Nuan Ulih Gaga Agi Ati lebuh Nginjil

1. Nama asai ati sekeda bala menyadi pasal bejaku enggau orang ba pengawa nginjil? (Peda mega gambar.)

SAKSI-SAKSI JEHOVAH nginjil ngagai orang bukai laban kitai rinduka Apai kitai ke ba serega, lalu kitai deka nulung orang bukai ngelala Iya. Mayuh ari kitai gaga ati lebuh nginjil. Tang bisi mega ke bukai ngasaika tu siti cabaran. Nama kebuah? Sekeda engka berasai malu lalu ngumbai diri ukai pengajar ti manah. Ke bukai engka berasai enda nyamai enti sida ngagai rumah orang ke enda dikelala. Bisi mega ke takut enti orang bukai ringat enggau sida. Lalu bisi mega diajar ngambika enda ngasuh orang bukai berasai enda nyamai ati. Taja pan bala menyadi tu amat rinduka Jehovah, tang sida ngasaika tu siti cabaran deka nginjil ngagai orang ke enda dikelala sida. Taja pia, sida agi nginjil enggau tetap laban sida nemu tu pengawa ti penting. Jehovah tentu amat gaga ati enggau sida!

2. Enti nuan tusah deka gaga ati lebuh ngereja pengawa nginjil, nama kebuah nuan enda patut berasai asa ati?

² Enti nuan kekadang ngasaika nya tusah deka gaga ati lebuh nginjil, anang meh berasai asa ati. Enti sema nuan berasai kurang yakin enggau diri empu, tu engka nunjukka nuan baruh ati lalu enggai ngasuh orang kelalu beratika nuan. Tu mega nunjukka nuan enggai bekelikuh enggau orang bukai. Lalu kitai tentu enggai ngasuh orang ringat kelebih agi enti kitai benung nguji deka nulung sida. Apai nuan ke ba serega nemu cabaran ke benung ditapi nuan, lalu Iya deka nulung nuan. (Isa. 41:13) Dalam artikel tu, kitai deka berandauka lima iti chara kena mutarka asai ati ke baka nya, lalu ngembuan pengaga ati ba pengawa nginjil.

AWAKKA JAKU PETARA NGERINGKA NUAN

3. Nama nulung Nabi Jeremiah nginjil ngagai orang bukai?

³ Indah ba jeman kelia, pesan ari Petara udah ngeringka bala nembiak Iya lebuh sida patut nembuka pengawa ti tusah. Peratika chunto Nabi Jeremiah. Lebuh Jehovah ngasuh iya ngereja pengawa nginjil, iya berasai kakang ati. Ku Jeremiah madahka: “Aku enda lanchar bejaku, laban aku agi nembiak.” (Jer. 1:6) Nama nulung Jeremiah yakin agi enggau diri empu? Iya bulih pengering ari utai ke dipadah Jehovah ngagai iya. Jeremiah madahka: “Pesan Nuan mau baka api dalam ati aku. Enggau naka ulih aku nguji nagang pesan nya pansut, tang enda ulih.” (Jer. 20:​8, 9) Taja pan Jeremiah patut nginjil ba endur ti tusah, tang pesan ke patut ditusui iya meri iya pengering ngambika ulih ngereja pengawa nginjil.

4. Nama nyadi lebuh kitai macha sereta belematika Jaku Petara? (Kolosi 1:​9, 10)

⁴ Orang Kristian bulih pengering ke diguna sida ari Jaku Petara. Lebuh Rasul Paul nulis ngagai raban gempuru ba Kolosi, iya madahka, enti sida belajarka penemu ti betul, nya deka nulung sida “idup baka orang ke nyembah Jehovah” seraya sida terus “mansutka asil ba tiap iti pengawa manah” ke digaga sida. (Bacha Kolosi 1:​9, 10.) Pengawa manah nya nyengkaum pengawa nginjil pasal Berita Manah. Nyadi, lebuh kitai macha sereta belematika Jaku Petara, nya negapka pengarap kitai ngagai Jehovah, lalu nulung kitai meretika kebuah nya penting nginjil pasal Perintah Petara.

