Nama Utai ke Ditemu Kitai pasal Chara Jehovah Ngakim Orang Jemah Ila?

1. Nama kebuah kitai ulih ngumbai kitai benung idup ba jeman ti ngagitka ati?

KITAI benung idup ba jeman ti ngagitka ati! Ninting hari, kitai ulih meda jaku benabi dalam Bup Kudus dikeamatka. Ambika chunto, kitai ulih meda “raja utara” enggau “raja selatan” belaban enggau pangan diri, laban seduai iya bela deka nguasa dunya tu. (Dan. 11:​40, NWT) Kitai ulih meda Berita Manah pasal Perintah Petara dikerembaika ba serata dunya, lalu bejuta iku orang udah milih deka nyembah Jehovah. (Isa. 60:22; Mat. 24:14) Kitai mega benung nerima mayuh pemakai rohani “ba maya ti patut.”—Mat. 24:​45-47.

2. Nama utai ke ulih dikeandalka kitai, tang nama utai ke mesti ditemu kitai?

² Jehovah terus nulung kitai mereti enggau terang agi pasal sekeda utai ti penting ke deka nyadi enda lama da agi. (J-lam. 4:18; Dan. 2:28) Kitai ulih andal, maya Penusah ti Besai berengkah, kitai deka nemu semua utai ke patut ditemu kitai ngambika ulih mengkang tetap ati sereta beserakup ba maya ti tusah nya. Taja pia, kitai mesti sedar, endang bisi sekeda utai ke enda ditemu kitai pasal jemah ila. Dalam artikel tu, keterubah iya, kitai deka berandauka kebuah kitai ngubah penemu kitai pasal sekeda utai ke deka nyadi nya. Udah nya, kitai deka berandauka sekeda utai ke ditemu kitai pasal jemah ila sereta pasal utai ke deka digaga Apai kitai ti ba serega.

UTAI KE ENDA DITEMU KITAI

3. Suba, ba penemu kitai, nama deka nyadi ngagai sida ke enda arap maya Penusah ti Besai berengkah? Lalu, nama kebuah kitai berunding baka nya?

³ Suba kitai kala madah, lebuh Penusah ti Besai berengkah, orang deka nadai agi peluang arapka Jehovah tauka diselamatka maya Armagedon. Kitai madah baka nya laban kitai ngumbai cherita pasal Bah Besai ngambarka utai ke deka nyadi jemah ila. Ambika chunto, maya jeman Noah, nadai agi orang ulih tama ngagai bandung pengudah Jehovah nutup pintu bandung nya. Nya alai, kitai ngumbai jemah ila, maya Penusah ti Besai berengkah, nadai agi orang ulih arapka Jehovah lalu diselamatka.—Mat. 24:​37-39.

4. Kati kitai diatu ngumbai cherita pasal Bah Besai nya siti jaku benabi ke deka dikeamatka jemah ila? Terangka.

⁴ Kati kitai patut ngumbai cherita pasal Bah Besai nya siti jaku benabi ke deka dikeamatka jemah ila? Saut iya enda. Laban Bup Kudus nadai bejaku munyi nya.a Endang amat, Jesus mandingka “maya jeman Noah kelia” enggau maya penatai iya. Tang Jesus nadai madahka, utai ke nyadi maya jeman Noah nya siti jaku benabi ke deka dikeamatka jemah ila, baka lebuh Jehovah nutup pintu bandung nya. Taja pia, tu ukai reti iya kitai enda ulih belajar ari cherita Noah enggau Bah Besai nya.

5. (a) Nama digaga Noah sebedau Bah Besai? (Hebrew 11:7; 1 Peter 3:20) (b) Nama utai ti sama entara pengawa nginjil Noah enggau pengawa nginjil kitai kemayaharitu?

⁵ Lebuh Noah ninga jaku tangkan ari Jehovah, iya nunjukka diri bisi pengarap lebuh iya ngaga bandung nya. (Bacha Hebrew 11:7; 1 Peter 3:20.) Baka nya mega, orang ke ningaka Berita Manah pasal Perintah Petara mesti ngayanka pengarap nengah ulah sida. (SKR. 3:​17-20) Peter madahka, Noah “nusui pasal pemendar.” (2 Pet. 2:5) Taja pia, baka ke dikerandauka ba artikel sebedau tu, kitai enda nemu sekalika Noah bisi nguji nginjil ngagai semua orang ke idup ba dunya sebedau Bah Besai. Kemayaharitu, kitai enggau ransing nguji nginjil ngagai semua orang ba serata dunya. Tang enda ngira pemesai usaha kitai, kitai enda ulih nginjil ngagai semua orang ba serata dunya sebedau pengujung datai. Nama kebuah?

