Աստուծոյ ծառաները—Կազմակերպուած եւ ուրախ ժողովուրդ մը
«Երանի՜ այն ժողովուրդին՝ որուն Աստուածը Եհովան է»։—ՍԱՂՄՈՍ 144։15
1, 2. (ա) Եհովա ինչո՞ւ իր ծառաներուն չափանիշներ սահմանելու իրաւունքը ունի։ (բ) Եհովայի յատկանիշներէն երկուքը ի՞նչ են, զորս մենք մասնաւորաբար պէտք է ուզենք ընդօրինակել։
ԵՀՈՎԱ Տիեզերքի Գերիշխանը, ամենակալ Աստուածը, Ստեղծիչն է։ (Ծննդոց 1։1. Սաղմոս 100։3) Այս հանգամանքով, ան իր ծառաներուն իրաւացիօրէն կը սահմանէ վարքի չափանիշներ, գիտնալով որ ի՛նչը լաւագոյնն է անոնց համար։ (Սաղմոս 143։8) Ան անոնց Գլխաւոր Տիպարն է, որու յատկութիւնները պէտք է ընդօրինակեն անոնք։ «Աստուծոյ նմանող եղէք սիրելի զաւակներու պէս», գրեց առաքեալ մը։—Եփեսացիս 5։1
2 Աստուծոյ մէկ յատկանիշը զոր մենք պէտք է ընդօրինակենք կապ ունի կազմակերպութեան հետ։ Ան «անկարգութեան Աստուած չէ»։ (Ա. Կորնթացիս 14։33, ՆԱ) Երբ ուշադրութեամբ զննենք ինչ որ Աստուած ստեղծած է, այն եզրակացութեան կը յանգինք թէ ան տիեզերքի ամենէն կազմակերպուած Անձնաւորութիւնն է։ Սակայն, Աստուծոյ ուրիշ մէկ յատկանիշը, զոր ան կ’ուզէ որ իր ծառաները ընդօրինակեն, իր ուրախութիւնն է, քանի որ ան «ուրախ Աստուած»ն է։ (Ա. Տիմոթէոս 1։11, ՆԱ) Ուստի, անոր կազմակերպչական կարողութիւնը հաւասարակշռուած է ուրախութեան հետ։ Մէկը միւսին հաշւոյն չէ գերադասուած։
3. Աստղազարդ երկինքը ինչպէ՞ս կ’ապացուցանէ Աստուծոյ կազմակերպելու կարողութիւնը։
3 Ամէն ինչ որ Եհովա ըրած է, ամենամեծէն մինչեւ ամենափոքրը, կ’ապացուցանէ թէ ան կազմակերպութեան Աստուած է։ Նկատի առնենք, զոր օրինակ, տեսանելի տիեզերքը։ Անոր մէջ կան եռիլիոնաւոր աստղեր։ Բայց ասոնք պատահաբար չեն ցրուած։ Աստղաբնագէտ Ճորճ Կրինշդայն դիտել կու տայ թէ «աստղերու կազմակերպութեան համար ծրագիր մը» կայ։ Անոնք կազմակերպուած են որպէս խումբեր որոնք հոյախումբեր կը կոչուին, ոմանք հարիւր միլիառաւոր աստղեր պարունակելով։ Իսկ գնահատուած է որ միլիառաւոր հոյախումբեր կան։ Հոյախումբերն ալ կազմակերպուած են, անոնցմէ ոմանք (մի քանի հատէն մինչեւ բազմաթիւ հազարաւորներ) միասին խմբուած են որպէս աստղահոյլեր։ Իսկ կը կարծուի որ աստղահոյլերը, իրենց կարգին, կազմակերպուած են աւելի ընդարձակ միաւորներու որոնք կը կոչուին գերաստղահոյլեր։—Սաղմոս 19։1. Եսայեայ 40։25, 26
4, 5. Կազմակերպութեան մասին օրինակներ տուէք երկրի վրայ ապրող բաներուն մէջ։
4 Աստուծոյ ստեղծագործութիւններուն գերազանց կազմակերպութիւնը ամէնուրեք կը տեսնուի, ո՛չ միայն տեսանելի երկնքին մէջ, այլ նաեւ՝ երկրի վրայ անոր բիւրաւոր ապրող բաներով։ Այս բոլորին առնչութեամբ, բնագիտութեան ուսուցչապետ Փօլ Տէյվիս գրեց թէ «ֆիզիքական աշխարհին վեհութիւնը եւ բարդ կազմակերպութիւնը» ‘ահաբեկած’ են դիտողները։—Սաղմոս 104։24