5. Baka ni kitai tau bulih mayuh agi penguntung ari pengawa macha sereta belajarka Bup Kudus?

⁵ Ngambika bulih mayuh agi penguntung ari Jaku Petara, kitai enda patut berumban lebuh macha, belajar, sereta belemati. Enti nuan bisi macha siti ayat Bup Kudus ke tusah dimeretika nuan, kena meh awak belajarka ayat nya enggau dalam agi. Nuan ulih ngena Bup Dikena Saksi-Saksi Jehovah Ngiga Pansik tauka litaricha bukai kena ngiga penerang pasal ayat nya. Enti nuan ngena awak ti chukup lebuh belajar, nuan deka negapka agi pengandal nuan ngagai pengamat Jaku Petara. (1 Tes. 5:21) Majak agi nuan andalka Jaku Petara, nuan deka gaga agi ati lebuh bekunsika utai ti dipelajarka nuan enggau orang bukai.

BESEDIA ENGGAU MANAH KE PENGAWA NGINJIL

6. Nama kebuah kitai patut besedia enggau manah ke pengawa nginjil?

⁶ Enti nuan besedia enggau manah ke pengawa nginjil, nuan deka kurang agi berasai irau lebuh bejaku enggau orang bukai. Jesus nulung bala murid iya besedia sebedau iya nganjung sida ngereja pengawa nginjil. (Luk. 10:​1-11) Ketegal sida nitihka utai ti diajar Jesus, sida ulih ngereja mayuh agi utai ti manah lalu tu nulung sida berasai gaga ati.—Luk. 10:17.

7. Baka ni kitai ulih nyediaka diri ke pengawa nginjil? (Peda mega gambar.)

⁷ Baka ni kitai ulih nyediaka diri ke pengawa nginjil? Kitai ulih berundingka utai ke deka dipadah kitai, lalu ngenataika nya nitihka chara kitai biasa bejaku. Kitai mega ulih berundingka sekeda reaksi orang sereta utai ti deka dikereja kitai lebuh napi reaksi ke baka nya. Udah nya, lebuh bejaku enggau orang bukai, uji meh relax, tuchum, sereta bejaku enggau manah.

8. Nama kebuah orang Kristian disemaka baka periuk ke digaga ari tanah liat dalam sempama ke dipadah Rasul Paul? Terangka.

⁸ Rasul Paul madah ngagai bala menyadi Kristian iya: “[Kitai] semina baka periuk ke digaga ari tanah liat, tang reta nya disimpan ba dalam [kitai].” (2 Kor. 4:7) Nama reta nya? Reta nya pengawa nusui pesan pasal Perintah Petara ke ulih nyelamatka nyawa. (2 Kor. 4:1) Nama digambarka periuk ke digaga ari tanah liat? Periuk nya ngambarka bala nembiak Petara ke nginjil pasal Berita Manah ngagai orang bukai. Ba jeman Paul, orang ke bedagang deka ngena periuk, kebuk, tauka tajau ke digaga ari tanah liat kena nganjung utai ti berega baka pemakai, wain, enggau duit. Baka nya mega, Jehovah meri kitai siti pengawa ti amat berega, iya nya nusui Berita Manah. Enggau tulung ari Jehovah, kitai tau bulih pengering ke diguna ngambika ulih terus nginjil.

BESAMPI MINTA PEMERANI

9. Baka ni kitai ulih mutarka asai ati ti takut ke mensia? (Peda mega gambar.)

⁹ Bisi maya iya, kitai engka berasai takut ke mensia. Kitai engka takut disakal, tauka irau orang enggai mendingka kitai. Baka ni kitai ulih mutarka cabaran tu? Peratika sampi bala rasul lebuh sida enda diasuh nginjil. Ari ke berasai takut, sida minta Jehovah nulung sida “terus nusui jaku [Iya] enggau berani.” Jehovah tekala nya nyaut sampi sida. (SKR. 4:​18, 29, 31) Lebuh asai takut ke mensia nya datai, besampi meh minta tulung ari Jehovah. Pinta meh Jehovah negapka pengerindu nuan ngagai orang bukai ngambika nuan enda takut madah ngagai sida pasal Berita Manah.

