Խուսափեցէք «Դատարկ» Բաներ Հետապնդելէ

¹ Ներկայիս հաղորդակցութեան ժողովրդական մէկ ձեւն է՝ Ե–նամակը։ Թէեւ այս միջոցաւ ընտանիքի անդամներու եւ բարեկամներու միջեւ անձնական փորձառութիւններ ու գաղափարներ բաժնելը կրնայ պատշաճ ըլլալ, սակայն, Ե–նամակի անսանձ գործածութիւնը ի՞նչ «դատարկ» բաներու հետ կրնայ առնչուիլ։—Առ. 12։11

² Ե–Նամակի Վերաբերեալ Զգուշացումներ. Ոմանք կը դաւանին թէ Եհովայի կազմակերպութեան հետ աւելի մօտէն շփման մէջ կու գան, երբ Ե–նամակով այդպէս կոչուած թարմ տեղեկութիւններ կը ստանան։ Ասոնք կրնան պարփակել փորձառութիւններ, Պէթէլի մէջ տեղի ունեցած իրադարձութիւններուն մասին նոթեր, աղէտներու կամ հալածանքի մասին տեղեկագրութիւններ, եւ նոյնիսկ Թագաւորութեան Ծառայութեան Դպրոցին մէջ եղած յայտարարութիւններ։ Ուրիշներ չափազանց անհամբեր կը թուին ըլլալ այսպիսի պատգամներ ղրկելու մէջ, յուսալով այս տեղեկութիւնները իրենց բարեկամներուն յայտնող առաջին անհատը ըլլալ։

³ Երբեմն, տեղեկութիւններ եւ փորձառութիւններ խեղաթիւրուած կամ չափազանցուած են։ Կամ թերեւս ջանալով զգայացունց ըլլալ, ոմանք սխալ տպաւորութիւն մը փոխանցած են։ Այսպիսի տեղեկութիւններ յայտնելու արտորացող անհատները, յաճախ բոլոր իրողութիւնները չունին։ (Առ. 29։20) Կարգ մը պարագաներու, նոյնիսկ երբ պատմութիւն մը անհաւատալի է, ուրիշներու կը փոխանցուի որպէս հետաքրքրաշարժ նիւթ մը։ Այսպիսի անճշգրիտ կամ մոլորեցուցիչ տեղեկագրութիւններ «առասպելներ»ու հաւասար են, որոնք հարազատ աստուածպաշտութիւն չեն քաջալերել։—Ա. Տիմ. 4։6, 7

⁴ Եթէ փոխանցէք տեղեկութիւն մը որ ետքը փաստուի անճշգրիտ ըլլալ, անոր պատճառած վշտին կամ շփոթութեան համար որոշ պատասխանատուութիւն կը կրէք։ Երբ Դաւիթ չափազանցուած տեղեկագրութիւն մը ստացաւ թէ իր բոլոր որդիները սպաննուած էին, ան նեղանալով «իր հանդերձները պատռեց»։ Սակայն, իրականութեան մէջ, միայն մէկ որդին մեռած էր։ Ասիկա ինքնին բաւական նեղացուցիչ էր, սակայն այդ չափազանցութիւնը Դաւիթի տառապանքը աւելցուց։ (Բ. Թագ. 13։30-33) Վստահաբար, պիտի չուզէինք ընել որեւէ բան, որ մեր եղբայրներէն ոեւէ մէկը պիտի մոլորեցնէր կամ վհատեցնէր։

⁵ Աստուծոյ Նշանակած Խողովակը. Ի մտի ունեցէք թէ մեր երկնաւոր Հայրը հաղորդակցութեան նշանակուած խողովակ մը ունի՝ «հաւատարիմ ու իմաստուն ծառան»։ Այդ «ծառան» պատասխանատուութիւնը ունի որոշելու թէ ո՛ր տեղեկութիւնները մատչելի ըլլան հաւատքի ընտանիներուն, ինչպէս նաեւ՝ զայն մատակարարելու պատշաճ ‘ատեն’ը։ Այս հոգեւոր սնունդը մատչելի է միայն աստուածպետական կազմակերպութեան միջոցաւ։ Վստահելի տեղեկութիւններու համար, պէտք է միշտ Աստուծոյ նշանակած խողովակին դիմենք, եւ ո՛չ թէ Համացանցը գործածողներուն։—Մատթ. 24։45

⁶ Համացանցի Կայքեր. Մենք Համացանցի պաշտօնական կայք մը ունինք՝ www.watchtower.org։ Այս կայքը հանրութեան տեղեկութիւններ մատչելի դարձնելու համար բաւարար է։ Հարկ չկայ որ ոեւէ անհատ, յանձնախումբ կամ ժողովք Եհովայի Վկաներու մասին Ուէպի էջ մը պատրաստէ։ Ոմանք ցուցադրած են մեր գրականութիւններուն բովանդակութիւնը, բոլոր համարներով եւ լման վերագրումներով, եւ նոյնիսկ նահանգային համաժողովի նիւթեր ներկայացուցած են, նուիրատուութեան մը փոխարէն։ Նիւթական շահ կայ թէ ոչ, Դիտարանի հրատարակութիւնները ելեկտրոնական կերպով վերարտադրելն ու բաշխելը իրաւասութեան օրէնքներու բեկանում է։ Թէեւ ոմանք ասիկա եղբայրներուն ի նպաստ եղած ծառայութիւն մը կը նկատեն, սակայն անիկա ընդունելի չէ եւ պէտք է դադրի։

⁷ Ելեկտրոնական հաղորդակցութիւնը գործածելու ատեն լաւ դատողութիւն եւ զգաստութիւն ի գործ դնելը, մեր մտքերը «պատուական ու վայելուչ գանձերով» պիտի լեցնէ։—Առ. 24։4