5 Նկատի առնենք «բարդ կազմակերպութեան» քանի մը օրինակներ որոնք կը գտնուին ապրող բաներուն մէջ։ Ջիղերու վիրաբուժ Ժոզէֆ Իվանս մարդկային ուղեղին եւ ողնածուծին մասին ըսաւ. «Մեծ կարգապահութեան իրողութիւնը գրեթէ ջախջախիչ է»։ Մանրադիտական ապրող բջիջին մասին, մանրէաբան Հ. Ժ. Շօնէսի նշեց. «Մանրակենսաբանական աշխարհի բարդութիւնը եւ սքանչելի կարգապահութիւնը այնքա՛ն հիանալի կերպով յղացուած են որ անիկա աստուածային կերպով հաստատուած դրութեան մը մէկ մասը կը թուի ըլլալ»։ Իսկ մասնկային կենսաբան Մայքըլ Տենթըն բջիջի մը մէջ եղող ծննդական ծածկագրին [DNA] մասին ըսաւ. «Անիկա այնքա՛ն ազդու է որ ամբողջ տեղեկութիւնը ... որ անհրաժեշտ է երկրագունդին վրայ գոյութիւն ունեցած մարմիններու բոլոր տեսակներուն ուրուագիծը յատկորոշելու ... կարելի է տեղաւորել թէյի դգալի մը մէջ եւ տակաւին տեղ պիտի մնար ցարդ գրուած բոլոր գրքերուն մէջ տեղեկութիւնները աւելցնելու համար»։—Տես Սաղմոս 139։16–ը։
6, 7. Հոգեղէն արարածներուն մէջ ի՞նչպիսի կազմակերպութիւն ցոյց տրուած է, եւ անոնք իրենց Արարիչին հանդէպ ինչպէ՞ս երախտապարտութիւն կ’արտայայտեն։
6 Եհովա ո՛չ միայն իր նիւթական ստեղծագործութիւնները կը կազմակերպէ, այլ երկնքի մէջ գտնուող իր հոգեղէն ստեղծագործութիւններն ալ։ Դանիէլ 7։10–ն մեզ կը տեղեկացնէ թէ ‘բիւրաւոր [հրեշտակներ] Եհովայի առջեւ կը կայնին’։ Հարիւր միլիոն հոգեղէն հզօր արարածներ պատրաստ կեցած են իրենց նշանակուած պատշաճ գործը կատարելու համար։ Կ’ապշինք երբ մտածենք թէ այսպիսի հսկայ խումբ մը կազմակերպելը որքա՜ն հմտութիւն պահանջելու է։ Տեղին ըլլալով, Աստուածաշունչը կը նշէ. «Օրհնեցէ՛ք Տէրը, ո՛վ հրեշտակներ, որ ուժով զօրաւոր էք, որ անոր խօսքին ձայնը լսելով՝ իր հրամանը կը կատարէք։ Օրհնեցէ՛ք Տէրը, ո՛վ անոր բոլոր [հրեշտակային] զօրքեր, անոր կամքը կատարող պաշտօնեաներ»։—Սաղմոս 103։20, 21. Յայտնութիւն 5։11
7 Ստեղծիչին գործերը որքա՜ն հոյակապ կերպով կազմակերպուած ու ազդու են։ Զարմանալի չէ որ երկնային ծիրին մէջ հոգեղէն հզօր արարածներ ակնածութեամբ եւ հնազանդութեամբ կը յայտարարեն. «Արժանի ես, Տէ՛ր, փառք ու պատիւ եւ զօրութիւն առնելու, վասնզի ամէն բան դուն ստեղծեցիր եւ քու կամքովդ եղան ու ստեղծուեցան»։—Յայտնութիւն 4։10
8. Ի՞նչ օրինակներ ցոյց կու տան թէ Եհովա երկրի վրայ իր ծառաները կը կազմակերպէ։
