Jehova u tu vatera vi okutjinda omauzeu?

1. Omena raye tji tu hepa okupanḓera po, nu ombatero iṋe ndji tu na yo? (1 Petrus 5:10)

ATUHE tu muna omauzeu pekepeke, ku nao povikando tjiva mape ya a rire ouzeu okupanḓera po. Tjiva mape ya va vera oure woruveze orure, nu varwe ve nomuhihamwatima mena romusuverwa wawo ngwa ṱa. Nu wina varwe ve muna omapirukiro okuza kouṋepo weṱunḓu rawo poo okuza kovandu mbe ri mohoromende. (Mat. 10:​18, 36, 37) Kainatja kutja u ri mouzeu uṋe, Jehova ma yenene okukuvatera okutuurunga ouzeu mbwo.—Lesa 1 Petrus 5:10.

2. Omena raye tji tu yenena okutuurunga?

² Okutuurunga omauzeu poo okupanḓera po ku heya okukarera Jehova nouṱakame nondjoroka nandarire indu tji matu munu omauzeu, ondatumisire, poo indu tji matu rorwa okutjita ouvi. Kutja tu tuurunge eṱe matu sokukambura kutja oviṋa mavi kara nawa. Eṱe matu yenene okutuurunga mena rokutja Jehova u tu pa “omasa nge kapita avihe.” Eṱe kamaatu yenene okutuurunga nokuhinombatero ye. (2 Kor. 4:7) Morupa ndwi, matu kahungirira koviṋa vine Jehova mbye tu pa kutja tu yenene okutuurunga omauzeu. Wina matu kerihonga oviṋa mbi matu yenene okutjita kutja tu mune ouwa okuza koviṋa vine mbyo.

ONGUMBIRO

3. Ongwaye ongumbiro tji i ri otjiṋa tjapeke?

³ Jehova we tu pa otjiṋa tjapeke tji matji yenene okutuvatera kutja tu tuurunga omauzeu. Nandarire kutja oweṱe ovanauvi, eye wa tjita kutja tu yenene okuhungira ku na ye okupitira mongumbiro, nu eye u tu puratena. (Hebr. 4:16) Ripura notjiṋa hi, eṱe matu yenene okukumba ku Jehova oiri ngamwa aihe nokumuraera otjiṋa kangamwa atjihe. Eye ma yenene okutuzuvira meraka arihe na poruveze ngamwa, nandarire kutja oweṱe atuyerike poo twa paterwa monḓorongo. (Jona 2:​1, 2; Oviung. 16:​25, 26) Indu tji tu nomerikendero tjinene nu katu nokutjiwa kutja ngatu mu raere ye, Jehova u tjiwa kutja matu vanga okumuraera ye. (Rom. 8:​26, 27) Tjiri ongumbiro otjiṋa tjapeke.

4. Matu tjiwa vi kutja indu tji twa kumbu ku Jehova okutuvatera okupanḓera po, eye me tu vatere?

⁴ MEmbo re, Jehova u tu raera kutja ma “zuvire ozongumbiro zetu tji matu ningire ngamwa otjiṋa otja kombango ye.” (1 Joh. 5:14) Hapo matu yenene okuningira Jehova okutuvatera okupanḓera po? Ii, mena rokutja okutjita nao i ri otja kombango ye. Ongwaye tji matu yenene okutja nao? Indu tji matu kayenda komurungu okurira ovaṱakame, Jehova u yenena okuzira Satan. (Omiano 27:11) Nu Ombeibela i tja Jehova u vanga “okuyandja omasa ku imba mbe ṱakama mu Ye.” (2 Ekuruh. 16:9) Ku nao matu yenene okukara nongamburiro kutja Jehova u vanga okutuvatera nokutja me tu pe omasa okupanḓera po.—Jes. 30:18; 41:10; Luk. 11:13.

5. Omomuano uṋe ongumbiro mu i tu pa ohange momuinyo? (Jesaja 26:3)

⁵ Ombeibela i tja indu tji matu kumbu ku Jehova ohunga nomerikendero wetu ‘ohange yaNdjambi ndja kapita ozondunge azehe zovandu mai ṱakamisa omitima vyetu nouripura wetu.’ (Fil. 4:7) Eṱe tjiri tu nondangi kotjiṋa ho. Ovandu mbe ha karere Jehova ve muna omauzeu wina. Ovengi vawo ve kondja okupaha omiano okutjita kutja ve kare nohange momuinyo, poo okuzemba omauzeu wawo. Otjotjihorera, tjiva ve ungurisa omuano mbu isanewa kutja o-yoga mbu tjita kutja ave he ripurire kotjiṋa kokutja ve porimane. Okutjita nao okunaumba mena rokutja mape ya aku tu wanisa nozondemone. (Sasaneka na Mateus 12:​43-45.) Nu ohange Jehova ndje tu pa ya kapita ohange ovandu ndji ve muna okuza moviṋa mbi ve ungurisa mbyo. Indu tji twa kumbu ku Jehova, eṱe tu raisa kutja tu nongamburiro okuura mu ye nokutja me tu pe ‘ohange ndja yenene.’ (Lesa Jesaja 26:3.) Omuano umwe Jehova me tu pa ohange omokutuvatera kutja tu zemburuke omatjangwa. Omatjangwa ngo ye tu zemburukisa kutja Jehova u rikendera kweṱe nu me tu vatere okupanḓera po.—Eps. 62:​1, 2.

