Julai

Jesus enggau sempurna neladan runding sereta asai ati Apai iya ba semua utai ti dikereja sereta disebut iya. Tu mega nyengkaum kereja ajih ke digaga iya. (Jhn. 14:9) Peratika utai ke ulih dipelajarka kitai ari kereja ajih Jesus. Jesus enggau Apai iya amat rinduka kitai. Lebuh Jesus ba dunya, iya ngayanka pengerindu ti dalam lebuh iya ngena kuasa iya nulung sida ke merinsa. Bisi sekali, dua iku lelaki ke buta minta tulung ari Jesus. (Mat. 20:​30-34) Peratika, Jesus “kasihka seduai iya,” lalu iya ngeraika seduai iya. Pengasih ti dalam nya meransang Jesus ngayanka pengerindu ngagai orang bukai. Tu mega meransang Jesus meri sida ke lapar makai sereta ngeraika siku orang ke sakit lan. (Mat. 15:32; Mrk. 1:41) Kitai ulih yakin, Petara Jehovah ti “pengasih,” sereta Anak Iya amat rinduka kitai, lalu seduai iya tusah ati lebuh meda kitai merinsa. (Luk. 1:78; 1 Pet. 5:7) Seduai iya keran deka muai semua penanggul ke benung ninggang mensia! w23.04 3 ¶4-5

Kitai ulih bebendar nyeliah ari macha tauka ningaka penemu ti salah ke tebilang ba dunya Sitan. Kitai ulih ngisi runding kitai enggau utai ti manah lebuh kitai macha sereta belajarka Bup Kudus. Datai begempuru sereta nginjil mega ulih nyaga runding kitai. Lalu Jehovah besemaya, Iya enda nejuka kitai napi penguji ke enda ulih ditatka kitai. (1 Kor. 10:​12, 13) Kelebih agi ba hari ti penudi tu, tiap iku kitai patut lebih agi besampi ngambika ulih mengkang tetap ati ngagai Jehovah. Jehovah dekaka kitai besampi ngagai Iya lalu ‘madah ngagai Iya semua penusah kitai.’ (Mas. 62:8) Beri puji sereta terima kasih ketegal semua utai ti udah dikereja Iya. Minta Iya meri nuan pemerani ngambika ulih nginjil. Lalu, minta tulung ari Jehovah kena tan napi sebarang penanggul sereta ngelaban pengingin ke engka ditapi nuan. Anang nejuka sebarang utai tauka sapa-sapa nagang nuan ari seruran besampi ngagai Jehovah. w23.05 7 ¶17-18

Nama kebuah kitai datai begempuru? Kebuah ti pemadu penting iya nya, ngambika kitai ulih muji Jehovah. (Mas. 26:12; 111:1) Kitai mega datai begempuru ngambika ulih meransang pangan diri, kelebih agi ba maya ti tusah tu. (1 Tes. 5:11) Lebuh kitai meri komen ba gempuru, kitai benung ngereja dua iti utai tu. Tang lebuh deka meri komen, kitai engka napi sekeda penanggul. Kitai engka berasai takut deka meri komen. Tauka kitai engka amat deka meri komen enggau mayuh agi, tang kekadang menyadi ke ngiring enda ngangau kitai meri komen taja pan kitai udah ngangkatka jari. Nama ulih nulung kitai? Rasul Paul madahka, kitai patut betumpu ba pengawa ‘meransang pangan diri.’ Kitai ulih meransang pangan diri lebuh kitai meri komen ti pandak ke ngayanka pengarap kitai. Enti kitai ingatka tu, kitai deka berasai kurang agi takut lebuh meri komen. Lalu enti kitai enda suah dikangau, kitai agi ulih gaga ati laban bala menyadi ke bukai bisi peluang meri komen.—1 Pet. 3:8. w23.04 20 ¶1-3

Raja udah ngaga siti jaku gerah! Orang Judah ke nyadi orang tangkap ba Babilon pengelama kira-kira 70 taun, diatu udah bibas. Sida ulih pulai baru ngagai menua asal sida, iya nya menua Israel. (Esr. 1:​2-4) Semina Jehovah aja ke ulih ngereja tu. Babilon kesuah iya enda ngelepaska orang tangkap sida. (Isa. 14:​4, 17) Tang Babilon udah dialahka, lalu raja ti baru udah madah ngagai orang Judah, sida ulih pulai ke Jerusalem. Tiap iku orang Judah, kelebih agi bala tuai bilik, patut ngaga pemutus sekalika deka ninggalka Babilon tauka mengkang diau dia. Pemutus nya engka enda senang digaga. Mayuh orang engka udah kelalu tuai deka ngaga pejalai ti jauh nya. Lalu mayuh orang Judah ada ba Babilon. Sida enda kala diau ba endur bukai. Ba sida, menua Israel nya semina menua aki ini sida. Sekeda orang Judah mega engka udah nyadi amat kaya ba Babilon. Nya kebuah sida engka ngasaika nya tusah deka ninggalka rumah sida ti manah tauka pengawa dagang sida lalu diau ba endur ti enda ditemu sida. w23.05 14 ¶1-2