8 Եհովա երկրի վրայ ալ իր ծառաները կը կազմակերպէ։ Հ.Դ.Ա. 2370–ին, երբ ան Նոյի օրուան Ջրհեղեղը բերաւ, Նոյ եւ ուրիշ եօթը անհատներ Ջրհեղեղէն վերապրեցան որպէս կազմակերպուած ընտանիք մը։ Հ.Դ.Ա. 1513–ին, Ելքի ատեն, Եհովա մի քանի միլիոնի հասած իր ժողովուրդը Եգիպտական ստրկութենէն դուրս բերաւ եւ օրէնքներու մանրամասն կանոն մը տուաւ անոնց ամենօրեայ գործառնութիւններն ու պաշտամունքը կազմակերպելու համար։ Իսկ հետագային, Աւետեաց Երկրին մէջ, անոնցմէ տասնեակ հազարաւորներ տաճարին մասնայատուկ ծառայութեանը համար կազմակերպուեցան։ (Ա. Մնացորդաց 23։4, 5) Առաջին դարուն, Քրիստոնէական ժողովքները աստուածային առաջնորդութեան ներքեւ կազմակերպուած էին. «Ինք մէկ քանին տուաւ առաքեալներ ըլլալու, մէկ քանին՝ մարգարէներ, մէկ քանին՝ աւետարանիչներ, մէկ քանին՝ հովիւներ ու վարդապետներ. սուրբերուն կատարելութեանը համար, պաշտօնին գործին համար»։—Եփեսացիս 4։11, 12
Այժմու Ծառաներն Ալ Կազմակերպուած Են
9, 10. Ներկայիս Եհովա իր ժողովուրդը ինչպէ՞ս կազմակերպած է։
9 Եհովա իր այժմու ծառաներն ալ կազմակերպած է, որպէսզի անոնք կարենան իր գործը ազդու կերպով կատարել մեր օրերուն, այսինքն, իր Թագաւորութեան բարի լուրը քարոզել իրերու ներկայ ամբարիշտ դրութեան վերջ մը դնելէ առաջ։ (Մատթէոս 24։14) Նկատի առէք թէ այս երկրածաւալ գործունէութեան մէջ ի՛նչ պարփակուած է եւ թէ լաւ կազմակերպուած ըլլալը որքա՛ն կարեւոր է։ Միլիոնաւոր այրեր, կիներ եւ երախաներ կը մարզուին, որպէսզի Աստուածաշունչի ճշմարտութիւնները ուրիշներու սորվեցնեն։ Այս մարզումին օժանդակելու համար, Աստուածաշունչեր եւ Աստուածաշունչի վրայ հիմնուած մեծ քանակութեամբ գրականութիւններ կը տպուին։ Այժմ Դիտարանի իւրաքանչիւր թիւի տպաքանակը աւելի քան 16 միլիոն է 120 լեզուներով, իսկ Զարթի՛րի տպաքանակը՝ շուրջ 13 միլիոն 75 լեզուներով։ Գրեթէ բոլոր թիւերը միեւնոյն ատեն կը հրատարակուին, այնպէս որ Եհովայի ծառաներուն մեծամասնութիւնը նոյն տեղեկութիւնը կը ստանայ միաժամանակ։
10 Ասկէ զատ, համայն աշխարհի մէջ Եհովայի Վկաներու աւելի քան 73,000 ժողովքներ կազմակերպուած են, որպէսզի անոնք կանոնաւորաբար հաւաքուին Աստուածաշունչի դաստիարակութիւն ստանալու համար։ (Եբրայեցիս 10։24, 25) Նաեւ, ամէն տարի հազարաւոր աւելի մեծ ժողովներ տեղի կ’ունենան. շրջանային համաժողովներ եւ նահանգային համագումարներ։ Համայն աշխարհի մէջ մեծ թափով նոր կամ վերանորոգուած Թագաւորութեան Սրահներ, Համաժողովի Սրահներ, Պէթէլի տուներ եւ սուրբ գրային գրականութիւններ տպելու համար գործարաններ կը շինուին։ Աստուածաշունչի ուսուցիչներու աւելի յառաջացած մարզում տալու համար դպրոցներ կան, ինչպէս Դիտարանի Սուրբ Գրոց Գաղաադու Դպրոցը՝ միսիոնարներու համար եւ Ռահվիրաներու Դպրոցը, որոնք աշխարհի զանազան երկիրներու մէջ կը դասաւանդուին։
