Igbe Ajụjụ

◼ Nne na nna hà nwechara ike ịgụrụ awa ha ji eduzi ọmụmụ ihe ezinụlọ ha?

Ọ bụ eziokwu na ọ bụ ndị nna ka ọ dị n’ubu ịzụlite ụmụ ha “n’ọzụzụ na nduzi echiche nke si n’aka Jehova,” nne na nna na-agbakọ aka na-azụ ụmụ ha. (Efe. 6:4) Baịbụl gbara ụmụaka ume, sị: “Nwa m, ṅaa ntị n’ịdọ aka ná ntị nna gị, ahapụkwala iwu nne gị.” (Ilu 1:8) Otu ụzọ dị mkpa nne na nna na-esi azụ ụmụ ha bụ site n’iduziri ha ọmụmụ Baịbụl ezinụlọ.

N’oge gara aga, ọ bụ naanị nne ma ọ bụ nna nke na-eduziri nwa ya a na-emebeghị baptizim ọmụmụ ihe ezinụlọ ga-agụrụ oge, ma ọ bụrụgodị na nne na nna duzikọtara ọmụmụ ihe ahụ ọnụ. Ma, a gbanweela nke a. Ya bụrụ na mgbe a na-amụ ihe ahụ na nne na nna ahụ socha kụziere ụmụ ha ihe, ha abụọ nwere ike ịgụrụ ihe na-akarịghị otu awa kwa izu dị ka oge ha ji gaa ozi ọma. O doro anya na ndị nne na nna na-eji ihe karịrị otu awa akụziri ụmụ ha ihe n’izu. Ịzụ ụmụaka na-achọ ka ma nne ma nna rụsie ọrụ ike. (Diut. 6:6-9) Ma, ihe a na-ede dị ka oge e ji jee ozi n’ọnwa kwesịrị ịbụ karịsịa oge e ji jee ozi n’ubi. N’ihi ya, e kwesịghị ịgụrụ ihe karịrị otu awa, ma a sịgodị na ọmụmụ ihe ahụ gafere otu awa, na e duziri ya ihe karịrị otu ugboro n’izu, ma ọ bụ na a na-eduziri nwa nke ọ bụla ọmụmụ ihe nke ya iche. Ọ bụ naanị otu onye n’ime nne na nna ga-agụrụ ọmụmụ Baịbụl n’ọgwụgwụ ọnwa, gụrụkwa otu nletaghachi maka izu nke ọ bụla e duziri ọmụmụ ihe ahụ.