Jaku Petara meransang kitai terus ngemansangka ati ti tan, ati ti siru, enggau pengerindu. Luke 21:19 madahka: “Enti kita betan, kita deka mengkang idup.” Kolosi 3:12 madahka: “Rasukka meh ati ti siru.” Lalu 1 Tesalonika 4:​9, 10 madahka: “Kita empu udah diajar Petara ngambika rinduka pangan diri. . . . Taja pia, bala menyadi, kami minta kita terus meh ngereja nya enggau bebendar agi.” Semua ayat tu ditulis ngagai bala murid ke udah ngayanka ati ti tan, ati ti siru, enggau pengerindu. Taja pia, sida patut terus belajar ngayanka sifat tu. Kitai mega patut belajar ngereja utai ti sama. Kena nulung nuan, nuan ulih beratika chara orang Kristian ba abad keterubah ngayanka sifat nya. Lalu nuan deka beratika chara nuan ulih neladan bala murid nya, sereta nunjukka nuan udah besedia ke Penusah ti Besai. Nyadi lebuh Penusah ti Besai berengkah, nuan udah nemu chara ngayanka ati ti tan, lalu nuan mega deka terus ngayanka sifat nya. w23.07 3 ¶4, 8

Enda ngira kitai dipilih ngagai serega tauka “raban bedus ti bukai,” kitai patut mengkang ba “Jalai Raya Ngagai Pengudus.” Iya deka nulung kitai terus nyembah Jehovah diatu sereta ba jemah ila lebuh Perintah Petara mai utai ti manah ke dunya tu. (Jhn. 10:16) Kenyau ari taun 1919 M., bejuta iku lelaki, indu, enggau anak udah ninggalka Babilon ti Besai, iya nya gerempung pengarap pelesu sedunya. Sida udah berengkah bejalai ba “Jalai Raya Ngagai Pengudus” nya. Lebuh orang Judah ninggalka Babilon, Jehovah nentuka utai ti nekul jalai sida dibuai. (Isa. 57:14) Baka ni enggau “Jalai Raya Ngagai Pengudus” kemayaharitu deh? Beratus taun sebedau taun 1919, Jehovah udah berengkah ngena bala lelaki ke amat bebasaka Iya ngambika nyediaka jalai kena orang bukai pansut ari Babilon ti Besai. (Banding Isaiah 40:3.) Sida ngereja utai ti patut ngambika ila orang ti lurus ulih ninggalka pengarap ti pelesu lalu nyembah Jehovah begulai enggau nembiak Iya. w23.05 15-16 ¶8-9

Jehovah dekaka kitai nyembah Iya enggau ati ti gaga sereta deka. (2 Kor. 9:7) Nyadi, kati kitai patut terus berusaha nyapai sesiti juluk ati taja pan kitai nadai pengeran deka ngereja nya? Peratika teladan rasul Paul. Iya madahka: “Aku disiplin enggau terit tubuh aku lalu ngaga tubuh aku nyadi ulun.” (1 Kor. 9:​25-27) Indah lebuh Paul nadai pengeran deka ngereja utai ti diasuh Jehovah kereja iya, tang iya majakka diri ngereja nya. Kati Jehovah gaga ati enggau utai ti dikereja Paul ke Iya? Jehovah tentu gaga ati! Lalu Jehovah merekatka usaha Paul. (2 Tim. 4:​7, 8) Baka nya mega, Jehovah gaga ati lebuh Iya meda kitai bebendar nguji nyapai juluk ati kitai, taja pan kitai nadai pengeran deka ngereja nya. Iya gaga ati laban Iya nemu, taja pan enti kitai enda seruran rinduka utai ti dikereja kitai, tang kitai agi ngereja nya laban kitai rinduka Iya. Baka Jehovah ke merekatka Paul, Iya mega deka merekatka usaha kitai. (Mas. 126:5) Lalu seraya kitai ngasaika berekat ari Jehovah, kitai engka deka berengkah ngembuan pengeran deka ngereja juluk ati nya. w23.05 29 ¶9-10

Rasul Paul mandingka sida ke enda ulih selamat maya hari Jehovah datai nya baka orang ke benung tinduk. Sida enda sedar enggau utai ke benung nyadi ngelingi sida tauka pasal jam ke benung belalu. Nyadi, sida enda nemu lebuh utai ti penting nyadi tauka ngereja utai ti sejalai enggau nya. Mayuh orang kemayaharitu baka orang ke benung tinduk secara rohani. (Rom. 11:8) Sida enda pechayaka bukti ke nunjukka kitai benung idup ba “hari ti penudi” tauka pasal Penusah ti Besai ke deka datai. (2 Pet. 3:​3, 4) Tang kitai nemu, ninting hari kitai patut bebendar agi mengkang bejaga. (1 Tes. 5:6) Nama kebuah kitai patut mengkang tenang sereta enda panik? Ngambika kitai enda masuk champur dalam politik tauka pekara sosial. Seraya hari Jehovah majak semak kitai deka majak agi ditekan ngambika milih sapa ke deka disukung kitai. Tang, kitai enda ibuh irau pasal utai ke deka dikereja kitai. Kuasa kudus Petara deka nulung kitai mengkang tenang sereta enda jampat panik. Tu deka nulung kitai ngaga pemutus ti manah.—Luk. 12:​11, 12. w23.06 10 ¶6-7

