Ime Nkwusa Na-edo Anyị Iche

¹ Ọtụtụ ndị na-ajụ, sị, “Gịnị mere ka Ndịàmà Jehova dị iche n’okpukpe ndị ọzọ?” Olee otú ị ga-esi zaa ya? Ị pụrụ ịkọwa ụfọdụ n’ime nkwenkwe anyị ndị dabeere na Bible. Ma ì chewokwa echiche banyere ịkọwapụta ókè ozi ihu ọha anyị na-edoru anyị iche n’okpukpe ndị ọzọ?—Mat. 24:14; 28:19, 20.

² Taa, ọ bụ mmadụ ole na ole ji okpukpe kpọrọ ihe na-enwe mkpali isoro ndị ọzọ kerịta ihe ndị ha kweere. Ha pụrụ iche na irube isi n’iwu Siza, ibi ndụ dị ọcha, ma ọ bụ imere ndị ọzọ ihe ọma ezuwo. Otú ọ dị, ha adịghị eche na ọ bụ ibu ọrụ ha inyere ndị ọzọ aka ịmụta ihe Bible na-ekwu banyere inweta nzọpụta. Olee otú anyị si dị iche?

³ Ozi anyị ji ịnụ ọkụ n’obi na-eje dị nnọọ iche n’ihe okpukpe ndị ọzọ na-eme. Ruo ihe karịrị 100 afọ, Ndịàmà nke oge a ejiriwo ịdị uchu kwusaa ozi ọma ahụ ruo nsọtụ nile nke ụwa, n’iṅomi ndị Kraịst oge mbụ. Nzube anyị ji na-eme otú ahụ bụ iji nyere ọtụtụ mmadụ aka dị ka o kwere mee ime ka ndụ ha kwekọọ n’uche Chineke.—1 Tim. 2:4; 2 Pita 3:9.

⁴ Olee Ụdị Aha I Nwere? À maara gị dị ka onye ji ịnụ ọkụ n’obi na-ekwusa Okwu Chineke? (Ọrụ 17:2, 3; 18:25) N’ihi ọrụ nkwusa gị, ndị agbata obi gị hà na-ahụ n’ụzọ pụtara ìhè ihe dị iche n’okpukpe ha na nke gị? À maara gị dị ka onye ọ na-anụ ọkụ n’obi isoro ndị ọzọ kerịta olileanya ya? Ì nwere ndokwa ikere òkè n’ozi mgbe dum? Cheta na anyị na-edo onwe anyị iche ọ bụghị nanị site n’aha anyị kamakwa site n’ime ihe aha ahụ na-akọwa—ịgba àmà banyere Jehova.—Aịsa. 43:10.

⁵ Ịhụnanya anyị maka Chineke na ndị agbata obi anyị na-akpali anyị ikere òkè n’ọrụ nkwusa. (Mat. 22:37-39) Ọ bụ ya mere anyị, dị ka Jisọs na ndị ozi ya, ji achọ iji ohere ọ bụla dapụtaranụ soro ndị ọzọ kerịta ozi Alaeze ahụ. Ka anyị nọgide na-eji ịnụ ọkụ n’obi na-ekwusara ndị chọrọ ịṅa ntị ozi ọma ahụ. Ime otú ahụ ga-enyere ndị nwere obi eziokwu aka ‘ịhụ ihe dị iche n’etiti onye na-efe Chineke na onye na-adịghị efe Ya.’—Mal. 3:18.