6-7. Nama kebuah kitai ulih ngumbai kitai enda ulih nginjil pasal Berita Manah ngagai semua orang ba serata dunya sebedau pengujung datai? Terangka.

⁶ Perundingka utai ke dipadah Jesus pasal pengawa nginjil kitai. Iya madahka, Berita Manah deka ditusui “ba serata dunya, nyadika saksi ngagai semua bansa.” (Mat. 24:14) Jaku benabi nya benung dikeamatka enggau chara ti besai agi diatu. Pesan pasal Perintah Petara bisi dalam lebih ari 1,000 iti bansa jaku. Lalu ketegal laman web jw.org kitai, mayuh orang ba serata dunya ulih belajar Berita Manah pasal Perintah Petara.

⁷ Taja pia, Jesus mega madah ngagai bala murid iya, sida enda ulih “nembuka pejalai [sida] ngagai semua nengeri” tauka nginjil ngagai semua orang sebedau iya datai. (Mat. 10:23; 25:​31-33) Jaku Jesus mega bisi reti ke kitai kemayaharitu. Bejuta iku orang kemayaharitu diau ba endur alai pengawa nginjil kitai balat disekat. Kelimpah ari nya, beratus iku anak mit ada tiap minit. Nya alai, kitai enda ulih nginjil ngagai semua orang ba serata dunya sebedau pengujung datai, taja pan kitai bebendar nginjil ngagai orang ke datai ari “tiap iti menua, raban bansa, jaku, enggau bansa.”—Pem. 14:6.

8. Nama tanya ke engka diperundingka kitai pasal chara Jehovah ngakim orang jemah ila? (Peda mega gambar.)

⁸ Bepelasarka utai ke baru dikerandauka kitai, kitai engka berunding: Baka ni enggau sida ke nadai peluang ningaka Berita Manah sebedau Penusah ti Besai berengkah? Baka ni Jehovah enggau Anak Iya, ke udah diberi Iya tanggung pengawa ngakim, deka ngakim sida? (Jhn. 5:​19, 22, 27; SKR. 17:31) Ayat tema ke artikel tu madahka, Jehovah “enggai siku pan ari [kitai] dipunaska,” tang “Iya deka semua orang nesal ati.” (2 Pet. 3:9; 1 Tim. 2:4) Taja pan kitai nemu Jehovah bisi sifat ke baka tu, tang Iya bedau madahka kitai chara Iya deka ngakim sida ke nadai peluang ninga pasal Berita Manah. Lalu endang amat, Iya enda ibuh madahka semua utai nya ngagai kitai.

9. Nama udah dipadah Jehovah ngagai kitai dalam Bup Kudus?

⁹ Dalam Bup Kudus, Jehovah udah madahka sekeda utai ke deka dikereja Iya. Ambika chunto, Bup Kudus madahka, Jehovah deka ngidupka baru “orang ke enda lurus” ke nadai peluang belajar pasal Berita Manah sereta ngubah jalai pengidup sida. (SKR. 24:15; Luk. 23:​42, 43) Utai tu ngasuh kitai berundingka sekeda tanya ti penting.

10. Nama tanya ke bukai ke engka dikembuan kitai?

¹⁰ Kati semua sida ke mati maya Penusah ti Besai deka dipunaska belama iya lalu nadai harapan diangkatka idup baru? Bup Kudus madahka, sida ke ngelaban Jehovah sereta sida ke dipunaska Jehovah enggau bala melikat Iya ba Armagedon nadai harapan diangkatka idup baru. (2 Tes. 1:​6-10) Tang baka ni enggau orang bukai? Ambika chunto, sekeda ari sida engka mati maya Penusah ti Besai ketegal sakit, umur ti tuai, eksiden, tauka ketegal orang bukai. (P-jar. 9:11; Sek. 14:13) Kati sekeda ari sida tu deka disengkaum ba “orang ke enda lurus,” ke deka diangkatka idup baru ba dunya baru? Saut iya, kitai enda nemu.

UTAI KE DITEMU KITAI

11. Nama utai ke nentuka chara sesiku orang deka diakim ba Armagedon?

¹¹ Kitai udah nemu sekeda utai ke deka nyadi jemah ila. Ambika chunto, kitai nemu maya Armagedon, orang deka diakim bepelasarka chara sida ngintu bala menyadi Kristus. (Mat. 25:40) Sida ke nyukung bala menyadi ke dipilih ke serega enggau Jesus deka diakim sebagai bedus. Kitai mega nemu, sekeda bala menyadi ke dipilih ke serega agi bisi ba dunya nyentuk ngagai pengudah Penusah ti Besai berengkah. Taja pia, sebedau Armagedon berengkah, semua sida deka dibai ke serega magang. Seagi-agi bala menyadi Kristus agi ba dunya, sekeda orang engka agi bisi peluang nyukung sida enggau pengawa ke benung dikereja sida. (Mat. 25:​31, 32; Pem. 12:17) Nama kebuah penemu tu penting?