6. Ovikwaye mbi mo yenene okukumbira ko? (Wina tara kotjiperendero.)

⁶ Oviṋa mbi mo yenene okutjita. Indu tji u nouzeu, “omerikendero woye ye esa na Muhona” nu kumba kutja me ku pe ohange. (Eps. 55:22) Mu ningira kutja me ku pe ounongo mbu mo hepa okutjinda ongaro mu u ri. (Omiano 2:​10, 11) Nu wina o zembi kutja ndangi ku Jehova mozongumbiro zoye. (Fil. 4:6) Ripurira komiano Jehova me ku vatera okutuurunga ouzeu mu u ri eyuva arihe, nu i tja ndangi kombatero ndjo. O yandjere omauzeu ngu mo munu okukutjaera kutja o ha munu ozondaya nḓu u na zo rukuru.—Eps. 16:​5, 6.

EMBO RA MUKURU

7. Omomuano uṋe okukonḓonona Ombeibela mu maku tu vatere okupanḓera po?

⁷ Jehova we tu pa Embo re okutuvatera okupanḓera po. MOmbeibela mu nomatjangwa omengi nge tu honga kutja Jehova tjiri me tu vatere. Ngatu tare kotjihorera tjimwe. Mateus 6:8 ri tja: “Iho ma tjiwa rukuru imbi mbi mwa hepa ngunda amu hiye Mu ningira.” Jesus wa hungira omambo ngo, nu eye u tjiwa Jehova nawa okukapita ovandu avehe. Ku nao, eṱe matu yenene okukara nongamburiro kutja indu tji matu munu omauzeu Jehova u tjiwa kutja ovikwaye mbi matu hepa, nu eye me tu vatere. Ombeibela yeura nomakwizikiro okuza ku Jehova nge tu pa omasa ngu matu hepa okupanḓera po.—Eps. 94:19.

8. (a) Ondunge iṋe okuza mOmbeibela ndji mai tu vatere okutuurunga? (b) Ovikwaye mbi mavi tu vatere okuzemburuka omirari vyOmbeibela indu tji matu vi hepa?

⁸ Ombeibela i tu pa ondunge ndji mai yenene okutuvatera okutuurunga otuveze otuzeu. Ondunge ndjo i tu vatera kutja tu toore omikambo omisemba. (Omiano 2:​6, 7) Otjotjihorera, Ombeibela i tu raera kutja ngatu ise okurikenda ohunga noviṋa mbi mape ya avi tjitwa moruyaveze, nu tu riyameke ku Jehova eyuva arihe. (Mat. 6:34) Indu tji twa lese Ombeibela yetu eyuva arihe nokuripurira ko oukoto ohunga noviṋa mbi twa lese, i rira oupupu okuzemburuka omirari vyOmbeibela indu tji matu vi hepa.

9. Indu tji twa lese mOmbeibela ohunga nomuano Jehova ma vatera ovakarere ve, otjiṋa ho matji tu ṱunu vi?

⁹ MOmbeibela wina mu novihorera vyovandu mba ri nongamburiro mu Jehova nu mba vaterwa i ye. (Hebr. 11:​32-34; Jak. 5:17) Indu tji twe ripurire komuano Jehova me ve vatera, ongamburiro yetu mu Jehova kutja me tu vatere wina i ku rira ko. Eye “omaundiro nomasa wetu, aruhe u vatera momauzeu aehe.” (Eps. 46:1) Nu indu tji twe ripura ohunga nomuano ovakarere va Jehova mu va raisa ongamburiro yawo mu ye nave kayenda komurungu okumukarera nandarire motuveze otuzeu, iho tji tu tunduuza okutjita nao wina.—Jak. 5:​10, 11.