Nama runding nuan lebuh nuan ninga nama Samson? Nuan engka berunding pasal siku lelaki ke amat kering. Taja pan nya amat, tang Samson kala ngaga pemutus ti enda manah. Ketegal nya, iya balat merinsa. Taja pia, Jehovah agi beratika penetap ati Samson ngagai Iya. Lalu Petara mega nentuka teladan Samson ditulis dalam Bup Kudus ke penguntung kitai. Jehovah ngena Samson ngereja sekeda utai ti ngalitka ati ngambika ulih nulung bala nembiak Iya, iya nya orang Israel. Beratus taun pengudah Samson nadai, nengah kuasa kudus, Jehovah ngasuh Rasul Paul nyimpan nama Samson dalam lis bala nembiak Petara ke ngayanka pengarap ti besai. (Heb. 11:​32-34) Teladan Samson ulih meransang kitai. Iya bepanggai ba Jehovah, indah lebuh napi situasi ti tusah. Kitai deka belajar mayuh ari Samson. Lalu kitai mega deka belajarka chara teladan iya ulih meransang kitai. w23.09 2 ¶1-2

Lebuh kitai seruran besampi ngagai Jehovah lalu madahka Iya semua utai ti ngasuh kitai irau, nya deka nulung kitai ngemansangka agi sifat ati ti tan. (1 Tes. 5:17) Nuan engka enda napi penanggul ti balat diatu. Tang, kati nuan bisi besampi ngagai Jehovah lalu minta tulung ari Iya lebuh nuan berasai tusah ati, charut runding, tauka enda nemu nama utai ti patut dikereja nuan? Enti nuan seruran besampi minta tulung ari Petara kitai, indah lebuh nuan napi penanggul ti mit diatu, nuan tentu enda kakang ati ngereja utai ti sama lebuh nuan napi penanggul ti besai agi jemah ila. Nya baru nuan ulih andal enggau pengabis ati, Jehovah nemu kemaya sereta nama utai ke patut dikereja Iya kena nulung nuan. (Mas. 27:​1, 3) Kitai deka agi tan napi Penusah ti Besai ke deka datai enti kitai mengkang tetap ati ngagai Jehovah lebuh napi penanggul diatu. (Rom. 5:3) Nama kebuah kitai ulih bejaku munyi nya? Mayuh bala menyadi madahka, tiap kali sida mujur tan napi sesiti situasi ti tusah, nya nulung sida besedia agi kena napi penusah ke bukai ke deka datai. Lebuh sida tan napi penanggul enggau tulung ari Jehovah, nya ngasuh sida arap agi Jehovah deka nulung sida. Lalu ketegal sida arapka Jehovah, sida ulih tan napi penguji ke deka datai.—Jas. 1:​2-4. w23.07 3 ¶7-8

Pemaruh ati sereta penyiru Jehovah ngasuh Iya ngembuan runding ti seimbang. Ambika chunto, pemaruh ati Jehovah ulih dipeda lebuh Iya deka ngemunaska orang ti jai ba Sodom. Nengah bala melikat Iya, Jehovah ngasuh Lot ngerarika diri ngagai endur ti bebukit. Lot berasai takut deka kin. Nyadi iya minta ngambika sida sebilik ulih dikemendarka ngagai nengeri Soar, siti endur ti mit ke deka dirusakka Jehovah. Jehovah ulih ngasuh Lot ngereja aja utai ti udah diasuh Iya kereja Lot. Taja pia Jehovah ngemendarka Lot ngagai Soar, lalu Iya enda ngerusak nengeri nya. (P-kal. 19:​18-22) Beratus taun udah nya, Jehovah ngayanka penyiru ngagai orang Nineweh. Iya nganjung nabi Jonah kena madah ngagai orang ti jai ba Nineweh pasal pengerusak ke deka ninggang sida enggau nengeri sida. Tang lebuh orang Nineweh nesal ati, Jehovah kasihka sida lalu enda ngerusak nengeri nya.—Jon. 3:​1, 10; 4:​10, 11. w23.07 21 ¶5

Nama ulih dipelajarka kitai ari chunto Joas? Iya baka siti pun kayu ke nadai urat ti dalam lalu bepanggai ba tiang kena nyukung iya. Pengudah Jehoiada ke nyukung Joas mati, iya berengkah ningaka orang ke angkat ngelaban Petara. Iya nyadi enda tetap ati ngagai Jehovah. Baka nya mega enggau kitai. Ruang bilik kitai tauka orang bukai ba raban gempuru engka udah netapka teladan ke kitai pasal mengkang tetap ati ngagai Jehovah. Tang chunto Joas nya nunjukka kitai enda patut ngasika Petara semina ketegal teladan sida aja. Ngambika ulih mengkang semak ngagai Jehovah, kitai empu mesti negapka agi pengerindu sereta basa kitai ngagai Jehovah. Kitai ulih ngereja tu enggau seruran belajarka Bup Kudus, belematika utai ti dipelajar nya, enggau besampi. (Jer. 17:​7, 8; Kol 2:​6, 7) Jehovah nadai minta kitai ngereja mayuh utai. Utai ke dipinta Iya bisi ba Pengajar 12:13 ke madahka: ‘Nangika Petara, lalu ngasika pesan Iya, laban nya endang kebuah kitai mensia digaga.’ Lebuh kitai nangika Petara, kitai ulih mengkang setia ngagai Jehovah enda ngira nama utai ke nyadi jemah ila. Nadai utai ke ulih ngerusak kaul kitai enggau Jehovah. w23.06 19 ¶17-19