11. Հիմա լաւ կազմակերպուած ըլլալով, ապագայ ի՞նչ օգուտ պիտի քաղուի։
11 Եհովա որքա՜ն լաւ կերպով կազմակերպած է երկրի վրայ գտնուող իր ժողովուրդը, որպէսզի անոնք ‘իրենց ծառայութիւնը լիովին կատաարեն’, իր սպասարկող հրեշտակներէն օգնութիւն ստանալով։ (Բ. Տիմոթէոս 4։5, ՆԱ. Եբրայեցիս 1։13, 14. Յայտնութիւն 14։6) Լաւ կազմակերպուած ըլլալու կերպերուն առնչութեամբ իր ծառաները այժմ դաստիարակելով, Աստուած ուրիշ բան մըն ալ կ’իրագործէ։ Իր ծառաները լաւ կերպով կը պատրաստուին, որպէսզի երբ իրերու այս դրութեան վախճանէն վերապրին, նոր աշխարհին մէջ կեանքը սկսելու արդէն կազմակերպուած ըլլան։ Ապա, Եհովայի առաջնորդութեան ներքեւ կազմակերպուած կերպով մը, անոնք պիտի սկսին երկրածաւալ Դրախտը կառուցանել։ Անոնք նաեւ լաւ պատրաստուած պիտի ըլլան միլիառաւոր մարդոց, որոնք պիտի յարուցանուին, կեանքի համար Աստուծոյ մանրամասն պահանջները ուսուցանելու։—Եսայեայ 11։9. 54։13. Գործք 24։15. Յայտնութիւն 20։12, 13
Կազմակերպուած, Բայց Ուրախ
12, 13. Ինչո՞ւ կրնանք ըսել թէ Եհովա կ’ուզէ որ իր ժողովուրդը ուրախ ըլլայ։
12 Թէեւ Եհովա սքանչելի աշխատող եւ գերազանց կազմակերպող մըն է, սակայն ան պաղ, անթեք կամ մեքենական չէ։ Ընդհակառակը, ան շատ ջերմ, ուրախ Անձնաւորութիւն մըն է, որ մեր ուրախութիւնով կը հետաքրքրուի։ «Անիկա ձեզի համար կը հոգայ», կը յայտարարէ Ա. Պետրոս 5։7–ն։ Կրնանք իր հոգատարութիւնը եւ իր ծառաներուն ուրախութիւն փափաքիլը նկատել մարդոց համար իր ըրած բաներէն։ Օրինակի համար, երբ կատարեալ մարդն ու կինը ստեղծեց, Աստուած զանոնք հաճոյքի դրախտի մը մէջ դրաւ։ (Ծննդոց 1։26-31. Ծննդոց 2։8, 9) Զանոնք գերազանցօրէն ուրախ պահելու համար, ան ամէն բան տուաւ անոնց։ Բայց անոնք այդ բոլորը կորսնցուցին ըմբոստութեան պատճառաւ։ Անոնց մեղքին առ ի հետեւանք, անկատարութիւն ու մահ ժառանգեցինք։—Հռովմայեցիս 3։23. 5։12
13 Թէեւ այժմ անկատար ենք, տակաւին կրնանք ուրախութիւն գտնել Աստուծոյ ըրած բաներուն մէջ։ Շատ բաներ կան, որոնք մեզի հաճոյք կը պատճառեն—վեհաշուք լեռներ. գեղեցիկ լիճեր, գետեր, ովկիանոսներ եւ ծովեզերքներ. գունաւոր եւ բուրումնաւէտ ծաղիկներ եւ ուրիշ պէսպիսի բուսականութիւններ. համադամ կերակուրներու առատութիւն. հանդիսավայել արեւնամուտեր, որոնց դիտելէն բնաւ չենք ձանձրանար. աստղազարդ երկինքը զոր գիշերը հաճոյքով կը զննենք. անասնական ստեղծագործութիւնը իր հսկայ այլազանութեամբ եւ անոնց գրաւիչ ձագերը իրենց զուարթ շարժումներով. ոգեւորիչ երաժշտութիւն. հետաքրքրական ու պիտանի գործ. լաւ բարեկամներ։ Բացայայտ է որ Ան, որ այսպիսի բաներ կարգադրեց, ուրախ անձ մըն է, որ ուրիշները ուրախացնելէն հաճոյք կ’առնէ։
