Սուրբ հոգիին նկատմամբ ինչո՞ւ շփոթութիւն կայ
Ի՞ՆՉ է սուրբ հոգին։ Այս ուղղակի հարցումին պարզ պատասխան մը գտնելը կրնայ դժուար ըլլալ։ Աւստրալիոյ մէջ, Պենետիկտոս ԺԶ. պապը բազմութեան մը ըսաւ. «Այնպէս կը թուի թէ Հոգիին մասին յստակ հասկացողութիւն ձեռք ձգելը մեր կարողութենէն վեր է»։
«Ի՞նչ է սուրբ հոգին» հարցումին առնչութեամբ վստահաբար շատ անորոշութիւն ու բազմաթիւ կարծիքներ կան։ Հետեւեալները կարգ մը սովորական պատասխաններ են.
• Իսկական անձ մը, որ Քրիստոսի աշակերտներուն մէջ կ’ապրի։
• Աստուածային գիտութիւն,– Աստուծոյ արտայայտուած մէկ օրէնքը։
• Աշխարհի մէջ Աստուծոյ գործօն ներկայութիւնը։
• Երրորդութեան երրորդ անձնաւորութիւնը։
Ինչո՞ւ այս շփոթութիւնը։ Անիկա մ.թ. չորրորդ դարուն սկսաւ, երբ աստուածաբաններէն ոմանք դաւանեցան, թէ սուրբ հոգին անձ մըն է եւ կերպով մը Աստուծոյ համահաւասար է։ Սակայն ո՛չ Սուրբ Գրութիւնները, ո՛չ ալ Քրիստոսի սկիզբի հետեւորդները այս գաղափարը սորվեցուցած էին։ Կաթողիկէ նոր համայնագիտարան–ը կը նշէ. «Յստակօրէն Հին Կտակարանը չի նկարագրեր Աստուծոյ հոգին որպէս անձ. . . Աստուծոյ հոգին պարզապէս Աստուծոյ ուժն է»։ Նոյն աղբիւրը կ’աւելցնէ. «Նոր Կտակարանի համարներուն մեծամասնութիւնը կը յայտնէ Աստուծոյ հոգին իբրեւ բան մը, եւ ո՛չ թէ՝ անձ մը. ասիկա յատկապէս ի յայտ կու գայ, երբ Աստուծոյ հոգիին եւ զօրութեան միջեւ զուգահեռութիւն կայ»։
Հասկնալիօրէն, մարդիկ դժուար կը գտնեն ուժին մասին մտածել իբր անձ։ Միացեալ Նահանգներուն մէջ վերջերս կատարուած փորձագիտանք մը յայտնեց, թէ մարդոց մեծամասնութիւնը կը մերժէ այն գաղափարը, թէ սուրբ հոգին անձ կամ «ապրող էութիւն» մըն է։ Անոնց տեսակէտը շիտա՞կ է, թէ ոչ՝ աստուածաբաններուն պէտք է հաւատանք, որոնք կը պնդեն թէ «Սուրբ Հոգին Անձ մըն է, իսկապէս անջատ՝ Հօրմէն ու Որդիէն»։
Վստահելի պատասխան մը առնելու համար, Աստուծոյ Խօսքին՝ Աստուածաշունչին պէտք է դիմենք, որ մանրամասնօրէն կը նկարագրէ սուրբ հոգին։ Պօղոս առաքեալ գրեց. «Աստուծոյ ներշնչումով գրուած բոլոր Սուրբ գիրքերը օգտակար են՝ թէ՛ ճշմարտութիւնը ուսուցանելու եւ թէ՛ սխալը հերքելու» (Բ. Տիմոթէոս 3։16, Անթիլիաս)։
Ինչո՞ւ պէտք է ջանաս սուրբ հոգիին մասին ճշմարտութիւնը գիտնալ։ Քանի որ ասիկա ճամբան կը հարթէ Աստուծմէ օգնութիւն ստանալու։ Երբեմն կը զգա՞ս թէ այլեւս չես կրնար քու ուժովդ շարունակել։ Յիսուս իր աշակերտներուն խոստացաւ. «Խնդրեցէք եւ պիտի տրուի ձեզի. . . եթէ. . . ձեր զաւակներուն աղէկ ընծաներ տալ գիտէք, որչա՜փ աւելի ձեր Հայրը երկնքէն Սուրբ Հոգին պիտի տայ անոնց որ իրմէ կը խնդրեն» (Ղուկաս 11։9, 13)։
Յաջորդ յօդուածներուն մէջ թոյլ պիտի տանք Սուրբ Գրութիւններուն, որ մեզի յայտնեն սուրբ հոգիին բնոյթը։ Եւ պիտի տեսնենք, թէ անիկա ի՛նչպէս կրնայ մեր կեանքին մէջ բարիի նպաստող զօրաւոր ոյժ մը ըլլալ։
[Մէջբերում՝ էջ 3]
Սուրբ Գրութիւնները մեզի կը յայտնեն սուրբ հոգիին բնոյթը