Ayat 5 berengkah baka tu: “Iya ke duduk ba kerusi diraja madahka.” (Pem. 21:5a) Rambai jaku tu amat spesial, laban dalam bup Pemandang semina tiga kali aja Jehovah Empu bejaku, lalu tu siti ari iya. Gerenti tu ukai diberi siku melikat, indah ukai Jesus, tang Jehovah Empu ke meri gerenti tu! Tu nunjukka kitai ulih pechayaka utai ti deka dipadah Iya pengudah nya. Nama kebuah kitai ulih bejaku munyi nya? Laban Jehovah “endang enda nemu bula.” (Tit. 1:2) Nyadi, utai ke dibacha kitai ba Pemandang 21:​5, 6 endang ulih dikearapka. Jehovah madahka “Peda!” (Pem. 21:5) Leka jaku Gerika ke mai reti “peda!” suah dikena dalam bup Pemandang. Nyadi, nama dipadah Petara pengudah nya? Iya madahka: “Diatu Aku benung ngaga semua utai nyadi baru.” Amat, Jehovah deka ngaga ubah tu jemah ila, tang Iya amat yakin Iya deka ngamatka semaya nya. Nya kebuah Iya nyebut utai nya baka ke Iya benung ngereja nya diatu.—Isa. 46:10. w23.11 3-4 ¶7-8

Rasul Peter udah nerima mayuh berekat, tang iya agi belaban enggau pengelemi iya. Peratika sekeda chunto tu. Lebuh Jesus madah iya deka diperinsa sereta mati kena ngamatka jaku benabi dalam Bup Kudus, Peter madah ngagai Jesus, utai tu tentu enda nyadi ba Jesus. (Mrk. 8:​31-33) Lalu Peter enggau bala rasul ke bukai mayuh kali bekelikuh enggau pangan diri pasal sapa ke pemadu besai. (Mrk. 9:​33, 34) Lalu ba malam sebedau Jesus dibunuh, Peter nyerang siku lelaki, lalu mutuska pending lelaki nya. (Jhn. 18:10) Ba malam nya mega, Peter nyadi amat takut pasal runding orang bukai ngagai iya nyentukka iya tiga kali madahka diri enda ngelala Jesus. (Mrk. 14:​66-72) Ketegal utai ti udah digaga Peter, iya duie-duie nyabak. Jesus enda putus asa enggau Peter lebuh Peter balat tusah ati. Pengudah Jesus diangkatka idup baru, iya meri Peter peluang nunjukka diri agi rinduka iya. Jesus ngasuh Peter nyaga bala bedus iya. (Jhn. 21:​15-17) Peter sedia deka ngereja utai ke diasuh Jesus. Ba hari Pengerami Pentikos, Peter bisi ba Jerusalem, lalu iya siku ari sida ke nerima kuasa kudus maya nya. w23.09 22 ¶6-7

Ku Peter madah ngagai bala tuai gempuru: “Ibun meh raban bedus Petara.” (1 Pet. 5:​1-4) Kati nuan siku tuai gempuru? Enti pia, kami nemu nuan rinduka bala menyadi Kristian nuan, lalu deka ngibun sida. Taja pia, bisi maya iya nuan berasai amat sibuk tauka lelak nyentukka nuan enda ulih bejalaika tanggung pengawa nya. Nama ulih dikereja nuan? Padahka ngagai Jehovah semua pengirau nuan. Ku Peter madahka: “Enti orang nulung orang bukai, awakka iya bepanggai ba pengering ke diberi Petara lebuh ngereja nya.” (1 Pet. 4:11) Bala menyadi Kristian nuan engka benung napi penanggul ke enda ulih diputarka diatu. Tang kingatka, “ketuai pengibun bedus,” iya nya Jesus Kristus, ulih nulung sida lebih agi ari ke ulih digaga nuan. Iya ulih nulung sida diatu enggau ba dunya baru. Utai ke dipinta Jehovah ari bala tuai gempuru nya, rinduka bala menyadi Kristian, ngibun sida, sereta ‘nyadi teladan ke raban bedus.’ w23.09 29-30 ¶13-14