14. Զինք ընդօրինակելու մէջ Եհովա ի՞նչ հաւասարակշռութիւն կը պահանջէ մեզմէ։
14 Արդ, Եհովայի ուզածը միայն կազմակերպուած արդիւնաբերութիւն չէ։ Ան նաեւ կ’ուզէ որ իր ծառաները ուրախ ըլլան, ինչպէս որ ինք ուրախ է։ Ան չ’ուզեր որ անոնք մոլեռանդօրէն իրերը կազմակերպեն իրենց ուրախութիւնը կորսնցնելու գնով։ Աստուծոյ ծառաները կազմակերպչական հմտութիւնները պէտք է հաւասարակշռեն ուրախութեան հետ, ինչպէս Ան կ’ընէ, քանի որ ուր որ իր հզօր սուրբ հոգին կայ, հոն ուրախութիւն կայ։ Արդարեւ, Գաղատացիս 5։22–ը ցոյց կու տայ որ Աստուծոյ ժողովուրդին մէջ ներգործող Իր սուրբ հոգիին երկրորդ պտուղը «խնդութիւն»ն է։
Սէրը Ուրախութիւն Յառաջ կը Բերէ
15. Սէրը ինչո՞ւ շատ կարեւոր է մեր ուրախութեանը համար։
15 Մեծ հետաքրքրութեամբ կը նկատենք որ Աստուածաշունչը կը նշէ թէ «Աստուած սէր է»։ (Ա. Յովհաննու 4։8, 16) Անիկա բնաւ չ’ըսեր. «Աստուած կազմակերպութիւն է»։ Սէրը Աստուծոյ գլխաւոր յատկութիւնն է եւ իր ծառաները պէտք է ընդօրինակեն զայն։ Այս պատճառով է որ Գաղատացիս 5։22–ին մէջ արձանագրուած Աստուծոյ հոգիին առաջին պտուղը «սէր»ն է, իսկ յաջորդը՝ «խնդութիւն»ը։ Սէրը ուրախութիւն յառաջ կը բերէ։ Երբ ուրիշներու հետ մեր գործառնութիւններուն մէջ Եհովայի սէրը ընդօրինակենք, ուրախութիւն կը յառաջանայ, քանի որ սիրալիր անհատները ուրախ անհատներ են։
16. Յիսուս ինչպէ՞ս սիրոյ կարեւորութիւնը ցոյց տուաւ։
16 Յիսուս աստուածային սէրը ընդօրինակելու կարեւորութիւնը ցցուն ըրաւ իր ուսուցումով։ Ան ըսաւ. «Հայրս ինչպէս ինծի սորվեցուց՝ այնպէս կը խօսիմ»։ (Յովհաննու 8։28) Յատկապէս Յիսուս ի՞նչ սորվեցաւ եւ, իր կարգին, ուրիշներուն սորվեցուց։ Երկու մեծագոյն պատուէրները, որոնք են՝ Աստուած սիրել եւ ընկերը սիրել։ (Մատթէոս 22։36-39) Յիսուս այսպիսի սիրոյ մէջ օրինակ հանդիսացաւ։ Ան ըսաւ. «Ես Հայրը կը սիրեմ». ան փաստեց ասիկա ցմահ Աստուծոյ կամքը կատարելով։ Իսկ ան մարդոց հանդէպ իր սէրը ապացուցանեց անոնց համար մեռնելով։ Պօղոս առաքեալ Եփեսոսի Քրիստոնեաներուն ըսաւ. ‘Քրիստոս ձեզ սիրեց ու իր անձը ձեզի համար մատնեց’։ (Յովհաննու 14։31. Եփեսացիս 5։2) Հետեւաբար, Յիսուս իր հետեւորդներուն ըսաւ. «Այս է իմ պատուէրս, որ մէկզմէկ սիրէք, ինչպէս ես ձեզ սիրեցի»։—Յովհաննու 15։12, 13
17. Պօղոս ինչպէ՞ս ցոյց տուաւ թէ ուրիշներու հանդէպ սէր արտայայտելը կենսական է։
