«Մեր Թաղամասը Բազմաթիւ Անգամներ Աշխատած Ենք»
1 Բնաւ զգացա՞ծ էք թէ ձեր թաղամասը ա՛յնքան յաճախ աշխատցուած է որ անոր մէջ այլեւս ոչխարանման անհատներ չկան։ Թերեւս խորհած էք՝ ‘Գիտեմ թէ մարդիկ ի՛նչպէս պիտի ընդառաջեն։ Ինչո՞ւ շարունակենք այցելել չհետաքրքրուած անհատներուն’։ Ճիշդ է որ բազմաթիւ թաղամասեր յաճախ կ’աշխատցուին։ Սակայն, այս իրողութիւնը դրական կերպով պէտք է դիտուի, եւ ոչ թէ ժխտական։ Ինչո՞ւ։ Նկատի առէք հետեւեալ չորս պատճառները։
2 Մեր Աղօթքները Պատասխանուած Են. Յիսուս ըսաւ. «Հունձքը շատ է բայց մշակները քիչ. ուստի հունձքին Տէրոջը աղաչեցէք որ մշակներ հանէ իր հունձքին»։ (Ղուկ. 10։2) Տասնամեակներէ ի վեր Եհովայի աղաչած ենք որ յաւելեալ օգնութիւն ղրկէ։ Շատ մը վայրերու մէջ, այժմ ունինք հարկ եղած յաւելեալ մշակները, եւ թաղամասը աւելի յաճախ կը ծածկենք։ Այն իրողութիւնը թէ Եհովա մեր աղօթքներուն պատասխանած է, պէտք չէ՞ մեզ ուրախացնէ։
3 Յարատեւութիւնը Պտուղ կու Տայ. Նոյնիսկ յաճախ աշխատցուած թաղամասերու մէջ, մարդիկ կ’ընդառաջեն Թագաւորութեան պատգամին եւ ճշմարտութիւնը կը սորվին։ Հետեւաբար, պէտք է շարունակենք կրկին ու կրկին այցելել, պարկեշտ սիրտ ունեցող աւելի շատ անհատներ գտնելու համար։ (Եսայ. 6։8-11) Ինչպէս Յիսուսի առաջին աշակերտները ըրին, շարունակենք ‘երթալ’ մեզի նշանակուած թաղամասին մէջ եղող մարդոց, ջանալով Աստուծոյ Թագաւորութեան հանդէպ անոնց հետաքրքրութիւնը արթնցնել։—Մատթ. 10։6, 7
4 Փորթուկալի մէջ, բազմաթիւ ժողովքներ իրենց թաղամասերը ամէն շաբաթ կը ծածկեն, սակայն անոնք տակաւին ոչխարանման անհատներ կը գտնեն։ Յատկապէս քոյր մը, շատ դրական տեսակէտ մը ունի։ Ան կ’ըսէ. «Ամէն առտու ծառայութեան երթալէ առաջ, Եհովայի կ’աղօթեմ որ ինծի օգնէ Աստուածաշունչի ուսումնասիրութեամբ հետաքրքրուած անհատ մը գտնելու»։ Օր մը ան ուսումնասիրութեան մը համար կարգադրութիւններ ըրաւ, վարսայարդարի խանութի մը գործաւորուհիներուն հետ։ Սակայն, հետագային, միայն մէկ հոգի ուսումնասիրութեան ներկայ գտնուեցաւ։ Այս անհատը ըսաւ. «Միւսները հետաքրքրուած չեն, բայց ես՝ հետաքրքրուած եմ»։ Ամիս մը չանցած, ան ալ սկսաւ Աստուածաշունչի երկու ուսումնասիրութիւններ վարել։ Անկէ քիչ ժամանակ ետք, այս գործաւորուհին մկրտուեցաւ, եւ հետագային ռահվիրայ եղաւ։
5 Գործը կը Կատարուի. Բարի լուրը կը քարոզուի, ճիշդ ինչպէս որ Յիսուս նախագուշակած էր։ (Մատթ. 24։14) Նոյնիսկ հոն՝ ուր մարդիկ ‘չեն ուզեր մեզի մտիկ ընել’, քարոզչութեան գործունէութեան միջոցաւ իրենց ազդարարութիւն կը տրուի։ Կ’ակնկալենք որ ոմանք ճշմարտութեան չընդառաջեն, կամ նոյնիսկ անոր հակառակին։ Սակայն, տեղին է որ այսպիսիներուն, Եհովայի գալիք դատաստանին մասին ազդարարութիւն տրուի։—Եզեկ. 2։4, 5. 3։7, 8, 19
