Անտարբերութեան Ի՞նչպէս կը Հակազդէք

¹ Անտարբերութիւնը անզգայ, չհետաքրքրուող եւ անհոգ ըլլալ է։ Անիկա ծառայութեան մէջ մեր հանդիպած շատ սովորական եւ դժուար եղող կեցուածքներէն մէկն է։ Անոր ի՞նչպէս կը հակազդէք։ Անիկա պատճառ եղա՞ծ է որ ծառայութեան մէջ դանդաղիք։ Ի՞նչպէս կրնաք զայն յաղթահարել, որպէսզի Թագաւորութեան պատգամը մարդոց հասցնէք։

² Նախ եւ առաջ, վերլուծեցէք թէ ձեր թաղամասի մարդիկը ինչո՛ւ անտարբեր են։ Արդեօք անոնք իրենց քաղաքական եւ կրօնական առաջնորդներէն յուսախա՞բ եղած են։ Անոնք կը խորհի՞ն որ իրենց դիմագրաւած խնդիրներուն լուծում մը չկայ։ Ապագայի նկատմամբ եղած խոստումներուն հանդէպ կասկա՞ծ ունին։ Հոգեւոր նիւթերու մասին խորհելու յօժար չեն, մինչեւ որ անմիջական, շօշափելի օգուտնե՞ր ձեռք ձգեն։

³ Թագաւորութեան Յոյսը Աչքառու Դարձուցէք. Խնդիր մը չկայ, որ Թագաւորութիւնը պիտի չլուծէ։ Ուստի, երբ կարելի է, Թագաւորութեան խոստումներուն մասին պէտք է խօսինք, սուրբ գրային բանալի համարներ բերանացիօրէն մէջբերելով, երբ կարելի կամ գործնական չէ Աստուածաշունչի համար մը ցոյց տալ։ (Եբր. 4։12) Սակայն, ի՞նչպէս կրնանք խօսակցութիւնը մինչեւ հոն հասցնել։

⁴ Մարդիկ պէտք ունին մեր այցելութեան նպատակը հասկնալու։ Անոնք պէտք ունին գիտակցելու թէ իրենց կ’այցելենք, քանի որ դրացիական սէր եւ համայնքի հանդէպ հետաքրքրութիւն ունինք։ Կրնանք լաւ–կանխամտածուած հարցում մը հարցնել, ինչպէս՝ «Ի՞նչ կը խորհիք լուծումն է [համայնքին ազդող խնդիր մը]»։ Եթէ մօտեցում մը չյաջողի, ուրիշ մը փորձեցէք։

⁵ Շատ հարուստ թաղամասի մը մէջ, ուր տանտէրները Թագաւորութեան պատգամին հանդէպ անտարբեր էին, հրատարակիչները յարատեւեցին փնտռել հետաքրքրութիւն արթնցնող մօտեցում մը։ Երբ Գիտութիւն գիրքը կը ներկայացնէր, զոյգ մը հետեւեալ մօտեցումը փորձեց. «Կը խորհի՞ք որ ներկայիս լաւ ուսումը կարեւոր է աշխարհի մէջ յաջողելու համար։ Կը համաձայնի՞ք որ ընդարձակ ուսում մը իր մէջ կը պարփակէ Աստուածաշունչի գիտութիւնը»։ Կէսօրէ ետք մը, անոնք երեք գրքեր տեղաւորեցին, որոնցմէ մէկը կնոջ մը հետ, որ հետագային ըսաւ որ Գիտութիւն գիրքը լման կարդաց, եւ համաձայնեցաւ Աստուածաշունչի ուսումնասիրութիւն մը ունենալու։

⁶ Երբ անտարբերութեան հանդիպիք, զանազան մօտեցումներ գործածեցէք, միտք գրգռող հարցումներ ուղղեցէք եւ Աստուծոյ Խօսքին զօրութենէն օգտուեցէք։ Ասիկա ընելով, կարող պիտի ըլլաք ուրիշներուն օգնել որ Թագաւորութեան մեր սքանչելի յոյսը որդեգրեն։