Կամաւոր հոգին օրհնութիւններ կը բերէ
1. Դաւիթ ու Նէեմիա ի՞նչպէս կամաւոր հոգի ցուցաբերեցին։
1 Երբ Գողիաթ Իսրայէլի բանակը նախատեց, ոեւէ զինուոր կրնար իրեն հետ կռուիլ։ Բայց միայն պատանի հովիւ մը կամաւորաբար ներկայացաւ, որ զինուորական մարզում չէր ստացած։ (Ա. Թագ. 17։32) Երբ Երուսաղէմ վերադարձող աքսորեալ Հրեաները չվերակառուցանեցին քաղաքին պարիսպները, Պարսիկներու թագաւորին մատռուակն էր որ յօժարեցաւ պալատին մէջ իր վայելած դիրքը ձգել ու Երուսաղէմ երթալ՝ գործը կազմակերպելու համար։ (Նէեմ. 2։5) Եհովա այս երկու տղամարդիկը՝ Դաւիթն ու Նէեմիան օրհնեց, իրենց ցուցաբերած հոգիին համար։—Ա. Թագ. 17։45, 50. Նէեմ. 6։15, 16
2. Քրիստոնեաները ինչո՞ւ կամաւոր հոգի պէտք է ցուցաբերեն։
2 Ներկայիս, աշխարհի մէջ կամաւոր հոգին հազուագիւտ է։ Այս «վերջին օրեր»ուն մէջ մարդիկ բազմազբաղ են, իսկ շատեր՝ «անձնասէր»։ (Բ. Տիմ. 3։1, 2) Դիւրին է որ անհատ մը անձնական հետաքրքրութիւններով ա՛յնքան կլանուի, որ իր ծառայութիւնները մատուցանելու պատեհութիւնները անտեսէ, երբ ուրիշներուն օգնելու կարիք ըլլայ։ Սակայն Քրիստոնեաներ ըլլալով, կը փափաքինք Յիսուսը ընդօրինակել, որ ուրիշներուն օգնելու նախաձեռնութիւնը կ’առնէր։ (Յովհ. 5։5-9. 13։12-15. Ա. Պետ. 2։21) Ի՞նչպէս կրնանք կամաւոր հոգի ցուցաբերել եւ ի՞նչ օրհնութիւններ պիտի ստանանք։
3. Կամաւոր հոգին ժողովքային հանդիպումներուն ի՞նչպէս կը նպաստէ։
3 Մեր եղբայրներուն ի նպաստ. Կրնանք ուրիշներուն «հոգեւոր շնորհք» հաղորդել, յօժարակամ մեկնաբանութիւններ տալով՝ երբ ժողովի բաժինը կը պահանջէ ներկաներուն մասնակցութիւնը։ (Հռովմ. 1։11) Մեկնաբանելը Եհովան կը պատուէ, ճշմարտութիւնը մեր մտքին ու սրտին մէջ աւելի կը դրոշմէ եւ ժողովը աւելի հաճոյալի կը դարձնէ։ (Սաղմ. 26։12) Կրնանք նաեւ Աստուածպետական Ծառայութեան Դպրոցին մէջ կամաւորաբար բաժին մը ներկայացնել, երբ փոխանորդի մը հարկ ըլլայ։ Ասիկա մեր ուսուցանելու կարողութիւնը բարելաւելու պիտի նպաստէ։
4. Ուրիշ ի՞նչ կերպերով կրնանք կամաւոր հոգի ցուցաբերել։
4 Եղբայրները կրնան կամաւոր հոգին ցուցաբերել՝ ժողովքային պատասխանատուութիւններու ձգտելով։ (Եսայ. 32։2. Ա. Տիմ. 3։1) Բոլորս կրնանք օգնել որ համաժողովները լաւ ընթանան, զանազան բաժանմունքներու մէջ որպէս կամաւորներ ծառայելով։ Երբ կամաւորաբար ճամբորդող տեսուչին հետ ծառայութեան կը մասնակցինք կամ զինք ճաշի կը հրաւիրենք, ‘զիրար կը քաջալերենք’։ (Հռովմ. 1։12, Անթիլիաս) Երբ գործնական կերպով օգնենք որբ երախաներու, այրիներու, հիւանդներու եւ անկարողներու, մանուկներ ունեցող մայրերու, եւ ժողովքի այլ անդամներու, ուրախ կ’ըլլանք եւ Եհովայի հաճութիւնը կը վայելենք։—Առ. 19։17. Գործք 20։35