6 Տակաւին Չվերջացուցինք. Մեզի չի վերաբերիր որոշել թէ քարոզչութիւնը ե՛րբ պիտի դադրի։ Եհովա ճշգրտօրէն գիտէ թէ անիկա ե՛րբ պէտք է վերջանայ։ Ան գիտէ եթէ մեր թաղամասին մէջ տակաւին կան մարդիկ, որոնք կրնան բարի լուրին ընդառաջել։ Ներկայիս, ոմանք կ’ըսեն թէ հետաքրքրուած չեն, սակայն իրենց կեանքին մէջ արմատական փոփոխութիւններ, ինչպէս՝ գործի կորուստը, լուրջ հիւանդութիւնը, սիրելիի մը մահը, կրնան պատճառ ըլլալ որ յաջորդ անգամ դրական ըլլան։ Կանխադատողութեան պատճառաւ կամ չափազանց զբաղած ըլլալով, շատեր իրապէս չեն լսած ինչ որ կը քարոզենք։ Կրկին անգամ բարեկամական այցելութիւններ ընելը կրնայ պատճառ ըլլալ որ անոնք ուշադրութիւն դարձնեն ու մտիկ ընեն։
7 Անոնք որոնք այս վերջին տարիներուն մեծցած եւ այժմ ընտանիքի տէր դարձած են, սկսած են կեանքը աւելի լուրջի առնել եւ հարցումներ կը հարցնեն, որոնց միա՛յն Աստուծոյ Խօսքը կրնայ պատասխանել։ Երիտասարդ մայր մը երկու Վկաներ իր տունը ընդունեց եւ ըսաւ. «Երբ փոքր աղջիկ մըն էի, երբեք չէի կրնար հասկնալ թէ մայրս ինչո՛ւ Վկաները կը մերժէր եւ անոնց կ’ըսէր որ հետաքրքրուած չէր, մինչ անոնք պարզապէս կ’ուզէին Աստուածաշունչին մասին խօսիլ։ Որոշեցի որ երբ մեծնամ, ամուսնանամ եւ առանձին տուն մը ունենամ, պիտի խնդրեմ Եհովայի Վկաներէն որ ներս մտնեն եւ ինծի Աստուածաշունչը բացատրեն»։ Եւ այսպէս ալ ըրաւ, ինչ որ շատ ուրախացուց իրեն այցելող Վկաները։
8 Կրնա՞ք Աւելի Ազդու Ըլլալ. Միշտ ալ պատճառը մեր այցելած անհատները չեն, որ թաղամասը յաճախակի աշխատիլը կը թուի դժուար ըլլալ։ Երբեմն խնդրոյ առարկան մե՛նք ենք։ Արդեօք բացասական գաղափարներո՞վ կը սկսինք թաղամասը աշխատիլ։ Ասիկա կրնայ ազդել մեր կեցուածքին եւ հաւանաբար մեր ձայնի թոնին ու դէմքի արտայայտութեան։ Դրական հոգի մը եւ հաճելի դէմքի արտայայտութիւն ցուցաբերեցէք։ Թարմ կամ նոր մօտեցում մը փորձեցէք։ Ձեր ներկայացումը այլազան դարձուցէք եւ ջանացէք զայն բարելաւել։ Թերեւս կարենաք ձեր բացման հարցումը փոխել, կամ խօսակցութեան մէջ տարբեր համար մը մտցնել։ Եղբայրներու ու քոյրերու հարցուցէք թէ ի՛նչ բանի մէջ յաջողութիւն գտած են թաղամասին մէջ աշխատելու ատեն։ Ծառայութեան մէջ զանազան հրատարակիչներու եւ ռահվիրաներու հետ աշխատեցէք, եւ նկատի առէք թէ ի՛նչ բան անոնց ծառայութիւնը ազդու կը դարձնէ։
9 Թագաւորութեան քարոզչութիւնը Եհովայի հաճութիւնը եւ օրհնութիւնը կը վայելէ, եւ անոր մէջ մեր մասնակցութիւնը, իրեն ու մեր դրացիներուն հանդէպ մեր սէրը կ’ապացուցանէ։ (Մատթ. 22։37-39) Ուստի, թող որ մեր գործը ամբողջացնենք, եւ թաղամասը կրկին անգամ աշխատելէ չյոգնինք։