Kitai patut nyeliahka diri ari runding orang ke enda bebasaka adat Jehovah. Enti kitai berunding baka chara orang ke enda bebasaka adat Jehovah, kitai mega engka berengkah enda bedulika Jehovah enggau adat Iya. (1 Kor. 3:19) “Penemu-dalam ba dunya tu” kesuah iya nyungkak orang enda ngasika Petara. Sekeda orang Kristian ba Pergamum enggau Tiatira nunda orang ke ngelingi sida ti ngereja ulah seks ti kamah sereta ke nyembah engkeramba. Jesus meri jaku tangkan ti berat ngagai kedua-dua buah raban gempuru nya laban sida enda nulak ulah seks ti kamah. (Pem. 2:​14, 20) Kemayaharitu, orang ke ngelingi kitai nguji ngasuh kitai nerima runding sida ti salah nya. Diri sebilik enggau orang ti dikelala kitai engka madahka kitai kelalu tarit, lalu ngasuh kitai enda ibuh seruran nitihka adat Jehovah. Ambika chunto, sida engka madahka nadai salah enti kitai nitihka pengingin diri. Sida mega engka madahka standard moral Bup Kudus enda ulih dikena agi. Kekadang, kitai engka berunding iring ke diberi Jehovah ngagai kitai nya enda chukup terang. Kitai indah engka bisi pengingin deka “ngereja utai ngelui ari utai ke ditulis.”—1 Kor. 4:6. w23.07 16 ¶10-11

Maria, indai Jesus begunaka pengering ngambika ulih ngereja peneka Petara. Gambarka pengirau Maria lebuh Melikat Gabriel madahka iya deka betubuh-bisi, taja pan iya bedau kawin. Iya nadai kala bisi anak. Tang diatu, iya patut nyaga anak mit ke deka nyadi Messiah. Iya mega agi dara. Tang iya patut madah ngagai tunang iya Josep, iya betubuh-bisi. Tu tentu enda senang ke Maria. (Luk. 1:​26-33) Pengawa ke diterima Maria nya tusah sereta luar biasa. Iya minta tulung ari orang bukai. Ambika chunto, iya nanya Melikat Gabriel mayuh agi penerang pasal pengawa nya. (Luk. 1:34) Enda lama pengudah nya, iya bejalai ngagai “nengeri ti bebukit” ba menua Judah, lalu ngabas kaban belayan iya Elisabet. Elisabet muji Maria, lalu nengah kuasa kudus Jehovah, Elisabet bekunsika jaku ti benabi ke meransang pasal anak Maria ke bedau ada. (Luk. 1:​39-45) Maria madahka, Jehovah “udah ngereja utai ti besai ngena lengan Iya.” (Luk. 1:​46-51) Jehovah ngeringka Maria nengah Gabriel enggau Elisabet. w23.10 14-15 ¶10-12

Sekeda ari bala murid Jesus udah dipilih ngena kuasa kudus. Penyampau sida nya 144,000 iku, lalu sida deka nyadi imam enggau Jesus ba serega. (Pem. 14:1) Endur ti Kudus ngambarka sida udah diambu Petara nyadi anak Iya lebuh sida agi ba dunya. (Rom. 8:​15-17) Endur ti Pemadu Kudus ngambarka serega, endur alai Jehovah diau. “Kain tirai” ke nyerara Endur ti Kudus enggau Endur ti Pemadu Kudus ngambarka tubuh mensia Jesus. Seagi-agi iya bisi tubuh mensia, iya enda tau tama ngagai serega, lalu nyadi Imam Besai ba rumah sembiang rohani. Lebuh Jesus nyerahka tubuh mensia iya nyadika genselan tebus ke semua mensia, iya muka jalai ngambika 144,000 iku nya ulih ngagai serega. Kena ngulihka upah sida ba serega, sida mega patut ngelengkaka tubuh mensia sida.—Heb. 10:​19, 20; 1 Kor. 15:50. w23.10 28 ¶13

Gideon mengkang tenang lebuh orang Epraim ngutuk iya. (P-ulu. 8:​1-3) Gideon enda nyaut sida enggau ati ti ringat. Gideon ngayanka diri baruh ati lebuh iya ningaka kompelin sida, lalu udah nya iya nelap lebuh bejaku enggau sida. Tu ngasuh situasi nya tenang. Bala tuai gempuru ti bepenemu-dalam neladan Gideon lebuh sida ninga enggau manah sereta nyaut enggau nelap enti dikutuk. (Jas. 3:13) Enggau nya bala tuai gempuru ulih nentuka penyerakup ba raban gempuru ulih mengkang dijaga. Lebuh orang bukai muji Gideon ketegal pemenang iya atas orang Midian, Gideon meri puji nya ngagai Jehovah. (P-ulu. 8:​22, 23) Baka ni bala tuai gempuru ulih neladan Gideon? Sida patut meri puji ngagai Jehovah ketegal semua utai ke udah dijapai sida. (1 Kor. 4:​6, 7) Ambika chunto, enti siku tuai gempuru dipuji ketegal pengelandik iya ngajar, iya ulih madahka pesan nya datai ari Jaku Petara, lalu semua kitai belajar ari gerempung Jehovah. Bala tuai gempuru ulih berunding sekalika chara sida ngajar mai mulia ngagai Jehovah tauka mai mulia ngagai diri empu. w23.06 4 ¶7-8

