Օգնական Ծառաները Արժէքաւոր Ծառայութիւն կը Մատուցանեն
1 Մեր Ծառայութիւնը Կատարելու Համար Կազմակերպուած գիրքը, օգնական ծառաներուն մասին հետեւեալը կ’ըսէ էջ 57–ի վրայ. «Անոնք ապացուցանած են թէ իրապէս նուիրուած տղամարդիկ են, որոնց հաւատքը բացայայտ է իրենց եռանդուն Թագաւորութեան ծառայութենէն եւ հաւատքին մէջ հաստատ մնալու համար ուրիշներուն տուած անոնց օգնութենէն»։ Արդարեւ, մեր օգնական ծառաները հոգեւոր գետնի վրայ լաւ օրինակներ են, որոնց կ’արժէ հետեւիլ։ Անոնց եւ երէցներուն հետ կողք կողքի աշխատելով, «մարմինը կ’աճի եւ կը զօրանայ սիրոյ մէջ»։—Եփ. 4։16, Անթիլիաս
2 Օգնական ծառաները ժողովքին մէջ կենսական գործունէութիւն մը կը կատարեն։ Պահ մը խորհեցէք անոնց կատարած արժէքաւոր բոլոր ծառայութիւններուն մասին. հոգ տանիլ՝ հաշիւներուն, գրականութիւններուն, պարբերաթերթերուն, բաժանորդագրութիւններուն եւ թաղամասերուն. ծառայել որպէս հիւրընկալ. ձայնի սարքերուն հոգ տանիլ եւ Թագաւորութեան Սրահը լաւ վիճակի մէջ պահել։ Անոնք մասնակցութիւն կը բերեն Աստուածպետական Ծառայութեան Դպրոցին եւ Ծառայութեան Ժողովին մէջ։ Անոնցմէ ոմանք նոյնիսկ հանրային դասախօսութիւններ կրնան տալ կամ կարգ մը ժողովներ վարել։ Ֆիզիքական մարմնի անդամներուն նման, օգնական ծառաները մեզի հարկ եղող ծառայութիւններ կը կատարեն։—Ա. Կորն. 12։12-26
3 Տեսնելով որ օգնական ծառաներ երէցներուն հետ փոխադարձ յարգանքով ու հասկացողութեամբ կը վարուին որպէս միակամ ծառայող մարմին, եւ ներդաշնակութեամբ իրարու հետ կը համագործակցին, ուրիշներ ալ կը քաջալերուին նոյնը ընել։ (Կող. 2։19) Ամէն շաբաթ կանոնաւորաբար ու հաւատարմօրէն իրենց պատասխանատուութիւնները կատարելով եւ անհատապէս ուրիշներով հետաքրքրուելով, անոնք ժողովքին հոգեւոր յառաջդիմութեան կը նպաստեն։
4 Ծանր աշխատող օգնական ծառաներուն հանդէպ մեր գնահատութիւնը ցուցաբերելու համար ի՞նչ կրնանք ընել։ Անոնց նշանակուած պարտականութիւններուն քաջածանօթ պէտք է ըլլանք եւ համագործակցելու պատրաստակամութիւն ցուցաբերենք, երբ մեր աջակցութեան հարկը կայ։ Խօսքով ու գործով, կրնանք անոնց ցոյց տալ թէ իրենց կատարած աշխատանքը կը գնահատենք։ (Առ. 15։23) Մեզի ի նպաստ ծանր աշխատող այս անհատները մեր անկեղծ գնահատութեան արժանի են։—Ա. Թես. 5։12, 13
5 Աստուծոյ Խօսքը օգնական ծառաներուն դերը եւ որակումները կը սահմանէ։ (Ա. Տիմ. 3։8-10, 12, 13) Անոնց արժէքաւոր ու սրբազան ծառայութիւնը, ժողովքին գործունէութեան համար անհրաժեշտ է։ Այսպիսի տղամարդիկ շարունակ մեր քաջալերութեան կարիքը ունին, քանի որ բոլորը՝ ‘Տէրոջը գործին մէջ աւելիով կ’աշխատին’։—Ա. Կորն. 15։58, Անթիլիաս