Ndị E Nyefere Ozi Ọma ahụ n’Aka
1 Lee ihe ùgwù anyị nwere ịbụ ndị e nyefere ozi ọma nke Chineke n’aka! (1 Tesa. 2:4) Ọ bụ ezie na ụfọdụ pụrụ ịjụ ozi a nwere mmetụta dị ike, a na-adọta ndị nwere obi eziokwu n’ebe ọ dị dị ka ihe na-esi ísì ụtọ. (2 Kọr. 2:14-16) Ọ pụtara nzọpụta nye ndị nabatara ozi ọma ahụ ma rube isi na ya. (Rom 1:16) Olee ihe anyị kwesịrị iji ihe a e nyefere anyị n’aka mee?
2 Jizọs na Ndịozi Ya: Jizọs butere nkwusa nke ozi ọma ahụ ụzọ. (Luk 4:18, 43) Ọbụna mgbe ike gwụrụ ya, mgbe agụụ na-agụkwa ya, ịhụnanya o nwere n’ebe ndị mmadụ nọ na ojiji o ji ozi ahụ kpọrọ ihe kpaliri ya ịkọrọ ya ndị ọzọ. (Mak 6:30-34) Site n’okwu na omume, o mesiri ịdị mkpa nke ọrụ nkwusa Alaeze ahụ ike n’uche ndị na-eso ụzọ ya.—Mat. 28:18-20; Mak 13:10.
3 N’iṅomi Jizọs, ndịozi ahụ ji ịnụ ọkụ n’obi kwusaa ozi Alaeze ahụ. Ọbụna mgbe a pịara ha ihe ma nye ha iwu ka ha kwụsị ime nkwusa, “ha nọgidere n’esepụghị aka na-ezi ihe ma na-akpọsa ozi ọma” ahụ. (Ọrụ 5:40-42) Pọl onyeozi rụsiri ọrụ a ike. (1 Kọr. 15:9, 10; Kọl. 1:29) O ji ihe ùgwù nke ikwusa ozi ọma ahụ tụnyere ụgwọ o ji ndị mmadụ ibe ya, ma dị njikere ịhapụ inwe ntụsara ahụ́ nke ya iji jezuo ozi ya.—Ọrụ 20:24; Rom 1:14-16.
4 Ihe Ùgwù Anyị Nwere Taa: Inwe ekele maka ọrụ a dị nsọ e nyere anyị ga-akpali anyị ịchọ ụzọ isi mụbaa òkè anyị na-ekere n’ọrụ nkwusa ahụ. (Rom 15:16) Edward, bụ́ onye na-anọ n’oche nkwagharị mgbe nile, na-anọdụ n’ọnụ ụzọ mbata nke otu ụlọ oriri na-agwa ndị na-abịa ebe ahụ okwu banyere okwukwe ya. Otú ọ dị, ebe o nwere ọchịchọ ịmụba ozi ya, o wunyere otu ihe pụrụ iche n’elu ụgbọala pikọp ya ma jiri ya sụọ ụzọ ruo ọtụtụ afọ, gaa ọtụtụ puku kilomita ka ọ na-eme nke ahụ. Dị ka Edward, ọtụtụ ndị taa edozigharịwo ọnọdụ ha iji kerekwuo òkè n’izisa ozi ọma ahụ.
5 N’iṅomi Jizọs na ndịozi ya, ka anyị onwe anyị taa na-ebute ọrụ ime nkwusa ahụ ụzọ ná ndụ anyị mgbe nile. Site n’ime otú ahụ, anyị na-egosipụta ịhụnanya anyị nwere n’ebe ndị mmadụ nọ nakwa ekele anyị nwere maka ozi ọma ahụ e nyefere anyị n’aka.