5. Թագաւորութեան Սրահին վերաբերեալ ի՞նչ բաներ կամաւորներ կը պահանջեն։
5 Նաեւ կրնանք մեր ժամանակն ու կորովը յօժարակամ գործածել՝ Թագաւորութեան Սրահը մաքրելու եւ զայն լաւ վիճակի մէջ պահելու համար։ Ասկէ զատ, քանի որ բազմաթիւ անհատներ ճշմարտութեան կու գան, նոր Թագաւորութեան Սրահներու եւ զանոնք կառուցանող կամաւորներու հրատապ կարիք կայ։ Ամոլ մը որոշեց տեղական Շրջանային Շինարարական Յանձնախումբին ձեռք տալ, թէեւ շինարարական մարզին մէջ անփորձ էր։ Ժամանակի ընթացքին, ամոլը մարզուեցաւ եւ այժմ աղիւս շարելու մէջ իր մասնակցութիւնը կը բերէ։ Կինը նշեց. «Ուրիշներուն հետ ուս–ուսի աշխատելով՝ շատ սերտ բարեկամութիւններ հաստատեցինք։ Իւրաքանչիւր օրուան վերջաւորութեան, ֆիզիքապէս յոգնած կ’ըլլանք, բայց՝ հոգեւորապէս թարմացած»։
6. Ինչո՞ւ քարոզչութիւնը ամենակարեւոր կամաւոր աշխատանքն է։
6 Քարոզելով. Թագաւորութեան քարոզչութիւնը ներկայիս ամենակարեւոր կամաւոր աշխատանքն է որ կրնանք կատարել։ Մարդոց օգնելով որ Աստուածաշունչի խրատները հասկնան ու կիրարկեն, անոնք կեանքի մէջ նպատակ կ’ունենան եւ վնասակար սովորութիւնները յաղթահարելու զօրութիւն ձեռք կը ձգեն։ Անոնք ապագայի նկատմամբ Աստուածաշունչի մատուցած ոգեւորիչ յոյսը կը սորվին։ Աստուածաշնչական կրթութիւն հայթայթելով, կամաւորներու բերկրալի ծառայութիւն կը կատարենք, որ մնայուն օգուտներ կը բերէ։ (Յովհ. 17։3. Ա. Տիմ. 4։16) Թերեւս մեր պարագաները թոյլատրեն որ այս գործին աւելի մասնակցինք՝ օժանդակ կամ կանոնաւոր ռահվիրայութիւն ընելով, փոխադրուելով հո՛ն ուր կարիքը աւելի մեծ է, կամ օտար լեզու մը սորվելով։
7. Ներկայիս ինչո՞ւ կամաւոր ըլլալը յատկապէս կարեւոր է։
7 Դաւիթ թագաւոր մարգարէացաւ որ երբ Մեսիան իր իշխանութիւնը սկսէր, Աստուծոյ ժողովուրդը ‘յօժարակամ պիտի ըլլար’։ (Սաղմ. 110։3) Մինչ Եհովա վերջին հոգեւոր հունձքը կ’արագացնէ, կամաւորներուն համար շատ գործ կայ։ (Եսայ. 60։22) Արդեօք ըսա՞ծ ես. «Ահաւասիկ ես. զի՛ս ղրկէ»։ (Եսայ. 6։8) Արդարեւ, կամաւոր հոգի ցուցաբերելով՝ Եհովան կը հաճեցնենք եւ ճոխ վարձատրութիւններ կը հնձենք։