Ndị Enyi Chineke Ga-ebi Na Paradaịs

Paradaịs agaghị adị ka ụwa anyị bi n’ime ya ugbu a. Ọ dịghị mgbe Chineke chọrọ ka ụwa jupụta ná nsogbu na mwute, ihe mgbu na ahụhụ. N’ọdịnihu, Chineke ga-eme ka ụwa ghọọ paradaịs. Olee otú Paradaịs ga-adị? Ka anyị lee ihe Bible kwuru:

Ndị ezi mmadụ. Paradaịs ga-abụ ebe obibi nke ndị enyi Chineke. Ha ga na-emere ibe ha ihe ọma. Ha ga na-ebi ndụ dị ka ụzọ ezi omume nke Chineke si dị.—Ilu 2:21.

Ụbara ihe oriri. N’ime Paradaịs, agụụ agaghị adị. Bible na-ekwu, sị: “Ka ọtụtụ ọka [ma ọ bụ, ihe oriri] dị n’ala n’elu ugwu nile.”—Abụ Ọma 72:16.

Ụlọ ndị mara mma na ọrụ na-enye obi ụtọ. N’ụwa Paradaịs, ezinụlọ ọ bụla ga-enwe ebe obibi nke ya. Onye ọ bụla ga na-arụ ọrụ na-eweta ezi obi ụtọ.—Aịsaịa 65:21-23.

Udo n’ụwa nile. Ndị mmadụ agakwaghị na-alụ agha ma na-anwụ na ya. Okwu Chineke na-ekwu, sị: “[Chineke] na-eme ka agha nile kwụsị.”—Abụ Ọma 46:8, 9.

Ezi ahụ ike. Bible na-ekwe nkwa, sị: “Onye obibi [nke Paradaịs] agaghị asị, Ana m arịa ọrịa.” (Aịsaịa 33:24) Ọzọkwa, ọ dịghị onye ga-ada ngwụrọ ma ọ bụ kpuo ìsì ma ọ bụ bụrụ onye ntị chiri ma ọ bụ onye na-apụghị ikwu okwu.—Aịsaịa 35:5, 6.

Ọgwụgwụ nke ihe mgbu, mwute, na ọnwụ. Okwu Chineke na-ekwu, sị: “Ọnwụ agaghị adịkwa ọzọ; iru újú ma ọ bụ ịkwa ákwá ma ọ bụ ahụ ụfụ agaghị adịkwa ọzọ: ihe mbụ nile agabigawo.”—Mkpughe 21:4.

A ga-ekpochapụ ndị ọjọọ. Jehova na-ekwe nkwa, sị: “Ndị na-emebi iwu ka a ga-ebipụ n’ụwa, ọ bụkwa ndị na-aghọ aghụghọ ka a ga-efopụ na ya.”—Ilu 2:22.

Ndị mmadụ ga-ahụ ibe ha n’anya ma kwanyere ha ùgwù. A gakwaghị enwe ikpe na-ezighị ezi, mmegbu, anyaukwu, na ịkpọasị. Ndị mmadụ ga-adị n’otu ma bie ndụ kwekọrọ n’ụzọ ezi omume nke Chineke.—Aịsaịa 26:9.