10. Ovikwaye mbi mo hepa okutjita kutja Ombeibela i ku vatere?

¹⁰ Oviṋa mbi mo yenene okutjita. Lesa Ombeibela eyuva arihe, nu kara nomatjangwa nge ku vatera. Ovandu ovengi omuhukomunene auhe ve lesa etjangwa nomambo nge ri mokambo nga, Konḓonona Omatjangwa Eyuva arihe. Otjiṋa ho tji ve pa otjiṋa okuripurira ko eyuva ndo. Okutjita nao, kwa vatera omukazendu omukambure wena Mariea indu tjaa hungu ina na ihe. Ovanene ve va verere omutjise wokangera, nu va ri pokuṱa. Eye wa tja: “Omuhukomunene auhe ami ee lese etjangwa mokambo nga Konḓonona Omatjangwa Eyuva arihe, nu ee ripurire ko oukoto koviṋa mbi mbe rihongo. Ihi aatji ndji vatera eyuva arihe okuripura ohunga na Jehova noviṋa oviwa mbye tu honga mEmbo re pendje nokuripurira komauzeu wandje.”—Eps. 61:2.

OVAKAMBURE OVAKWETU

11. Eṱe tu kara noumune uṋe indu tji matu ripura ohunga nomuano ovakambure ovakwetu mu ve tuurunga omauzeu?

¹¹ Jehova we tu pa ovakambure ovakwetu mouye auhe okutuvatera okupanḓera po. Okutjiwa kutja ‘mouye auhe ovakambure ovakwetu ve tjinda omahihamisiro tjingewo,’ ku tu vatera okumuna kutja kaweṱe atuyerike. (1 Petr. 5:9) Ihi matji hee kutja pe novakambure ovakwetu mbe tjinda omauzeu tjimuna owetu, nu mbe kayenda komurungu okurira ovaṱakame ku Jehova. Ku nao matu yenene okukara nongamburiro kutja eṱe wina matu yenene okupanḓera po.—Oviung. 14:22.

12. Ovakambure ovakwetu mave yenene okutuvatera vi, nu ovikwaye mbi matu yenene okuvetjitira? (2 Ovakorinte 1:​3, 4)

¹² Otja tji matu panḓere po ovakambure ovakwetu mave yenene okutuyanḓiparisa. Omuapostele Paulus wa muna kutja ihi ouatjiri. Motutuu twe, eye wa tamuna omana waimba mbe mu vatera indu tja ri omukamburwa woponganda, nu wa raisa ondangi ku wo. Owo ve mu huhumiṋa nokumuyanḓiparisa nokumupa oviṋa mbyaa hepa. (Fil. 2:​25, 29, 30; Kol. 4:​10, 11) Ndino ovakambure ovakwetu wina mave yenene okutuhuhumiṋa nokutuvatera okutuurunga omauzeu mu tu ri. Nu eṱe wina matu yenene okuvevatera tji mave hepa ombatero.—Lesa 2 Ovakorinte 1:​3, 4.

13. Ovikwaye mbya vatera omukazendu omukambure wena Maya okupanḓera po?

¹³ Ovakambure ovakwetu va yanḓiparisa omukazendu omukambure wena Maya ngwa tura moRussia. Mo-2020 ovaporise va hita mondjuwo ye okupaha moviṋa, nu kombunda ve mu twara kotjombanguriro mena rokuraera varwe ohunga nongamburiro ye. Eye wa tja: “Oruveze ndo mba urirwe, ee rikende, nu mba wire momuinyo. Posi ya ovakambure ovakwetu ve ndji tonena ongoze nokundjitjangera ozombuze notutuu okundjiraera kutja ve ndji suvera tjinene. Ami aruhe ee tjiwa kutja ovakambure ovakwetu ve ndji suvera nokutja owo eṱunḓu randje. Nu mbi kambura kutja owo ve ndji suvera tjinene mena roviṋa mbi ve ndji tjitira.”

14. Ovikwaye mbi matu sokutjita kutja tu mune ouwa okuza kombatero ndji za kovakambure ovakwetu? (Wina tara kotjiperendero.)

¹⁴ Oviṋa mbi mo yenene okutjita. Otja tji mo tuurunga ouzeu kaaṋi, kara popezu novakambure ovakweṋu. O keyakeya okuningira ombatero kovanene vombongo. Owo ve ri tjimuna “omawameno kombepo, notja poṋa pomaundiro kotjivepo tjombura.” (Jes. 32:2) Zemburuka kutja ovakambure ovakweṋu wina ve tuurunga omauzeu. Indu tji mo tjitire omundu otjiṋa otjiwa ngu me tji hepa, u kara nondjoroka nu tji ku vatera kutja u tuurunge omauzeu woye omuini.—Oviung. 20:35.

