Ո՛վ Պատանիներ՝ Ապագային Համար Լաւ Հիմ Դրէք
1. Քրիստոնեայ պատանիները ինչո՞ւ զօրաւոր հաւատք պէտք է մշակեն։
1 Ձեր միտքին մէջ ի՞նչ բան առաջնագոյն տեղը կը գրաւէ։ Ի՞նչ բանի մասին կը մտածէք։ Ձեր գլխաւոր հետաքրքրութիւնները ներկա՞յ բաներուն թէ ապագայի եւ Աստուծոյ խոստումներուն վրայ կը կեդրոնանան։ (Մատթ. 6։24, 31-33. Ղուկ. 8։14) Աստուծոյ խոստումներուն համաձայն վարուելու համար զօրաւոր հաւատք պէտք է, ինչպէս կը տեսնուի Աբրահամի ու Մովսէսի օրինակներէն։ (Եբր. 11։8-10, 24-26) Ի՞նչպէս կրնաք այսպիսի հաւատք մը մշակել եւ ‘հանդերձեալին համար բարի հիմ դնել’։—Ա. Տիմ. 6։19
2. Յովսիա Թագաւորին օրինակէն ի՞նչ կը սորվինք։
2 Եհովան Փնտռեցէք. Եթէ ձեր ընտանիքին հետ հոգեւոր գործունէութեան սովորութիւն մը ունիք, ասիկա գովելի է։ Բայց մի՛ ենթադրէք որ այսպիսի սովորութիւն մը ինքնաբերաբար զօրաւոր հաւատք յառաջ պիտի բերէ։ ‘Աստուծոյ գիտութիւնը գտնելու’ համար, Եհովան անձամբ պէտք է փնտռէք։ (Առ. 2։3-5. Ա. Մնաց. 28։9) Պատանի Յովսիա Թագաւորը ասիկա ըրաւ։ Հոգեւոր աննպաստ միջավայրի մէջ մեծնալով հանդերձ, «իր հօրը Դաւիթին Աստուածը փնտռել սկսաւ», երբ 15 տարեկան էր։—Բ. Մնաց. 34։3
3. Ներկայիս դեռատի Քրիստոնեաները ի՞նչպէս կրնան Եհովան փնտռել։
3 Ի՞նչպէս կրնաք Եհովան փնտռել։ Ուշադրութեամբ քննելով ձեր հաւատացածը եւ ստուգելով որ անիկա իրապէս ճշմարտութիւնն է։ (Հռովմ. 12։2) Օրինակ, կրնա՞ք բացատրել թէ Աստուածաշունչը արեան մասին ի՛նչ կ’ըսէ, կամ ապացուցանել թէ Աստուծոյ Թագաւորութիւնը 1914–ին երկինքի մէջ սկսաւ իշխել։ «Ճշմարտութեան» ճշգրիտ գիտութիւնը ձեռք ձգելը, ապագային համար լաւ հիմ դնելու կարեւոր մէկ քայլն է։—Ա. Տիմ. 2։3, 4
4. Չմկրտուած հրատարակիչները ի՞նչպէս կրնան իրենց յառաջդիմութիւնը յայտնի ընել։
4 Յովսիայի Աստուած փնտռելը լաւ արդիւնքներ յառաջ բերաւ։ 20 տարեկան չեղած, ան քաջաբար գործի լծուեցաւ որ երկիրը սուտ կրօնքէն մաքրէ։ (Բ. Մնաց. 34։3-7) Նոյնպէս ձեր հոգեւոր յառաջդիմութիւնը յայտնի պիտի ըլլայ ձեր արարքներով։ (Ա. Տիմ. 4։15) Եթէ չմկրտուած հրատարակիչ մըն էք, ջանացէք ձեր ծառայութեան որակը բարելաւել։ Մի՛ բաւականանաք պարզապէս գրականութիւններ ներկայացնելով։ Նպատակակէտ դրէք որ Աստուածաշունչը գործածէք, մարդոց հետ պատճառաբանէք, եւ ձեր գտած հետաքրքրութիւնը մշակէք։ (Հռովմ. 12։7) Ասիկա ձեզի պիտի օգնէ որ հոգեւորապէս աճիք։
5. Մկրտուած Քրիստոնեաները ի՞նչ պատեհութիւններ ունին որ իրենց ծառայութիւնը ընդարձակեն։
5 Եհովայի Տուէք Ձեր Լաւագոյնը. Երբ Եհովայի կատարած ձեր նուիրումը ապացուցանէք մկրտութեամբ, Աստուծոյ ձեռնադրուած ծառան կ’ըլլաք։ (Բ. Կորն. 3։5, 6) Ասիկա ձեզի պատեհութիւններ կու տայ որ Եհովայի լիաժամ ծառայէք, ինչպէս՝ ռահվիրայութիւն ընել եւ Պէթէլի, միսիոնարական ու միջազգային ծառայութեան մասնակցիլ։ Նաեւ կրնաք ձեր ծառայութիւնը ընդարձակել՝ օտար լեզու մը սորվելով կամ փոխադրուելով հո՛ն ուր կարիքը աւելի մեծ է։
6. Ի՞նչպէս բոլորս ալ կրնանք ապագային համար լաւ հիմ դնել։
6 Անշուշտ բոլորը չեն կրնար ծառայութեան այս առանձնաշնորհումներուն մասնակցիլ, սակայն իւրաքանչիւրս կրնանք մեր լաւագոյնը Եհովայի տալ։ (Մատթ. 22։37) Ձեր պարագաները ի՛նչ որ ալ ըլլան, Եհովայի ծառայելը ձեր կեանքին առանցքը դարձուցէք։ (Սաղմ. 16։5) Ասիկա ընելով, ապագային համար լաւ հիմ դրած պիտի ըլլաք։