Utai ke Ulih Digaga Nuan Ngambika Idup ba Dunya Baru

Artikel sebedau tu nerangka, enda lama da agi Petara deka ngujungka dunya ti jai tu sereta semua penanggul mensia. Utai tu endang deka nyadi, laban Petara udah besemaya:

“Dunya . . . deka lenyau.”—1 JOHN 2:17.

Tang kitai andal, endang bisi orang ke selamat laban ayat ti sama mega madahka:

‘Tang orang ke ngereja peneka Petara deka idup belama iya.’

Nya alai, enti kitai deka selamat kitai patut ngereja peneka Petara. Ngambika ulih ngereja peneka Petara, kitai patut ngelala Iya dulu.

NGELALA PETARA NYELAMATKA KITAI

Gambar: 1. Seiku indu misi duduk ba lantai, ketegal kelalu lelak. 2. Maya iya belelak ba siti kafe, iya tepedaka seiku agi indu misi berupai gaga maya macha siti majalah. 3. Indu misi nya macha ayat Bup Kudus ngagai iya, lalu meri iya kad jw.org.

Jesus madahka: ‘Tu pengidup ti meruan belama iya, ngambika sida ngelala Nuan, Petara ti bendar, enggau Jesus Kristus, ke dikirumka Nuan.’ (John 17:3) Enti kitai deka diselamatka maya pengujung dunya sereta idup belama iya, kitai patut “ngelala” Petara. Tang, semina ngaku Petara bisi tauka nemu beberapa fakta pasal Iya enda chukup. Kitai mega patut nyadi pangan Iya. Baka kitai ke patut meri awak begulai enggau seseiku orang, kitai mega patut meri awak belajar lalu ngelala Petara. Peratika beberapa pemendar ti beguna dalam Bup Kudus ke ulih nulung kitai, ngemansangka sereta nyaga kaul kitai enggau Petara.

Pemendar ke Dipelajar Kitai ari Bup Kudus

Kitai belajar Petara deka kitai diau ba Paradais.

Petara nempa mensia keterubah Adam enggau Awa, lalu ngengkahka seduai iya ba Kebun Eden. Seduai iya mensia ti sempurna, lalu Petara meri semua utai ke diguna sida. Seduai iya ulih idup belama iya seagi seduai iya terus nyadi pangan Petara. Tang seduai iya enggau sengaja ngelanggar siti perintah ti senang ari Petara.

Kitai belajar kebuah kitai tau merinsa kemayaharitu.

Ketegal Adam enda ngasika Petara, iya enggau semua peturun iya lenyau peluang idup belama iya. Bup Kudus nerangka: “Nya alai, baka dosa ti datai ngagai dunya nengah orang siku, lalu pemati datai laban dosa, nya alai pemati ngelekai ngagai semua mensia, laban semua bela udah bedosa.” (Rome 5:12) Baka seiku anak ke engka murih penimpang apai indai iya, semua peturun Adam mega murih penimpang Adam. Tu ngujungka, sida mega nyadi tuai lalu mati.

Kitai belajar pasal utai ke udah digaga Petara kena nulung kitai.

Bup Kudus madahka: ‘Petara balat rinduka dunya, nya alai Iya meri Anak Tunggal Iya, ngambika genap iku orang ke arapka Iya enda mati tang bulih pengidup ti meruan belama iya.’ (John 3:16) Petara nganjung Jesus ke dunya kena nebus dosa kitai. Bekaul enggau pengerindu ke diayanka Petara, Prabhakar, seiku lelaki ke bebansa India ti beumur 86 taun madahka, “Pengawa tu nunjukka Jehovaha amat rinduka aku. Ketegal pengerindu Iya, aku bepeluang idup belama iya.”

Kitai belajar chara ngayanka terima kasih ke utai ti udah digaga Petara ke kitai.

Bup Kudus madahka, kitai ulih ngayanka diri beterima kasih ngagai Petara ari ‘ngasika pesan Iya.’ (1 John 2:3) Petara Jehovah ngajar kitai chara idup lantang kemayaharitu. (Isaiah 48:17, 18) Petara enggai kitai merinsa. Iya besemaya enti kitai nitihka pesan Iya, kitai ukai semina deka idup lantang diatu, tang mega bisi peluang idup belama iya.

MACHA BUP KUDUS NINTING HARI

Indu misi nya malik ke langit lebuh iya macha Bup Kudus maya jam belelak. — Nuan ulih diselamatka maya pengujung dunya enggau besampi ngagai Petara, sereta ngereja peneka Iya

Ninting hari kitai patut makai ngambika terus idup. Tang Jesus madah: ‘Mensia enda ulih idup makai roti aja, tang beridup ba genap leka jaku ti pansut ari mulut Petara.’—Matthew 4:4.

Kemayaharitu kitai ulih macha utai ke dipadah Jehovah dalam Bup Kudus. Ari mansik Bup Kudus, nuan deka belajarka utai ke udah, benung, enggau utai ke deka digaga Petara.

BESAMPI MINTA TULUNG NGAGAI PETARA

Nama utai ke patut digaga nuan enti nuan deka nitihka iring Petara, tang agi tusah deka ngetu ngereja utai ke salah ba mata Iya? Nuan patut ngelala Petara enggau manah agi.

Peratika peneleba seiku indu ke benama Sakura.b Pengidup iya enda menuku. Lebuh iya berengkah belajarka Bup Kudus, iya nemu pasal pesan Petara ti madah: “Seliahka ulah ti kamah.” (1 Korint 6:18) Nya alai, Sakura besampi ngagai Petara minta pengering ngambika iya ulih ngetu ari ngereja pengawa ti enda menuku nya. Tang iya agi belaban enggau penguji tu. Ku iya, “Enti runding ke enda menuku ayan dalam runding aku, aku deka besampi lalu madah ngagai Jehovah enggau terus terang, laban aku nemu aku enda ulih ngelaban penguji tu kediri. Sampi udah ngerapatka kaul aku enggau Jehovah.” Baka Sakura, bejuta iku orang benung belajar lalu ngelala Petara. Petara meri sida pengering kena ngubah pengidup sida, sereta idup enggau chara ti ngelantangka ati Iya.—Pilipi 4:13.

Enti nuan semak agi enggau Petara, Petara deka ngelala nuan baka seiku kaban ke sayauka nuan. (Galatia 4:9; Masmur 25:14) Enggau nya, nuan layak diselamatka sereta tama ngagai dunya baru Petara. Tang, baka ni gaya pengidup ba dunya baru? Artikel pengudah tu deka nerangka nya.

a Jehovah, nama Petara ke bisi ayan ba Bup Kudus senentang Jaku Penerang.

b Nama udah diubah.