Enti kitai enda nerima utai ke disampika kitai, kitai engka ulih nanya diri empu tiga iti tanya. Tanya kesatu, ‘Kati aku besampika utai ti betul?’ Kesuah iya, kitai ngumbai diri nemu utai ti pemadu manah ke diri empu. Tang, utai ke dipinta kitai engka enda entu mai penguntung ke kitai. Enti kitai besampi pasal sesiti penanggul, engka bisi chara ti manah agi kena mutarka penanggul nya kelimpah ari chara ke dipinta kitai. Lalu sekeda utai ke dipinta kitai engka enda sejalai enggau peneka Jehovah. (1 Jhn. 5:14) Ambika chunto, peratika chunto apai indai ke besampi minta Jehovah nulung anak seduai iya mengkang ba pemendar. Utai ke dipinta seduai iya endang manah. Tang Jehovah enda ngansak sapa-sapa nyembah Iya. Iya dekaka semua kitai, nyengkaum bala anak kitai, milih deka nyembah Iya. (U-dat. 10:​12, 13; 30:​19, 20) Nyadi, apai indai nya ulih ngubah peminta seduai iya. Seduai iya ulih besampi minta Jehovah nulung seduai iya nyapai ati anak seduai iya. Enggau nya, anak seduai iya deka diperansang rinduka Jehovah lalu nyadi pangan Iya.—J-lam. 22:6; Eps. 6:4. w23.11 21 ¶5; 23 ¶12

Nama kebuah ngelantangka ati orang bukai nya siti chara ti penting kitai ngayanka pengerindu ngagai sida? Nitihka siti pansik pasal Bup Kudus, leka jaku ke dikena Paul madahka pasal “ngelantangka ati” mai reti “bediri ngimbai sesiku orang kena meransang iya lebuh orang nya benung napi situasi ti tusah.” Nyadi, lebuh kitai ngelantangka ati siku menyadi ke benung merinsa, kitai nulung iya terus nyembah Jehovah enggau tetap ati. Lalu tiap kali kitai ngelantangka ati menyadi Kristian kitai, kitai ngayanka diri rinduka sida. (2 Kor. 7:​6, 7, 13) Penyiru enggau ngelantangka ati orang bukai bisi kaul ti rapat entara pangan diri. Lebuh sesiku orang siruka orang ke benung merinsa, iya deka ngelantangka ati sereta ngereja utai kena nulung orang nya. Nyadi, lebuh kitai bisi penyiru, tu nulung kitai ngelantangka ati orang bukai. Peratika baka ni Paul ngaitka penyiru Petara enggau pengelantang ke diberi Iya. Paul madahka, Jehovah nya “Apai ti penuh enggau pengasih sereta Petara ti ngelantangka ati kitai dalam semua pekara.”—2 Kor. 1:3. w23.11 9-10 ¶8-10

Semua murid Kristus patut ngadang diri deka diperinsa. Peratika teladan Rasul Paul. Ku iya madahka tu ngagai orang Kristian ba Tesalonika: ‘Lebuh kami enggau kita, kami suah madah tumu ngagai kita, pasal kitai deka napi pemerinsa, lalu utai nya sigi amat nyadi.’ (1 Tes. 3:4) Lalu ngagai bala menyadi Kristian ba Korint, iya madah: “Bala menyadi, kami deka kita nemu pasal pemerinsa ke ditapi kami . . . Kami enda nemu sekalika kami ulih idup tauka enda.” (2 Kor. 1:8; 11:​23-27) Orang Kristian kemayaharitu mega ulih ngadang diri deka diperinsa. (2 Tim. 3:12) Ketegal nuan arapka Jesus, lalu berengkah nitihka iya, bala kaban tauka kaban belayan engka jai enggau nuan. Tauka kati nuan diperinsa ba endur kereja ketegal nuan deka jujur dalam semua utai? (Heb. 13:18) Tauka, kati nuan kala napi perinsa ari perintah ketegal nuan nginjil ngagai orang bukai pasal harapan nuan? Enda ngira nama pemerinsa ke ditapi kitai, Paul madahka kitai patut gaga ati. w23.12 10-11 ¶9-10

Jakop mayuh napi penanggul. Dua iku anak Jakop ke benama Simeon enggau Lewi ngemaluka nama sida sebilik sereta nama Jehovah. Nambahka nya, Rachel, bini ti dikesayauka Jakop, mati lebuh ngadaka anak seduai iya ti kedua. Lalu ketegal lapar pungkang, Jakop patut pindah ngagai menua Ejip lebuh iya udah tuai. (P-kal. 35:​16-19; 37:28; 45:​9-11, 28) Taja pan napi semua penanggul nya, Jakop nadai kala lenyau pengarap ngagai Jehovah sereta semaya Iya. Lalu, Jehovah nunjukka diri agi benung nyaga Jakop. Ambika chunto, Jehovah agi meri Jakop mayuh utai. Lalu Jakop tentu amat beterima kasihka Jehovah lebuh betemu baru enggau Josep—anak ke dikumbai iya udah lama mati! Kaul Jakop ti rapat enggau Jehovah nulung iya tan napi semua penanggul nya. (P-kal. 30:43; 32:​9, 10; 46:​28-30) Lebuh kitai ngetanka kaul ti rapat enggau Jehovah, kitai mega ulih tan napi penanggul ke enda dijangka. w23.04 15 ¶6-7

