Kụziere Ndị Na-amaghị Agụ Ihe nke Ọma Ihe

1. Olee ihe nwere ike isiri anyị ike n’ozi ọma?

¹ Mgbe anyị na-ekwusa ozi ọma, anyị na-ahụ ndị na-amaghị agụ ihe nke ọma mgbe ụfọdụ, ọ na-esikwara anyị ike ịkụziri ha eziokwu Baịbụl. Gịnị ka anyị nwere ike ime?

2. Olee otú anyị nwere ike isi kwanyere ndị na-amaghị agụ ihe nke ọma ùgwù, gịnịkwa mere anyị ga-eji mee otú ahụ?

² Kwanyere Ha Ùgwù: Ọ bụ obi mmadụ ka Jehova na-ele, ọ bụghị òkè onye ahụ gụruru n’akwụkwọ. (1 Sam. 16:7; Ilu 21:2) N’ihi ya, anyị adịghị eleda ndị na-amaghị agụ ihe nke ọma anya. Ọ ga-aka adịrị ndị dị otú ahụ mfe ikwe ka anyị nyere ha aka ma ọ bụrụ na anyị ana-akwanyere ha ùgwù ma na-enwere ha ndidi. (1 Pita 3:15) Anyị nwere ike ime nke a ma ọ bụrụ na anyị anaghị esi ọnwụ ka onye ahụ gụọ amaokwu Baịbụl ma ọ bụ paragraf anyị na-amụrụ ya. Ka onye ahụ na-amụtakwu eziokwu ndị dị oké ọnụ ahịa dị na Baịbụl, o nwere ike gụwakwuo ya agụụ ịmụta ịgụ ihe nke ọma. Nke a ga-emekwa ka o nwee ọṅụ mmadụ na-enwe mgbe ọ na-agụ Okwu Chineke “n’olu dị ala ehihie na abalị.”—Ọma 1:2, 3.

3. Olee ụzọ ndị e nwere ike isi kụziere onye na-amaghị agụ ihe nke ọma ihe?

³ Ụzọ Ndị E Si Akụziri Mmadụ Baịbụl: Iji ihe osise akụzi ihe bụ ụzọ magburu onwe ya e si akụziri mmadụ ihe, ọ na-emekwa ka onye ahụ cheta ihe ndị a kụziiri ya. I nwere ike ịjụ onye ahụ ị na-amụrụ ihe ihe ọ chọpụtara n’ihe osise dị n’akwụkwọ unu na-amụ. Jụzie ya ajụjụ ndị ga-enyere ya aka ịghọta ihe ihe osise ahụ na-akụzi. Gụọ amaokwu Baịbụl ndị ga-enyere ya aka ịghọta ihe osise ahụ. E nwekwara ike iji ihe osise ndị ahụ tụleghachi ihe ndị unu mụrụ n’isiokwu ahụ. Amụrụla ya ọtụtụ ihe n’otu oge. Mee ka isiokwu na isi ihe ndị dị n’ihe unu na-amụ doo anya, ewebatakwala ihe ndị na-agbasaghị ihe unu na-amụ. Kama ịgụ amaokwu Baịbụl ị chọrọ ịgụ n’isi, si na Baịbụl gụọ ya, jụọkwa ya ajụjụ iji mata ma ọ̀ ghọtakwara ihe ị gụrụ. Nke a nwere ike ime ka ọ gụwakwuo ya agụụ ịmụta ịgụ ihe nke ọma, ka o nwee ike jiri aka ya na-achọtakwu eziokwu ndị ọzọ dị na Baịbụl.

4. Olee otú anyị nwere ike isi nyere onye anyị na-amụrụ ihe aka ka ọ mụtakwuo ịgụ ihe?

⁴ Ihe Ndị Na-enye Aka Ịmụtakwu Ịgụ Ihe: Ndị na-amaghị agụ ihe nke ọma ma ọ bụ ndị na-enwechaghị ohere ịmụta otú e si agụ ihe were were, nwere ike ịghọta ihe nke ọma ma ghara ichefu ya. I nwere ike ịgba ndị dị otú ahụ ume ka ha na-ele anya n’akwụkwọ nke ha ma na-ege ntị nke ọma mgbe ndị maara agụ ihe na-agụpụta ihe, ma ọ bụdị jiri olu dị ala na-agụghachi ihe ha na-agụ. Nke a ga-enyere ya aka ịmụtakwu ịgụ ihe. Ndị okenye nwekwara ike ịhazi ka ọgbakọ nwee klas a na-amụ ka e si agụ na ka e si ede. Aro ndị a bara uru nwere ike ime ka anyị nyere ndị na-amaghị agụ ihe nke ọma aka ịghọta “ihe odide ndị ahụ dị nsọ,” bụ́ nke nwere ike ime ka ha mara ihe iji nweta nzọpụta.—2 Tim. 3:15.