17 Պօղոս արտայայտեց թէ այս աստուածային սէրը որքա՜ն կենսական է, հետեւեալը ըսելով. «Եթէ մարդոց ու հրեշտակներուն լեզուները խօսիմ եւ սէր չունենամ, ես ձայն տուող պղինձի պէս եղայ, կամ հնչող ծնծղաներու պէս։ Եւ եթէ մարգարէութիւն ունենամ ու հասկնամ ամէն խորհուրդները ու ամէն գիտութիւնը եւ եթէ ունենամ ամէն հաւատքը մինչեւ լեռները տեղափոխելու ու սէր չունենամ, ոչինչ եմ։ Եւ եթէ իմ բոլոր ստացուածքս աղքատներուն կերցնեմ ու իմ մարմինս այրուելու տամ եւ սէր չունենամ, օգուտ մը չեմ ունենար։ ... Կը մնայ՝ հաւատք, յոյս, սէր։ Այս երեքը ու ասոնց մեծագոյնը սէրն է»։—Ա. Կորնթացիս 13։1-3, 13
18. Եհովայէ ի՞նչ կրնանք ակնկալել, որ մեր ուրախութեան կը նպաստէ։
18 Երբ Եհովայի սէրը ընդօրինակենք, կրնանք մեզի հանդէպ իր սէրէն վստահ ըլլալ, նոյնիսկ երբ սխալներ գործենք, քանի որ ան «ողորմած ու բարերար, երկայնամիտ եւ առատ [է]՝ ողորմութիւնով ու ճշմարտութիւնով»։ (Ելից 34։6) Երբ սխալներ գործենք եւ եթէ անկեղծօրէն զղջանք, Աստուած զանոնք նկատի չ’առներ, այլ՝ սիրալիր կերպով կը ներէ մեզի։ (Սաղմոս 103։1-3) Այո, «Տէրը բազմագութ ու ողորմած է»։ (Յակոբու 5։11) Ասիկա գիտնալը մեր ուրախութեան կը նպաստէ։
Ներկայիս Յարաբերական Ուրախութիւն
19, 20. (ա) Ինչո՞ւ հիմա կարելի չէ կատարեալ ուրախութիւն ունենալ։ (բ) Աստուածաշունչը ինչպէ՞ս ցոյց կու տայ թէ այս ժամանակին մէջ կրնանք յարաբերական ուրախութիւն ունենալ։
19 Սակայն, կարելի՞ է ուրախ ըլլալ ներկայիս, երբ կ’ապրինք Սատանայի ներքեւ եղող ոճիրով լեցուն, վայրագ, անբարոյ այս աշխարհին վերջին օրերուն մէջ, ուր կը դիմագրաւենք հիւանդութիւն ու մահ։ Անշուշտ, հիմա չենք կրնար այն աստիճան ուրախութիւն ակնկալել, որ գոյութիւն պիտի ունենայ Աստուծոյ նոր աշխարհին մէջ, ինչպէս իր Խօսքը կը գուշակէ. «Ահա ես նոր երկինք ու նոր երկիր պիտի ստեղծեմ եւ առաջինները պիտի չյիշուին ու մարդուս միտքը պիտի չգան։ Բայց դուք իմ ստեղծագործութիւնովս յաւիտեանս յաւիտենից ուրախացէ՛ք եւ ցնծացէ՛ք»։—Եսայեայ 65։17, 18
20 Ներկայիս ինչ որ Աստուծոյ ծառաները կրնան ունենալ յարաբերական ուրախութիւն է, քանի որ անոնք իր կամքը գիտեն եւ այն հոյակապ օրհնութիւններուն մասին ճշգրիտ գիտութիւն ունին, որոնք շուտով պիտի գան իր դրախտային նոր աշխարհին մէջ։ (Յովհաննու 17։3. Յայտնութիւն 21։4) Այս պատճառով է որ Աստուածաշունչը կրնայ ըսել. «Ո՛վ զօրաց Տէր, երանելի՜ է քեզի յուսացող մարդը», «երանի՜ այն ամենուն՝ որոնք Տէրոջմէ կը վախնան ու անոր ճամբաներուն մէջ կը քալեն», «երանի՜ հեզերուն, վասնզի անոնք պիտի ժառանգեն երկիրը»։ (Սաղմոս 84։12. 128։1. Մատթէոս 5։5) Ուստի, ներկայ դժուար պարագաներուն հանդերձ, որոնց հետ ստիպուած ենք մաքառիլ, կրնանք որոշ չափով ուրախութիւն ունենալ։ Նոյնիսկ երբ գէշ բաներ պատահին մեզի, չենք տրտմիր ինչպէս ուրիշներ, որոնք Եհովան չեն ճանչնար եւ յաւիտենական կեանքի յոյսը չունին։—Ա. Թեսաղոնիկեցիս 4։13