10. Baka ni Jehovah nulung kitai meri saksi pasal Iya? (Isaiah 43:​10-12)

¹⁰ Jehovah udah milih kitai nyadi Saksi Iya, lalu Iya besemaya deka nulung kitai nyadi berani. (Bacha Isaiah 43:​10-12.) Peratika empat iti chara Iya ngereja nya. Kesatu, Jesus bisi enggau kitai tiap kali kitai nginjil pasal Berita Manah. (Mat. 28:​18-20) Kedua, Jehovah ngena bala melikat Iya nulung kitai. (Pem. 14:6) Ketiga, Jehovah udah meri kitai kuasa kudus Iya kena nulung kitai ngingatka utai ti udah dipelajarka kitai. (Jhn. 14:​25, 26) Keempat, Jehovah udah meri kitai bala menyadi Kristian. Enggau tulung ari Jehovah sereta sukung ari bala menyadi Kristian, kitai ulih nyadi berani sereta terus nginjil.

NYADI FLEKSIBEL, LALU NGEMBUAN RUNDING TI POSITIF

11. Baka ni nuan ulih tetemuka mayuh agi orang lebuh nginjil? (Peda mega gambar.)

¹¹ Kati nuan berasai asa ati laban tusah deka betemu enggau orang maya nginjil ari rumah ke rumah? Enti pia, tanya meh diri empu: ‘Ba jam ke baka tu, dini aku ulih tetemuka mayuh agi orang?’ (SKR. 16:13) ‘Kati sida ba endur kereja tauka benung shopping?’ Enti pia, kati nuan ulih nginjil enggau enda formal ngambika ulih betemu enggau mayuh agi orang? Siku menyadi lelaki ke benama Joshua madahka: “Aku ulih betemu enggau orang lebuh nginjil ba endur shopping tauka ba endur ke bisi mayuh orang.” Iya enggau bini iya, Bridget, ulih tetemuka mayuh agi orang ba rumah lebuh seduai iya nginjil maya lemai hari, pia mega maya ngalih hari Hari Minggu.—Eps. 5:​15, 16.

12. Baka ni kitai ulih nemu utai ti dipechaya tauka dikeirauka orang?

¹² Enti orang enda entu bisi minat enggau pesan Bup Kudus ke dibai kitai, uji meh nemu dulu utai ti dipechaya tauka dikeirauka sida. Joshua enggau Bridget ngena tanya ke bisi ba depan surat mit kena berandau enggau orang. Ambika chunto, ngena surat mit Nama Runding Nuan Pasal Bup Kudus? seduai iya madah: “Sekeda orang ngumbai Bup Kudus nya bup ari Petara, tang ke bukai enda entu pechayaka nya. Nama runding nuan?” Chara tu kesuah iya ngasuh orang deka agi berandau.

13. Taja pan orang enggai mendingka pesan ke dibai kitai, nama kebuah kitai agi ulih ngumbai diri mujur? (Jaku-Dalam 27:11)

¹³ Pemujur kitai ba pengawa nginjil enda bepanggai ba asil ke diulih kitai. Nama kebuah? Laban kitai udah ngereja utai ti dikedekaka Jehovah enggau Jesus, iya nya meri saksi. (SKR. 10:42) Taja pan kitai nadai betemu enggau orang tauka pesan kitai enda diterima orang, kitai agi ulih gaga ati laban kitai nemu kitai benung ngagaka ati Apai kitai ke ba serega.—Bacha Jaku-Dalam 27:11.