OMAUNDJIRO WETU

15. Omaundjiro woruyaveze ya vatera vi Jesus, nu maye yenene okutuvatera vi? (Ovaheberi 12:2)

¹⁵ Jehova we tu pa omaundjiro nge ha teratera, nu ngu maye tu vatere okupanḓera po nga komaandero. (Rom. 15:13) Zemburuka kutja Jesus wa tuurunga eyuva ezeu tjinene momuinyo we kombanda yehi mena romaundjiro nga ri na wo. (Lesa Ovaheberi 12:2.) Jesus aa tjiwa kutja ouṱakame we mau kohorora ena ra Jehova. Jesus aa undju oruveze ndu ma yaruka ku Ihe meyuru nokukahonapara otjombara pu novatwirisiwa ve. Momuano tjingewo, omaundjiro wetu wokukahupa nga aruhe mouye oupe ye tu vatera okutuurunga omauzeu ngu tu muna mouye wa Satan.

16. Omaundjiro ya vatera vi omukazendu omukambure umwe okupanḓera po, nu mo rihongo ye okuza komambo nga hungira?

¹⁶ Tara komuano omaundjiro wokukahupa mouye oupe mu ya vatera omukazendu omukambure moRussia wena Alla. Omurumendu we wa kamburwa na ṱizirwa monḓorongo ngunda ama undju otjiposa tje. Indu otjiṋa hi tji tja tjitwa, Alla wa tja: “Okukumba ohunga nomaundjiro woruyaveze nokuripurira ko oukoto ku ndji vatera kutja e ha u momuinyo tjinene. Ami mbi tjiwa kutja kombunda yomauzeu nga maku ya oviṋa oviwa. Jehova ma rwisa ovanavita na ye, nu me tu pe ondjambi.”

17. Matu raisa vi kutja tu nondangi komaundjiro Jehova nge tu pa? (Wina tara kotjiperendero.)

¹⁷ Oviṋa mbi mo yenene okutjita. Twa po oruveze okuripura ohunga noruyaveze oruwa Jehova ndwe ku kwizikira. Rimuna omuini kutja u ri mouye oupe, nu ripura nozondaya nḓu mo kamuna. Ouzeu mbu tu muna nai ‘oupupu nu u kapita tjimanga,’ tji wa sasaneke ku nokukahupa nga aruhe moparadisa. (2 Kor. 4:17) Ove wina mo yenene okuraera varwe ohunga nomakwizikiro wa Mukuru woruyaveze. Ripura nomuano ehupo mu ri ri ezeu kovandu mbe ha karere Jehova, owo wina ve nomauzeu omengi posi ya kave tjiwa oviṋa oviwa Jehova mbya kwizika ohunga noruyaveze. Nandarire tji we ve raere oviṋa oviṱiṱi uriri, mape ya o ve tunduuza okuvanga okutjiwa ovingi ohunga nOuhona wa Mukuru nomakwizikiro we.

18. Ongwaye tji matu yenene okukambura momakwizikiro wa Jehova?

¹⁸ Job tja za nokutuurunga omauzeu pekepeke nokurira omuṱakame ku Jehova, eye wa tja: “Ami, Muhona, me tjiwa kutja oOve Omunamasaaehe, nokutja Ove u tjita oviṋa avihe, mbi u vanga.” (Job 42:2) Job we rihonga kutja kape notjiṋa tji matji tjaere Jehova okuyenenisa omakwizikiro we. Indu tji twa zemburuka kutja Jehova ma kayenenisa omakwizikiro we nokukaisa po omauzeu wetu, iho matji tu pe omasa okupanḓera po. Otjotjihorera, ripura ohunga nomukazendu ngwa vera oure woruveze orure. Eye wa wa momuinyo mena rokutja wa ya kozonganga ozengi, posi ya kape na imwe ndja yenena okumuverukisa. Nu okuzambo wa kamuna onganga ombwa ndje mu raera kutja ovikwaye mbi mu verisa nokutja mai mu vatere vi. Eye wa hakahana okukara nondjoroka nandarire kutja aa sokuundja oure woruveze kaaṋi kutja ma veruke. Ma rire oupupu ku ye okutjinda omutjise we mena rokutja ma tjiwa kutja ma veruka. Momuano tjingewo, eṱe matu yenene okukayenda komurungu okupanḓera po mena rokutja tu nongamburiro yokutja omakwizikiro wa Mukuru woparadisa maye kayenenisiwa.

19. Ovikwaye mbi matu hepa kutja tu panḓere po?

¹⁹ Otja tji twe rihongo, Jehova u tu vatera okutuurunga omauzeu wetu okupitira mongumbiro, mEmbo re, ovakambure ovakwetu na momaundjiro wetu. Indu tji twa ungurisa oviṋa mbyo, Jehova me tu vatere okutjinda omauzeu wetu nga ouye wa Satan nomauzeu ayehe tji vya zu po.—Fil. 4:13.