Ba Masmur 23, David madahka, iya andal Jehovah rinduka iya sereta deka nyaga iya. Iya madahka pasal kaul ti rapat ti dikembuan iya enggau Pengibun iya, iya nya Jehovah. David berasai likun laban Jehovah ngiring iya, lalu iya bepanggai ba Jehovah enggau pengabis ati. David nemu Jehovah deka ngayanka pengerindu ngagai iya sepemanjai pengidup iya. Nama kebuah iya amat yakin? David berasai dijaga laban Jehovah seruran nyediaka semua utai ke diguna iya. David mega bisi kaul ti rapat enggau Jehovah, lalu iya mega nemu Jehovah gaga ati enggau iya. Nya kebuah iya yakin, enda ngira nama utai ti deka nyadi ngagai iya dudi hari, Jehovah deka nyediaka semua utai ti diguna iya. Ketegal David yakin enggau pengerindu Jehovah, tu nulung iya enda irau tang berasai gaga sereta puas ati.—Mas. 16:11. w24.01 29 ¶12-13

Kenyau ari Perang Dunya Kedua, nembiak Jehovah udah nginjil enggau bibas ba mayuh menua. Kebendar iya, pengawa tu benung mai asil ti besai. Mayuh orang udah ngelala Jehovah, lalu bala nembiak Iya benung nginjil ba serata dunya. Kemayaharitu, Raban ti Ngiring terus bepanggai ba iring ari Jesus. Sida dekaka iring ke diberi sida ngagai bala menyadi Kristian mandangka runding Jehovah enggau Jesus. Lalu, sida ngena bala tuai ti ngabas enggau bala tuai gempuru meri iring ngagai raban gempuru. Semua tuai gempuru dalam “jari kanan” Kristus, enda ngira sekalika sida dipilih ngagai serega tauka enda. (Pem. 2:1) Endang amat, semua tuai gempuru enda sempurna sereta ngaga penyalah. Moses, Josua, enggau bala rasul mega kekadang ngaga penyalah. (P-pau. 20:12; Jos. 9:​14, 15; Rom. 3:23) Taja pia, kitai ulih meda enggau terang, Jesus benung ngiring ulun ke tetap ati sereta bala tuai gempuru, lalu iya deka terus ngereja nya Nya alai, kitai ulih pechaya sereta yakin ngagai iring ke diterima ari sida ke dipilih ngulu kitai. w24.02 23-24 ¶13-14

Kemayaharitu, kitai ulih ngagaka ati Jehovah lebuh kitai bejaku pasal Iya enggau asai ati ti besyukur sereta penuh pengerindu. Lebuh nginjil, tuju utama kitai nya nulung orang bukai semak ngagai Jehovah. Kitai dekaka sida ngembuan asai ati ti sama enggau asai ati ke dikembuan kitai pasal Jehovah. (Jas. 4:8) Kitai gaga ati bekunsi enggau orang bukai pasal utai ke dipadah Bup Kudus pasal Jehovah. Bup Kudus madahka mayuh utai pasal pengerindu, pengelurus, penemu-dalam, kuasa, enggau sifat Iya ke bukai. Kitai mega muji sereta ngagaka ati Jehovah lebuh kitai bebendar neladan Iya. Lebuh kitai ngereja nya, orang bukai engka meda kitai bebida ari orang ba dunya tu. Lalu tu engka ngasuh sida berundingka kebuah kitai bebida. (Mat. 5:​14-16) Lebuh kitai begulai enggau sida ba pengidup besehari-sehari, kitai engka bisi peluang nerang ngagai sida kebuah nya. Asil iya, sida ke bisi ati ti lurus deka datai semak ngagai Petara kitai. Lebuh kitai muji Jehovah enggau chara ke baka tu, kitai ngelantangka ati Iya.—1 Tim. 2:​3, 4. w24.02 10 ¶7

Ngambika ulih nyadi orang Kristian ti matang, nuan patut ngemansangka pengelandik ke beguna ba pengidup besehari-sehari. Tu deka nulung nuan nerima tanggung pengawa ba raban gempuru, bulih kereja ti tetap ke ulih nulung nuan ngintu diri empu sereta diri sebilik, lalu ngembuan kaul ti manah enggau orang bukai. Ambika chunto, belajar macha sereta nulis enggau manah. Bup Kudus madahka, orang ti gaga ati sereta mujur nya macha Bup Kudus ninting hari lalu belematika nya. (Mas. 1:​1-3) Lebuh iya macha Bup Kudus ninting hari, iya deka majak nemu chara Jehovah berunding. Tu deka nulung iya berunding enggau manah sereta belajarka chara ngena prinsip Bup Kudus dalam pengidup iya. (J-lam. 1:​3, 4) Bala menyadi Kristian kitai begunaka bala menyadi lelaki ke baka tu ngambika ulih ngajar sereta meri jaku lalau ari Bup Kudus ngagai sida. Enti nuan ulih macha sereta nulis enggau manah, nuan ulih nyediaka cheramah sereta komen ti deka meri penguntung ngagai orang bukai sereta negapka pengarap sida. Nuan mega ulih ngambi nota ti beguna ke ulih negapka pengarap nuan sereta ulih dikena nuan meransang orang bukai. w23.12 26-27 ¶9-11