14. Nama kebuah kitai gaga ati lebuh bala menyadi ke bukai betemu enggau orang ke bisi minat lebuh nginjil?

¹⁴ Kitai mega gaga ati lebuh bala menyadi ke bukai betemu enggau orang ke bisi minat lebuh nginjil. Majalah Menara Jaga nyemaka pengawa nginjil kitai baka pengawa ngiga siku anak mit ti tesat. Mayuh orang nulung ngiga anak mit nya ba semua endur. Lebuh anak mit nya ditemu, semua orang gaga ati, ukai semina orang ke tetemuka anak mit nya aja. Baka nya mega, semua orang ba raban gempuru bisi ungkup ba pengawa ngaga orang nyadi murid Jesus. Semua kitai besaup nginjil ba kawasan nginjil kitai. Lalu enti bisi orang ke baru datai begempuru, semua kitai berasai gaga ati.

FOKUS BA PENGERINDU NUAN KE JEHOVAH ENGGAU KE ORANG BUKAI

15. Baka ni nitihka Matthew 22:​37-39 nulung kitai gaga agi ati ba pengawa nginjil? (Peda mega gambar.)

¹⁵ Kitai ulih gaga agi ati lebuh ngereja pengawa nginjil enti kitai befokus ba pengerindu kitai ke Jehovah enggau ke orang bukai. (Bacha Matthew 22:​37-39.) Gambarka pengaga ati Jehovah lebuh Iya meda kitai nginjil! Gambarka mega pengaga ati orang lebuh sida berengkah belajarka Bup Kudus! Kingatka meh, sida ke ningaka pesan kitai sereta ngaga pemutus deka nyembah Jehovah deka bulih pengidup meruan belama iya.—Jhn. 6:40; 1 Tim. 4:16.

16. Baka ni kitai ulih tetemuka pengaga ati ba pengawa nginjil taja pan kitai enda ulih ninggalka rumah? Beri sekeda chunto.

¹⁶ Kati nuan enda ulih ninggalka rumah ketegal sekeda kebuah? Enti pia, befokus meh ba utai ke ulih digaga nuan kena ngayanka pengerindu ke Jehovah sereta ke orang bukai. Maya pandemik COVID-19, Samuel enggau bini iya, Dania, enda ulih ninggalka rumah seduai iya. Ba maya ti tusah nya, seduai iya seruran nginjil ngena talipun, nulis surat, sereta ngajar pemelajar Bup Kudus nengah Zoom. Samuel nginjil ngagai orang ke ditemu iya ba klinik lebuh iya benung berubat ketegal penyakit kanser. Ku iya madah: “Lebuh kitai napi situasi ti tusah, kitai berasai balat irau sereta lelak. Pengarap kitai mega diuji. Nya alai, kitai patut ngiga pengaga ati ba sembah kitai ngagai Jehovah.” Ba maya nya mega, Dania labuh lalu enda ulih angkat pengelama tiga bulan. Udah nya, iya patut ngena kerusi roda pengelama enam bulan. Ku iya madah: “Aku ngereja utai ke ulih aku. Aku nginjil ngagai indu misi ke ngabas aku. Lalu aku mega nginjil ngagai sida ke nganjung barang ngagai rumah. Aku mega bisi randau ti manah enggau siku indu nengah talipun, ke gawa ba kompeni nyual perengka perubatan.” Taja pan Samuel enggau Dania enda ulih ngereja mayuh baka suba, tang seduai iya ngereja utai ke ulih seduai iya. Asil iya, seduai iya tetemuka pengaga ati.

17. Baka ni nuan tau bulih mayuh agi penguntung ari cadangan ke bisi ba artikel tu?

¹⁷ Uji meh nitihka semua cadangan ke bisi disebut dalam artikel tu. Tiap iti cadangan nya baka siti bahan ke dikena dalam resipi. Lebuh semua bahan dalam resipi nya dichampur, nuan deka bulih pemakai ti nyamai. Baka nya mega, lebuh kitai nitihka lima iti cadangan dalam artikel tu, kitai ulih mujur agi napi asai ati ti negatif sereta gaga agi ati lebuh nginjil.