12-13. Nama engka reaksi sekeda orang pengudah sida meda “Babilon ti Besai” dirusakka? (Peda mega gambar.)

¹² Indah pengudah Penusah ti Besai berengkah, sekeda orang ke meda pengerusak “Babilon ti Besai” engka deka ingat pasal Saksi-Saksi Jehovah ke udah betaun-taun madahka utai tu deka nyadi. Kati sekeda ari sida ke meda Babilon ti Besai dirusakka maya Penusah ti Besai deka berengkah arapka Jehovah?—Pem. 17:5; Esk. 33:33.

¹³ Enti utai tu nyadi, tu engka sama enggau utai ke nyadi ba Ejip maya jeman Moses. Bup Kudus madahka, “mayuh macham bansa orang” sama enggau orang Israel lebuh sida ninggalka Ejip. Sekeda ari sida engka berengkah arapka Jehovah lebuh sida meda jaku tangkan Moses pasal Sepuluh Penulah amat nyadi. (P-sut. 12:38) Enti utai ti sama nyadi pengudah Babilon ti Besai dirusakka, kati kitai ngumbai nya enda adil enti sekeda orang enggau kitai nyembah Jehovah chun-chun sebedau pengujung datai? Tentu enda! Kitai deka neladan personaliti Apai kitai ti ba serega. Iya ‘Petara ti pengasih sereta siru, lubah ringat, ngayanka pengerindu ti setia enggau belimpah, lalu semua utai ke dipadahka Iya amat magang.’b—P-sut. 34:6.

14-15. Kati peluang sesiku orang idup belama iya bepanggai ba ni maya iya mati tauka dini alai iya diau? Terangka. (Masmur 33:​4, 5)

¹⁴ Kekadang, kitai engka ninga bala menyadi madah, “Manah agi enti kaban belayan aku mati sebedau Penusah ti Besai berengkah. Engka sida deka bisi peluang diangkatka idup baru.” Sida engka bisi tuju ati ti manah lebuh bejaku munyi nya. Tang peluang sesiku orang idup belama iya enda bepanggai ba ni maya iya mati. Jehovah nya Hakim ti sempurna. Pemutus Iya seruran betul. (Bacha Masmur 33:​4, 5.) Kitai ulih andal, “Hakim ba serata dunya” tentu deka ngakim enggau adil.—P-kal. 18:25.

¹⁵ Kitai mega ulih madahka, peluang sesiku orang idup belama iya enda bepanggai ba dini alai iya diau. Bejuta iku orang diau ba menua alai pengawa kitai ditagang tauka disekat, lalu sida nadai peluang belajar pasal Perintah Petara. Jehovah tentu enda ngumbai sida tu “kambin” semina ketegal sida diau ba endur ke baka nya. (Mat. 25:46) Jehovah, Hakim ba serata dunya ti lurus, ibuhka semua sida lebih agi ari kitai. Kitai enda nemu baka ni Jehovah deka ngubah utai maya Penusah ti Besai. Engka sekeda orang deka bisi peluang belajar pasal Jehovah, arapka Iya, sereta bepiak ba Jehovah lebuh Iya ngemuliaka nama Iya ba serata dunya.—Esk. 38:16.

16. Nama utai ke udah ditemu kitai pasal Jehovah? (Peda mega gambar.)

¹⁶ Lebuh belajarka Bup Kudus, kitai nemu nyawa mensia amat berega ba Jehovah. Iya meri nyawa Anak Iya nyadika tebus ngambika semua kitai bisi peluang idup belama iya. (Jhn. 3:16) Semua kitai kala ngasaika penyayau Jehovah. (Isa. 49:15) Iya nemu nama tiap iku kitai. Kebendar iya, Jehovah amat ngelala kitai. Lalu enti kitai mati pan, Iya ulih ngangkatka kitai idup baru laban Iya ngingatka semua utai pasal kitai sereta semua pengingat ke dikembuan kitai. (Mat. 10:​29-31) Endang amat, kitai bisi kebuah ti manah andal Jehovah deka ngakim semua orang enggau sempurna laban Iya bepenemu-dalam, adil, sereta kasih.—Jas. 2:13.

17. Nama deka dikerandauka kitai ba artikel ke nangkanka tu?

¹⁷ Ketegal penemu kitai udah diaduka baru, kitai sedar pengawa nginjil kitai penting agi diatu. Nama kebuah kitai ulih bejaku munyi nya? Lalu nama utai ke meransang kitai terus nginjil enggau ransing? Kitai deka berandauka tanya-tanya tu enggau nyemetak agi ba artikel ke nangkanka tu.