Lebuh nuan berasai takut, belematika meh utai ke deka dikereja Jehovah jemah ila. Maya nya, Sitan deka nadai agi. Ba program konvensyen 2014, bisi siti lakun,Ba lakun nya, siku apai berandau enggau diri sebilik iya pasal 2 Timoti 3:​1-5. Iya ngubah ayat nya kena nunjukka utai ti deka nyadi ba dunya Paradais. Ku iya madahka: “Ba dunya baru, maya ti amat ngagaka ati deka datai. Orang deka rinduka orang bukai, rinduka pekara ti bekaul enggau sembah ngagai Petara, baruh ati, muji Petara, ngasika apai indai, beterima kasih, setia, ngembuan penyayau ti dalam ngagai diri sebilik, deka ninga penemu orang bukai, seruran nyebut utai ti manah pasal orang bukai, ulih nagang diri, nelap, rinduka utai ti manah, tau dikearap, nemu ngalahka diri, enda sumbung, rinduka Petara lebih agi ari ngelantangka ati diri, nyembah Petara enggau pengabis ati. Terus meh semak enggau orang ke baka nya.” Au, berandau meh enggau diri sebilik tauka bala menyadi Kristian ke bukai pasal gaya pengidup ba dunya Paradais. w24.01 6 ¶13-14

Bup Kudus madahka: ‘Jehovah gaga ati ke nembiak Iya.’ (Mas. 149:4) Endaka jaku tu ngelantangka ati kitai? Tang kekadang, bisi sekeda bala menyadi ke berasai kakang ati. Sida engka berunding, ‘Kati Jehovah lantang ati enggau aku?’ Kebendar iya, mayuh ari nembiak Jehovah ke tetap ati kelia menya kala ngembuan runding ti sama. (1 Sam. 1:​6-10; Jop 29:​2, 4; Mas. 51:11)Bup Kudus enggau terang nunjukka, mensia ti enda sempurna ulih ngagaka ati Jehovah. Baka ni? Kitai patut arapka Jesus Kristus sereta dibaptisa. (Jhn. 3:16) Enggau nya, kitai nunjuk ngagai orang bukai, kitai udah nesal ati ke dosa kitai sereta udah ngaga semaya deka ngereja peneka Petara. (SKR. 2:38; 3:19) Lebuh kitai ngereja semua utai nya ngambika ulih ngembuan kaul ti rapat enggau Iya, Jehovah berasai amat gaga ati. Enti kitai enggau bebendar ngamatka semaya kitai ke deka nyembah Iya, Jehovah deka lantang ati enggau kitai lalu ngumbai kitai kaban rapat Iya.—Mas. 25:14. w24.03 26 ¶1-2

Kitai ulih neladan bala murid Jesus. Kitai deka terus nginjil taja pan piak perintah ngasuh kitai badu agi nginjil. Kitai ulih andal Jehovah deka nulung kitai nembuka pengawa nginjil kitai. Kitai ulih besampi minta pemerani sereta penemu-dalam. Minta tulung ari Jehovah kena tan taja pan napi penanggul. Mayuh ari kitai merinsa ketegal bisi penyakit tauka napi penanggul ba emosi, lenyau orang ke dikesayau, penanggul ba diri sebilik, diperinsa, tauka penanggul ke bukai. Lalu utai baka pandemik enggau perang udah ngasuh kitai tusah agi tan napi penanggul nya. Padahka enggau nyemetak ngagai Jehovah pasal asai ati nuan. Padah ngagai Iya pasal situasi nuan sama baka chara nuan bejaku enggau siku kaban ti rapat. Lalu pechaya meh, Jehovah “deka nulung nuan.”(Mas. 37:​3, 5) Majak besampi ulih nulung kitai ‘betan lebuh napi penusah.’ (Rom. 12:12) Jehovah nemu utai ke benung ditapi bala penyembah Iya. Bup Kudus madahka: “Iya ninga sabak sida.”—Mas. 145:​18, 19. w23.05 5-6 ¶12-15

Lebuh kitai patut ngaga pemutus ti penting, kitai patut “meretika peneka Jehovah” lalu ngereja utai sejalai enggau nya. (Eps. 5: 17) Lebuh kitai ngiga prinsip Bup Kudus ti ngena enggau situasi kitai, kitai kebendar iya benung ngiga runding Petara pasal pekara nya. Udah nya, seraya kitai nitihka prinsip Iya, kitai ulih ngaga pemutus ti manah. Munsuh kitai, Sitan, dekaka kitai kisuk enggau utai ba dunya tu nyentukka kitai nadai awak nyembah Petara. (1 Jhn. 5:19) Siku orang Kristian engka berengkah ngenuluka duit, pelajar, tauka kereja sekular, ari ke befokus ba peluang gawa ke Jehovah. Lalu enti iya ngereja nya, tu nunjukka iya berengkah berunding baka orang ba dunya tu. Endang amat, duit, pelajar, tauka kereja sekular nya enda salah, tang kitai enda patut nejuka utai tu nyadi utai ti pemadu penting ba pengidup kitai. w24.03 24 ¶16-17