է հակառակ կրկնակի ընդօրինակութեան եւ թարգմանութեան։ Պիտի նկատէք ինչպէ՛ս այս աստուածային գիրքը պահպանուեցաւ հակառակ չափազանց ընդդիմութեան անոր բաշխումին։ Նաեւ պիտի նկատէք կենդանի վկայութիւններ թէ ինչպէ՛ս Աստուածաշունչը մարդոց կեանքը փոխած է դէպի լաւ։
4 Այս պատկերիզը արժէքաւոր պիտի ըլլայ Աստուածաշունչի ընտանեկան խօսակցութեան համար եւ շատ մը ուրիշ գործնական նպատակներու համար—ճիշդ առաջինին նման։ Վստահ ենք որ Եհովա պիտի օրհնէ անոր գործածութիւնը։ Կ’ակնկալենք զանիկա Արաբերէն լեզուով ունենալ։ Եհովայի Վըկաները—Անուն մը, Կազմակերպութիւն մը պատկերիզը նաեւ տակաւին մատչելի է։