21. Իրենց անձերէն տալը ինչպէ՞ս Եհովայի ծառաներուն ուրախութեան կը նպաստէ։
21 Եհովայի ծառաները նաեւ ուրախութիւն ունին, քանի որ իրենց ժամանակը, կորովը եւ նիւթական միջոցները կը յատկացնեն Աստուածաշունչի ճշմարտութիւնները ուրիշներուն սորվեցնելու համար, մասնաւորաբար այն անհատներուն որոնք Սատանայի աշխարհին մէջ գործուած ‘բոլոր գարշանքներուն համար կը հառաչեն ու կ’ողբան’։ (Եզեկիէլ 9։4) Աստուածաշունչը կ’ըսէ. «Երանի՜ անոր, որ աղքատին հոգ կը տանի։ Նեղութեան օրը Տէրը պիտի փրկէ զանիկա։ Տէրը պիտի պահէ ու ապրեցնէ զանիկա, երանելի պիտի ըլլայ երկրի վրայ»։ (Սաղմոս 41։1, 2) Ինչպէս Յիսուս ըսաւ. «Աւելի երանելի է տա՛լը, քան թէ առնելը»։—Գործք 20։35
22. (ա) Ուրախութեան առնչութեամբ, Աստուծոյ ծառաները հակադրեցէք իրեն չծառայողներուն հետ։ (բ) Ո՞ր մասնայատուկ պատճառով պէտք է ակնկալենք ուրախ ըլլալ։
22 Արդ, մինչ Աստուծոյ ծառաները չեն կրնար այս ներկայ ժամանակին մէջ գերազանց ուրախութիւն ակնկալել, սակայն անոնք կրնան ուրախութիւն մը ձեռք ձգել զոր Աստուծոյ չծառայողները չեն ճաշակեր։ Եհովա կը յայտարարէ. «Ահա իմ ծառաներս սրտի ուրախութեամբ պիտի ցնծան, բայց դուք սրտի ցաւէ պիտի աղաղակէք եւ հոգիի ճնշումէ պիտի ոռնաք»։ (Եսայեայ 65։14) Նաեւ, Աստուծոյ ծառայողները հիմա ուրախ ըլլալու շատ մասնայատուկ պատճառ մը ունին. անոնք իր սուրբ հոգին ունին զոր «Աստուած իրեն հնազանդ եղողներուն տուաւ»։ (Գործք 5։32) Իսկ չմոռնանք որ, ուր որ Աստուծոյ հոգին կայ, հոն ուրախութիւն կայ։—Գաղատացիս 5։22
23. Ի՞նչ բան նկատի պիտի առնենք մեր յաջորդ ուսումնասիրութեան մէջ։
23 Այսօր Աստուծոյ ծառաները կազմակերպուած ըլլալուն մէջ կարեւոր դեր մը կը խաղան «երէցներ»ը որոնք ժողովքներուն մէջ առաջնորդութիւնը կ’առնեն, Եհովայի ժողովուրդին ուրախութեան նպաստելով։ (Տիտոս 1։5) Անոնք իրենց պատասխանատուութիւնները եւ իրենց հոգեւոր եղբայրներուն ու քոյրերուն հետ իրենց յարաբերութիւնը ինչպէ՞ս պէտք է նկատեն։ Մեր յաջորդ յօդուածը այս կէտերը պիտի շօշափէ։
Ինչպէ՞ս Պիտի Պատասխանէիք
◻ Ստեղծագործութիւնը ինչպէ՞ս կը վկայէ Եհովայի կազմակերպուած ըլլալուն։
◻ Եհովա ինչպէ՞ս կազմակերպած է իր ծառաները անցեալին եւ ներկայիս։
◻ Եհովա կ’ուզէ որ ի՞նչ հաւասարակշռութիւն յայտնաբերենք։
◻ Սէրը որքա՞ն կարեւոր է մեր ուրախութեանը համար։
◻ Ի՞նչպիսի ուրախութիւն կրնանք ակնկալել մեր ժամանակին մէջ։